2009年3月30日

吃了屎的女孩


我鍾意果句: Thank you Fans...

2009年3月29日

HP慢慢的去, Lenovo慢慢的來

部HP desktop終於病入膏肓, B頂唔順要花每次七百蚊(係, 新價係七舊!)再加兩星期搵HP人出黎整機決定要換機! 好在我響之前已經將大部份檔案都過落我部手提電腦(單係過果40GB歌曲已經用左五個鐘!)
根據之前網友意見, 似乎大家都傾向Lenovo. 咁啱PCCW又有優惠, 原價四千幾既C2D雙核心電腦平賣四千有找. 況且部HP之前都係幫襯PCCW買, 售後服務都ok. 點知今次事隔幾年竟然有變! 原訂星期四送貨, 直到是期三都無電話通知幾多點送貨, 走上PCCW既攤位問, 對方都見到我既order, status係等送貨. 當日賣野俾我位哥仔好好心搵到個送貨部既電話, 點知打上去又係電話錄音. 直至星期四朝早對方回電話星期五送貨星期六裝機, 原來而家PCCW所有野客人都係無say, 對方鍾意幾時上黎就"一定"要幾時上黎.
部新電腦暫時感覺唔錯, 當然B要再學Vista既功能. 至於部舊HP, 已經聯絡左明愛上門做電腦回收捐贈.

2009年3月28日

一餐六千蚊既晚飯: 仁寶小館

升職加薪, 同事們當然嗌晒要(我)請(佢地)食飯. 好彩同期仲有兩位同事都升職, 所以三個人請我都覺得ok, 頂盡咪每人一千蚊.
同事M揀左呢間位於北角和富道既小菜館, 根據"開飯"上面網友介紹都係唔錯既. 心諗呢種小菜館貴極有限, 同事亦報價只係二千六蚊一圍, 三人夾份都係每人一千有找. 但我實在太天真太傻, 成個部門成廿幾人, 係要分兩檯... 呢個我係去到先至知.
至於菜式一開波就黎幾碟炸物: (是晚對眼有古怪, 好多相都out focus, 請見諒)
賴尿蝦 (小弟唔食蝦, 唔知味道)聖子 (另一樣我唔食, 一樣唔知味道)椒鹽排骨 (貌似好乾, 實質味道唔錯)椒鹽魷魚 (又係炸...味道一流)油炸鬼釀魚肉 (aka 鬼鬼馬馬) (呢個真係精彩, 樣騎厘但原來油炸鬼溝沙律醬係可以!)龍蝦仔 (小弟唔食蝦, 唔知味道)兩碟菜 (前者味過啖, 後者味過濃)豉油日本雞皇 (果然係招牌菜, 有雞味又易入口, 好耐未食過咁正既雞)蝦蒸飯 (雖然唔食蝦, 但個蒸飯好正呀!!)
再加埋一班"酒鬼"同事喪隊, 結果是晚埋單五千九, 每位承惠二千大元, 連老細都話太貴. 講真二千六百蚊咁既環境食呢D菜式確係好鬼貴, 一D都唔值.

(後記: 同事們第二朝都醉醒提議不如出一半, 免得食左我地隻"車".)

我的HKIFF 2009 (Day 2)

一個老師走到鄉下地方教書, 除左為教育仲有為乜呢?
套戲前段鋪排不錯, 直至中段前度男友既出現終於明白老師係為左逃情而走到鄉下教書, 雖然口口聲聲話寧願孤獨都唔要愛, 但係情不自禁非禮學生一段真係有D矛盾, 亦令人好失望. 失望既除左為左人物故事亦為左編導過份鋪排非禮場面而目瞪口呆. 同樣兩場生牛仔既戲過於逼真同詳細亦令人摸不著邊際.
反而女角單親媽媽描寫得好好, 尤其知道自已個仔被非禮仍然願意救老師一段, 正好呼應之前老師開解左佢對前夫既心結.


The Country Teacher 鄉村有機老師

2009年3月26日

我的HKIFF 2009 (Day 1)

鍾德勝過去既作品都ok, 今次加入崔允信做監製, 似乎更具野心.
今次同志題材成為副題, 主題係: 毒! 講真睇完部戲第一下感覺係: 乜咁似"迷上癮"(Requiem for a Dream)?? 主人翁因為毒品跌到落谷底先醒覺, 仲唔係迷上癮?
亦因為同志變得副題, 更顯得編導過份鋪排大量床上肉搏戲, 變成肉慾大觀園, 有D跌眼鏡. 但直到中段主角進入解毒營, 部戲變得有趣好多, 而且漸入佳境. 結局係意料之內, 只係有D蠢.
相對之前"只愛陌生人", 呢套主題確係更加廣闊, 但亦因為題材角度有變, 同志角色只落得沉淪慾海, 呢一點會係幾可惜.


