2007年3月31日

我的HKIFF 07 (Day 3)

當你發覺你既人生原來早有人幫你安排, 完全唔可以有自己話事. 你話幾悲哀.

原來自己既人生係人地本小說既情節, 最慘仲要落係有自毁傾向既小說作家手上. 會唔會係更加悲哀.

未睇Stranger than Fiction前, 真係以為係套喜戲. Will Ferrell 近年開始揀戲拍, 再唔可以出現例如ELF呢類鬧劇. 點知原來呢套係套非常非常黑色既悲劇. Will Ferrell一個普通人, 一直唔知自己只係小說筆下既人物, 每日只活係小說家旁白下. 直到有日旁白透露佢會死. 先發現原來自己既命運一直操縱響他人手下. 甚至希望嘗試阻止. 結果最終都係忠於小說結局賠上生命.

套戲初頭由喜劇作引子, 交代主角同旁白. 尾段變得好沉重. 對自己命運既無奈確係寫得好好. 導演之前拍Finding Neverland已見有創意. 呢套更利用CG製造好多有趣效果. 其中有段巴士上既對話戲, 利用巴士拖卡轉彎時變更既角度, 變得影機有動作一樣, 令畫面有動態, 非常聰明.

無人生大哲理, 只有生命小意義. Stranger than Fiction會係令你對自己命運有所反思.

Stranger Than Fiction 離奇過小說

2007年3月30日

我的HKIFF 07 (Day 2)

之前已有部有關RFK既電視電影, 不過主要講佢被刺殺前既事蹟. 唔同呢同, RFK變左伴碟. 主菜變成一班毫不相干既人走埋一齊既故事.

1968年. 或者RFK真係在生兼當選, 美國可能會變成另一個面貌. 1968年, 對於美國人剛剛係動盪既一年. 人民都想RFK能夠為大家帶黎希望. 片中一班唔同階層種族既人, 就響當日各自發生對佢地改變既事. 成套片材料豐富有齊種族社會家庭倫理. 就算片中演員眾多但都唔覺太散.
正當大家聚首一堂為未來而有個新開始. 槍聲打碎大家既夢想, 亦改變左呢個世界.

呢套係Emilio Estevez 絕對有野心之作, 流暢而唔沉悶. 片中各位大明星更加好戲連場. 尤其Demi Moore 加Sharon Stone 一場對手戲更加係好到不得之了. 好遺憾呢套得唔到金球獎最佳電影, 因為呢套真係一套好戲.

Bobby RFK遇刺的那天

2007年3月29日

長篇荒謬啓示錄: 唱衰香港(第三集) - 自斷米路

話說某外資集團承租左某個地舖好幾年, 一直都交緊比市價高既租金. 但一直因為地點唔錯所以無諗過搬. 點知舊年業主見經濟起飛, 所以決定瘋狂加租一倍. 租客見已經係俾緊貴租, 如果再加一倍根本無可能經營落去. 所以决定租約滿之後立即搬走.
業主相信係好有信心會再有租客願意俾市價高兩倍既租金租呢個近四十年樓齡過萬呎既舖位. 可惜一日復一日. 一年後既今日, 呢個舖位一直被丟空. 業主損失七位數字既租金.
當經濟低潮, 商人及夾心家庭不停要求政府求助. 生意失敗炒樓蝕錢甚至碌爆咭都賴上政府, 就好似政府欠左佢地咁. 但當經濟好轉時, 有風駛盡. 去到盡! 完全忘記之前都係咁而爆煲.
相信香港好快又要死多次.

2007年3月28日

長篇荒謬啓示錄: 唱衰香港(第二集) - 無啖好食

又有領匯既屋村商場內中式酒樓因為唔被續約而結業.
究竟公共屋村多左富戶定抑或想更多中下階層無啖好食呢?
領匯幫旗下商場重新裝修, 確係好事. 至少光猛D, 買野都開心D. 但係一裝修, 付出既就係一班租戶. 以厚德村為例, 之前係個好典型屋村商場. 入面有好多小本經營既商戶, 作為一個公共屋邨商場, 呢類價廉既小商戶足以同對面大型屋苑商場抗衡. 可惜領匯接手後將北翼商場改建, 大部小商戶被換走, 換埋一大堆連鎖舖頭. 而家南翼開始改建, 大部份小商戶都要被迫結業. 而家成個商場只得番大約十間小商戶繼續. 不過難保當改建工程開展到果條天橋, 呢十間小商戶都會被叮走. 到時成個商場就得番連鎖商店.
我明白呢個係商業决定, business is business. 大公司有租金保證, 但係好似忘記左厚德邨係公共屋邨. 住既都係中下階層. 佢地未必需要有好華麗兼好貴既酒樓, 亦未必需要有一間Starbucks去hea. 佢地都寧願要一D價亷物美既小商戶. 就算要買貴既野, 對面東港城都係好選擇. 但係而家呢個屋邨商場入面既舖同其他私人商場都係差唔多. 睇下成個將軍澳入面三個最大型私人商場入面, 佔左百分之八十既商號係一樣. 即係話同一區已經有三間豐澤三間KFC同四間屈臣氏. 如果連屋邨既商場都係只copy私人商場既店舖, 令選擇性降底. 一來外來客因為自己屋苑商場已有呢D商戶未必需要去公屋商場, 再者屋邨住客都未必負擔到果D高昂消費. 再扼殺小商戶既創業.
政府一邊叫人創業增值, 一邊又扼殺小商戶. 又費解又矛盾.

