2008年1月31日

陳冠希: 玩得, 又點停得...

當一班fans仆心仆命以為玉女真係玉女, 靚仔真係靚仔. 連日既連環圖唔多唔少都令好多人醒覺原來娛圈都只係個大染缸. 就算有公司或藝人以為用番幾十年前乜都否認既舊橋, 就可以過骨. 人同社會都係"曾經"有進步, 科技同思想教育都令人用多角度去思考對與錯真與偽. 呢D舊橋對老一輩或者有效, 新一代只會覺得大話只會越講越出事, 越遮越想知真相. 亦造就沒完沒了既結局.

原來件事兩年前已經暴光, 只係大家對"媽咪姐"既野睇完就算, 諗唔到原來係真.

2008年1月30日

通脹下的早餐

通脹乜都貴, 呢面豬肉牛肉加, 果面就連麵食商會都話不如一齊加價. 邊個係真邊個抽水? 大家有眼見. 就連平日好少食既茶餐廳早餐都加左價!

以往$19一個有一餸公仔麵加火腿煎雙蛋連牛油方飽. 今個月開始, 脹價到$20, 依舊一餸公仔麵煎蛋牛油方飽仍然健在但火腿唔見左.
個餐加左一蚊仲要cut走塊完全無煎過既火腿, 實在加得好誇張.

2008年1月29日

E先生?G小姐?B小姐?仲有無呢?

由前日下晝已經令網上各膠男瘋狂既"鮑魚"相再加尋日既"熱狗"相, 令到飲食版都無人去, D人寧願繼續追尋仲有其他"大家食"既相.
但由今次事件, 我有兩個感想:
1) 下次去整電腦手機, 都係做好backup先, 淨機拎去整.
2) 下次響網上貼相尤其新聞組, 最緊要睇清楚先好貼. 一個唔覺意貼錯, 後果可大可小.

2008年1月26日

有仇不報非君子

今日睇見"紅牛"一輯新廣告真係"O"晒咀. 意識相當不良, 並唔係指佢周街露械, 而係指意識: 報仇!
雖然呢隻飲品既目標群組並唔係小朋友, 但呢個入晒屋既廣告確係散播唔係太正確觀念俾觀眾. 呢次連家長都未必識指引.
(以下廣告片或令人情緒不安, 敬請注意!)


反而有另一個較溫和版本, 大人細路啱睇.

試片室:Meet the Spartans

上回Epic Movies實在爛得太可怕, 非常趕客. 今回揸定宗旨(係宗旨, 唔係中指!)大玩戰狼300, 再玩時裝既歪咀Rambo同慘被炒魷既Spiderman. 實在好笑. 其中原來玩MJ已經out, 玩BS先最in...

我們的博益

我地呢一代真係讀博益既書/月刊長大! 當時四大出版社各有台柱. 明窗有衛斯理, 天地有亦舒李碧華, 友禾就有一班明星, 博益就有一班真正既作家: 黃霑林燕妮嚴沁仲有後起既畢華流. 我當年就有儲齊一套畢華流全集.
但自從博益俾SCMP收購後, 本地書市場回落. 友禾早就走人, 明窗天地亦都減產. 台灣既皇冠曾經都有叱吒一時近年都收晒水. 但博益仍然因為商譽歷史悠久, 都繼續有新作品推出.
今朝突然收到博益停止出版新書既消息, 我都唔太意外. SCMP入主後, 以前TVE既旗下機構或後來SCMP自家分支都一間間結業或賣走. 地利店健康工房華星唱片都走晒, 遺下博益, 只差會唔會拼入SCMP books. 結果消息都係話結業, 可惜但已經係意料中事. 只不過消息中有兩個重點: 1)結業後所有書籍會回收銷毀. 2) 博益會繼續運作及仍持有所有書本既版權.
後者我明白, 版權係一個資產寶庫. 你睇華星唱片停止製作之後仍持有所有舊唱片版權, 每有舊有旗下歌星想向華星買歌曲版權可以響演唱會上獻唱, 華星都係開出天文數字, 令到一班歌星"汗顏". 就連劉華想買番佢響華星時代既歌曲, 華星都一口拒絕, 堅持長揸唔賣斷. 所以我深信今次博益都會咁做, 無法! 呢個就係商業社會.
但有D唔明白前者... 燒書?? 書本印左出黎都係資產, 理得你書店賣五十蚊一本又好, 抑或書展賣十蚊一本又好, 都係要入數亦都係算做錢! 大拿拿出幾十萬搵人回收D書再用幾十萬拎去銷毀, 而唔將批書拎出市場十蚊一本賣晒去, 實在唔似郭氏家族所為. 華星當時都無回收唱片事件, 近年更重出經典作既復刻版. 我實在對呢個"燒書"傳聞抱唔太可能既心態.
無論如何, 博益既終結會係我地呢一代既集體回憶.

