2005年3月31日

宣示主權

今日大大大老板光臨香港office宣示主權. 半個月前老細同事都已經準備好今日, 結果今日, 人人飲樣.
但我就見唔到大大大老板一面.

2005年3月29日

荒謬日記 之衰心軟

真XX@@%^@&
衰心軟
話說半個月前有代銷女sales call我話"壹弍叁"有平plan, 我就貪平應承帶兩個號碼過台. 簽好約上星期二過台, 但一直無發生過. 兩個號碼仲停留響舊台.
每日打上呢間公司"SCL"追問, 佢地一味話幫我跟進, 但一直無回覆. 直至尋日, 打上"壹弍叁"一問之下, 對方話從來都未收過我份合約. 咁我份合約去左邊? 上面有齊信用咭資料, 簽名甚至身份證副本. 我開始懷疑呢次係個局. 我再打去問, 仍然係拖, 無人回覆.
今朝上去消委會落左案, 心諗都係由佢地搞掂.
點知......
今日下晝, 呢間死人"SCL"公司打黎道歉, 話會響四日內搞掂. 我都趁機鬧爆佢: 不如你搵到我份合約既話, 直接交番俾我, 我直接同"壹弍叁"deal.
結果, 衰心軟. 四日後, 睇下點.

唔知大家會點做呢?

2005年3月28日

我的HKIFF 2005 (Day 4)

Day 4
Summer Storm

好一套summer storm, 老掉牙既故仔, 他愛他但他愛她. 拍過萬七次. 不同既係發生響不同既國家. 好好一場比賽點解多一隊基佬隊行出行入引人注意, 搞到衣櫃基仔心大心細.
錯就錯在基隊中各人原有條線可以放大, 但最後只係輕輕帶過. 完全為左只係放大基與直既分別. 大佬呀, 宜家係21世紀, 仲有人咁拍基佬, 真係多謝晒唔該.

2005年3月27日

我的HKIFF 2005 (Day 3)

Day 3
只愛陌生人

導演Simon Chung都話岩岩先搞掂套片, 好王家衛!
呢套會係佢拍得最成熟既一套, 一套長片, 縱然故事係較弱一環, 但係處理得好好.
基仔賣豬仔到多倫多, 人生路不熟, 遇上大隻表哥同學伙記rice queen, 終於學上人生既一課.
之所謂非人人皆基, 有時猴擒時都要睇清睇楚, 否則傷既係你自己.

2005年3月25日

我的HKIFF 2005 (2)

Day 2
Ae Fond Kiss

因為要應付印度班大懶蟲, 己經放棄左"美麗緣未了"同"起碼做過星". 呢套"鍚錫又如何"算係最後防線. 另一原因:堅盧治!
舊年無睇佢一年, 今年又再見面. 今次似幾年前果套"Bread and Roses", 小品但並無果種火爆. 依舊係果種關係, 不過今次比較潮: 阿哥見過阿妹靚miss念念不忘, 到追到手又因為該死既種族宗教家庭種種處境下處處踫壁.
今回雖則古仔有D老土, 但好在處理得好好, 尤其神父對話一場絕對係高潮.

2005年3月23日

我的HKIFF 2005

Day 1
Hotel Rowada

原本唔係我選擇, 呢個係B既選擇. 得到奥斯卡提名已將呢套信升格十倍. 但想唔到拍得真係唔錯, 張力一流. 雖然仍似"鋼琴戰曲"般萬事化險為夷, 但入面每句對白都係發人深省. 男角發揮其實似不足, 反而眾客串男配角就真係各有各搶戲.
一套令人睇到幾不安, 但又劇力萬鈞既作品. 算係個好開始. 值得係呢套片係何傑民監製. 好耐都無睇過佢既製作.

P.S. Jean Reno竟已成為譚校長, 無論演得有幾認真, 觀眾都係笑左先.

2005年3月19日

同時迷上三個男人

呢個星期, 同時迷上三個男人, 帶住佢地番工放工...
男人一
Moby

新碟"Hotel"出左, 有單碟或孖碟版. 但太忙其餘二個男人未拆開聽.

男人二
Leonard Cohen

原來自己out-dated左咁耐, 人地隻出左五個月後先被發現. 仍然再三回味, 一流!

男人三
Tim McGraw

話說有日難得破天荒聽港台, 有位DJ播左一隻歌. 吸引到我注意但可惜無留意歌名+歌者. 只隱約記得係country music. 結果走上"阿嫲喪"search齊佢地既country music dept.先搵到呢位"鳥咀狗"同隻歌"Where the green glass grows".Tim McGraw, Faith Hill既老公.響HMV買左佢兩隻舊碟聽, 咁就一聽鍾情. 以前覺得country music係幾怪, 但宜家終於俾Tim先生薰陶!

"真正"荒謬日記合訂本

荒謬日記之 認識抑鬱症

不久之前, 我發現自己好容易突然情緒低落, 甚至想死. 工作, 愛情及社交都遭受很大打擊. 我也懷疑自己患上抑鬱症. 慶幸得兩位朋友開解, 在網上為我找些抑鬱症的資訊. 從而令我認識抑鬱症. 他們也解開了我的心結.
今天, 我的病情也已好轉. 在此也希望一些需要幫助的朋友, 告訴給你的身邊朋友, 他們一定會幫助你.
這裡有個很好的網頁, 也令我認識到抑鬱症.
http://www.defeatdepression.com.hk/
----------------------------------------------------------------

荒謬日記之新華書店:係個笑話!

