2008年9月30日

孖腸意

想食日式冷麵又突然轉menu, 唯有退而求其次叫呢個檸檬汁雙腸意. 怪汁加怪半截腸.

2008年9月28日

wonder....miriam

千嬅未出呢隻碟之前, 實在太擔心, 因為: 1) 西歌如"啦啦誇啦啦"! 2)"大慈善家"無咁西但吸引力實在好弱. 3)就連"明日再會"都係普通過普通道.
接過新碟既第一首"當女飛俠愛上萬能俠"感覺良好, 似係一個好開始. "明日再會"都被上首感染變得一個唔錯既耐聽作品. "撈月亮的人"已經係好耐無見既中國小調式流行曲, 事實上千嬅確係幾適合唱呢一類曲. 可惜跟住既"開心果"同"一葉舟"及"塗鴉"感覺有D過時, 有D似佢響華星時代既作品. 就連演釋上黎都似係無厘心機咁. 就算我D國語有幾唔會, 我都聽唔出呢首"愛過"原來其實係隻國語歌, 聽落真係以為佢用緊廣東話唱緊.
"嬅麗緣"有D似近期關先生與張太果隻"四面楚歌"一樣將歌名串成一首歌, 不過今次佢用盡千嬅所有歌名來串連.
今次呢張碟明顯比上一張更去"老黎"化, 更接近千嬅既風格但可惜楊小姐已經唔再係十八廿二, 風格唔可能重回十年前青春少艾果隻"啦啦誇啦啦", 就連離開金牌最後一張碟時都已經成熟啦, 結果兩年後既今日黎先生竟然將佢重塑成華星時代既楊小姐. 如果咁樣重塑風格可以令歌星reborn, 我諗黎先生自己應該要整番隻"眼睛想旅行"2009年版本.
楊小姐, 你還是離開黎先生吧啦!

2008年9月27日

逃得過東亞謠言但走不出堡加敬傳聞

之前做左個醒目人, 都諗唔到臨近週末就做左傻仔. 周四, 響網上得知北角炮台山開設左Burger King. 我諗距離公司都只係三個港鐵站, 中午都可以走去食個晏. 結果星期五真係一支公碌左去炮台山, 一出港鐵站就見到個招牌, 急步過馬路就完全失望到極點....因為間野仍在裝修中! 唉! 逃得過上次東亞一劫, 反而衰響Burger King....

It's Possible!

諗起之前呢間公司既廣告, 真係乜事都會發生!

伸延閱讀: 警 搜 萬 通 保 險 拘 11 職 員 涉 偽 造 AIA 賣 盤 內 部 文 件 撬 客

2008年9月26日

cwtm 真心膠語錄 之 8 (尺牘篇)