2007年3月27日

四叔又發功

繼上鋪蒙古包過新年. 今次復活節, 四叔又有新招. 蛋都無隻用PS 3過復活節, 打機打到精(力)盡人亡!!! 真係另類到無朋友.


新都城中心辦全港首個慈善馬拉松 48 小時爆機大賽 由3 月31 日至4 月9 日,一個集遊戲和視聽享受、適合大人小朋友的PLAYSTATION 3 超越玩樂全接觸暨「高達無雙」登陸大比試》登陸將軍澳新都城中心2 期及3 期商場。全場設有PLAYSTATION 3、PSPTM試打及視聽欣賞,3 大主題區域,包括針對打機發燒友的"PLAYSTATION 3 試玩區- 高達無雙激戰場",專為尊貴貴賓而設的"PS3TM Blu-ray 尊貴視聽室",以及令小朋友樂而忘返的Smart kids 遊樂園",配合Sony 最新高清電視播放,打造一個極盡高質素之打機及超感官享受環境。 另外,全港首次PLAYSTATION 3 打機馬拉松比賽將在4 月5 日至7 日於新都城中心2 期正式舉行,接力挑戰最新PLAYSTATION 3遊戲《高達無雙》共48 小時,為「願望成真基金」籌款。此外,一班美麗兼可愛的美少女將會化身成「復活兔遊戲大使」,齊集於新都城中心與你打機過復活節。

相信一班電車男一定湧入黎....我都係咪落樓. 呵呵!

長篇荒謬啓示錄: 唱衰香港(第一集) - 俺悶

嘩嘩嘩! 連續成個星期蔡生都成為周刊封面同C1頭條. 乜仲有值得講既野咩? 明知係個公開既秘密, 點解仲要寫到好似四歲細路仔咁要人估? 好心啦, 香港真係好俺悶.

伸延閱讀: 三闖 Volar 被拒蔡一傑醉界老翻Lincoln

2007年3月26日

我要做好呢場戲!

B之前接左部戲, 飾演奸人!

其實佢只不過幫某機構拍一段員工培訓片段供內部培訓用. 佢呢就飾演橫蠻無理既外籍顧客. 成段戲佢只係負責好惡咁鬧個職員. 對白好簡單, 總之似成個八婆咁鬧個不停. 響周星馳既戲入面, 有D咁既情節, 周星馳一定用番中文鬧番位外籍演員甚至打佢黎製造喜劇效果. 不過呢套只係用黎培訓員工既教材. 唔駛笑料卦.

今日同B對稿, 對完之後我覺得佢都係唔夠惡. 兼且學左王喜咁不停改對白, 搞到我都唔識跟落去. 佢問我點, 我話都係唔夠惡. 不如做番自己啦.
佢厲左我一眼.
哈.

2007年3月25日

我的HKIFF 07 (Day 1)

經過無飛到有飛到無飛, 由心煩到鬧幾日到鬧到口臭. 電影節終於開始!

Charles放棄事業, 家庭搬到貧民區隱居. 甘心做個平凡人只為左寫作. 聽落去有D傻, 但至少能夠實現自己理想係件好事. 情形就似流氓醫生. 結果為周圍既人做事, 卻換黎唔同既待遇. 可惜始終好人早死, 身邊就只有人和事有待解決.

首次自編自導自演, 有板有眼. 睇完部戲令我諗起多年前鉅作: 一生何求. 老人同小朋友一段同呢套男角同女孩子一段相映成趣.

Le pressentiment 我自求我道

2007年3月24日

大家樂文化

話說尋晚到公司附近一間"利華超級三文治店"買兩份三文治, 見餐牌只有套餐. 就響我猶豫不決之際, 有位阿姐走出黎話: 散賣都有架, 當然Combo抵D啦. 跟住呢位阿姐不斷重復話: Combo抵D啦, 個Combo有野欽, 好抵! 佢不停強調: 好抵好抵! 講真, 我真係唔想要杯咖啡拎住周圍走. 我亦強調唔想要杯咖啡. 但佢仍然強調:Combo 好抵! 心諗: 幾時利華變成咁? 利華一直堅持質素保證, 一份三文治三四十蚊都有保證. 從無話抵唔抵. 呀! 記得係由被大家樂集團收購後, 由盛至衰...

