2007年8月31日

釣魚的參議員

呢期炒得熱烘烘既新聞並唔係Owen Wilson自殺, 竟然係一向反同性婚姻既共和黨参議員Larry Craig竟然涉嫌響機場廁所內挑逗一位便衣警察. 得意就得意在佢被拉之後認罪, 但之後又公開反口話認罪既決定係錯, 因為只係想件事快D完結離開警署. 亦公開宣稱話自己唔係基, 但有趣在咁多年以黎都有傳聞佢係基, 甚至政府曾經想過調查. 近年佢亦以反同性戀為馳名.
所以外界一聽到呢段新聞, 各界紛紛惡搞一番! 一上youtube, 唔難搵到各式惡搞短片. 甚至乎各大電視台NBC, CBS都響節目中當笑話講甚至CBS新聞節目有主持玩案件重演, 當正親身經歷, 非常搞笑.

都話恐同既永遠都係基佬自己.


1982有關Larry Craig既性取向新聞報導


MSNBC惡搞案件重演短片

伸延閱讀: CNN 報導

2007年8月30日

Face to Face 復刻重現

90年代係香港樂壇衝剌期, 新人新音樂新公司湧現. 其中有現今已成為天皇巨星, 亦有一碟歌星. 其中亦有被迫退出既例子. 就似"Face to Face". 當年亦大有前途, 可惜一場車禍, 令至其中一位成員癱瘓. 結果組合被迫解散. 後黎唱片公司改組退出本地市場, 佢地既唱片再無再版, 後生一輩再難聽到佢地舊既作品.

上星期, 佢地唱片公司重新發行Face to Face第一張唱片: Face to Face. 確係相當感動. 聽番佢地既"Face to Face"又或者"一些", 佢地有佢地既風格. 倫永亮陳澤忠所寫既輕快歌曲比同期另一組合"Echo"所唱既跳舞"蒲歌"來得大路易入耳. 當年佢地既見報率雖然比"Echo"為少, 但受歡迎程度絕對不少於對方.

環顧現今本地樂壇同樣可以咁有風格既組合, 答案係: 零.

2007年8月28日

試片室: La Vie En Rose 粉紅色的一生

第一次聽Edith Piaf既歌, 就係響套德國電影"Nobody loves me"(港譯: 情來自有方), 戲入面臨尾出credit整個成crew人大合唱"Non, je Ne Regrette Rien". 跟住多年之後響上世紀極之暴力既兒童片"Babe: Pig in the City"中再打個照面.

講真我對Edith Piaf既認識就係咁多, 一隻歌咁大把. 所以呢套戲絕對係對我一個好好既入門!

video


有興趣睇呢套戲兼想買隻soundtrack CD, 就更加唔好錯過HMV既優惠. 響hmv.com.hk網上訂購呢套戲既soundtrack CD即送呢套戲兩張飛.

環保日本?

日本一直以環保自居, 乜野停車熄匙天台綠化等等, 都覺佢地有心做. 好似今次入住一間溫泉渡假酒店都以"綠色生活"做主題. 例如通常入住酒店幾晚, 每朝都有員工執房或添置日常消耗品. 但呢間主動向住客提出, 如果唔需要執房或補充消耗品如毛巾, 只需填張表格交番俾酒店, 就可以即場回贈一千円禮券一張, 可以用於酒店內既餐廳同商場. 呢個都係個唔錯既主意, 一來佢地人手可以靈活調配, 二來又唔需要消耗太多資源.

不過雖然呢邊咁環保, 諗起佢地周街即用即棄筷子或勁多勁誇既無謂包裝, 點講環保都無用.

2007年8月27日

旅行團

都成十年無參加過旅行團, 仲記得上次参加旅行團係同某位ex一齊到華東旅行. 當然講得出ex, 就已經代表ex, 因為一番到香港就分手.

以往参加旅行團, 第一二日素未謀面既團友已經可以談天說地, 一齊同檯食飯, 兼且全部互相幫助. 呢個我係覺得旅行團另一個好處: 認識新朋友. 我曾經響旅行團認識一對年青夫婦, 後黎完團後佢地寄番一D相比我(記得以往我地係用菲林影相!), 我地一直有互寄聖誕咭長達五年之久.
不過後黎自遊行流行, 對於我呢種"單男"黎講, 自遊行自自在在總好過参加旅行團同人share房間.
今次再次参加旅行團, 發現好多野唔同晒. 團友再唔同其他團友傾計, 團友再唔會同檯一齊食飯. 番到酒店就各自入房互不相干. 参加五天團大家姓甚名誰已經唔重要, 全程完全無溝通, 莫過講互相幫助, 就算互相見到都立刻彈開. 我地都曾經試過幫人影相, 幫其他團友一D好濕碎既事. 除左一班女仔有計同我地傾之外, 其他都一個唔該都無就走開.
究竟係而家D人變左, 還是旅行團變左質呢? 不過我好肯定一樣野, 就係而家既父母太遷就佢地既細路, 而家既細路亦可能物質生活好左, 變得嬌生慣養.
其實呢個團就未必岩D小朋友, 有幾多十歲以下既小朋友鍾意響高溫之下賞花? 又或者沿途欣賞風景? 又或者去名店購物呢? 不過成團三十人已經有四五件呢種十歲以下小朋友. 結果行程中, 呢班小朋友唔係嗌悶就係喊熱, 嘈到你想大巴大巴升埋去.

