2008年2月29日

唉卜突豬的日子(3)

近日我地部門掀起左加入"唉卜"黨既熱潮, 好多同事相繼入黨, 甚至有同事大手入貨添. 今日更加一班新入黨同事研究"唉通".
同最早買既"資深黨員"同事傾既時候, 大家講到應該用乜野格式轉錄歌曲原來都有值得討論既立場. 佢一直用"唉卜爛佬"(近日佢亦加入"唉卜突豬"族), 容量有限所以佢一直用AAC格式128kbps去轉歌(就算而家仍然係.), 因為檔案細可以放得更多歌. 但我之前用mp3格式320kbps去轉歌都係好一般所以而家改用"Apple Lossless"格式去轉, 因為無壓縮得咁勁但亦有近似WAV既聲音質素. 但同事驚嘆我咁"大駛", 有32GB都唔係咁用卦? 佢覺得聽歌只係kill time有歌聲有音樂就得, 理得你係DSD定HDCD. 但我話: 既然用成三四千蚊買部新機又用幾百蚊買靚耳筒, 我實在唔甘心仲停留mp3既質素. 人地用近幾十萬造隻大碟都係希望有人真係欣賞佢既音樂, 如果我地只係用黎填充時間, 製作人何不索性復古用番單聲道是旦求其錄完就算, 一來可以慳錢, 二來又簡單.
科技確係帶來好多方便, 一部細細既"唉卜"可以放幾百隻歌. 之但係我地係咪因為方便而放棄以往一直認定既質素呢? 當市場唔再出CD, 只係出索價十蚊一隻既低質mp3, 你會唔會再聽歌兼懷念CD/唱片呢?

我的三月天(前言)

貳零零捌年叁月.
對其他人黎講可能好普通一般咁過. 對我黎講, 亦都可能係, 又或者未必.
我諗無論如何, 我都想嘗試將每一日捕足某一個時刻.
所以由三月一日開始一共三十一日, 我會嘗試每日影一張相放上黎做一個紀錄. 當儲齊三十一張相或者會做就一個故事, 又或者未必.
無論如何, 就由呢個三月天故事開始.
當然日常生活文字日記仍然依舊, 亦歡迎其他朋友加入.

2008年2月28日

唉卜突豬的日子(2)

試左機幾日, 亦終於有少少適應戴果個耳筒既方法. 起初耳筒既聲確係麻麻, 不過發現自己戴耳筒既方法係錯之後, 再嘗試用"軟綿"既耳塞之後, 無論隔音同效果真係大有進步. 在此要多謝娜姐同Gabriel既指引.

唉卜突豬: 呢幾日既試用效果都好滿意, 只係近日發現cover flow好慢兼封面亂晒. 本來入好譚詠麟既歌變成出Suede既封面, 睇番iTune又見自己無入錯, 真係耐人尋味. 近日我仲添置埋speaker, 經過多日考慮同試機, 最終都係揀左呢部Philips. 一來最重要係有收音機, 二來原來個低音都幾勁下. 唔知點解之前去"百記"試D聲又會咁沉, 無晒高音或低音. 但今次一試高中低音都齊, 不過唔可以太大聲播Rock歌, D聲一定會拆. 不過放得響公司, 都唔會(敢)開得太大聲.
唉通: 呢件野真係玩死我, 每次過歌總會俾error message俾我嘆. 總係要每次過幾次先成功, 而且大食異常, 非常無敵咁拖慢部電腦.

2008年2月27日

我係華星人

華星都算八九十年代香港華資唱片公司大哥, 可惜被收購轉型成無歌星既版權公司. 同樣賣歌, 但淪為發死人財或海鮮價既地步.