伸延閱讀:
諾韻寫字日記 - 博益停業
反正不是人(雲海) - 最不想發生的事情發生了﹕博益停業!
五師兄字 - 博益,安息吧!
死火手記 - 零八香港第一個謎團:博益有利潤下歲晚停業
加百列傳 - 結業後的良心
天航 - 博益結業,焚書滅版
無聊blog -香港文化界大悲劇:博益停業

2008年1月24日

2008年1月23日

硬膠床下底電視機

水墨畫過新年

今年四叔終於明白到農曆年始終係好傳統既野, 所以今年整個水墨畫展賀新歲, 總好過舊年既蒙古包.

2008年1月22日

大懶代

每晚十點半, B都要扭去Discovery Home and Health (明年改名叫OWN)睇一個名叫"Til Debt Do Us Apart"(負債夫妻翻身戰)既節目, 每集作為財務重整專家既主持人都會幫一對夫婦解決佢地既財務狀況. 通常呢D夫婦都係負債累累, 財經狀況亂過亂世佳人. 但經專家指導下, 都會有所改善或進步, 明白自己係可以改變呢個事實.
但今晚呢集算係咁多集以黎最失敗一個例子. 個案係一對廿零歲年青夫婦, 男既係航空技師, 月入六萬. 女既係教師散工, 收入有幾多佢自己都唔知, 因為佢根本唔想做野. 但佢地一共欠債加稅加政府貸款及父母三十萬. 奇就奇在佢地無買太多無謂野, 但每個月仍然要駛突一萬.

專家主持幫佢改善個財務狀況, 唔可以再用信用卡只可以用現金, 每週支出預算更減少一半. 更加針對嬌生慣養以為錢會響天跌落黎既老婆太懶, 所以主持叫佢去餐廳洗碗賺時薪八蚊去體驗生活.
一星期過後, 老公做足預算, 老婆亦捱左一晚(咁多)苦. 主持人以為佢地係有得改, 所以要求第二個星期老公幫手做家務等老婆有時間去返工搵錢. 亦希望能夠同佢地父母講出自己個債務如何. 一個星期後, 主持人發現老公出糧只還左一百蚊俾阿媽, 但成份糧唔知去左邊. 老婆確係有番工, 但只番左兩日咁多. 至於同父母傾, 兩個更加講大話話有. 但主持搵佢地父母間就反而有個相反答案.
結果原本如果佢地有改善, 佢地可以有五千蚊獎金. 但今次佢地實在係原地踏步, 所以只有一千蚊.
睇完個節目, 突然感覺香港都可能有好多呢一類家庭. 兩公婆欠債累累但仍然花天酒地. 尤其總有一方表現太倚賴甚至大懶, 明知自已有一技傍身仍然唔去投入工作, 寧願坐食山崩或等政府綜緩. 記得幾日前睇過一段新聞片, 有工人控訴自己做到死只能月入一萬, 但一D坐身山崩既綜援戶每月拎萬二蚊綜緩. 政府福利係俾一D有需要既家庭, 一D有手有腳又懶返工既, 我覺得無必要受到呢個福利. 長此落去只會養一左班不善生產既大食懶, 對社會係百害而無一利.
記得以前香港人既勤力奮鬥, 對領取綜緩甚抗拒. 應為自己一手一腳出力而賺到金錢先至係值得. 唔知道點解呢一代突然無左呢個基因, 變成"大懶代".

