將軍澳有個飛機場

最近就迷上一個電腦遊戲. 已經無玩電腦遊戲好幾年. 點知一次"偶遇"就改變左我近日既生活習慣.
話說上星期出去旺角覆診, 當然到信和中心走一轉. 自從搬左入新界後, 由屋企到旺角係一條路途好遙遠既路程. 所以都少左去旺角.
行到去信和, 通常都會到地庫其中一間影碟舖睇下有無新貨. 不過當晚碟舖休息, 唯有四處蕩. 失失魂魂走左入間遊戲軟件舖四圍望下. 原本都無諗住幫襯, 點知就係呢個game引起我注意. 就係....
"夢幻飛機場". 結果睇左前後唔夠廿秒, 位妹妹好是旦"介紹"左半分鐘, 終於一分鐘內買左呢個game.

一開始玩先發現其實係好難玩. 呢個game其實都幾責任重大. 因為你會係一位航空管制員. 負責関西空港(個名好籮白)所有飛機升降, 所有會飛過機場上空左右隔離既飛機航道. 因為稍有差池就會撞機. 雖則只係個遊戲, 但當玩上手就變得好認真. 編排飛機升降, 安排唔同飛機飛唔同既航道或高度. 有時遇上繁忙時段幾班機又升又降, 又要搵位泊架飛機但又同時上空有三四架機左穿右插. 又怕佢地會撞機又要兼顧同佢地聯絡, 真係忙到癲. 所以我更佩服真實既航空管制員, 原來真係唔係講玩.