  1. 真頂大家唔順, 打字已經 "口語化" 了, 唔緊要, 都仲可以接受到, 但字都仲要打錯, 實在有點兒那個.畫質既 "質" 字, 係呢個, 唔係 "汁" 字, 畫係無 "汁" 既, 所以話到左 2008 年代, d 人都搞成咁, 再遲多 十幾年, 仲更加出埋晒好多不明來歷既 "象形文字", 簡直好似返番去古代咁. 唉...
  2. 起初都只係諗住陪下你地癲 (打錯字), 但諗諗下, 都係打番正好 d, 事關都真係唔太掂, 新聞都有報過, 只係 ... "忠言永遠都係逆耳", 如果話新聞報股市行程, 有幾多人會聽?? 但如果報: 有議員為現時年青人爭取, 娛樂事業大舉減價, 睇怕個個唔只會聽, 仲會牢記於心添點解新聞報導員, 大多都係女仕為主(女主播)??? 新聞也曾講過, 睇睇有無人記得??
  3. 同埋呢... 早前聽聞你地講過有關 "美亞" logo 問題, 已發電郵投訴, 但無乜點樣回覆, 或者可能有(你地個人自己先會知), 但我睇過有關既文章, 俾著我都未必回覆, 字裡行間, 有 d 字打錯, 文字意思有令人混淆情況, 你地o係呢個討論區打到點樣都得, 皆因係 "自己人" 睇番之嘛, 實睇得明, 但打去果 d 咁既公司, 就麻煩你地打得好點, 最基本既野都無, 叫人家覆唔覆你地好?? 自己留意一下啦
  4. 呢個呢 ... 好明顯係本人 "走漏眼", 所以 大部份既稿都會用 "英文" 黎寫, 皆因無乜 "同音字".講真架, 曾發到美亞的書信確實有問題架, 回覆左你地既 ... 當然係好事啦, 但無覆果 d , d 文字實在真係要留意下."敬啟者" "致: xxx" "人家公司名" ... 等等字句有無寫呀??"候覆" "日期" .... 等等字句有無寫呀??
  5. 有時有 d 野 ... 係無錯, 你地講得啱, 係要輕鬆下, 但唔係度度地方(web site) 都可以咁樣俾大家輕鬆法, 如果係咁既話, 世界大亂都得嘞, 唔好忘記, web site 係 世界性的, 仲唔係 世界大亂?!
  6. 睇見你地既(不一定是閣下) 平時掟 d 碟既資料就知你地既 品味, sex and the city 應該未必合乎你地既口味, 人家行既路線, 同你地行既路線根本唔同, 你地話套戲 (sex and the city) 唔掂, 無可口非, 各人有各口味.
  7. 果然係 ... "官官相護"到此為止!
  8. 佛兄?! 真係 "佛兄" ?? 乜 "佛" 唔係o係寺廟嗎?? 冒充佛僧, 阿 sir, 拉 Q 佢啦
  9. 阿 "law" 人, 見你係 "論壇元老" (自稱咋), 就敬下你 "完老" 啦, 係你地 "窒" 本人在先, 我 "攻" 你在後, 天經地義, 教唔聽既, 咪唔好回囉, 無理由唔攻你咁戇Q.
  10. 乜閣下仲認為世間上有 "英雄" 既咩?? 思想仍有守舊的觀念 <--- 正確但只可惜 ... 係無既(英雄)"教你又唔聽" <-- 呢句正確係 .... " "教" 你唔聽", 係分開架, 如果係睇得明, 就唔會亂吊人啦.加漏左個 "標點符號" 就咁大件事, 個個走黎吊我, 我個洞好得閒俾你地插架?!
  11. 都知你無讀過書架喇, 等我黎解你知, 點解我用 "官官相謢"?!嚟呢個討論區度, 無論係 login name or user name(閣下自己稱咋), 都講到好鬼死勁兼強, d 說話又講到好鬼死似呢個討論區係你地開創既, 以 "討論區" 作為 "世界" , 你地 d 身份咁高, 又咁話得事(user name), 仲唔係似 "官"?!我用 "官官相謢" 字詞, 非常貼切
  12. 等緊你地 "ban" 呀, 原來各位唔係 "官", 係 "黑社會" , 入錯 "壇" 添, call police