2008年1月20日

我的十大2007(電影部)

遲左成個月先貼出黎係因為又忙又懶. 不過今年豐收, 又有十三套出黎.



1) The Holiday 緣份精華遊 (Universal)
肥溫一段真係救左成套戲.

2) Music and Lyrics 冧歌有情人 (Warner Bros.)
每隔幾年總會拎80年代既重溫, 兼永遠都係好美好.

3) Stranger Than Fiction 離奇過小說 (SPE)
對人生既無奈, 編導演皆出色.


4) Mr. Bean's Holiday 戇豆放大假 (Universal)
終於對Mr Bean有所突破, 相當不俗既公路電影.


5) Die Hard 4.0 虎膽龍威 4.0 (Fox)
比第三集更緊湊更有人性.


6) Transformers 變形金剛 (Dreamworks)
夢想成真... 下一套會係龍珠嗎?


7) The Simpsons Movie 阿森一族大電影 (Fox)
好過癮! 近日睇埋廣東話版更加笑到肚攣.


8) 男兒本色 Invisible Target (Universe)
房組名真係演得太好!


9) Bubble Fiction: Boom or Bust 超時空泡泡女
正到哩.....香港無人買實在太可惜.


10) Hot Fuzz (Universal)
玩盡世界各套動作名片.


11) The Queen 英女皇 (Pathe'/Granada)
齋睇Helen Mirren已經值回票價.


12) Childen of Men 末代浩劫 (Universal)
呢套可以話係近代一部於技巧上好重要既作品之一, 大量超高難度既長鏡頭實在嘆為觀止.

13) The Man Of My Life
讀電影既同學必看.

2008年1月17日

好凍...

今晚份外覺得凍, 真係想呢一刻跳上床取個暖.
上: 貓: 好鬼凍呀. 中1: 貓: 阿狗你凍唔凍呀? 中2: 狗: 梗係凍啦! 貓: 咁你過黎一齊取暖啦. 下: 狗: 吾, 你好暖. (設計對白)

2008年1月15日

我很好, 劉若英

打從滾石到EMI都有聽劉若英既歌曲, 佢既歌曲永遠帶俾人一個好完整既思想畫面. 絕對就連其他歌手既都較難做到.

新碟"我很好"比再之前既"聽說"更有畫面, 而且更正面既演進. "我很好"既活得比你更好, 不敢愛既"落跑新娘", 愛人不是/曾經是我既"給你", 又或者跌過愛過仍無悔既"還是一樣".
始終有名牌效應, 陳小霞既"口香糖"仍然好得人心. "12月3日, 北京"既袁帷仁亦係必聽之一. 仲有同范瑋琪合唱既"不能跟情人說的話"好K亦好有味道.
正如唱片既標題: 我住在自己的身體裡. 我是我.
我就係鍾意呢種自我.

(75/100)

2008年1月14日

喪吞味精

唉, 之前幾年都試過老麥既shake shake薯條, 無疑係味精溝熱氣, 但係都無乜事. 唔似今次, 星期日食完, 足足個咀乾左成日. 灌冰水汽水綠茶通通無效, 唔知各位有無良方可以解決呢?

惡搞長江7號無難度!



http://www.tcirc.com.hk/index.php

2008年1月13日

乜咁唔小心呀

雖則人難免有錯失, 之但係作為一個有電視直播既頒獎禮, 再加現場觀眾. 竟然出現一個咁既錯, 真係抵打! 難得兩位假情人落得投入繼續"演出", 令到大家好落台.

2008年1月9日

我用七十蚊買垃圾

經過某討論區既版友多番引誘下, 都係忍唔住去左旺角.......

用左七十幾蚊做左一次唔係幾正確既交易.
就係買打口碟!
一直我都幾抗拒買打口碟, 一來明知呢D碟既來源, 二來要買都買左, 唔需要等打口碟. 不過今次因為片目實在唔錯. 主要係環球同霍士既日本版2區DVD, 日本版向來係包裝精美, 品質唔差見稱. 今回更加因為大部份發售既屬於1,2,3區共用拷貝既片目即係都擁用中文字幕. 以每張售價$28黎睇, 確係幾吸引. 所以我都執左兩隻: 踎底噴飯:最緊要好玩(孖碟特別版)同埋史匹堡首部電影"Duel". 前者我早有港版3區但前年錯過左台灣出既特別版, 極之遺憾, 而家只需$48就入手.
罪過罪過.