之前我都講過麵店既失禮事件, 話說呢間麵店好細, 冷氣又唔足, 所以就真係好熱. 不過作為遊客一心想品嘗美食都唔計較, 不過有一家人就幾失禮不停嗌好熱, 奇就奇在父母毫無意思去安撫D小朋友, 任由小朋友嘈住扭計嗌熱, 難為對住幾個火爐既老板顆計大汗細汗都無出聲, 仲要笑面迎人送呢樣送果樣. 在場另一檯日本本地客見到咁嘈都面有難色. 完全極之對呢位老板既心血不敬.
當香港人嘈大陸自遊人搞到香港污糟邋遢無晒儀態, 請唔該各位有口話人無口話自己, 外遊時請保持應有儀態, 免得外地人都怕左港客.

2007年8月26日

Rush Hour 3+阿森一族

終於有時間睇呢兩套戲, 一套麻麻一套勁好睇.
Rush Hour 3
覺得由第一集互相欣賞到第二集合作無間, 但到第三集各自各玩. 尤其今集集中晒響Chris
Tucker身上. 成龍好似客串咁. 不過最弊係成套戲拍到"散修修", 東一忽西一忽, 相當求期. 好在唔駛錢入場.
阿森一族
相信係今年我所睇幾套暑期片最好睇既一部! 玩到好抵死, 好多場面真係笑到癲, 由露何B仔到Spider-pig, 簡直未停過.

如果想去睇, 請睇番英文版. 另外片尾不停間斷咁有野睇, 尤其出到credit尾有一段, 絕對串到爆.

2007年8月24日

楊千嬅對黎明

各位波友, 呢場東亞友誼賽, 左攻右係楊千嬅隊, 佢地既隊員有:

陌路
只談風月不談戀愛
同病相愛
最後今天
傑出青年

至於右攻左黎明隊, 隊員有:
集體回憶
不認不認還需認
別阻我開心
每當變幻時
知情識趣


好奇怪一場賽事, 六個打五個. 但係黎明隊係主場, 佔盡優勢. 就等我分析下兩隊隊員.
楊千嬅隊既"化"一出, 劣評如潮! 又話技術老土, 一定拖誇成隊楊千嬅. 之但係都有少部分人接受左"化". 跟住其他五位同以往打楊千嬅隊既隊員好相似, 十足餅印咁. 完全唔深刻.

至於黎明隊"有來自印度既外援"不認不認還需認", 一貫黎明懶特別既包裝, 完全唔listener friendly. 至於另一位"別阻我開心"雖然不俗, 之但係同黎明隊某位隊員太似, 眞係以為係"孖生". 另一位係"集體回憶", 原本可以食住呢個同名潮流, 之但係同樣有掛上"老土"既罪名. 至於老將"每當變幻時", 再度復出, 可惜情懷不再. 另一位"知情識趣"亦係一睇完就無印象果隻.
呢場賽事咁既陣容, 分分鐘兩面都輸!
唉.


(認真)
講真呢隻碟搞成咁, 主導既黎生應該要放開手同埋改善自己既音樂品味. 因為除非對方係新人, 否則對一個唱左十年歌既歌手, 已有一班固定既歌迷, 硬係要將自己既音樂觸覺强加上去, 只會將對方做死.

當然千嬅之前轉去新藝寶都出現唔夾既情況,直至再到金牌既時候先有改善. 所以上一隻"Unlimited"實屬非常成熟之作. 寄望下次黎楊佢地既合作會有改進.


連music video都拍到咁黎明, 究竟呢隻係千嬅大碟定老黎新碟呢?

2007年8月22日

試片室: Underdog 超能狗特工

呢類搵狗惡搞既戲都唔知拍過幾多, 連迪士尼自己之前都發行過.
呢套仲勁係遠古年代卡通"Underdog"既真人版.
當然之前既製作未必識迪士尼呢種獨特既市場方針. 就係: 懶cute! 好抄唔抄學左Pixar咁另拍假outtakes, 就算明知係假都覺得係懶.........好笑.
不過果句: Evil gets licked
真心抵死.