身為香港人都知"大家樂"有幾好食. 平價中式快餐香港就只有"大家樂", "美心", "大快活". 美心就算做快餐或高級餐廳都做得唔錯. "大快活"係一個超難食超汚糟既icon, 不值一提. 只有"大家樂"一直以平取勝. 結果多年以黎, "大家樂"開始併購一D高級食府. 例如早年收購左"意粉屋", 即時發現"意粉屋"質素直線下降. 跟住"利華超級三文治店", 未被收購前, 每星期我都會去一次"利華超級三文治店"食早餐. 被收購後, 早餐組合變左樣, 大家樂化! 只差未有糯米雞同菠蘿油. 跟住我都無再去"利華超級三文治店"食早餐. 近日知"大家樂"入股稻香酒樓. 心諗: 又會係一個品牌既終結. 屋苑商場入面有間稻香酒樓, 一直以又經濟又靚做賣點. 試過搭枱, 有兩位聲稱領取綜援既女仕, 一邊大談綜援生活, 一邊叫左半枱點心, 誇張得可怕. 令到同檯, 我呢D叫得幾碟點心既中下階層有D心寒. 原來我地D稅有部份係去左稻香. 講番正題, 要係大家樂再入主呢家酒樓, 或者酒樓既阿姐都可能同我地話: 呢個combo好抵架!

2007年3月22日

舊相機



圖中大家睇到架相機都用左四年, 近呢一年發現影出黎既開始有問題. 好似係時候升級換一部新.
呢部機同之前幾部相機曾經陪我去過好多個國家, 拍過好多相. 每一張相都係個回憶. 由以前菲林相機, 到後來短命既APS相機, 跟住SONY第一部30萬像數碼相機. 都陪我度過唔同既歲月.
今日響電腦上睇番以前既相, 原來我都走過咁遠, 咁多路...

2007年3月20日

加人工

今日承蒙老細召見, 終獲通知會加人工. 作為新入職都有得加, 都算係咁.

當然我係有D激動, 因為今次係過去三年以黎首次被加人工. 雖然話係經濟好左, 但之前份工要加人工真係難過登天. 部門主管同你溝通唔到甚至唔鍾意你. 無論你幾做得野, 咪話加人工升職, 有無得發揮都成問題.

幾辛苦終於擺脫左個困局, 黎到新崗位, 我都好珍惜呢份工. 同特首一樣: 我會做好呢份工!

2007年3月19日

大鄉里出城: 荷里活道買拖鞋

有人講過, 周一至六中環係屬於香港, 星期日中環係屬於菲律賓.

為左搵幅畫, 唯有冒住唔帶passport就出國既險, 出征中環!
翠華原來有美極推廣, 有美極咸牛肉三文治, 有美極生炒牛肉飯...我除左能發生"yuk"一聲之外真係無野好講.

原來荷里活道雖然係旅遊景點之一. 但原來星期日, 絕大部份既舖頭都係休息, 絕對失望. 仲話振興旅遊業, 休晒息點振興呢?
始終嚤囉街先至係正道, 新野舊野真野假野乜都有齊. 但就缺左我地要搵既野.
反而行過一間雜貨舖, B話反正屋企我對拖鞋爛左, 不如買番對. 結果買左對拖鞋. 畫就無, 拖鞋就有對.
中途遇上靚鬼仔一名問路大喊蕩失路唔識番酒店, 自稱俾其他人點過荷里活道來回幾次都搵唔到間酒店. 先生, 你間酒店響蘭桂坊喎, 點會響荷李活道呢? 唯有指點迷津. 結果係對牛彈琴死都唔信直行荷里活道到藝粹會左轉就係蘭桂坊. 結果繼續佢既蕩失路之旅向山上行. 希望佢今晚返到酒店.
回程經過H&M, 舖頭外過百人排隊. 成條皇后大道中突然湧現好多香港人面孔. 人人為左幾百蚊貨式既名牌輪米咁等入舖. 反而Esprit馬莎就水靜河飛.
B問: 點解要排隊? 我答: Well, you know, this is Hong Kong!
香港確係乜都排一餐.

2007年3月18日

我的HKIFF: 食左屎的電影節 (無飛的日子 3)

謹向使用網上購票的朋友致歉!