之前曾經跟風重出復刻版, 華麗包裝但音質仍然惡劣, 只留下一個曾經美好既回憶. 今次出版呢張"我係華星人"唔多唔少想話俾後生一輩, 華星曾經有過一班巨星. 老屎忽既一輩如我即刻搵番佢地1997年25週年紀念所出既同樣3 CD精選一對. 選曲近乎70%相同, 只係今次多左後期加入既楊千嬅陳奕迅何韻詩何超儀古天樂同埋呢一世都買唔番版權華星永遠既遺憾:劉華, 反而無左甄妮孫明光賈思樂毛阿敏李玟關菊英譚耀文.
聽番呢隻新專輯, 好遺憾華星人才不致於此. 歷屆既新秀如林楚淇海浚傑張衛健都曾經屬於華星旗下亦都有出單歌或專輯. 可惜今次揀歌既版權部職員只係好求其是是旦旦搵夠50隻歌礼埋單, 希望唔該既然出致敬專輯, 下次搵個有經驗既揀歌出番另一輯主要係華星新秀又或者重出"華星(影視)新節奏"系列, 令到更多人重新認識果班新秀歌手.
不過今次唯一最好安排就係果隻MV DVD, 有時影像更勝聲音...就算當時TVB既製作有幾得人驚. 陳淑芬寫既華星小故事亦有一定可觀.

(70/100)

2008年2月25日

無殼蝸牛搵殼日誌(後傳第二回)

終於收樓了!

當我響上手業主手上接收門匙, 真係又緊張又興奮. 終於成為業主.
唔知係咪心理問題, 望住一間吉屋, 感覺又真係無想像之中咁大. 原本有好多計劃都打亂左.
例如業主留低左個大衣櫃, 我地又唔想放棄自己個衣櫃, 仍然唔知點算好. 其次係細房, 比之前果次睇樓好似縮左水咁, 擺左書檯就擺唔落四櫃影碟. 可能要徵用飯廳位置放影碟櫃. 從睡房外望, 上面同下面都係出市區條公路.
遠望響公屋群中可以望到"一條"海.

多舊魚

我唔食魚但尋晚響"粥谷"搵到呢套片真係令我笑左成晚. 雖則搞笑之但係亦富教育趣味, 至少上網真係唔應該乜網都上唔到.

伸延閱讀: 安全問題

2008年2月22日

唉卜突豬的日子(1)

自從買左呢部"唉卜突豬", 好多時間都研究功能同果個大食iTune周旋.
始終用慣入耳既耳筒而家再用番跟機果個原廠耳筒有D唔慣, 所以都係買番個質素好少少既入耳耳筒. Gabriel提議用SHURE較佳, 但始終銀根問題唔敢落太重注用過千買耳筒, 所以都係買佢地既入門版.
呢個SE110型號員工價都係七百幾只係平街價五十蚊. 應該係有史以來我買過最貴既耳筒, 記得最貴係好多年前買過某名牌大耳筒都係五百幾蚊, 就算而家屋企果對無線耳筒都只係三百幾蚊(因為其他舖賣五百幾蚊, 但屋企樓下有舖頭只賣三百幾. 原以為水貨或標錯價, 但舖頭又話無標錯價, 亦講明呢個耳筒係行貨).
Shure呢個牌子一向係俾人好專業既質素, 所以一試呢隻Shure耳筒就知果然唔揀錯, 音場闊左, 低音高音亦分得好清楚, 同之前果個P牌入耳耳筒真係爭好遠.
唯一我始終唔慣係佩戴方法, 佢有一個特定佩戴方法但係我試左好耐都係戴得唔好, 只有一次試戴得成功. 如果用平時普通耳筒咁戴法, 音質又會有影響. 唔知各位有無個方法可以容易D戴呢個耳筒呢?
下一步係購入 "唉卜"專用既喇叭放響公司用, 因為每日都有成八個鐘會聽住歌做野, 所以需要一個好少少既喇叭.