Trailer

Blooper Reel

伸延閱讀: 官方網頁

2007年8月21日

兩傻遊之五萬日圓北海道遊(四)

冬天去北海道當然係睇雪, 咁夏天呢? 當然係睇花啦. 第四日既行程就係睇花.
呢日亦都係最辛苦既一日, 六點morning call七點幾出發. 仲要坐兩個幾鐘巴士先到達呢個位於"美瑛"既農莊.
一望無際既花地, 極之壯觀! 可惜當天太陽太毒, 烈日當空, 響呢D咁空曠既地方逗留多一分鐘都會被煎熟. 結果草草影左十幾張相就要番入紀念品舖頭入面避避. 不過咁靚既花田真係令人好舒服.
下一站亦係花莊兼且位於最出名既"富良野"! 講真呢個花莊就無美瑛果個咁大咁靚, 甚至係幾失色.
完成富良野之後正式進入行程既尾聲: 正式進入扎榥市. 離開鄉市進入城市突然有D唔慣. 之前幾日多見樹木少見大厦. 今回進入一個大城市人多車多, 好似番左香港咁.
導遊放低我地響一條商店街自由活動, 對於唔多買野既我同B, 對住呢條日本式商店街有D唔多胃, 當諗緊去邊好之際, B抬頭一望, 見到前面大厦天台竟然有幅摩天輪! 呢位摩天輪狂迷B話一定要上去坐坐! 結果響果幢商場大厦左穿右插終搵到個摩天輪. 可能因為係weekday, 無乜人. 入場費都只係每位三百円, 就可以盡情睇晒扎榥市, 又平又正. 相信我地係成團人之中唯一去過呢個摩天輪既人. 其他都只係瘋狂搶購過晒期既"白之戀人".
當日兩餐都係自費, 晏晝食左好味既咖喱飯, 晚餐就走左去拉麵橫町試試. 導遊介紹左一間話超好味兼好多日本同香港明星都幫襯過, 名叫"來來軒". 老板係位識少少英文既日本叔叔, 雖則間舖細又熱到爆, 但係佢地D拉麵係超級好好味添! 老板仲好好人好識同客人溝通, 佢見我地大汗淋漓, 即送上凍水兩杯, 反而同行既團友一家就唔多識欣賞, 相當失禮! (另文詳談)老板仲因為係導遊介紹送左兩客餃子俾我地. 千四円就兩個人飽到飛起, 超值! 所以我都幫下佢賣廣告! 來來軒, 橫町第二間. 好好味架!!
到達最後一日, 已經成為購物日. 真正唔賣唔舒服. 當一去到大丸西武等百貨公司, 大家巳經鳥獸散消失響各大商場. 我只係想搵下一D PSP game, 一見到HMV咪衝上去. 點知原來呢間HMV係無game賣, 反而B就買左兩隻夏威夷歌既CD.
食過午飯後, 終於結束五日既行程, 向機場出發番香港.
總括今次行程相當好玩, 除左太熱外, 導遊太多廢話外完全無投訴, 真正住得好食得好. 其中負責揸車既大隻司機響呢幾日都好盡責, 天氣又熱又要揸車又要搬行李, 日日三十五度見佢成日要抹汗既同時仲要無時無刻都見佢笑面迎人, 有禮貌到不得了. 所以我同B都決定私下俾多一萬日圓俾司機作為"貼士".
今次駛費都唔多, 除左果一萬円"貼士", 我地只用左五萬円. 大都花響食物,紀念品,兩隻玻璃杯, 兩隻CD. 駛咁少真係意外.
寄望下個旅程一樣咁好玩.
(完)

2007年8月20日

兩傻遊之五萬日圓北海道遊(三)

入住呢間溫泉渡假酒店果晚, 酒店安排有暑假煙花匯演. 響荒山野嶺放煙花都幾危險, 一個唔該燒著D草木就好難救. 佢地仲一個星期放兩次煙花, 果然重本. 重申佢地唔係煙火, 真係放好巨型既煙花. 我地就響酒店外個廣場超近距離睇住個煙花響頭頂爆開, 仲震撼過睇維港煙花.