今年香港國際電影節首次使用自行開發的網上售票系統,因系統在初期運作階段出現未能預見的問題,導致操作故障及混亂情況,為觀眾帶來不便,本會深感歉咎!
較早時,由於部份有關網上購票確認交易的電郵在發送過程中被防火牆阻隔,令有關的網上購票客戶未能收到確認電郵。經本會發出緊急呼籲後,受影響客戶已陸續聯絡我們並得到確認。同時,購票系統亦由2007年3月9日起將電郵確認改為網上即時確認交易,上述情況亦從此絕跡。
另有部份客戶因按「重試」鍵引致重複付款的情況,本會已主動註銷重複的交易及退還款項,請有關的朋友放心。若有疑問,歡迎致電 21027388 或電郵 ticketing@hkiff.org.hk 與本會聯絡。 至於郵寄戲票方面,我們會盡力保證所有戲票將於放映日期前準時送到客戶已登記的地址。
今年本會採用一套全新網上售票系統,最主要目的是要為觀眾提供一站式服務,並配合電影節的長遠發展。我們非常抱歉這些新措施的不足為大家帶來了不便。我們定會深入檢討並徹底改善。
我們謹此感謝大家的諒解和支持,並希望每一位觀眾都能全情投入今年香港國際電影節的精彩節目!


戚家基
香港國際電影節協會總監
2007年3月16日

以上係有關當局唯一兼遲到既道歉啓事.
乜野叫做"我們會盡力保證所有戲票將於放映日期前準時送到客戶已登記的地址"? 即係一有人唔盡力, 就會有人入唔到場! 請唔好再賴個系统, 跟本就係有人無盡力去做, 低估左個嚴重性. 有工作人員透露膽敢三月十五日當局先收到飛準備寄出. 足足比原訂遲左成個星期.
各位, 請即日立刻衝擊電影節office追討你仲未收到既飛!

香港國際電影節協會有限公司
香港中環德輔道中31-37號中國聯合銀行大廈7樓電話:
(852) 2970 3300


我地呢一刻唔係要道歉, 我地係要飛! 唔該, 盡快寄出你地手頭上既飛. 跟住先追究責任!

(19/3 晚上最新消息) 今晚收到大部分飛! 仲差兩場未收到. 唉!

2007年3月17日

我的HKIFF: 電影節繼續食屎啦! 好頹! (無飛的日子 2)

好呀! 就放長雙眼睇下你地幾時先捨得寄飛俾我.

如果send email俾佢地時順便cc埋兩大報章, 等佢地兩報知事情嚴重亦令hkiff知件事已經搞大左. 相信飛一定寄唔切, 因為有人話已被通知上去hkiff office攞飛. 睇怕星期一早上, 響佢地office門口大把人兇神惡剎一幅追債樣去追飛.

生果報: adnews@appledaily.com
方向報: news@oriental.com.hk

世界只有一個啟德機場

我仲好懷念啟德機場!
記得以前每次去九龍城我都好驚頭頂突然有架飛機飛過, 震耳欲聾既聲成日都令我懷疑大家究竟點可以響呢個環境住呢? 就算以前屋企都可以睇到飛機升降, 但噪音都無咁響.
後黎長大, 有機會搭飛機. 可惜第一次搭飛機並唔係由啟德機場出發. 直至第二次番大陸九天遊先至第一次可以由啟德機場出發. 但當時新機場已經開始起.
其實之前都去過啟德機場無數次包括送機同接機. 不過都只係好表面咁響禁區外. 仲記得三樓既餐廳同四樓觀景臺! 直至第一次入到禁區內, 先發現禁區係好細. 候機大堂亦都好窄. 好難想像一個咁細既機場可以用到九十年代後期.
跟住最後一次出入啟德機場係1996年到加拿大. 仲記得係早機, 好早就搭機場巴士到機場check-in. 入禁區後我盡量響禁區內四圍行, 因為我知道當搬到新機場後, 呢個咁有特色既市內機場就會消失.
我記得...
百好酒樓
有地庫既麥當勞
天橋底既世運公園
當機場搬走, 百好酒樓執左, 世運公園少左人經過. 大家再唔去或去少左九龍城.
九龍城雖然靜晒, 但亦都無晒生氣.

以下呢段片係五/六十年代既啟德機場內貌. 除左可以懷念下啟德機場之外, 仲可以留意到九龍一帶仲係好少大廈.

