2006年10月29日

原來過得很快樂


人越大就越怕死, 一次腹痛引來癌症疑雲. 結果我就被送入醫院做一次徹底檢查.
其實呢類檢查以前我都做過, 結果都係小小事. 但今次就連醫生都話唔尋常, 所以一定又要做多次.
尤其胃同腸, 呢兩個檢查都係最辛苦. 辛苦唔在於過程反而係在於之前準備.
為左令到胃鏡腸鏡檢查順利, 通常院方要求病人清理自己胃腸先. 點清理? 瀉藥排毒也!
要求我兩小時內飲完一樽味道極難飲既瀉藥. 但結果飲左三個鐘都未飲完, 最後護士用威迫口吻話飲唔完就要洗腸洗胃, 我先至乖乖地飲完成枝瀉藥. 不出一個鐘, 我就似開大水喉一樣一瀉不止. 足足成晚去左八九次, 成個人都虛脫.
第二日一早就開始各樣檢查, 率之到下晝先完成.
跟住各種報告都出左黎, 腸同胃都有發炎跡象但都係小事, 反而我個肝既問題就特別. 醫生千叮萬囑一定要再做多次檢查先能夠確定點解會發生.

出院後, 除左個人覺得自己輕左, 仲發覺其實自己都過得好快樂.

PET SHOP BOYS - CONCRETE: IN CONCERT AT MERMAID THEATRE


正當大家都講緊Robbie Williams有隻新歌叫We're the Pet Shop Boys, 其實半年前Pet Shop Boys早已大嗌Robbie Williams!

呢隻BBC錄音收錄左PSB響五月於倫敦Mermaid Theatre所開既音樂會. 唔同既係由BBC Orchestra演奏. 一直我都覺得PSB+管弦樂係絕配. 照舊音樂會一開始一首Left to my own devices由管弦樂團奏出就知係龍定鳳.

錄音就連Neil既間場說話都有收錄, 可以話照顧周到. 但當Neil介紹Robbie Williams主唱Jealousy時, 突然發覺Jealousy可能係寫俾Robbie, 點解成隻歌可以咁fit到Robbie Williams?

17隻歌, 所揀選除左兩三首係經典之外, 其他都係後期甚至上隻大碟既作品. 或者係為左谷碟.
PSB除左呢隻音樂會錄音之外, 十月尾更加會推一隻名為"a Life in Pop"既DVD. PSB迷萬勿錯過.

2006年10月5日

王雅文!! 正到爆!


一知道王雅文響星島全音果隻"Don't Cry for me貝多芬"首現CD, 真係茶飯不思.
搵左好多間, 連HMV都話無, 信和甚至賣晒無貨, 先至響CD貨倉買到.
真係正到喊. 真正早期80年代音樂. 一首"夜之節拍"已經殺晒. 再加上小美"到震"既"Don't Cry for me 貝多芬", 完全係同而家D歌無得揮.

$89係貴左D, 但係絕版左20年再現, 就算音質差D都算做幾珍貴.

P.S. 小島精選都出左, 不過條母帶好似爛得好緊要, D聲真係差到無人有.

2006年10月3日