2008年9月24日

瘋后

一直覺得呢個黑格比, 縱然係颱風, 但並非直接吹襲香港, 只係在不遠處行過應該唔會對香港有乜野影響. 但諗都諗唔到原本縱有距離但都對香港做成好大既破壞.
尋日響公司就根本神不守舍, 一邊忙工作, 一邊又check住地下天文台既風暴消息, 另一邊台灣既同事N小姐又問我香港既天氣因為佢要今朝早機經香港去外地公幹. 結果一知六點鐘掛八號波, 大家都早有準備隨時走人, 可惜我就要"被磨"到五點先可以動身. 從公司向對岸一望, 海面已翻起好大既白頭浪, 走到街上, 風勢確係幾大, 好似已經八號波. 為左避開港鐵"必定"既人群, 唯有選擇搭小巴, 但又好容易就上到車, 以為可以舒舒服服一程車番到屋企唔駛同人迫. 點知去到過海隧道口遇上長長車龍, 塞車??? 好彩並唔嚴重, 20分鐘後就番到將軍澳. 從車站行番屋企, 風勢越黎越大, 而且風聲大得好恐佈, 只見路旁大樹搖得好誇張, 唯有急急腳行快兩步. 跟住成晚, 風聲未停過, 好幾次我好怕玻璃窗會爆開尤其客廳其中一個窗向海相當當風. 今朝睇新聞先知大澳長洲杏花村鯉魚門大樹灣海水倒灌得好嚴重, 從youtube亦可以睇番紅磡小西灣大浪灣風暴情況, 如果呢個颱風正面吹襲香港, 相信我地真係凶多吉少.
一波未停一波又起, 今午網上流傳某銀行行將結業既流言. 心諗唔會卦, 我成副身家由利是錢到退休金同外幣存款全都存響呢間銀行喎, 但我又真係好相信呢個傳言真係好"流", 我亦知阿媽一定相信呢個傳言, 所以打電話俾佢叫佢唔好信傳言同唔好又去銀行排隊(因為阿媽有我授權可以郁我D錢), 但可惜太遲了! 原來佢食完午飯已經碌左出去排隊, 排左三個鐘直到銀行休息都未入到銀行. 直到今晚先搵到佢叫佢聽日唔好再去排隊勒.
香港人既一窩"瘋", 小小野就panic, 由貨櫃碼頭風暴消息forward email到銀行結業sms, 究竟幾時大家先會識得分辯是非黑白呢?

2008年9月23日

cwtm 真心膠語錄 之 7

  1. 其實都唔想講, 你使乜踩呢套戲唧, 麻煩你先睇左個英文戲名先啦, 唔好只睇中文戲名, 個中文戲名只係 "作" 上去咋.##
  2. 睇完個英文戲名後, 應該明點解我會咁講吧!
    呢套戲根本唔使踩, 都已經講明左咯, 你都仲要踩, 嘥氣
  3. 套戲既名 ... "你唔好同 (name) 一起癲"# , 換句話講, 套戲都癲癲地, 低能片, 都叫左你唔好同佢一齊癲, 都仲要同佢一齊癲?!
  4. 你地講得言之有理, 亦有非常好既分析力, 但 ... 唔好意思, 你地忽略左 d 野, 呢套根本唔係 "英" 文片, 置於係咩片? 咁都睇唔出, 就真係要再進修一下了.
    "don't mess with .... " 呢句真正既意思 ...
    再加上, 英文字母 ... 仲要幾隻英文字串聯埋一齊黎解 ... 你地話 yahoo 都解到, 無疑地係解到, 但並唔係完全正確既解釋, 仲要睇埋佢用o係邊度, 點用, 等等.
  5. 本人自問"英" "美" 語尚未夠好, 都需要繼續進修, 但幾位人仕就話 o係 yahoo 個字典內可以解釋得掂, 如果真係咁厲害, 出面 d 乜乜 字典呀 ... 詞典呀 ... 豈不是可以 收埋??!! 一個 yahoo 字典都夠啦!
#C先生將You don't mess with Zohan"譯成.........唉.
## 有人覺得套戲唔好笑, 結果.......唉.

2008年9月22日

荒謬影話: Saturn in Opposition

好少可睇戲睇到眼濕濕, 至少好耐都無試過.
呢部意大利同志片...咪住! 呢套究竟算唔算係同志片呢? 講述一對同志伴侶維緊住一大班攣直朋友, 故事就用一段婚外情開始, 從男男眼中睇男女關係. 直到片末突遇巨變, 將大家既友誼扯到極點.
全片頗多對白但毫不沉悶, 人物又寫得頗立體, 尤其男主角同幾位朋友/ex既多角關係, 描述得不慍不火洽到好處.
結尾既巨變真係幾"催淚彈", 但好在又唔太過火, 但最後都令我有少少眼濕濕.
(80/100)

2008年9月20日

下次再見...