2007年3月16日

我的HKIFF: 食屎啦! 電影節.(無飛的日子 1)

相信今年係咁多屆以黎最混亂既一屆電影節. 記得前兩年開始經Cityline網上訂票, 因為系统負荷唔到結果系统曾經冧左幾日. 但都好彩至少最後人人都訂到飛收到飛.
點知今年改由HKTicketing 負責就更加亂. 有訂左雙重飛, 有扣多左錢, 有訂岩左但出錯飛. 最杰就係因為系统故障好多人連確認電郵都收唔到. 有關方面賴其實電郵係有寄出, 只不過大家既Spam filter隔開左. 對唔住喎, 我每日都有check個spam folder, 都係從未收過果封電郵.
結果追左兩次, 隔左兩日先收到. 果時已經係訂票後七日. 跟住我地就只有等待收飛. 當一日一日咁過去, 郵購既收齊飛, 門市亦都已經開買甚至已經買晒. 我地一班網上訂票只有繼續等.
因為有關方面講過, 網上訂既飛會響三月八日後寄出. 結果, 今日三月十六日, 身邊仲有好多朋友, 網上有其他網友都仲未收到飛. 問題係: 電影節係下星期二開始. 有朋友暫時只收到星期二既飛, 其餘日子既場次就仲未收到飛. 甚至有人星期二係第一場都仲未收到飛.
我曾經打電話/電郵同主辦公司聯絡. 結果, 留言信箱滿左兩日都留唔到言. 電郵隔左三日後先有回覆(如下):

Pls expect tickets by post take 6-7 working days from Mar 8, Pls DO contactby email or by hotline if no tickets arrived 3 days prior to screening date
HKIFF

咁即係今日係限期啦?
真係唔明白, 一邊吹噓今年賣飛破紀錄, 點解唔增加人手去處理訂票呢? 唔通真係得一個人去處理果幾萬飛咩?
講真今年佢地既安排同處理手法非常之差劣. 睇左十幾年電影節, 今年俾我感覺好差好失望. 戲多左日子長左唔係大晒, 連普通賣一張飛都搞到天怒人怨. 下年仲會有人参與咩?
所以我希望大家, 如果到今日仲未收到戲飛, 除左可以打 2102 7388 鬧爆佢之外, 佢地仲有個電話係 29703300 可以打去查詢.
如果你巳經因為呢件事嬲到眼火爆, 除左消委會外, 仲可以致電各大報章報料投訴.
蘋果日報報料熱線: 2929 0000
東方日報爆料熱線: 3600 3600
星島日報報料熱線: 2798 2319

2007年3月15日

蠢蛋進化論 Idiocracy

從來都唔鍾意Mike Judge既作品, 上回Office Space反智得可怕. 再之前黐孖B簡直係低能之首選. 今回話會拍套科幻片, 就俾次機會你.

可惜... 都係麻麻.

話說美國軍部要試驗"人類冬眠計劃", 就搵左兩位好平庸既人去做試驗. 但係試驗中出左問題, 兩人被遺忘左響垃圾堆中. 與此同時, 人類越黎越蠢越黎越笨. 所有好既基因都消失晒, 所有人只留下最劣既基因. 500年過後, 被冬眠既兩位平庸人醒番. 先發現佢地成為全世界最聰明既人. 總统仲要佢地去拯救地球.

當然主題鮮明-- 明串而家既人類愚蠢到就快害死地球. 可惜有咁好既題材, 導演都可以拍到有好多"喊露位". 好多笑位又唔識去掌握白白浪費左. 濫拍王Luke Wilson今次又再行貨. 上次The Family Stone有咁正既劇本, 佢都可以求求其其就算. 究竟佢識唔識演戲既呢?

不過, 就算套戲唔係真係咁好睇. 但至少有個意識俾大家, 就係反思大家既行徑對地球會有乜野後果.

2007年3月14日

家有囍事

前兩日阿仔唔舒服扭計, 我叫佢不如拎隻"家有囍事"黎睇, 包保"藥到病除".
真係架! 笑真係能醫百病. 就算無醫學根據, 但至少笑90分鐘就可以忘記90分鐘既痛楚.

"家有囍事"確係港片既經典. 完全顛複左常理, 將一D平時係荒謬既事變得合理化. 但又生活化得就好似你同我.
以下呢段片係"家有囍事"另一個版本中既片段. 係當年為左應付韓國片商而拍. 香港觀眾應該未睇過呢個版本. 多得一位朋友, 港片專家Littlesam有收藏呢段片, 並響梅玲既版聚中作全港首播. 非常多謝佢帶俾大家一個機會一睹呢段珍貴情節.

2007年3月13日

將軍澳有個飛機場

最近就迷上一個電腦遊戲. 已經無玩電腦遊戲好幾年. 點知一次"偶遇"就改變左我近日既生活習慣.
話說上星期出去旺角覆診, 當然到信和中心走一轉. 自從搬左入新界後, 由屋企到旺角係一條路途好遙遠既路程. 所以都少左去旺角.
行到去信和, 通常都會到地庫其中一間影碟舖睇下有無新貨. 不過當晚碟舖休息, 唯有四處蕩. 失失魂魂走左入間遊戲軟件舖四圍望下. 原本都無諗住幫襯, 點知就係呢個game引起我注意. 就係....
"夢幻飛機場". 結果睇左前後唔夠廿秒, 位妹妹好是旦"介紹"左半分鐘, 終於一分鐘內買左呢個game.