2008年1月7日

弊傢伙! 我有一隊巴士車隊

自從買左層樓, 自己既支出確係有少少收縮, 至少平日一個月千零二千蚊投放去DVD或CD身上, 上兩個星期減少左. 只係抵唔住頸買左無線套大事回顧全紀錄boxset較貴, 又無左五百大元.

回想再之前, 除左買碟花費最勁. 其實仲有一個嚐好真係比較駛錢. 就係巴土!
自少都鍾意巴士電車, 一來成日見到或乘搭. 二來敢話每個小朋友都會話大個要做巴士電車司機, 但通常大個後又會無左件事, 但仍然不減對巴土電車既熱誠.
出來做野後幾年, 巴士模型興起, 我都投入呢個收集潮. 起初每隔一段時間先發行一款巴士模型, 雖訂價二百幾, 但都負擔到. 但後尾熱潮開始, 每星期都有新巴士模型推出. 就真係應付不下, 結果只能夠選擇性去買. 當然預上限量貨或特別版, 我都會搵英國既朋友幫手買或甚至索性自己響英國的日子自己走去買.
記得當時J知道我對電車著迷, 有日甚至搵到佢響博物館工作既朋友,揸左兩部古董電車出黎俾我影相其中包括香港送俾利物浦果部舊電車. 見到部香港電車響Merseyside行走,確係好得意.
結果屋企無厘頭多左一隊巴士車隊, 而且全部都係未拆盒甚至連包裝袋都未拆. 不過因為出得太濫太密兼太貴. 所以三年前已經終止唔再買"新車". 現今呢批車一半仲放響阿媽果面另一半就放響我呢面. 我諗, 基於收藏既都係限量或巳絕版而且又未拆包裝或者十零廿年退休後都可以賣出去賺番少少生活費掛, 算做係一個小小投資.


P.S.後記: 終於連B都出聲叫我唔好再買咁多碟, 終於連佢都頂唔順. 但轉過頭我又同佢講搬左之後要買多個櫃先夠位擺. 反眼. 我知舊年仍然買得好狠, 但我估今年應該有改變勒. 始終人大左, 有個家, 要負下責任.


伸延閱讀:

弊傢伙,買大咗!-牢騷絮語

弊傢伙,買大咗!(Bought up) -一個好人?

弊傢伙,買大咗! - Lost in Procrastination

弊傢伙,買大咗! - 飯格

「-弊傢伙,買大左!」之去旅行要小心 -island blue

A Shopaholic's Confession -彩云之南

弊傢伙,買大咗!-Life as a 2 hit 6

沒看過的書...- Yan's space?

弊傢伙,買大咗!—我在書店中沉淪了-Gabriel

弊傢伙,買大咗!-紫熊

弊傢伙,買大咗!-no reason

買的疑惑/弊傢伙,買大咗!-Uncle Ray's Corner

[敗家] 弊傢伙,買大咗!-罐頭裡的蛋治

弊家伙,買大咗! -My Heart of Darkness

弊傢伙,買大咗!-龜仔的生活點滴

「弊傢伙,買大咗!」- 謝爾曼&艾布蘭

『弊傢伙,買大咗』! -咖啡之心

[聯播] 弊傢伙,買大咗!- Open Cloze

我冇買大咗!-五師兄字

幾樣 - mad dog

弊傢伙,買少咗﹗ - readandeat

弊傢伙...我都唔知買大咗 - 艾麗絲謝影話隨筆

弊傢伙,買大咗!— amo

2008年1月5日

愛的根源25週年

今日經濟日報報導, 譚詠麟為左紀念1984年推出既"愛的根源"大碟25週年紀念. 搵左陳輝揚重新製作全張"愛的根源"大碟, 準備於明年推出.