尋晚, 從第三者口中得知原來我一直幫襯開既按摩師傅早前突然中風, 而家半身不遂.
聽到呢個消息心裡一酸, 上次見佢已經係九個月前, 之後自己一直好忙無再搵佢. 點知竟然發生呢種事, 尤其佢同我年紀相若, 想唔到佢都會中風.
我認識佢差唔多已經有四年多, 最初佢都係初入行, 但係去左間傳统既地方, 佢得到老師傅珍傳, 所以佢係正宗既技術手勢. 多年以來大家由客人變成朋友, 好難得每次見面大家有講唔完既話題.
好可惜到而家事隔幾個月後先知到呢件事, 一來佢既珍傳可能會失傳, 二來我都唔可以再享受大家見面時既交流, 祝願佢會安然過度到餘下既日子.

世事就係咁, 人越近就總係有野令到距離拉遠...

2008年9月19日

cwtm 真心膠語錄 之 6 超無能.勁弱智

  1. 我都睇過佢套碟既盒, 最底部 ... 加左 "得利 logo" 而已, 始終都係 "華納" 為主點, 而且根本無提過 "得利" 添, 係隻字不提, 華納呀華納, 你真可惜呀, o係 逼不得已情況下被 "得利" 收購左, 但都算 "得利" 有番 d "司性" (真想講 "屍性")(皆因 "得利" 都唔係人, 係公司, 所以叫佢 "司性"), 除影碟盒外, 套片完全無提及過自己("得利"), 不過有點諷剌, "得利" 有點兒存心玩 "華納" , 華納網(hk) 已全軍覆沒, but ... tw 版網, 仍存在, 究竟 "華納" 係咪真係根本唔想被 "得利" 收購??!! 還是 ... "華納" 想食多 d 水(錢), 但又想搞到好似好可憐咁, 被 "得利" 收購了, 賣既價錢豈不是可以賣高 d 囉.
  2. 兄台的確 言之有理, 我本來都唔想講, 但係咁椅講番句:"超無能.勁弱智" 09 年新句(自創), 美亞兄佢以為地球上就只有佢最叻嘛, 佢地可以有權加乜都得, 使乜問人, 使乜理人地點睇, 又或者 .. 佢地根本無當過其他人(買家)(消費者) 係人, 佢地只係諗 ... 佢地(消費者) 買就買, 唔買就算, 全港咁多人, 總有人賣既, 但事問 ... 戲院本來就唔係 "高清", 係由一 d 人經過特別處理先變成高清, 所以, 係咪真係 所謂既 杜比 true HD audio ... 有鬼人知咩, 點證明?? 畫面方面 ... dvd 方面 ... 將佢既畫面質量(素) 調低小小, blu-ray ... 就好番小小, 但事問 .... 又有幾多人知它的真與假呢??? 講得好聽 d 就係科技先進, 講得唔好聽就係 "略水" , 試諗諗 ... 連 N 年前既片都話整 "高清" , 不如咁吖, 將以前既 "錄影帶" 變做 "高清" 版, 我就話你叻, 佢地好似乜都可以變高清, 嘥氣, 係咪真係咁勁??
  3. 有係咁椅睇過, 暫時未見 logo 出現, 但 ... 頂佢個x , 咁鍾意玩配音, 不如玩埋 "配種" 啦, 定係 ... d 演員唔係講野呀?! 變晒做 "阿慶" ?! 做手語啦苯, 好彩果時無入戲院睇唧, 實後悔死.
  4. 頂甩佢個 x, blu-ray 都得國語咋! 我諗 ... 要買非港版先有原人原聲版, 定係 ... 拍果時 ... 個個演員都只係 "口 o翕 o翕" ?? 但無出聲, , 片場豈不是好靜??!!