愛到盡 End of Love

2009年3月19日

點解D同事日日響公司食榴槤?


相信我會可能係第一個響工作期間俾榴槤臭死既人....

2009年3月17日

碌冧Encore

距離上次幫襯都已經事隔兩年, 係時候溫故知新, 皆因上次感覺良好, 值得回頭.
或者因為時道唔好, 乜野套餐都出爐, 連賣四十五蚊既一人火煱都有, 實在有D不祥預兆. 既然有咁多套餐選擇, 就揀個二人餐睇下有無keep水準.
一上個餐湯: 蛋花疑似粟米肉碎湯. 無味偏甜, 個獻杰到無朋友. 根本就生粉水湯, 有D想嘔.
跟住上沙律木瓜牙車快, 各位, 你見過牙車快係咁既樣未?
跟住個燒豬頸肉, 薄切加靚魚露, 味道唔錯.最後個主菜南乳雞跟炒飯, 味佳可惜雞件得四件, 其中兩件係有大骨.
最終我地係完全"空虛", 就算跟住有甜品(其實都只係四塊椰汁膏)B罕有地要加碼, 最終叫左一多個牛撈檬. 味道唔錯, 可惜份量細得可憐.

雖則少飽離開, 但個套餐可以有D咁可怕既野出現, 相信下次都係散嗌好D.... 如果真係有下次既話.

2009年3月16日

又有新玩具....



講真搬左入黎將軍澳成三年原本一直想買抽濕機因為明知將軍澳比倫敦更似霧都, 但一直都無實行, 直至上星期家務助理阿姐響睡房大叫先發現因為太潮濕睡房牆身都發霉, 呢一點先再次激起我地真係要買部抽濕機.
經過多次格價, 終於買左呢部. 試用呢部機, 起初都唔覺有乜效, 但後來發現真係有效, 只係乾左半日衫, 已經有半缸水.
我諗再濕我地都唔會怕.

2009年3月14日

少理阿爸


吾... 咁岩既? 歡迎對號入座.

科學教派??

唔係嘛?? 重申我同呢個團體無關, 果個只係佢地經Google Adsense登響呢度既廣告. 連呢種教會都登網上廣告, 果然與時並進.

伸延閱讀:
神秘之夜 » 科學教 Scientology

2009年3月13日

work @ home

終於完成三日在家工作既特別行動, 俾我感覺真係不如於公司工作.
之前仲以為在家工作會好自由, 為所欲為. 一路食住麵睇住電視著住睡衣做野, 但原來到真正實行時先知之前一切都係夢一場.
首先, 公司既system remote 反應好慢. 之前做過測試一切安好, 但係一到正式, 蝦碌連場, 唔係login唔到就係連印email都有困難. 亦因為系统反應慢, 連帶工作進度都被拖慢. 又咁好彩台灣一大堆野湧埋黎, 自己都有D手忙腳亂.
響屋企工作, 雖則開住電視既音樂台播歌襯底(其實響公司都可以開住電視做野!), 但根本係無時間去望一眼. 食野亦係個問題, 響公司好少一路食野一路做野, 但響屋企, 煮麵太方便, 零食又太吸引, 趁住系统有阻塞既空檔就心思思想去煮個麵食.... 當然都試左一次咁多... 當然仲有響屋企無人得我一個, 無人答訕有D唔慣. 但尋日B放假留響屋企, 反而令我太分心. 不停響我面前行黎行去, 叫我幫手整野餵魚, 我又唔想咁分心.
終於三日在家工作既時光告終, 今日會繼續番公司工作, 當然仲有新電腦用啊! 我會掛念響公司工作, 少雜念, 又有同事雙伴, 系統又唔會太慢太限制. 工作, 留響公司做好了. 屋企都係留番黎生活吧啦.

2009年3月12日

兩傻遊台灣2009 (5)

黎到旅程既最後一日, 開始習慣高雄既步伐, 亦都習慣高雄熱熱既天氣. 因為係搭夜機, 所以有一大日空閒. 結果我地check out左酒店之後, 就去左對河既高雄歷史博物館參觀.
其實甚至我對台灣既歷史都知得好少, 甚至十幾年前先知日本曾經佔領台灣一段好長既時間, 所以今次博物館之行可以彌補不足.