先唔講譚詠麟近年不停食老本, 不停重唱又重唱舊歌. 但佢於八十年代幾張大碟確係非常經典, 奇怪在佢唔揀銷量超過十二白金既"愛情陷阱"黎重錄而搵張銷量少十萬隻既"愛的根源"? 不過講真如果可以揀, 我會揀"霧之戀"跟住"愛的根源", 先至輪到"愛情陷阱".
"霧之戀"絕對對我有莫大意義, 第一: 呢張係我第一次接觸既CD. 第一次聽當年仲係新科技既CD, 音質雖然生硬, 但音樂編排就令我留下好大印象. 尤其當年仍然流行無論快歌慢歌採用大量絃樂, 唔多唔少都有幾分氣派. 第二: 歌曲整體係一流. 全部都係必定流行作品, 就算事隔25年, 仍然唔覺老土落後. 甚至多年後我都買番早期德國版既CD珍藏. (可惜隻CD借左俾人後無回頭, 迫住要再買隻skc版)"愛情陷阱"唱到無論響屋企響街甚至響沙灘一定有人播緊, 之但係歌曲就比較行貨, 或多或少因為整張碟有好大部份係由日本製作人負責. "愛的根源"就唔同, 雖然已有日本製作人有份製作, 但至少仍保留本地製作既特色. 而且全碟真係無一首歌唔係無人識, 十首歌各有捧場.
而家"愛的根源"25週年紀念版重新用DSD灌錄, 究竟譚校長同陳輝揚有無火花可以擦出, 我地真係拭目以待!

2008年1月2日

生活炒雜碎 (第六回)

過時過節梗係食食食, 大約六七年前帶過B去食一次大家樂之後, B簡直係"聞樂色變". 以後我都會響大家樂買外賣番黎, 番到屋企我都會即刻掉左膠袋同餐盒免得佢知. 結果聖誕日睇完睇都巳經成十點, 商場既茶餐廳超低能地只賣百二銀既聖誕餐, 其他食物一律欠奉.. 結果其他選擇係老麥或大家樂. 唔想聖誕都吔包, 都係揀大家樂. 餐牌上, B無樣睇得上眼, 是旦叫左個火雞餐. 火雞餐?? 三十八蚊火雞餐? 我就穩陣D叫個干炒牛河. 即叫即炒, 等左好耐. 一上檯, 原來係火雞扒餐有意粉有雜菜, 睇落都唔差. 但我個干炒牛河... 水汪汪比濕炒更水汪汪, 直頭似係瑞士汁炆牛河. 兼且甜到好似食緊糖咁, 真係好難受.
以為佢會更怕呢類中式快餐. 點知前幾日唔知點解佢話不如去食大快活. 嘩! 大快活算係史上最難食既快餐廳. 我即刻話不如去打邊爐啦. 但係呢幾日凍到抽筋, 要搵位真係有難度. 行過美心MX見到佢地都有火煱兼且有大把位. 結果我地決定一試, 原本佢都打定輸數, 但最後佢又覺得幾得意, 尤其有"真火"暖住佢, 確係加左唔少分. 第二晚已經話又要去食過!
##############################################
當然第二晚無真係又去美心打邊爐. 因為為左去黃埔睇傢俬兼可以去食佢既至愛"鼎泰豐". 佢巳經千叮萬囑要我打去訂位, 我亦訂左. 因為行傢俬舖真係幾花時間, 巳經打去"鼎泰豐"話我地要遲D到, 對方亦都話無問題. 行完之後就立即衝上"鼎泰豐", 點知去到門口... 咦? 變左第二間酒樓既? "鼎泰豐"呢? 再打個電話去問... 原來佢地巳經搬左去灣仔兼且改左名! 即係"鼎泰豐"撤離香港? 唉. 黃埔美食坊一樓入面永遠有幾個死舖位, 無論做乜野開乜野, 永遠最後都係死路一條聽執.
但無得好揀之下揀左其中一間無乜客既死舖, 呢一期佢地係賣海南雞飯兼售泰菜. 可惜海南雞又貴又麻麻, 叫左個菜同湯都係一樣難食得可怕, 就連油飯都可變成油加落飯就算, 十蚊兩啖都算經典. 兩餸一湯收我二百七, 真係多謝晒唔該. 早執早著. (食完番屋企仲要即刻"拉肚子"排左一夜一朝毒. 真係咪再搞我!)
##############################################
時間又番去聖誕日, 是日晏晝去左觀塘既傢俬倉行下. 行完去左apm食下午茶自助餐. 五十八蚊一位有湯有pasta有pizza又有各式熱盤仲有甜品蛋榚仲包杯"蒸"添! 真係幾抵. 不過既然價錢咁抵又撞正假期, 一定一家大細出動既時候. 我地坐正甜品附近就目睹一次恐佈襲擊. 話說侍應捧出一盤芒果布甸, 有一兩位太太已經立刻上前筆左少少, 當時個布甸都仲係一個圓型只係少左細細兩忽. 跟住兩個小女孩就圍住個布甸, 我仲諗住等佢地筆完先起身去筆. 點知睇住當兩個女孩行開左後, 成個布甸唔見左. 只淨底一片片好似豆腐花形狀既布甸打平瞓響碟面, 最重要我發現果兩個女孩根本無拎碟去筆, 兩手空空就番埋位. 可憐既布甸突然俾人肢解後但無送上碟就咁被棄屍檯面, 有幾個客有去望望, 都只係望望就空手回頭.
我覺得家教真係好重要, 無論係屋內屋外都要好好管教同社交禮儀都要有一定既認知. 並唔係由得佢地自由發揮跟住拋一句: 細路仔係咁勒啦, 你未做過細路仔咩? Sorry, 我好有家教架. 大人唔教, 細路咪有壞學壞囉.
以下係我兩三年前一次經歷: 有次響銅鑼灣某名食店食自助餐, 親眼目睹一位小朋友去筆雪榚但唔小心跌左個雪榚球落地. 佢似係好情急之下, 用個雪榚匙羹響地面筆起個雪榚球跟住放番落雪榚櫃. 跟住有個男人似係識呢位小朋友同佢講左兩句後, 跟住個男人就去筆左雪糕番埋位.
直到我埋單後, 回頭一望先至知個男人係位小朋友既老豆. 唔知杯雪榚好唔好味呢?