一開始玩先發現其實係好難玩. 呢個game其實都幾責任重大. 因為你會係一位航空管制員. 負責関西空港(個名好籮白)所有飛機升降, 所有會飛過機場上空左右隔離既飛機航道. 因為稍有差池就會撞機. 雖則只係個遊戲, 但當玩上手就變得好認真. 編排飛機升降, 安排唔同飛機飛唔同既航道或高度. 有時遇上繁忙時段幾班機又升又降, 又要搵位泊架飛機但又同時上空有三四架機左穿右插. 又怕佢地會撞機又要兼顧同佢地聯絡, 真係忙到癲. 所以我更佩服真實既航空管制員, 原來真係唔係講玩.

2007年3月12日

爛口的香港人(片段或會令人不安)

唔知點解近年D人越黎越狂燥, 越狂燥就越爛口, 越爛口用既字就越少. 左邊呢位垃圾蟲, 因為俾人捉到正, 就足足用左佢人生近8分鐘時間不停重復用果四個字對住幾位食環署職員咒罵. X你老母真係有用咩? 人地都係打份工, 點解自己理虧仲可以咁惡呢?

見事後一見警察出現佢即刻無晒聲. 原來果8分鐘只不過係隻欺善怕惡既狗響度吠四個音節, 明白.
以下片段或會令人不安. 敬請留意. 切記! 切勿模仿.

英女皇

從小就接受英式教肓, 不過真係好少話教我去認識英女皇, 頂多係歷史堂會巡禮講下英國君主制又或者每年英女皇生日我地都可以放日假. 其他?我真係唔知有幾多. 甚至乎後黎先至知英女皇其實只係個象徵. 佢前面係仲有個叫"首相大臣"主持國家事務.

97前, 山高皇后遠, 英女皇對我地香港小市民黎講已經係好遠. 97後更加好似唔關我地事. 記得好幾年前, 有日出到倫敦, 突然心血來潮行左去白金漢宮. 因為每次響英國, 都係未去過所謂倫敦tour. 當然大笨鐘摩天輪格林威治倫敦塔橋等名勝係有去過, 唯獨是"白金漢宮"就真係未去過. 去完, 就好似劉嘉玲響阿飛正傳入面一句對白: 都係不外如是. 可能係英女皇或皇室成員因為一張協訂就離我地越遠. 如果俾我97年前去, 或者我會:WOW!

"The Queen", 一部電視台既製作, 巧妙運用電視台有既資源, 將真實既新聞片加插響電影中. Stephen Frears響呢部近乎電視規模既製作中不慍不火將一段白事毫不形重咁去交代. 活現左皇室成員跟普通百性唔同既價值觀. 再大膽去批判英國既君主制度. 唔難想像話英女皇係唔會睇呢套戲. 係太過真實, 定或唔想睇到俾人醜化? 真係只有佢先知道.

Kentucky Fried Movie

ZAZ組合(Jerry Zucker, James Abrahams, David Zucker), 響美國影壇有著好重要既一個時代. 由佢地既Airplane!系列, 到白頭神探系列, 都帶埋我地好多歡樂.

"Kentucky Fried Movie"係佢地最早期既作品: 一部天馬行空, 無故事無主旨, 只係為左搞笑. 成套片就由好多短劇所組成, 情形就似香港既"歡樂今宵"電視節目一樣. 不過有幾段會係比較好笑, 例如"實感4D影院", 又或者玩轉李小龍電影再cross over荷里活式童話故事仲要將李小龍變成drag queen. 可以睇得出ZAZ控制笑位無後期可以掌握得咁好, 都若果論創意度, 呢套贏晒. 而且仲可以重溫70年代美國嬉春片一貫"波濤洶湧", 性解放既情懷.

講番隻碟, 由於套戲剛好30年前. 而且原片又未經收復, 所以成套片不停出現花痕或色調唔平均. 今次Anchor Bay出得好求其. 不過賣$80大圓, 可以有乜要求咩?

2007年3月11日

賞月食糖水,咁遲至call 我地?

taken from 十兄弟. 真係好似英文.