之後就去左最後一個地方, "夢時代"商場. 事關B酷愛摩天輪, 呢個商場天台亦有個摩天輪, 只可惜非常硬膠, 既然有個咁靚景, 應該可以就咁坐響摩天輪內欣賞風景, 可惜佢地響車廂外貼住Hello Kitty巨型貼紙, 遮左一半風景, 好鬼掃興. 不過個商場真係大到無輪, 行極都行唔完, 不過亦見商場有不少地方只係劃成雜價攤.
因為約左酒店既專車到機場, 所以先要返酒店拎行李跟住就坐洒店既七人車去機場.路程中發現天開始密雲, 落車時都覺涼左. 之前一日我地已經上網做網上劃機位, 所以只需到機場check in行李. 諗住check in完行李可以響機場舖頭行下, 點知成個機場離境大堂得一間新東陽舖頭加一間酒樓(見圖就係咁多勒, 相既左面已經係細細既酒樓), 頹到無話可說, 就算過左海關都係得一間免稅店. 上到機, 天開始落雨. 番到香港前甚至遇上氣流, 將我地拋上拋落左好幾次. 就咁就結束左我地今次四天台灣之旅.
今次俾我感覺係台北比較係現代化城市, 行人好急速好忙. 高雄似個過份急速發展既城市, 有好新既建設但亦有好多丟空或無去維修既舊建設. 不過高雄人好親切好肯去幫人. 戰利品:

2009年3月11日

測試進行中

究竟要測試D乜呢? 係咪想知機場清潔係咪真係人人愛? 真係無言...

2009年3月10日

兩傻遊台灣2009 (4)

是日行程係到台中, 為免再次身水身汗由酒店行去捷運站轉車去左營, 所以決定"打的"去左營, 原本一望地圖都知路途遙遠, 但諗唔到遠到咁誇張.車站, 月台甚至列車都好似好接近日本既"子彈火車". 坐上火車, 座位空間好闊, 就算腳前放一件行李都可以. 行車都好平靜穩定, 雖然仍有煩人既電話鈴聲, 但至少無港式大聲說話.我地係搭直通車, 只停台中, 所以只需九個字就到台中. 跟住再搭高鐵既免費接駁巴士到市區, 沿途俾我感覺係番左去十幾年前既深圳. 有好高既摩天大廈隔離亦有好殘破既舊樓攤檔, 亦可以響隧道見到流浪漢周街瞓.響台中我地只有半日時間, 所以選擇左去自然科技館睇下. 地方大就唔在講, 乜都有就更加令香港幾個博物館失色. 原訂行完後想搵賣太陽餅既地方, 點知搵極都唔見. 唯有搭巴士番高鐵站, 點知一上車, 架巴士行左唔夠五個舖位, 連續兩間賣太陽餅既舖頭出現. 唉~番到高雄當晚去左"愛河", 其實河邊兩側風景欠奉, 但係識包裝之下, 愛河之旅就變得好hip.

The Greatest Love

Oh My God! 唔睇個MV, 真係以為邊位本地女新人. 點知原來係一位澳洲籍本地出世既女孩子唱起廣東歌. 隻歌又幾順耳, 本地幾位金牌玉女要小心了! 唔知B又幾時可以唱咁正既廣東歌俾我聽呢? 呵呵~


伸延閱讀:
http://queen.cocolog-nifty.com/blog/2006/10/corinna.html
http://en.wikipedia.org/wiki/Corinna_Chamberlain

2009年3月9日

兩傻遊台灣 2009 (3)

是日行程首先到左營買高鐵車飛準備翌日到台中, 高雄捷運同台北有D相似但係好奇怪係高雄捷運乘客比較少, 就算當晚繁忙時間外出搭捷運亦都保証有位坐. 我亦發現平日晌高雄街頭, 係好少見到行人. 高鐵站亦都好大好光猛, 之前我地一直想用網上訂飛不果, 結果今次我地用售票機買飛就簡單容易好多.買完飛後就繼續行程, 根據旅遊書話有個叫"橋頭糖廠", 我見係只係好幾個捷站以外, 所以我諗會係值得去. 點知好似仲遠過由台北入淡水咁, 行程好似一直都唔完, 甚至似乎已離開左高雄接近台南, 因為見到好多郊外地帶. 大約超過30分鐘後就到帶"橋頭糖廠", 其實只不過係個荒廢左既糖廠再加一個類似講糖廠歷史既展館. 地方好大, 要行完確係要大半日. 其中行入荒廢左既廠房碓係好恐佈, 仲可以間動其中一部機器, 令到整條行道震動就更加毛骨悚然.
行完糖廠後, 近捷運站有所公社改成既台糖專賣店, 原來佢地有款雪榚連售貨員都極力推薦, 結果果然係無錯, 真係幾好味.
咁就行左大半日, 決定番去高雄市, 因為B堅決買件短袖衫, 咁唯有去三多商圈附近幾間大百貨公司, 最終佢亦都買左件衫. 行完街買完衫跟住梗係醫肚, 咁我地貪方便就去左百貨公司樓上一間叫"Cha for Tea"既地方, 佢地除左賣茶仲會賣一D小菜, 叫左兩個輕食套餐, 有人參蒸雞同普弭牛肉, 兩款都味道可以, 但都唔及佢地奉上果杯茶咁正.
當晚原本係想去六合夜市"掃街", 但點知一去到行左一轉, 興趣大減, 直頭係無興趣想掂任何野. 完全同我想像之中分別極大, 而家呢個近似香港廟街.
因為想唔到去邊食晚飯, 結果又搭捷運番酒店. 番到酒店原本想試台菜酒樓, 但因為有團體包場無開放, 最終再encore小籠包. 唔知台灣人係咪會早食晚飯, 我地九時入席就得番連我地三檯客, 當我地食到一半, 我地甚至係最後一檯, 連廚房都熄燈. 今次試另一樣野就係排骨(豬扒)炒飯, 件豬扒炸得好脆好好味, 炒飯亦都有好濃蛋香. 當然埋單四樣野加一茶介連扣除三張抵用券都係台幣四百幾蚊, 抵到哭了.