2008年1月1日

十六不搭喜趣來:你想點呀?

我曾經話過如果亞視真係拎左"囍趣台"條橋去拍, 應該會好好玩. 點知亞視真係宣報拍一套諷刺娛樂圈既處境劇. 由盧海鵬扮陳志雲巳經係一個賣點, 尋晚更宣稱係首個亞視高清製作既劇集, 更加係有睇頭. 亞視向來拍"影射劇"都有一手, 真係好想睇下今次會係拍成點.

可惜睇左頭15分鐘就註定個劇死硬. 三個主角扮曾志偉陳百祥譚詠麟, 由頭到尾都一D都唔似. 跟住"九嬸"更加完全脫離現實. 打後既"莊文華"諗到我頭都大埋究竟係指邊個, 直至佢地講莊生間" 家和.....萬事興電影公司"先至知原來玩鄒文懷.
打後45分鐘枝離破碎令人唔識笑既笑料再加上無劇情之下, 柴娃娃就一集. 一出credit時我真係"噢"咀. 證明亞視人識賣橋由唔識presentation. 一個超級好橋都可以落得咁既地步.
最慘盧海鵬, 短短30分鐘內要扮董建華曾蔭權陳太葉太陳志雲五大個角色. 更加頭五個角色要同一時間及場面出現. 確實係挑戰亦都係全劇唯一可取之處. 可惜劇本對白就非常求其, 根本俾唔到佢發揮個人物.
其實, 呢類劇確係難拍. 以前"娛樂插班生"都唔係主線玩劇情. 今次又要玩人物又要玩劇情, 響sitcom度真係較難發揮. 反而如果係一個gag show, 就可以較易做到. 因為暫時所睇既第一集, 全部笑料都係好短同一截截, 確係似gag show多過似係一套sitcom.
我估成晚最令我一笑係果段"智能飯局"陳志雲訪問白雪仙既時候, 白雪仙迴避問題, 頭頂打出一句野話陳先生一定係男性荷而蒙失調. 跟住陳生雙手拍面懶cute咁重覆問題.
雖則亞視將條橋拍到咁爛, 但聊勝於無. 因為無線呢一刻一定"唔會"拍.