2008年2月21日

終於加入"唉卜"黨

前文講過因為部三叔mp3機變左大AL牌, 所以迫住要買部新. 娜姐曾經介紹過一部PMP機, 可惜當我見真機時又驚覺原來係都幾有份量. 經過多日思量還是跪拜於"唉卜"黨旗下, 加入"唉卜突豬"一派.

記得當iTune初推出時曾經下載過試用, 但大食兼難用之下就俾我一日內鏟走. 今回一定要用, 唯有死死氣又下載. 今回仍然無從入手, 要搵同事指點下先識入歌. 單係入歌前幫電腦內既所有mp3響網上搵番D唱片封面已經搞左一晚.
至於部機, 始終我係穩陣派, 預左會玩好多年, 所以一入就係32GB容量. 第一次加入"唉卜"黨, 好多野要學, 尤其"唉卜突豬"要搵手指拉拉扯扯, 我就唔太習慣, 仍然一味用指甲"咪"個屏幕, 見者牙煙.
好唔容易先至入左一D歌同片. 以往響三叔mp3機入面有好多"死歌", 即係每次都會飛唔播又唔delete左佢既歌. 今回新機到手, 就可以完全揀過晒所有歌. 因為未買新耳筒, 所以原用跟機果個. 音質同三叔mp3唔係太大分別, 或者遲下買番個好耳筒既時候可以聽出分別.
至於影片, 嘗試將mov格式既電視節目同埋用DVD轉成mp4格式既電影入落機, 質素仍然係mov檔較佳.
我諗我仍然需要時間去研究呢個"唉卜突豬"派既結構同功能, 下回再分解.

採M&M青?

年年office個大業主都會請一班醒獅上黎各家各戶團拜...好聽D係團拜, 難聽D收陀地.

舊年因為大家忙到癲冷落左隻醒獅隊, 一毫子利是都無. 今年都忙但人人都想take個break. 所以一於玩盡佢! 將利是貼滿office! 甚至有同事將M&M當採青. 獅頭師傅一見包野都嗌: M&M呀!
一開M&M, 好事自然來!

點解點解點解我地咁失敗?

點解要影相?
點解要出走?
點解要道歉?
點解要天真?
點解要笑?
點解要追相?
點解要做朋友先又相睇?
點解要亂拉人?
點解要斬手?
點解要出全紀錄?
點解要八卦?
點解
點解
點解我地咁失敗?

2008年2月17日

長江7號

足足聽左三個星期劣評, 終於要面對呢套戲. 講真又唔係講到咁差.

有故事有極小量笑料有眼淚亦有幾完美既特技. 劣響邊度呢? 只怪過年過節眾人一廂情願地希望周生放笑彈. 今回比上次"功夫"踏實得多, 並無上次咁漫畫亦無左果種憤怒. 只不過今次太說教, 一兩次無問題, 但問題每次佢一出場都將果個窮得有骨氣既主旨不停回帶, 變得又長氣又無助.
作為賀歲片, 呢套至少可以話大人細路都啱睇, 亦未致到爛片. 跟上個世紀超級大爛賀歲片"神龍賭聖"黎講, 呢套已經係上佳之作.

好不雅好淫褻?

呢期又興不雅與淫褻, 既然係咁我就公然挑戰大家既忍耐力, 送上歌舞片一段.
但留意片段或許不雅或淫褻或令人不安, 唔想睇就請熄機. 但繼續睇既話請留意各男角表情.

2008年2月16日

Jack Johnson: Sleep Though the Static

我係自"Curious George"隻OST先開始認識Jack Johnson, 佢既音樂言之有物亦聽得人好舒服, 好有渡假果種Feel. 而且最重要佢既歌聽兩三次你就會跟住哼,易入腦亦易上口.

新碟"Sleep Though the Static"唔再環保說教但亦仍然宣稱係太陽能錄音, 歌曲主題視野亦再大D.
其中主打"If I had Eyes", 講人生哲理, 流行度足夠有餘. 但我反甬鍾意一隻只有兩分鐘既"Angel", 簡單易明, 聽左幾次已經想跟住唱. 另外"Same Girl"同"Go On"都係上佳既作品.
呢隻一定最好夜晚放工後洗滌心靈既不二之選.