呢間渡假酒店另一賣點係溫泉, 但唔知點解我實在唔好一大班光豬浸響一池熱湯. 我唔介意光豬, 響香港做按摩都係脫光去做, 但我既底線係一對一. 間房得我同師傅就無問題, 因為我相信師傅係真心做按摩, 但一去到出面沖凉就周身唔自在, 尤其當浴室多過一個人. 而響日本溫泉, 一定要剝清. 就算住響呢間酒店佔左九成住客係日本人(當日全酒店得我地一團港客.), 但係都係唔習慣. 結果成個行程我都無去溫泉.
第三日行程好簡單, 只係去兩個地方: 玻璃底船同小樽. 一生人最容易暈船浪, 每次去遊船河都暈足幾個鐘, 所以無去遊船河已經十幾年. 就連上去雙魚星號既膽都無. 今回唯有頂硬上尤其見到隻船咁細隻, 更加驚! 基本上響船底望落去我都希望可以睇到好多魚遊黎遊去, 實情出到海都只係見到大量海膽同小量魚同海星, 都幾失望. 反而回航餵海鷗就有趣得多.
跟住就到小樽, 每每有人提起北海道, 除左雪節之外就係小樽運河. 不過我覺得都係不外如事, 可能冬天落雪時會係靚D.
同B去附近既著名music box商店行時, 佢發現間舖入面D英文告示真係唔知講乜, 文法錯晒, 要睇番中文先知大約講乜. 因為間舖太多人所以無影相, 心諗只係果間舖係咁, 點知跟住行多幾間舖入面D英文都係錯到笑. 原來香港都未算太差, 仲有大國墊底.
(代續)

2007年8月19日

兩傻遊之五萬日圓北海道遊(二)

講真參加旅行團真係信個行程表十足十既話一定好失望, 因為一定有一句好細既字仔寫住: 行程如臨時有更改將不另行通告. 而我地呢個行程表第一日係無行程, 反而一落機就上巴士去左一個牧馬場.
第一個印象俾我係: 北海道好似真係好荒茫. 由機場到牧場一段路, 盡見農地或小森林. 甚至一大片草地上有一群乳牛, 感覺係我終黎岩左地方. B同我都好滿意.

到達牧場, 所謂既牧場一邊真係一個牧馬場, 有一大片草地俾馬匹走黎走去. 另一邊算係個主題公園. 我地可以騎馬坐馬車等等. 當然亦可以租部golf車響園內自己暢遊. 結果我地租左部golf車楂住周圍去. 邊個揸車? 我無揸十年, B無揸幾年. 但係...B唔想揸. 結果信我一次, 等我揸. 雖則呢D golf車好易揸, 只需識踩油同煞車就得, 但係我都照足平時揸車咁左右望. 只因園內既馬路, 除左有人/馬/馬車/golf車/單車行之外仲有真正既私家車貨車同大巴行. 一個唔專心都會撞車. 不過除左可以近距離睇到馬之外其實真係無乜好睇. 我都志在練下手車, 好彩今次我都無嚇親B, 仲識點揸車.
離開牧場, 天都黑齊, 係時候番酒店. 由牧場到酒店車程要成90分鐘. 可能之前飛機搖得太緊要, 令到自己有D唔舒服, 原訂番到酒店就有晚飯食. 但自己就暈陀陀, 結果食左兩啖就頂唔順番房大覺訓.
第二日行程係去洞爺湖, 到果園擇生果, 最後熊牧場.
一生都見過好幾個湖, 但最靚應該係呢個洞爺湖, 尤其朝早湖面有層薄薄煙霞, 好鬼淒美. 如果時間許可, 我地一定租架船仔黎個湖上泛舟. 可惜今次係跟團, 得果20分鐘影相時間. 其實果日好曬好熱, 天空一舊雲都無. 跟住仲要去果園! 我地就好似干煎蝦球咁, 外面乾晒. 心諗果園都應該有瓦遮頭卦, 有就有, 不過係一顆顆大果樹. 今次當做係車厘子, 雖則係任食, 之但係食得幾多呢? B甚至有部分時間坐響樹下抖涼. 得我努力咁食呀, 影相呀~ 響園內見到一D提子好靚呀, B仲偷偷擇左一粒試, 好甜呀!!
跟住就係去熊牧場, 不過我對"真熊"無乜興趣, ("假熊"可能仲吸引!) 我寕願睇樂樂盈盈. 所以今回我地放棄呢個自費節目, 走左去熊牧場對面一個真火山睇睇. 仲要係一個真正活躍緊既火山! 咁大個仔都未試過同個火山有咁近距離既接觸, 好神奇. 我地坐響火山下吔雪榚, 真正既"冰火"荒謬感受!