伸延閱讀: 十兄弟的英文對白

刮花CD有得救

CD 被 刮 花 了 , 往 往 會 影 響 播 放 的 效 果 , 有 甚 麼 方 法 可 以 讓 CD 復 原 呢 ? 在 香 港 討 論 區 , 網 友 lolokyee 介 紹 了 一 個 小 秘 訣 , 所 需 要 的 工 具 很 簡 單 , 就 是 一 支 油 性 筆 。 lolokyee 說 , 只 要 用 油 性 筆 塗 在 刮 痕 上 , CD 即 可 回 復 靚 聲 , 不 過 此 方 法 只 限 於 輕 微 刮 花 。
用 油 性 筆 填 補 刮 痕
香 港 資 訊 科 技 商 會 副 會 長 方 保 僑 稱 , 網 友 的 復 原 方 法 基 本 上 可 行 , 其 原 理 是 利 用 油 性 筆 填 補 刮 痕 , 「 市 面 上 都 有 一 打 磨 CD 套 裝 , 賣 一 百 幾 十 蚊 , 主 要 係 用 微 弱 腐 蝕 性 , 令 CD 表 面 平 滑 番 。 」 但 方 保 僑 提 醒 以 上 兩 個 方 法 只 適 合 用 於 輕 微 刮 痕 , 亦 非 百 分 百 可 行 , 因 為 CD 是 靠 反 射 雷 射 光 來 讀 取 資 料 , 但 復 原 後 CD 的 折 射 能 力 未 必 跟 原 來 一 樣 。 想 避 免 CD 受 到 損 害 , 最 好 是 用 盒 子 裝 起 來 。 方 保 僑 亦 提 醒 , CD 不 宜 擺 放 在 溫 度 高 的 地 方 , 「 溫 度 高 隻 碟 會 攣 , 咁 就 壞 啦 , 因 為 轉 速 唔 一 樣 , 讀 唔 到 入 面 資 料 。 」

2007年3月9日

黎明都住過天水圍!

而家被邊緣化既天水圍, 曾經何時係個豪宅區! 經過十幾年轉變, 豪宅變成綜緩戶天堂. 如果唔係近期炒家炒到無野好炒, 走入嘉湖山莊炒過興合合. 嘉湖山莊只會同天水圍一齊變成萬劫不復被遺棄既貧民窟.
你睇, 連黎明都拍過嘉湖山莊既廣告! 以前賣樓廣告真係好均真, 無現樓都至少有樓宇模型睇下. 唔似而家乜乜灣乜乜別墅, 只有靚外人靚外景, 層樓? 你買左咪有得睇囉.
再講隻廣告歌, 有幾句係咁:

從來沒這麼開放 花一般開放
原來越將心開放 越愛得多
其實未懂得開放 怎麼懂得愛
全面讓拘束開放讓我愛

明顯呢幾句係同港人講: 其實天水圍城並唔可怕, 只要放開D, 果度一樣可以係好可愛!


伸延閱讀: 開放/黎明

2007年3月8日

你會送三百蚊俾甄妮嗎?



仲記得軟硬演唱會DVD賣二百幾蚊已經俾人鬧爆話太貴. 貴為神枱級既甄妮, 佢既演唱會DVD賣三百大元應該無人鬧爆, 因為果三百蚊其實仲有其他更重要既用途可以用.






我遇上我的前半生

響剛過去左既三個月內, 我響屋企位處既屋苑內, 共遇上某某親戚, 某某一夜情人, 呢份工既同事, 上一份工既前同事, 甚至明報既舊同事, 甚至甚至我既初戀情人, 统统唔係住響隔離果期或者隔離屋苑就係同我同一期...
就似將我前半生遇到既人一次過將佢散番落響我身邊.

香港真係細...

復黑膠

自幾年前環球掀起將以前既唱片復刻以扮黑膠碟設計既CD發行, 即刻引起幾間唱片公司爭相學習.

當然好處係當今後生既一輩可以聽下七八十年代既經典作或者我地呢一輩可以重溫一D己絕版既唱片.

我地唔否認七八十年代係香港樂壇都光輝既年代, 當時有才華先可以留底, 唔似九十年代至今, 阿豬阿狗只要識"chok"樣, 唔識睇譜五音不全都無問題, 就可以做歌星出碟紅足十年. 唱歌唔掂? 電腦執音咪得囉, 逐個字逐句錄, 完成後簡直繞樑三日! (八十年代都有, 葉沙利小姐自稱唔識中文, 唯有逐句錄, 響未有電腦既年代用人手逐句黐番成一隻歌, 工程極之浩大!)


雖然自己係儲碟狂, 乜野冷門碟都有. 但有D碟係從來未出過CD, 只活係黑膠時代. 咁呢類復刻版簡直係救星. 記得黑膠過度到CD既時代, 因為唱盤壞左, 又難搵新既一個, 唯有忍痛將珍藏左十年既幾百張黑膠碟送晒俾人. 留底既只有硬硬數碼聲既CD, 同後悔連果D絕版碟都無埋. (當然有D後黎好辛苦之下先搵到貴貴CD版!)