拖左咁耐, 先話有時間去行下呢間書店.
但行完一層後已經有結論: 大而無當!
有時連書架都未分類, 東一忽西一忽. 同一本書可以響三個唔同位置既書架上出現. 希望有既書種又唔齊, 有種空洞既感覺.
如果將以前時代既Page One藏書量放入呢個位, 我會覺得好充實. 但而家, 只覺係個笑話.
---------------------------------------------------------------

荒謬日記之從超級三文治到星巴克

港大入面, canteen有幾難食大家都知. 所以通常會走去"Super Sandwiches"去食個早/午餐. 雖然價錢貴D, 但至少真係可以入得口. 點知年尾"Super Sandwiches"都執埋, 真係幾失望. 今日收到電郵, 原來有承租者: 星巴克! 我更加失望. Starbucks既咖啡質素算係好但對普通一個大學生, 好難會每日俾得起二三十蚊只為一杯咖啡. 更甚印象中Starbucks無好似Super Sandwiches咁多食物選擇. 雖然大家有個地方可以坐耐D, (以前Super Sandwiches都得, 不過坐户外會俾麻雀趕! ) 但換來係繼續為搵飯食而傷腦筋.
---------------------------------------------------------------

荒謬日記之今日大家捐左錢未?

今日大家捐左錢未?
今日響街, 俾民建聯截住要捐錢賑災, 雖然唔鍾意個黨, 但賬災為先, 捐晒銀包D錢.
----------------------------------------------------------------

荒謬日記之你有幾多mp3哼?

終於買左份聖誕禮物俾自己. 係一部20GB mp3機. 原本以為買5GB算, 但係20GB有個鬼馬功能係FM廣播, 即係將mp3機入面D歌用FM廣播出去. 周圍既人都可以用收音機聽到架機播緊既歌.
點知返到屋企整playlist先至知, 其實我真係無乜mp3, 搞完一大輪先發現想放入機聽既歌都唔夠1GB(只有9XXMB).
有時, 有D野雖然可以話未雨綢繆, 但亦都要量力而為.
---------------------------------------------------------------

荒謬日記之爸爸,呢條係唔係T-Back?

今晚響拮豬島買野, 見排響前面位十歲小妹妹攞住盒野, 唔望尤自可, 一望竟然係盒男裝運動用既supporter.(係咪底環呢? 仲要係中碼!!) 咦? 我係好想問位小妹妹: 係咪買俾同學仔既聖誕禮物?
呢個時間, 一位中年男人上前, 應該係個女仔既爸爸.
我心諗, 大佬呀你著都唔駛叫個女俾錢卦. 況且你只著中碼咁細兜?
---------------------------------------------------------------

荒謬日記之臭八婆

今晚去北角某惠康買野真係嘆為觀止. 人性可以去到咁恐佈.
有個女人買左D野, 但收銀小姐打找續時打錯數, 並且講左亦找番岩錢. 但個女人唔罷休, 個收銀小姐好詳細解釋已找岩錢, 但個女人仍然對住個收銀鬧話佢黎唔係黎做加數. 但呢個女人完全唔知阻住其他人, 一條長龍排響佢後面. 結果事件越鬧越大, 收銀小姐亦忍不住淚洒當場. (位收銀平時好有禮貌架!)
經理即場引導長龍到另一個counter, 龍尾既位老女人一湧而上, 原本排第二既小姐(排鬧收銀既女人後面)不甘俾龍尾湧上排响佢前面. 即場提醒老女人排隊, 老女人話: 佢地叫我地去咪行去囉. 小姐就開始同老女人開始爭論, 點知老女人話: 你咪以為你教書好叻啦, 係你D教育失敗囉. 唔夠人爭唔夠快.


咁既人都有. 祝佢地無好死.

2005年3月16日


on the road

2005年3月14日


three brothers @ wampo station, thailand

兩傻遊曼谷

Day 1 八點九早機飛到曼谷都係十一點幾, 搭的士去酒店. Check-in後先發現間酒店真實幾舊. 間房仲有陣味添! B有個習慣就係訓晏覺, 結果一訓就幾個鐘. 下晝我諗住行出市中心行下, 點知間酒店距離市中心大街真係幾遠, 三十幾度之下行真係大汗叠細汗. 是日晚餐於酒店自助餐, 又貴又難食.

Day 2 是日皇宮行, 仲行左大半日, 是日午餐於"Central"既Food Loft, 價錢合理食物又正! 晚餐於"Cafe de Laos", 未試過老撾菜, 原來係咁正.

Day 3 是日係B既主意, 因為佢好想去桂河橋行. 結果前一日join左個local tour去桂河橋. 心諗都已經無香港旅行團去呢D地方. 畢竟外國人同香港人既要求真係唔同. 佢地要fun既係名勝歷險, 我地只識:Shopping. 個local tour真係聯合國, 有比利時靚仔德國夫婦仲有對著高跟鞋透視裝新加坡基couple. 二個半鐘巴士+十分鐘快艇+個半鐘無冷氣硬座火車. 果然真係大開眼界. 是夜晚餐係豬肉麵, B叫左個沙律, 辣到佢出唔到聲.

Day 4 無乜野做,除左山長水又遠去Tesco Lotus掃碟, 買左"Bear Cub"同"The Adventure of Iron Pussy". 正啊! 咁就完左曼谷兩傻遊記.
後記:

1) 間酒店真係無下次! 又遠房又臭!
2) 搭的士真係小心老屈.
3) 咪太信香港D旅遊書, 我就乃左野!