2006年4月20日

電影節那碗紅豆沙

一直以來, 電影節都會等同節食: 連續兩星期一日趕三四場午晚飯可能只有五分鐘仲要係一路趕車趕船時進行. 因為一入到場, 你就會同食物斷六親. 如果你偷運一串魚蛋三文治凍檸茶入場, 都會俾職員喝止, 就算係無, 隔離位都會報串或厲眼怒啤.
自從電影節殺入一般商業戲院放映, 汽水爆谷熱狗成為長註電影節人民指定午晚餐.
不過尋晚驚見有人打破常規! 坐響隔離一對男女, 未開場前已打開手袋拎出一袋二袋狀似準備開餐. 最觸目係當男方拎出一大碗野, 女方就話: 你一打開成間院都會聞到! 唔係掛! 你果碗唔會係榴連嘛?
男方二話不說打開個蓋.... 一碗香到人都癲既紅豆沙. 女方仲提男方: 小心熱.
跟住果90分鐘, 坐響隔離位男仔就一路咬麵包, 一路"雪"佢果碗紅豆沙直至散場.
坐響隔離既我, 一路要忍受肚子餓到咕咕聲, 但又要忍受佢碗紅豆沙既香味吸引, 兼且承受痛頸之苦. 呼天搶地!

我的HKIFF (Day 6)

大清早發現自己扭親條頸, 痛到入心. 結果唯有忍心放棄Snow Cake. 唔見左件餅, 夜晚忍痛去睇今年電影節最後一部電影: Housewarming. 擅舞搞野大狀要裝修間屋, 請來三山五嶽幫手鬧出笑話成籮. 聽落係有D似Tom Hanks舊作Money Pit.
雖然套戲幾鬆散, 但至少天馬行空兼政治正確, 笑笑無妨.
當然最驚喜係某英國影星特別客串30秒, 全場嘩然.

散場後, 都係乖乖地去睇醫生, 因為太痛.

2006年4月17日

我的HKIFF (Day 5)

無嘩眾取寵兼個人崇拜, BBC既The Power of Nightmares絕對不二之選. 揭穿謊言係新聞工作者任務之一, 但如果新聞工作者受謊言所困呢? Good night and Good luck就由佐治古尼熟煉導技為大家展現一次鬥爭. 我仲嫌90分鐘唔夠呢!

P.S.
1) 敬告各位! 去得電影節遲到在所難免, 但係既然節目已開場而你又遲到兼仲週場走揀位坐. 阻住晒後面觀眾既視線, 你係咪想死?
2) 今晚文化中心放Good night and Good luck時套片可能有問題而多次跳片兼中斷左一陣. 睇怕都係買DVD睇多次.

2006年4月15日

我的HKIFF (Day 4)

B, 一位響猶他州住過又係摩門教兼民主黨, 會唔會好矛盾呢?
"誰怕米高摩亞"正係發生響猶他州一件荒謬事, 正所謂天下烏鴉一樣黑, 響銀幕上見兩派互相對罵時, 本地咪一樣有仆街賣國賊與冚家鏟共產黨惡毒咁對罵場面.
難怪B一直都拒絕睇Fox News Channel...

註: 猶他州係摩門教根據地, 而且大部份為共和黨.

我的HKIFF (Day 3)

"每個人都有座斷背山", 原來法國就興"每個人都有斷雞頭山"!Michael Haneke玩完鋼琴老師再玩估誰是真兇. 有日發現原來有人無時無刻偷窺你,簡直照顧你既思維上需要. 但係從此帶出自己既"斷背山": 一樣你唔想俾人知既過去. 但係紙包唔住火, 始終都有日迫埋身.

Hidden

2006年4月12日

我的 HKIFF (Day 2)

大會堂轉左新椅, 可惜椅背太矮, 就好似坐住小學椅, 好唔舒服.
今晚係B既選擇, "The silent holy stones" 有D似多年前小活佛世界杯. 小喇嘛中左電視毒, 一日到黑由寺院到屋企到寺院都希望有電視隨身. 尤其對西遊記更加視為寶, 甚至連小活佛都感染成電視精.
場口不多但處境及對白一流. 其中追睇港產片一段更加笑中有淚.

2006年4月10日

我的HKIFF (Day 1)

俗語有云: 屋企無個女人係唔掂架! 所以老母去左, 兄弟老豆都將細仔當女養. 家頭細務一手包辦不在話下, 老豆仲俾錢佢買花戴.
後來仲迷上救命恩人警察大哥哥, 送飯調情樣樣齊. 可惜人在江湖生不由己. 一家大細都係撈偏門. 好難同皇氣門當户對. 老豆捧打鴛鴦, 再加上直男係永遠好難被拗攣.
後段變得公式得可怕, 阿仔招惹官飛結果子債父還並唔係重點. 後來蜜詩見警察大哥哥如見陌路人才是成長既一課! 12歲? 都係大個D先算!

蜜詩成熟時 The Blossoming of Maximo Oliveros

2006年4月5日

係傻豹定係烏Sir Sir?

差唔多睇齊"粉紅豹"咁多集, 只差兩集外傳未睇.
今回Steve Martin扮Inspector Clouseau其實係幾難頂. 尤外型到硬生生既假扮法國鄉音就係一大敗筆. 或者你會講: 只係Peter Sellers太深入民生. 或者係, 或者唔係, Roberto Benigni都曾經扮粉紅豹個仔一樣太過做作.
只可惜今次全人類都行貨到暈完全無喜劇感. 甚至由拍攝手法到故事都不值一提. 尤其前半段過於堆砌, 只覺教英文一段同阿婆講廣東話真係好笑.
當然舊版又慢又唔係笑片, 唔可同呢套笑片比. 但作為PP Fans, 呢次有些少失望.

P.S. 有某明星uncredited客串某名角色, 呢次cross-over絕對耳目一新, 全片最正. 可惜呢位明星食左次咋糊.