(80/100)

再見! 我的Yepp

陪左我三年幾既三叔Yepp mp3機, 尋日突然喉嚨痛, 容祖兒陳奕迅關智斌Jack Johnson到The Who全部變晒大AL. 我實在唔明原因, 前日仲係好好地. 尋日所有歌就突然拆晒... 我諗係時候換機了.

可惜... 20GB容量至今都只用左8GB.

2008年2月15日

情人節: 寧願食左佢!

情人節唔知邊個立下規例必送花同朱古力.

送花我實在唔想送, 雖然B係隻人型蜜蜂, 見到花真係發狂. 舊年年尾試過送佢一札, 花送到佢公司, 開心到佢哩... 完全將嬲我既事忘記晒. 之但係花幾時送都得, 就係唔好響情人節送. 一來一千蚊一札實在係暴利, 二來當日人人手上一札, 一定無街上只得你一札咁得戚.
今年寧願花錢響朱古力: Godiva. 幾百蚊一盒朱古力同普通幾十蚊一盒確係有分別...
當然再加一餐情人節晚餐及一份令佢幾溫暖既禮物. 佢呢個傷風晒既情人節確係溫暖.

2008年2月13日

點解阿嬌要道歉?

呢件事真係沒完沒了, 呢面主角齊齊失蹤, 果面網友繼續交朋結友互傳新閃咭同時間警方又不停拉人. 直到鍾欣桐話要出黎見記者交代, 就以為件事一定去到終結. 點知...
以為又黎控訴傳媒, 點知黎一句天真同傻要向各界致歉. 咪住! 做乜道歉呢? 由Day 1有關公司唔係已經話D相係假既咩? 既然係假相? 又何需道歉呢? 今次道歉係咪要証明D相其實係真而經理人公司講大話報假案呢? 就算D相係真, 亦唔需要道歉. 就算多年都以青春玉女見稱見到其他人接吻都會驚到尖叫仲問: 會唔會有BB架? 畢竟佢都只係個受害者, 佢同E先生影呢D相都只不過係佢地兩個人既事. 只係咁唔好彩佢放響電腦既相被盜先令件事暴光, 錯不在女方. 又何需道歉呢?
真係唔明... 我係咪太天真太傻呢?

P.S. 演偽人果然係演偽人, 戲如人生人生如戲.

2008年2月12日

我旅途中的男人

從來我都認為只有李志超先會咁肆無忌憚講佢遇過既男人既身體.

年三十晚完全無避忌走去書店打個轉買左呢本書. "我旅途中的男人" 係作家陳克華既作品, 全書二百幾頁都係圍繞佢旅途中遇上既男人. 我總係覺得直男寫其他男人都係有一種敵視既態度, 無論係讚係彈內心既或外表既都有種唔係你死就係我亡既感覺. 但係基佬寫其他男人, 無論就算果個男人有幾壞是直是攣, 都係有種欣賞既氣味.
可惜本書相多過字, 文字有趣圖片亦佳. 但如果文字多D(尤其手寫既寫好D大D), 就會比較更豐富.亦唔好俾封底果幾句懶"性感"既文字令你想入非非, 入面係無咸野睇.

都因為俾佢頭一兩篇吸引貴貴都買黎睇, 點知一晚睇晒. 都係李志超以前既書"襟"睇.