近呢兩年, 有間名叫New Century Workshop既公司不停收購一D獨立唱片公司既版權, 又同大型公司如百代, 索貝(新力貝淘斯曼)等label將一D經典既唱片復刻發行. 當然出到固然開心, 但發現佢地既製品質素真係參差. 大label既母帶質素就通常無問題, 反而獨立label, 例如連出幾張小島樂隊既舊作, 竟發現母帶損毁左都照印片直出. 亦試過凡風樂隊印錯碟照出街. 其實亦都試過大label好求期, 如某大公司夠膽死真係用黑膠復刻, 連炒豆聲原汁原味入口. 亦有某公司10週年復刻最尾既一隻歌竟然無左一半, 就如突然斷帶, 聲都無埋.


環顧番現今樂壇, 好難想像十至廿年後, 會為側田吳雨霏周麗淇呢類chok樣怪出版復刻. 因為我更加難想像十至廿年後, 香港仲有無樂壇.

2007年3月7日

慢慢老去, 又美麗又冷靜

阿仔有日同我講, 話我皮膚好左又後生左.


講真近年我都覺得自己皮膚係好左. 記得後生時滿面暗瘡酒米黑頭, 都幾得人驚. 後黎細妹教我學識所謂"深層清潔", 即係除左真係皮膚表面清潔外, 身體內清潔都好重要. 結果飲食習慣轉左, 每日一枝綠茶. 表面野我就唔會做太多, 乜野H2O, SKII都只係為一時之靚同呃女人錢, 男人老狗都只需要買D好普通既Body Shop產品都己經好夠, 甚至萬寧賣十零廿蚊既沐浴露都有唔錯既效果.


或者因為後生個狀況咁差, 仲記得廿幾歲時, 好多人話我個樣似四十歲. 老到不得了! 我無嬲, 只係諗: 下, 唔知到我四十歲時會係點樣? 會唔會有個六十歲樣呢? 結果, 今日, 人地都話我個樣似三四十歲. 簡直係時光倒流. 之前識得位老板, 現年五十到尾, 但有個三四十歲既樣同身材. 唔係有身份證作證, 我真係以為佢講笑. 究竟係我護膚有道令年齡停止定抑或某D男人到某D年齡就會停止衰老呢? 護膚真係可以抗老咩? 又唔見黄夏蕙.....


阿仔話我後生係有原因. 請估下呢位灰色外套幾多歲...





估中無獎!







答案: 33歲 重後生過我, 但就..

2007年3月6日

我愛斷背衫

呢套曾經響舊年同志電影節放映既"我愛斷背衫", 係我所認識, 同志影展負責人Ray Yeung第一長片. 舊年因為時間唔許何, 再者個電影節淪為基佬睇肉專家既項目, 想齋睇戲既就真係幾趕客. 所以放棄左. 結果一拖就到近日先搵到隻DVD欣賞.

講真比佢之前其中一套短片"Yellow Fever" 黃色微熱, 水準有D下降. 或者將長片同短片比較係唔公平. 但係短片比長片更難拍, 短短30分鐘就要講晒成個故仔, 無長片90分鐘可以有更多時間鋪排. 但亦都係咁, "黃色微熱"可以拍活潑有趣可觀性高. 但反而"我愛斷背衫"就係太多時間, 有D支節確係可以刪去.

故仔真係老掉牙, 男扮女裝溝直男(咦? 候生唔係拍過咩?). 西餐妹愛餐飲餐食餐餐清, 有靚鬼仔送上門都唔識珍惜. 結果溝直男點知遇上姊妹, 靚鬼仔以牙還牙直逼The Devil Wears Prada!. 基佬也是人, 大家既人生都有踎底噴飯既場面. 只要愛一個, 上一課. 呢個就係人生.

2007年3月5日

試片室: 我愛籮霸 "Norbit"

諗唔到Eddie Murphy 正正經經拍完部Dreamgirls咸魚番生, 又走去整部一人分飾幾十角, 翻炒肥佬博士式既笑片. 乜黑人真係咁鍾意扮肥女人咩? Martin Lawrence 扮肥媽都扮左兩集, 今回Eddie Murphy又扮肥女人. 唔通真係為兩餐乜都肯制, 前世!



2007年3月3日

如有雷同

嘩! 搞乜咁熟口熟面, 係邊度見過呢?


咦? 係咪呢個呢?



伸延閱讀: 多哈國際機場

2007年3月2日

我的眼被挑了

上文提要:

眼挑針!!!

搽左幾日藥膏, 呢個瘡就越黎越大, 變得差左. 結果要轉介到專科醫生, 由醫生動個小手術, 將粒大孖瘡割左去.

當醫生護士都幫我打麻醉針, 我真係以為會無感覺. 點知原來仲係會有感覺, 感覺到醫生一下拮落黎, 跟住清理癑, 再將部份皮膚剪左. 佢一邊做, 我就痛到入心.

完成後, 結果...




獨眼龍!! 一日咁多啦!