跟團就算報名時講食得幾好, 都只不過屬於團體餐. 即係計過晒價錢而定. 正如之前一晚既酒店自助晚餐, 講真真係得二三星水準. 今次呢個午餐哩, 除左原訂既"團體"式海鮮火煱外, 我地仲可以自費加餸. 經過導遊多番推介, 我地每組都加左一隻"鱈場蟹". 原以為加一隻蟹可能會太少, 誰不知隻蟹大到哩...(請看下圖)
大到O 咀, 先至知分分鐘我地兩個未必食得晒. 原本導遊叫我地生食D蟹腳, 之不過B最怕食生野, 佢一個唔該就將D蟹放晒入個煱入面. 好彩我仲爭取到試一試生食蟹肉既滋味. 味道好甘甜, 有海水味但唔腥. 但就算煮熟D蟹, 味道一樣好味兼且啖啖肉. B食到一半巳經飽到停晒手, 我又唔想浪費呢隻成萬五円既巨蟹, 結果食左成個鐘先食完. 飽到有罪惡感!
飽肚後就番酒店. 今次我地只搬三次酒店, 包括第一晚既日式溫泉酒店, 第二三晚既溫泉渡假酒店同埋最後一晚響市內既酒店. 今回呢間溫泉渡假酒店竟然響深山入面, 足足兩個鐘頭車程又越過高山又越過谷先至到達呢間深山酒店.
(代續)

2007年8月17日

Hot Fuzz 笑死人特警

由第一日知道呢套戲就已經好期待欣賞呢套戲. 可惜3區DVD或連戲院上都無望, 結果響飛機上面睇左呢套戲. 響幾吋既screen睇呢套戲有D對唔住部戲, 番到香港立刻買番隻1區睇多次.

由"Shaun of dead"原班人馬再加英國最top果幾位喜劇演員, 出黎效果非常之突出. 超快既節奏, 急速精彩既剪接, 情節充滿荒謬同衝突, 劇本精密笑料又層出不窮. 確係一部佳作. 尤其片尾喪玩"Point Break"同"Bad Boys"兩片情節亦玩得好搞笑. 不過全片充滿極多血腥暴力鏡頭, 爆頭斬首較剪插喉爆口乜都齊. 心血少真係要諗諗. 亦令我諗起多年前李修賢既小本製作"月黑風高", 一樣既處境, 只差在本地果部節奏太緩慢.
(98/100)

兩傻遊之五萬日圓北海道遊(一)

係咁既, 今年情人節B又送上一份得張紙既禮物. 我都唔係第一次收呢隻"禮物", 通常B響賀卡入面加多張紙仔, 上面會寫我將會得到既獎品, 例如大餐一頓又或者去澳門打個轉. 今年哩, 張紙寫住旅行, 地點任擇. 因為佢見我日日放工番屋企時都好似得番半條人命咁, 所以想我同佢一齊放假去個旅行散心兼充電.

跟住我地開始計劃行程同地點, 由地中海印度歐洲加拿大甚至陪佢番拉斯維加斯探佢父母都諗過. 再加上因為佢同之前份工約滿, 新工合約又未搞掂, 結果行程一直由六月拖到八月. 最後決定去北海道. 因為一來為佢荷包著想, 二來天氣又唔會太熱或太凍. 不過, 原訂我地會買"自駕遊"套餐, 即係機票酒店包租車. 但因為時間太趕未有空去計劃行程, B亦唔多信任我既駕駛技術, 因為我都有十幾年無揸過車. 所以今次破天荒join旅行團! 嘩!! 上次参加本地旅行團巳經係十幾年前既事. 今回破格回歸, 有D大鄉里出城既感覺. 尤其要B一齊参加一個廣東話為主既旅行團, 確係辛苦左佢, 唯有我響旅程中充當"快譯通".
皆因行程係早機去晚機返, 我地呢D住響新界以東既人黎講, 要朝早五點起身六點出門七點到機場九點起飛, 仲辛苦過番工. 話明豪華團, 無理由咁辛苦卦! 所以B提議響出發日前早一晚去機場酒店過夜, 咁咪唔駛咁早起身, 可以六點九起身梳洗, 七點二就準時到機場集合.
只不過萬萬諗唔到個颱風會打回頭, 出發前一日整個八號風球. 當人人走晒趕住迫船迫車番屋企, 我仲響控制室執自己既"蘇州屎", 心諗打八號波, 分分鐘未必有得出發喎. 結果成六點幾先趕入機場酒店, 成功避開左人潮.
第一次入住機場酒店, 酒店仲upgrade左我地去商務樓層. 響房間入面仲可以望到飛機降落, 旅行社仲打黎因為就快落風球, 所以旅程依期出發.
既然入到機場, 當然入去新既二號客運大樓行行. 原以為好大好多野行, 點知...
由一號大樓或酒店行去就非常麻煩, 九曲十三彎, 又上又落先到. 去到感覺好似東涌某商場, 店舖唔係因打風提早休息, 就係完全無吸引力. 難怪成個大樓除左要check-in既旅客之外就好少人行果D商舖. 我覺得好失望亦認為呢個大樓好失敗. 仲話諗住幫襯食個dinner, 望到果D食肆, 即刻唔駛諗, 番去酒店食.
8月11日朝早, 終於如期出發. 今回跟團既除左我地兩個之外全部都你一家大細, 而且見到有細路仲係好百厭果隻添! 弊! 無法啦, 鬼叫係暑期咩.
今次搭係一班加班機, 而且仲爆滿添! 兼且係今生入面第二程最辛苦既航程. 辛苦唔係成機細路嘈到拆天, 而係我好怕搭747, 一來又舊又迫, 尤其我地坐響中間, 完全好似三文治咁夾到實一實, 想郁少少都會撞到人. 兼且今次五個鐘航程有三個鐘係響氣流入面不停咁上下左右搖, 搖到根本餐又食唔到, 想飲杯水都怕搖瀉. 想訓又被搖醒. 直至去到北海道機場, 天朗氣清! 順利開始我地五日既行程.
(代續)