2008年2月11日

荒謬影話: 再談"The Valet"

雖則"The Valet"確係爛尾, 但以整部片黎講始終都算係中上作品. 尤其兩位男女主角都有表現出果種無奈, 只係其餘兩位男女主角戲份不多, 有少少交行貨之嫌.
近年法國喜劇水準非常不穩, 可以有極佳既The Dinner Game, 亦可以有爛到不得了既"The Closet". 不過呢套戲俾我感覺係就似近年既港產片: 永遠有個天下無敵既故事大橋, 但最後就因為故事太完美, 唔識講落去埋尾, 最終得出個爛尾結局.
當然有時觀眾又係被寵壞既果隻. 愛情片一定Happy Ending, 動作片一定大爆炸結尾, 笑片一定要笑死為止. 但當有open ending, 又會話睇唔明. 就以今次呢套戲為例, 愛情已經開花結果, 但駛唔駛仲要警惡懲奸講到咁白呢? 係導演驚觀眾唔明定抑或導演編劇老板自己都唔明呢?
據知呢套戲將會拍成美國版, 香港既編劇們老板們又不如動動腦筋, 將呢個故事大綱再配合近期城中熱門話題, 就響荷里活版2009年推出前吃個頭嗒湯. 當然唔係叫你全部抄足, 但故仔確係不錯, 再加近期溝女王既話題, 或者會被以前果套"鼠膽龍威"更有趣.

2008年2月10日

荒謬影話: The Valet 我要做替工

你睇你睇, 有Daniel Auteuil, Kristin Scott Thomas, Richard Berry, Gad Elmaleh, Alice Taglioni 咁強勁陣容, 再加上Dinner Game導演Francis Veber .... 就算之前差唔多卡士既"The Closet"爛到不可以再爛. 但始終人係唔會有同一個低點, 只有新低點.

故事就由一個泊車仔開始, 人老實又怕醜點知求婚時就俾人飛. 一個唔覺意俾有錢人釗點做愛情替工.... 另一半係全城最靚既model.
故事都幾有趣, 電影頭大半部份都交代描寫得好好就連推進節奏就一流, 一定係一流既喜劇. 只不過近結尾開始失控, 有好多有用枝節被刪但保留左一D無謂既gag位. 直至結局最後一分鐘, 真頭可以話係爛尾. 既然故仔講完有情人終成眷屬, 點解係要講到咁白呢?
原來人真係唔會有同一個低點, 只有新低點.
(65/100)

2008年2月9日

試片室: Run, Fatboy, Run

鍾意Simon Pegg既人上次套Hot Fuzz巳經超滿足. 今次呢套Run, Fatboy, Run真係咪錯過. 一樣笑到收唔到聲. 導演更加估你唔到係響"老友記"(Friends)入面飾演"Ross"既David Schwimmer.
US Teaser


UK Trailer

Beyond 25 週年特輯

真係... 樂壇吸血鬼呀!!!

雖則我算係半個粉絲, 但吸血鬼近年出既吸水碟真係一隻都無買. 今次因為見環球自己出番, 所以以為有信心, 點知吸血鬼又有份.
Disc 1又有新野, 唔錯, 可惜聽得出又係黑膠番錄, 都算. 但之後Disc 2, Disc 3 今次又話用乜野DXD混音. 有D歌乜搞到爆晒咪仲衰過之前. 我知舊master差就算點mix都無乜幫助, 但係都唔會好似今次搞成咁.
早知用果舊錢買Jack Johnson都無咁嬲.

(10/100)

2008年2月8日

The Best Sound Ever Reborn

之前已經講過譚詠麟會出"愛的根源"25週年紀念版, 重新灌錄成張碟. 但諗唔到佢真係一晚錄晒兼拍晒成張碟既歌.