2008年9月17日

Be Kind Rewind

終於睇左呢套"低清老翻王", 意念正可惜執行上就強差人意. 但基於呢套戲既主旨, 唔多唔少令我又懷念當年租帶既時代.
仲記得當年街頭街尾既影視店, 十蚊五蚊就可以租一部電影錄影帶兩日一夜. 當年好多德寶公司既戲都係租帶睇, 果個年代, 影視店仲係分黨分派. 呢一間獨家有嘉禾電影, 果一間獨家有金藝城電影. 要係想一間有齊晒所有公司發行既影帶, 係直到KPS金獅影視擴大後先出現.
那陣子我啱啱出黎做野, 睇帶變成我唯一嘗好. 一個星期租三四部電影, 中西日絕不手軟來者不拒. 亦勝在KPS有所謂外國版既水貨影帶, 令我可以接觸更多唔同類型既電影. 當時KPS那位經理更加同我混熟, 呢位小姐完全掌握我鍾意邊類電影去介紹我睇一D新片甚至暗啞底幫我預留新片. 後來LD既盛行, 我都由VHS過度到LD. 甚至KPS既消失到Blockbusters既DVD時代, 都同以前租帶既心態完全唔同.
租帶果個年代, 客人睇完部戲還帶時仲會同影視會既人有交流, 至少影視會既職員要檢查顧客有無回帶既時候, 顧客仲會同職員交流套戲既心得. 可惜到左LD/DVD時代, 職員仲會檢查隻碟有無花痕, 但已絕少同顧客互動. 甚至有時問佢地搵一部電影, 佢地都似遊魂一樣完全唔識任何一部戲.
到左今日, 我已經無再租碟, 全部影碟都係買番黎. 要同人傾戲就只可以走到網上, 雖然可以"即食", 睇都未睇完就講, 但少左當年果種"敬請回帶"既過程中對部戲既反思或同影視店既互動交流.

2008年9月15日

荒謬影話: Before I Forgot (一套老年人性生活大全)

記得舊年同志電影節我有訂呢套戲既飛, 但後來有事去唔到, 以為走寶.
點知今個月出碟立即買黎睇睇, 真係睇到眼突.
不停賣弄無謂既長鏡頭, 而且整部戲過於悶藝, 似係導演自己自瀆多於想表達劇情. 再加上片中沒完沒了主角分享叫鴨心得又或幾場賣弄既性交場面, 整部戲既中心變得似低級咸片咁, 想表達主角對自己景況既無奈亦變得輕輕提過就算, 本來30分鐘可以交代既劇情再加上無謂既悶藝長鏡頭竟可以將部片拉成百幾分鐘, 我係幾慶幸舊年無入場睇呢套戲, 否則未夠一半我就會離埸.
(0/100)

2008年9月14日

究竟係男定女?

好耐無去翠華食飯, 尋晚去左銅鑼灣謝斐道新裝修果間食飯. 一坐低, B已經笑到收唔到聲... 希望翠華既老細仲識分男同女. (因為用手機拍, 所以質素低)

2008年9月13日

古巨基- Guitar Fever

今次玩到咁大連出四隻唔同歌既EP, 再加賣弄地懶Hi-Fi鑑聽級錄音. 古巨基玩厭左人生後, 終於要步李克勤後塵向hi-fi友跪拜.
今次第一隻EP玩結他, 五隻歌無晒人生道理又或者加洲紅式K歌, 切切實實五隻結他歌. "下次再見"似係一隻向hi-fi友 say hello既示範作, 我用我部微型音響聽都份外好聲. 可惜跟住既兩隻歌唔多唔少都聽唔到有乜分別. "啦啦"令我諗起千嬅首西歌"啦啦誇啦啦", 呢隻"啦啦"除左啦啦兩字之外就無乜歌詞, 但勝在旋律搭夠, 非常入耳. "你恨到"我仲以為佢翻唱Kary首新歌, 但一樣唔湯唔水.
結他碟難做, 你睇十幾年前陳國平隻結他碟, 雖則紅左呂珊隻3650夜, 但碟內其他歌一隻都hit唔到.
(65/100)

Clycling

笑鳥~

2008年9月11日

9.11 good show?