2007年8月10日

硬膠的誘惑

見到"娜姐"發起"無無謂謂消費實錄", 即刻舉起所有野加入兼支持.
天生就係一個唔識理財既人, 曾經幾乎變成破產人仕, 兼且幾乎連愛人都走埋. 先至去學識理財投資善用一分一毫. 到今日, 我巳識得忍手, 至少以往一入HMV, 無六百都要五百先行得出黎, 今日分分鐘十次有九次係空手出黎. 當然識我既人實話: 車! 你都買鬼晒, 乜碟都有, 梗係空手出黎啦! 但係, 阿媽有句名言: 碟係會出唔完, 永無止境, 問你點追!
一生最大駛費除左旅行之外, 相信就係貢獻響CD/VCD/DVD/Video/LD上 . 青年時代開始對電影熱衷, 一個星期睇三四部戲都唔斬眼. 後黎錄影帶流行, 就花錢租錄影帶睇. 後黎LD既熱潮, 我更加水深火熱! 租碟已經滿足唔到我, 租完番黎重要轉錄成影帶收藏回味. 後黎就連影帶都覺唔夠, 索性買隻LD番黎. 當時美版LD都要二三百蚊一隻, 一個星期買兩三隻, 一個月都要近三千左右埋單. 雖然當時人工都唔錯都有萬幾蚊, 扣除家用仲可以有七八千留用. 但單影碟費巳經三千, 仲未計CD. 其實一個月實際使費可能得一二千用.
後黎Video同LD被淘汰, VCD同DVD既冒起, 我又要將自己所收藏既電影又黎一次轉格式行動. 美其名收藏, 實則等同燒錢. 結果由原來四百幾部戲, 變成現在共擁有千幾部中西電影. 尤其當HMV初引入香港, 雖則價錢高昂之但係片種齊全, 對我呢種懶人完全似係被催眠咁, 不停咁幫襯! 尤其當時佢地既"吸印仔"制度, 買滿百五就有一個"印仔", 滿二十個就可以換一樣價值百二蚊既貨品. 果時真係真心為"印仔", 就似宜家D師奶為左百佳惠康既印花換個煎pan瘋狂買野一樣. 試過買野爭十蚊先有多個"印仔", 竟然買塊清潔用"絨布".
後黎網上購物又平又方便, 幫襯HMV既機會少左. 好難好難先可以吸到"印仔". 後尾, HMV被收購. "吸印仔"呢家野索性取消埋.
宜家坐響書房兩邊都俾高高既"碟櫃"包圍, 仲未計放響飯廳存放B既影碟收藏既碟櫃. 成日有人話: 買咁多做乜呢? 你睇得晒咩? 你會成日重睇咩? 講真, 我呢隻可能算做係病態, 正所謂"唔買唔舒服". 而且我真係睇唔晒, 至少而家有40%既碟係未開封或未睇過. 當然唔排除有朝一日會開黎睇. 但有時我真係會拎番一D戲又再重溫, 始終好戲係百看不厭!
不過近呢一兩年, 雖然買碟有節制, 之但係又染上失憶. 就係星期一買完A碟同B碟, 星期五就會買C碟同A碟, 完全唔記得四日前其實已入A碟. 已經發生左好多次, 買左幾隻寃枉碟. 所以往後一買碟, 我會寫底買左乜野, 廢事下次再入重覆.
有時, 外人係好難明呢D"硬膠"有乜魔力令我地奉獻咁多. 無法, 電影或音樂都係文化既一種, 可以陶冶性情. 只要唔走火入魔, 都係不失一個幾唔錯既寄托.

aulina: 無無謂謂消費實錄
Bill: 無無謂謂消費實錄
Guy: 無無謂謂消費實錄
Gabriel: 無無謂謂消費實錄
rice: 無無謂謂消費實錄
lu: 無無謂謂消費實錄
HW: 無無謂謂消費實錄(失敗篇)無無謂謂消費實錄(成功篇)

