2005年4月19日

工作的意義

只係一封小小電郵, 只係一個簡單既請求. 但想唔到牽連會咁大.
再加上俾人乘虛而入加鹽加醋無限發大, 結果問題一發不可收拾.
由香港到印度到英國, 我地老細既無限擺款, 英國頭頭既連番質問. 真係有點透唔到氣
情緒都跌到新低點.
今日響公司男厠內同同事一番話, 令我反醒返呢份工既意義....
"做左一年都係呢個台?"
有D無奈... 我好想講, 唔係一年, 係巳經兩年多.
曾經喜愛呢份工作(老細愛用事業career黎形容), 可惜現在我只係無奈被困.

2005年4月3日

Britney Spear陪你叫雞

尋晚去左Kenny Roger's Roasted Chicken食飯. 以前去銅鑼灣果間, 好似係最正宗, 放既係Kenny Roger既music video同歌曲. 但今次去太古城呢間, 大電視放既係無線播映中張國榮既倩女幽魂, 歌曲係播放Britney Spear. 差D雞都唔想食.
好彩食物依舊好食, 尤其沙律! 不容錯過.

我的HKIFF 2005 (Day 6)

Day 6
Simon

年年電影節都發生, 基佬錢易呃, 都唔駛年年都黎呃一次. 舊年His Brother己經上左一次檔. 今年又有一套.
Simon, 在場百幾個基佬都有同一個想法: 乃野! 想唔到從小冊子上基蹤處處變成女人奶奶大觀.
基佬意外地撞上政冶不正確既粗豪直男, 仲跟佢出相入對, 漸漸溶入直男既複雜生活. 多年後再次遇上直男, 但對方已變成絕症病人. 但基佬仍同佢走埋人生最後一程.
完全係舊年His Brother翻版, 前半段講直男既淫盪人生係幾好笑, 但一去到尾段重回現實, 就開始拖慢, 甚至係一個"拖"字. 沉悶不堪. 慶幸全片描寫各人性格各有突出, 挽回不少分.

我的HKIFF 2005 (Day 5)

Day 5
Melinda and Melinda

學B話齋: 無Woody Allen演出既Woody Allen電影真係好悶.
今次阿叔無份演, 反而有笑星Will Ferrell. 一個故事兩種表達, 確係有D亂. 雖然中心仍然想係幽默, 但果段慘情野太嚴肅, 真係唔多同喜劇果part拍得埋. 喜劇果part反而有驚喜. Will Ferrell太搶!
今次好似係Woody Allen精選, 有早期既言情作品, 亦有近年既都市喜劇. 可惜太亂, 大打折扣.

今次仲係第一次睇見有人買晒熱狗加汽水睇入場睇電影節!