就算事隔多年後, 9/11呢幾個數目字仍然一個傷痛既代表. 仲記得為左呢個日子, 有活動取消電影延期電視劇改劇本... 但諗都諗唔到今年有如此一部戲既本地宣傳竟用上如此口號, 難保下年都可能有如斯口號:6月4日無死錯人...
悼念9/11死難者.

2008年9月10日

2008年9月9日

初嘗VOD

錯過左"互動電視"既年代, 屋企既寬頻電視由YES tv開始直到而家既"現在"電視, 一直未嘗裝過VOD. 因為實在作用不大, 因為世上有種叫錄影機既物體, 可以錄任何節目. 再者多數頻道仍然愛上滾筒式播放, 所以今晚八點睇唔到仍然可以較錄影下晝三點鐘重播.
屋企個"現在"電視約滿, 原以為原價續約, 點知對方話新約要加VOD先得, 一問原來公司規定訂左兩個中文電影台套餐既訂戶, 續新約時自動提升套餐到有VOD功能, 但每月要加多五蚊. 明顯VOD太少人加訂所以強迫訂戶加訂, 但一加十蚊就每月要俾四百蚊! 實在太可怕, 為左要維持四百以下, 唯有忍澝cut台. 對方問不如cut CNN/CNBC啦, 嘩! B所訂既台不能郁, 只好cut CHannel V同星空衛視呢D少睇既台, 但仍然比舊約每個俾多五蚊.
新約一開始, 就試下衛視自選電影台. 介面都做到user friendly, 片種比較平庸, 但總好過隔離個美亞自選台一大籮80年代舊片.
VOD好處係隨時開始隨時停止, 但睇第一次揀左"小親親", 睇左一半真係話停就停, 不過唔係我整停部戲, 而係對方個server整停左都戲, 跟住甚至logout埋個VOD, 認真大吉利是.

2008年9月8日

美味天王

大家睇到上圖, 都發現圖中既中文文法完全錯晒.
但最重要係左下角果個"雞扒日式紅咖喱茄茸汁", 又咖喱又茄茸汁再加埋日式, 究竟想點呢?

2008年9月7日

又黎半島酒店月餅



敗家呀!!! 今年同事又玩團購"半島酒店嘉麟樓"月餅, 味覺即刻俾反應, 訂呀! 之不過百物騰貴, 今年佢地都加價到每盒$198. 即到打個突, 但奈何味覺戰勝窮根, 又訂左三盒!
一個星期後返阿媽度食飯, 細妹極興奮同我講佢又訂左三盒"半島酒店嘉麟樓"月餅, 每盒只係壹二捌! 我暈了! 我呢面同佢果面又俾晒錢無得退, 結果我呢面原本預俾阿媽果兩盒就益左俾B拎番公司俾同事嘆.
今年佢地既出品水準保持,不過盒月餅無落防腐, 所以中秋前就到期, 有辣有唔辣!

谷歌Chrome用後感

首日用Google Chrome確係興奮, 又爽又快, 點知換來係煙花既一剎那! 第二日全面咁用呢個瀏覽器就發現又唔係咁user friendly, 甚至乎可以話失敗.
遊覽網頁確係爽, 之不過去某一D好鬼專注俾IE用既網頁, 唔係顯示出問題, 就係load一大輪出現"死樣"話無法顯示. 甚至乎去香港某大論壇都會出現文字圖片側埋一邊既情況出現, 就連之前Firefox都唔會有呢個情形出現.
話就話Google出品, 但似乎對Google旗下其他產品好似有無法兼容既問題出現. 就連寫blog, 之前一篇"打戲釘"就因為兼容有問題唔能夠將加多video既文章內的文字調教大細, 就算入去edit HTML都係錯晒, 結果篇文入面D字時細時大好鬼肉酸. 呢個問題都係IE同FF無出現過.
爆笑如right click save相咁簡單既動作, GC係完全失效!
真係以為GC好細好慳資源, 但當你將GC一開二甚至三分頁, 再開個task manager望望, 其實同用FF無乜分別.
當然到呢一到, 用GC睇蘋果日報網頁仍然又爽又快, 用FF就俾Java同廣告拖慢到hihi. 所以我諗我只會用GC去蘋果日報網頁, 其他仍然會用番FF做主力. 但最硬膠係響公司仍然係主力用IE, 因為公司所用既程式全都係用IE基礎去寫, 用FF去睇? 只會顯示唔到.