2007年8月7日

爛片之最

無幾耐之前悶悶地開隻DVD睇, 睇到一半實在睇唔落去. 因為實在太爛. 差劣導技, 演員出盡六壬都係無補於事. 奇情就奇情在套戲係講去製作部爛話劇, 相當諷刺.
講真自己"閱片無數", 乜鬼好片爛片都照單全收, 甚少會打回頭. 有時拍爛片, 有專登好心拍爛片, 亦有無心化腐成爛片. 其實最好睇係專登有心拍爛片, 明知自己無成本但又要將戲完成, 唯有將貨就價, 做出好多好爆笑場面. 演技導技差已經算少事, 有時連劇本都失控, 演員可以響鏡頭前發夢, 道具或特技穿崩就最好笑. 尤其套戲拍短左或拍漏shot要時不時loop番舊片段或鏡頭, 完全睇到反肚. 最經典有套C級西片竟然偷用幾部經典電影既片段加插落自己套戲, 成為一套千軍萬馬有齊戰爭加飛車動作既電影. 導演只加番幾場靜態既戲就貫連成一部戲, 唔可以唔佩服剪接既技巧同唔怕醜既勇氣.
以下係我多年以黎所睇過最勁既爛片, 有興趣都可以搵搵過下癮.

1)Hard cash
係Hard Cash唔係Hard Rain.套片頭20分鐘係最精彩! 我指係好睇! 真架! 當條橋一twist! 嘩! 真係絕! 但往後70分鐘每況愈下. 就好似係兩個導演拍咁. 後半段更淪為為特技而特技. 但唔知做乜, 係導演沉醉blue screen或是無錢出外景又或者為演員安全問題, 所有飛車鏡頭係用blue screen黎拍(即係key個演員同架車上去), 就連尾場一場船上交談戲都用blue screen key個海景! 而且做得好求其. 破壞左頭20分鐘最好既編排!

2)奇逢敵手
我從來未試過睇套戲要睇到熄機! 終於有幸... 試一次! 睇到中間要停, 透一下. 因為實在太爛. 林領東可能學Woody Allen咁盲左去拍呢套戲. 全片東拉西扯, 胡鬧非常. 學石琪話齋: 全片笨頭笨腦! 完全反智. 夠膽死半中間變左"點解泰國咁好玩"!! 全片做得最好係...Nel Nel! 做番自己!

3)Spitfire
一代C片王Albert Pyun又一傑作. 近年努力向上爬成為B片導演, 呢套係佢既舊作.一部老掉牙既故仔, 可以好公式但佢又要拍得別出心裁. 結果成為一套"寰宇風情".由羅馬追到馬來西亞(實情菲律賓扮)再追到香港. 成班人走黎走去無非為左條匙!女主角不停表演"楊麗青"式失驚無神跳起後空翻既絕技. 笑到甩褲! 最重要故仔越拍越複雜, 條線都唔知去左邊.西片拍香港永遠幾樣野: 避風塘, 街市, 打麻雀. 呢套都唔例外. Tomb Rider 2有打麻雀場面(deleted), 呢套都有仲好無厘頭添! 今次呢套戲仲成功將紅磡火車站改成機場(又租唔到機場拍啦!), 真係嚇親街坊. 但最嚇親係尾段中環人質事件, 當街當巷挾持人質, 後面有"真差人"行過被攝入鏡, 但阿SIR都唔理就最經典! 吳大衛有份客串但一早死左.想認識Albert Pyun, 呢套可以算做入門! 先再睇套'極速潛龍3". 包你屋都燒埋!

4)The Third Wheel
Luke Wilson開始有D濫拍. 呢套咁既野雖然開正佢戲路但個劇本相當唔掂, 悶到出煙. 再加上Miramax孖寶: Ben Affeck, Matt Damon不停好煩咁客串出鏡. 絕對令觀眾越睇越燥! 結局更加令人髮指! 如果我係肥佬老板, 一早叫燒片啦!唔怪得美國都未上過!

5)Disaster
可能亦係史上最爛既Die Hard式片. 全片除左特技差, 演員差, 配音差. 導演完全無心機拍, 好多場面都魂遊太虛, (例如主角匿埋響炸彈隔離仲唔知!)穿崩佈景道具唔連戲場面又不停出現. 電腦特技又小兒級好似幾十年前粵語長片咁兒嬉! 最難頂係剪接, 完全上文不對下理, 兩組鏡頭跟本唔夾. 而且好明顯套片得80分鐘, 因為有D鏡頭響成套戲不停循環再用.