2009年3月8日

兩傻遊台灣 2009 (2)

其實一踏入高雄地區, 感覺麻麻. 兩側都係密密麻麻既貨櫃場, 有D似香港一離開青衣就見到葵涌貨櫃碼頭一樣,直至見到有摩天輪既夢時代商場, 感覺依然怪怪, 尤其響工廠區內有一幢巨型家樂福超市同宜家傢俬, 好有Mega Box感覺. 進入鬧市, 就比較似台北, 不過好多商舖已經丟空. 而我地入住既酒店就係座落響呢個舊區, 雖然酒店入面有間好大好華麗既百貨公司, 但其實同附近環境真係唔多夾.入到房間, 一見到個景有D失笑. 以為所謂海景真係對個靚海頂多望對岸樓群點知仍然會夾雜貨櫃碼頭景, 我估市區景房間可能仲好.同B出國, 佢指定每日都有兩個鐘午睡時間. 當日都唔例外, 點知一瞓就三個鐘. 梳洗過後, B諗住去附近行下, 發現附近有Starbucks同Blockbuster之外,最多就係診所. 附近都有一個好細既夜市, 但唔知點解, 我同B可以響台北九份淡水士林去"掃街", 但響呢個高雄夜市, 完全無令我地有"掃街"既衝動. 最終都係番酒店"醫肚".
酒店內有十幾間唔同既食肆, 第一間想試係叫"紅陶上海湯包", 係賣小籠包, 有D似鼎泰豐. 叫左一碟醉雞, 一籠小籠包, 一客餛飩麵. 醉雞味道一流, 酒味唔太濃仲仍然有雞味, 小籠包汁多但皮比較厚. 餛飩麵好普通. 但最正係個價錢, 三樣野包茶水加一都只係五百五台幣. 而且酒店所有餐廳都做緊"花一百送一百", 即係消費每一百蚊就送一百蚊現金券, 可以響酒店內任何酒樓使用. 今餐消費左五百, 就送上五百蚊現金券, 聽落都幾著數, 但現金券只可以每次消費滿二百用一百, 吸引力減半.
食飽飽就落樓下間百貨公司行, 話說當日一行出機場就發現天氣熱到癲, 前一晚我係有睇TVBS留意天氣預告, 我仲諗台北有16-20度, 應該高雄同香港天氣都差唔多, 點知會天氣會咁熱. 我地都只帶左長袖衫, 所以一出高雄機場已經標汗. B已經話要買番D短袖衫, 結果當晚諗住去百貨公司睇下.
呢間漢神百貨好似SOGO, 門面裝修甚至各名店都好靚,
唯一缺乏係客人. 去過好多層, 甚至頂層特賣場, 職員仲多過客. 而且貨物標價都唔平, 一件不知名既T裇都要兩千六台幣, 嚇得我地車轆腳走唔切. 落到地庫有惠康既Jason martketplace, 亦有Subway 三文治, 響附近無"七仔"情況下, 呢間惠康真係救命恩人. (最後一日先發現酒店行8分鐘有間"全家"便利店)
第二朝因為預左係高雄一日遊, 所以早起去食早餐. 早有聞呢間酒店係唔俾響早餐既地方影相尤其早餐樣貌, 所以我都唔想搞事. 但只係個所謂早餐款式多但想試少之又少, 大量沙律冷盤, 熱葷少, 中式點心甚至每日只有兩款: 咸到噴水既燒賣加硬心既奶黃包. 結果我日日都係煙肉腸仔炒蛋多士再加白粥加魯肉.

酒店距離捷運站似遠非遠(另一間五星酒店金典就比較近捷運站), 原本以為可搭百貨公司既專車去捷運站, 但太早百貨公司未開門, 無接駁車坐. 唯有嘗試步行去, 20分鐘後行到周身標汗先見到捷運站.

(代續)

另外我有兩張漢來大酒店餐飲抵用券兩張各值一百蚊, 每次於酒店內酒樓餐廳消費滿二百可以用一張. 抵用券有效期至今年四月三日. 如果各位有興趣索取, send email俾我, 當面交收.