中秋估圖


估下呢幅圖入面呢個藝術品個題目係乜?

2008年9月5日

躍動的心

以前電視台係有台歌呢回事, 近年已經無左呢樣野, 就算係新開既頻道, 上一隻以我所知已經係五年前星空衛視既陳慧琳"好地方".
舊年新開翡翠二台(J2), 奧運過後我睇左一兩日, 再加上身邊既人既反應, 都發覺佢地走啱左路線. 而且亦發現佢地原來一樣有一隻所謂宣傳台歌. 以往對側田頗有歧見, 但見今次呢隻歌又唔係太差. 再配合個promo, 完全sell到呢個台想點.

打戲釘

Milk:

十幾年前拜讀過Harvey Milk呢位傳奇人物既書, 但好似從來未有過電影拍過佢既事蹟. 今回Gus Van Sant將Harvey Milk事蹟搬上銀幕. 我諗基界又會爭住奉為上品.



Ghost Town:
Ricky Gervais挾住The Office 去美國結果直到Extra響HBO播先入到屋, 雖然跟住往後佢都有出現響幾部荷里活大片, 但都係行行企企食飯幾味, 直到呢套... 終於揸正做主角了!
不過一睇trailer, 乜咁似"賤精先生"加"Over her Dead Body"?



An American Carol:
David Zucker拍笑片永遠有一手, 今回竟敢玩Michael Moore, 一個民主既代表黎開玩笑.
一邊笑一邊亦可以令大家對民主既反醒.




Knowing
Nicolas Cage之前已有套爛到化開既"Next"一樣玩預知未來, 今回重操故業又拍多一套, 唔悶咩?


2008年9月4日

周柏豪 Continue

近月真係無乜碟吸引到我, 就只有周柏豪呢隻真正吸引到我真金白銀買. 一首"一事無成"確係太搶耳, 就連跟手一隻"最段的三分十六"亦都有流行潛質. 不過打後三首歌(不計Humming), 就平淡如水, 只有"宏願"歌詞還可以細嚼.

當然作為新人, 第二隻碟仍可以做個試探, 但下一回就要真係主力出擊, 否則真係會"一事無成".

2008年9月3日

谷歌Chrome

都係今朝睇電視新聞先發現Google今日推出自家瀏覽器, 作為資深"八卦"網民, 當然少不免上網下載一個黎試.

點知一下載落黎連install完成前後都唔駛兩分鐘, 安裝更加已包括將IE/Firefox既bookmark自動加入到Chrome. 當然一起步有少少唔慣, 無tool bar無statas bar, 入URL位置亦都係用黎做google search. 用黎去平時去開既網, 速度快得有D O 咀! 就連去考起Firefox同IE既蘋果日報網站, 速度都快得令人大叫好爽. 最重要係佔用資源極少, 以往用Firefox開多幾個分頁都會頂唔住, 今日試左用Chrome連開四個分頁都係無事. 不過最得意係去到一D死左既網站, 呢個Chrome竟然會出一個好得意既死樣公仔表示呢個網連結唔到, 果然幽默.

2008年9月1日

乜原來民建聯支持公平競爭?

太可惡了! 有人PS立法會張投票結果喎!
笑鳥~