6)In the cut
之前搵法國佬投資"The piano"好睇非常, 點知同樣係法國佬投資既"In The Cut"相差咁遠! 故弄玄虛還可以但可惜由頭到尾不停反駁自圓其說! 如果仲有人講"迷失東京"扮野, 唔該一係死左去, 一係快D去睇下"In The Cut", 佢果D扮野悶藝真係手高眼底!呢套真頭唔可以去用"爛"字去形容, 根本可以用"垃圾"黎代表! 零分已係俾多佢!
睇完後, B話"In The Cut"根本唔貼題! 名片應該叫"The Woman who's like (suck)dicks"!

7)靚女差館
眾望所歸無得留底~

8)Air Strike
未睇過乜野"大美國主義"電影. 唔該要見識下呢部垃圾.片中美軍面目可憎, 再加幼稚園級導技+電腦特技, 完全無故事可言, 無無聊聊強大爆炸場面, 慳皮戰爭場面係翻用新聞片, 狂抄John Woo慢鏡+MV式爆笑剪接, 同埋港片式一枝手槍可連開三四十發子彈而只射死一大位敵軍...
一部浪費左我90分鐘既垃圾!

9)阿嫂
多得衛視電影台不停重播, 終於一睹呢套咁有爭議性既戲.我只能夠講三個字去形容: 哈! 哈! 哈!空洞劇情, 無謂空鏡場面, 角色幼稚. 好難想像呢套係套戲而監製同老板又收貨.

終極冠軍: Rangers
呢類C級片, 荷里活一日都唔知出產幾多. 但係作為呢套能夠有幸上呢度, 當然有原因.因為呢套極低成本既動作片, 竟然有千軍萬馬炸飛機飛巴士場面. 真奇...但係要係睇開美國動作片, 就會發現...............呢套野竟然偷用其他電影既動作場面, 一字不漏. 結果成套野乜大場面都齊, 佢地只係補番主角大頭shot就得. 但又咁多雜碎片段都連到成套戲. 剪接果位絕頂一流.

(以上全部轉載自己多年以黎響"梅小玲"上面寫既介紹並經過修改)

至於一開始就講果套係"The Producers" 2005年重拍版.

2007年8月4日

變形金剛

"變形金剛"絕對係細個時幾迷既卡通片. 當時家境清貧, 真係無錢買個超合金既"變形金剛"黎玩, 但齋睇卡通都已經夠. 不過都隔左十幾廿年, "變形金剛"唔變車變左第二樣野: 氣, 過氣.

今時今日由無限幻想既卡通變成真人電影確係廿幾至三十幾既男仔既夢想. 一套可以有機械人響城市大街大巷打交無限破壞, 比見到哥斯拉響紐約生蛋更興奮.

作為一套暑期娛樂片, "變形金剛"絕對做到有聲有色有笑又有動作. 可惜係明知Micheal Bay一直係唔識講故仔, 只靠佢拍廣告片既技倆型造壯麗既構圖. 仲記唔記得舊年套"The Island"嗎? 爛既程度同O咀既程度絕對拍得住中古港片"東京攻略". 不過今回至少一早有個好基本既大綱, 所以出黎都係一忽忽. 但都跟到講乜. 兼且講到好白添!(相信係要兼顧小朋友)

特技作為呢套戲既主要原素, 完全無投訴. 眾車變形或街頭巷戰都已經超複雜, 令到在場班小朋友嘩嘩聲.

暑假仲有兩套老少咸宜既娛樂片:"五星級大鼠"同埋"阿森一族", 等回港後一定入場睇.

2007年8月3日

惡搞300

難忍唔轉載呢段惡搞, 因為實在好笑到不得了.


伸延閱讀: 這就是斯巴達!!!

2007年8月2日

試片室: The Invasion 無恐不入

仲記唔記得Nicole Kidman響"The Others"入面既演出? 佢演驚慄片確係有一手.

呢套重拍五十代經典"Invasion of Body Snatchers", 又係外星人入侵, 無聲無色進入人類身體.
可惜新版拍完後被監製另外揾人補戲, 雖則質素成疑, 但預告片仍然緊張過人.

2007年8月1日

從皇后再看Children of men

"末代浩劫"絕對係一套好出色既作品. 舊年失落奧斯卡真係替呢套戲唔抵. 從劇情意念到推進過程, 除左有無限張力, (尤其幾場嘆為觀止既長鏡頭!) 更加令人反思政治運動既背後目的.

套戲幾個月已睇過, 近日"皇后事件"我又拎番隻碟出黎重溫.

一班人為左保衛人類既唯孤, 由好正面到最後殺人放火不擇手段為左奪得向政府對抗唯一既籌碼. 雖則聽落荒謬但近日事件, 亦令好多野值得我地去思考. 究竟我地有無被利用? 究竟運動最終目的係乜? 係咪由始至終都係一樣呢?
我相信人係邪惡, 有時事先張揚為世界, 到頭來都只不過為自己未偷取生存籌碼.
又可憐又可悲.