今次佢除左推出呢張現場錄音CD外更推出現場拍攝既DVD. 而且CD更加採用DSD直接灌錄, 唔係事後混音果隻. 音色基本上更加有保証. 當然聽過呢隻CD一次, 音質真係超靚, 但問題係在於歌曲.
陳輝揚話佢無改過晒所有歌曲既編曲, 儘量保持原有編曲. 就只係改左部份樂器編排, 有古箏同二胡. 之不過如果套用呢D樂器落某幾首歌就真係怪到無朋友, 夏日寒風捕風的漢子都變成一隻不文不類既怪歌. 再加上譚先生唱Live既弱點: hea, 咬字不清之下更加令成隻碟比原版更加唔好聽. 絕對可以話弄巧成拙.
至於隻話採用高清拍攝既DVD就更加可以話"把鬼". 兩年到業界開始用高清機拍音樂製作, 起初確係有一兩套精品. 但係一到太濫人人都出既時候, 質素開始下降. 之前隻古巨基演唱會已經睇到眼突, 呢隻雖然唔係咁差, 但比之前早期製作確有距離. 係咪因為遷就錄音問題所引至, 定抑或將貨就價呢?
雖則今次確係有Best Sound, 之不過Best Song就俾糟蹋, 真係可惜. 下次出愛情陷阱? 我可以慳番.
(50/100)

2008年2月7日

生活炒雜碎(第七回)

新年快樂. 未過年就又拍敗杖, 年三十先開始傷風結果頭重重鼻塞塞去過新年, 真係意想不到. 不過近幾年真係唔係好想過年, 只因為怕被人追......問幾時結婚派利是. 上至父母親戚下至同事朋友都總會有人問. 以往會答遲D先啦, 而家會答有機會既...
#########################################
就快收新樓了! 距離收樓日子只差兩三個星期, 雖則賣家個律師成日失蹤, 搞到佢有特別要求我地都配合唔到. 但都無損我地對呢個日子期待.
尤其係每隔一段時間上網查銀行估價, 都有驚喜. 至今, 我地都未搬入去住, 已經升左廿七萬. B話佢保守估計當我搬入去住之日應該升至四十萬.
升當然開心, 但睇番個市反而好擔心. 尋日報紙報導炒家由私人樓宇居屋炒到去公屋, 黃大仙下村一個單位竟然高價一百五十萬售出, 買家更揚言裝修後會以七千六百蚊出租. 我心諗: 係咪有問題呢? 公共房屋既設立係俾大眾有廉價房屋居住, 由幾百到幾千蚊租金絕對人人負擔得起. 但今次高價成交及高價出租係咪有D有違原意呢? 當左鄰右里都只係交緊千零二千蚊租, 而果户就交七千六百蚊租, 唔知果位租戶個感受係點?
#########################################
前日某報地產廣告上係咁寫: 過萬呎可經營宗教.
原來宗教係可以經營.

2008年2月4日

臨急抱佛腳

話說B呢位熱帶人, 呢幾個星期既嚴寒都已經夠佢受. 幾年前佢自己住, 屋企係有個價值九十九蚊既豐澤牌暖風機. 一個人百幾呎地方確係啱晒. 跟住同佢一齊住之後, 冬天唔見左, 凍既日子更少上加少. 之不過部機用左四五年, 近日天氣又真係太凍. 暖得坐響廳既佢雙腳, 坐響碟房既我就會凍到TT震. 之前我曾經提出不如買過部"認真"少少既暖爐, 但佢覺得呢個冬天好快就會過去, 可以話下年先啦. 點知呢個天寒地凍既天氣一直維持, 前日佢終於頂唔順話不如買過部暖爐. 可惜天氣凍, 唔好話打邊爐一早賣晒, 就連暖爐都賣清光. 去到"蜂窄", 得番兩款沖油式暖爐. 但因為太大部, 唔係太啱. 好唔容易迫入去"味道", 佢地有個專櫃賣家電, 見到有隻叫"對衡式"暖爐, 講真真係唔知同其他有乜分別. 但見外型體積價值都好適合, 而且又見其他舖頭都無貨, 結果真係買左番屋企.番到屋企一試, 果然一陣間成屋就暖晒, 不過代價係成屋乾燥到無朋友. 只係一晚我地兩個就咀唇爆開標血, 就連洗左衫兩日都未乾, 而家吹一晚就乾晒, 認真神奇.

