2007年8月10日

硬膠的誘惑

見到"娜姐"發起"無無謂謂消費實錄", 即刻舉起所有野加入兼支持.
天生就係一個唔識理財既人, 曾經幾乎變成破產人仕, 兼且幾乎連愛人都走埋. 先至去學識理財投資善用一分一毫. 到今日, 我巳識得忍手, 至少以往一入HMV, 無六百都要五百先行得出黎, 今日分分鐘十次有九次係空手出黎. 當然識我既人實話: 車! 你都買鬼晒, 乜碟都有, 梗係空手出黎啦! 但係, 阿媽有句名言: 碟係會出唔完, 永無止境, 問你點追!
一生最大駛費除左旅行之外, 相信就係貢獻響CD/VCD/DVD/Video/LD上 . 青年時代開始對電影熱衷, 一個星期睇三四部戲都唔斬眼. 後黎錄影帶流行, 就花錢租錄影帶睇. 後黎LD既熱潮, 我更加水深火熱! 租碟已經滿足唔到我, 租完番黎重要轉錄成影帶收藏回味. 後黎就連影帶都覺唔夠, 索性買隻LD番黎. 當時美版LD都要二三百蚊一隻, 一個星期買兩三隻, 一個月都要近三千左右埋單. 雖然當時人工都唔錯都有萬幾蚊, 扣除家用仲可以有七八千留用. 但單影碟費巳經三千, 仲未計CD. 其實一個月實際使費可能得一二千用.
後黎Video同LD被淘汰, VCD同DVD既冒起, 我又要將自己所收藏既電影又黎一次轉格式行動. 美其名收藏, 實則等同燒錢. 結果由原來四百幾部戲, 變成現在共擁有千幾部中西電影. 尤其當HMV初引入香港, 雖則價錢高昂之但係片種齊全, 對我呢種懶人完全似係被催眠咁, 不停咁幫襯! 尤其當時佢地既"吸印仔"制度, 買滿百五就有一個"印仔", 滿二十個就可以換一樣價值百二蚊既貨品. 果時真係真心為"印仔", 就似宜家D師奶為左百佳惠康既印花換個煎pan瘋狂買野一樣. 試過買野爭十蚊先有多個"印仔", 竟然買塊清潔用"絨布".
後黎網上購物又平又方便, 幫襯HMV既機會少左. 好難好難先可以吸到"印仔". 後尾, HMV被收購. "吸印仔"呢家野索性取消埋.
宜家坐響書房兩邊都俾高高既"碟櫃"包圍, 仲未計放響飯廳存放B既影碟收藏既碟櫃. 成日有人話: 買咁多做乜呢? 你睇得晒咩? 你會成日重睇咩? 講真, 我呢隻可能算做係病態, 正所謂"唔買唔舒服". 而且我真係睇唔晒, 至少而家有40%既碟係未開封或未睇過. 當然唔排除有朝一日會開黎睇. 但有時我真係會拎番一D戲又再重溫, 始終好戲係百看不厭!
不過近呢一兩年, 雖然買碟有節制, 之但係又染上失憶. 就係星期一買完A碟同B碟, 星期五就會買C碟同A碟, 完全唔記得四日前其實已入A碟. 已經發生左好多次, 買左幾隻寃枉碟. 所以往後一買碟, 我會寫底買左乜野, 廢事下次再入重覆.
有時, 外人係好難明呢D"硬膠"有乜魔力令我地奉獻咁多. 無法, 電影或音樂都係文化既一種, 可以陶冶性情. 只要唔走火入魔, 都係不失一個幾唔錯既寄托.

aulina: 無無謂謂消費實錄
Bill: 無無謂謂消費實錄
Guy: 無無謂謂消費實錄
Gabriel: 無無謂謂消費實錄
rice: 無無謂謂消費實錄
lu: 無無謂謂消費實錄
HW: 無無謂謂消費實錄(失敗篇)無無謂謂消費實錄(成功篇)

8 則留言:

aulina 說...

我都有約兩三成從無開過封/睇過嘅VCD / DVD / CD,完全明白唔買唔舒服嘅感覺!:~~

Guy 說...

我也有十零廿隻DVD待開封....

不單cd/dvd,有些書買來也是待看,唔買唔舒服 XD

小張 說...

死啦, 原來咁多人都係好似我咁敗家既。
睇怕老左都要拿番lee d 野去賣先得。

Gabriel 說...

你屋企d存貨根本多過間細既hmv:p

lu 說...

嗯...我跟aulie和guy也是一樣.家裏沒看過的VCD/DVD/書可能要比看過的還多

-__-;

小瑟 說...

你個dvd櫃好正喎, 唔知係邊度買既呢??? 貴唔貴架???

Frankiewoo2001 說...

你都好,我有至少70%買番黎既碟未睇過,淨係嚮買果陣試下睇唔睇到,跟住就唔知等到幾時再開封勒!而家又話新制式勒,都唔知點算。

mysimplelife 說...

果D櫃係IKEA Billy書櫃. 五百幾蚊左右(橡木)