當然自己暖係唔得, 我會捐出同樣金額去紅十字會俾大陸賑雪災. 都希望大家儘可能捐助今次雪災, 令大家都可以過個安樂既新年.

2008年2月3日

7月13日我愛蕭邦

今晚響老歌谷見到有人介紹呢首歌, 係由廖雋嘉主唱. 廖雋嘉? 乜個名咁熟, 上網一查原來係人稱"女子監獄"既組合"女生宿舍"既成員. 佢啱啱出新一張個人大碟, 原來女子監獄解散後小小超無放棄, 將佢作個人發展.
呢首"我愛蕭邦"其實咪就係倫伯既"我愛雀班", 都係來自賈世寶Gazebo. 不過歌詞由廖雋嘉再填過, 調子輕快聽得真係幾舒服.

remember that piano
so delightful unusual
that classic sensation
sentimental confusion
下雨天容易思念
閉上眼就能看見一束光芒出現荒漠的甘泉
心底裏有一種信念
相信著那一瞬間
無論在身邊或遠方總能感覺一對小翅膀
蕭邦的琴聲再悲傷
生命本來就是流浪
一切力量與愛有關
為愛去冒險不回頭望
越過太平洋還是悲傷
生命不會浪費在路上
imagine your face
in a sunshine reflection
a vision of blue skies
forever distractions

伸延閱讀:
試聽: http://www.5nd.com/playcn/158800.htm
廖雋嘉Blog

2008年2月2日

閃咭下的香港

呢兩三日, 香港人聞"淫相"色變. 網民甚至寧願改口叫淫相做"閃咭"以避當局檢查. 尤其幾位代罪羔羊被拉後更覺原來源頭(E先生)可以出走海外響網誌串港人, 反而同樣有相既網民就被拉於監獄過新年, 香港法治係只針對窮人. 你無業又有爭咭數? 分分鐘任何野你都可以被入罪.

網民唯有再次發揮群眾力量對呢D不平事控訴. 例如尋日無線網站某版突然有以下一句野... (鳴謝魚腮人提供圖片)
http://tvcity.tvb.com/drama/wasabi_mon_amour/goodscene/index05.html

家樂的母親譚寶寶日日都為他準備了一個愛心飯盒,可惜她的廚藝功夫麻麻,令到家樂害怕吃媽媽的愛心飯盒,幸好禮和出現與他交換飯盒,家樂才有啖好食。可惜好景不常,家樂因忘記了帶手冊,譚寶寶幫家樂拿回學校時,發現他吃了別人的飯盒,譚寶寶因而大發雷霆,責罵家樂浪費了她的一番心血。 小朋友往往不明白成年人的背後心意,只是睇表面的東西是否靚及好食,不會明白背後的含意。所以父母們不要以為一句為小朋友好,就可以不用理他們的感受。其實做人同小朋友都是睇表面,即使是糖衣毒藥也會照單全收,無論工作同待人接物,只要表面勤勤力力對人和藹可親,全世界就會當你是好人及好員工,近日藝人的淫照亦是同一道理,外表是華麗一族內裡卻是淫亂一族,真相往往是愈揭愈臭

大家驚覺無線亦響呢件事抽水, 但又好中肯. 可惜網頁響三個鐘後, 果一句已經被刪. 亦相信有關員工可能已經被處分.
寫blog比寫自己網站有一好處, 就係容易俾其他search engine到某D話題. 手多入去自己個blog條Referral一睇. 近日除左好多人搵Juno既文之外, 另一就係"閃咭"事件. 兩篇文引來幾多人黎睇, 通常都係用E先生G小姐既字眼去搜尋. 不過自已呢度無閃咭, 大家可能失望而回. 唯一有趣係, 有"大摩"某職員響公司上網搵打口碟. 亦有間名叫"United Technologies Research Center"既公司搵"G小姐".
希望呢種"白色恐佈"可以儘快解決, 令香港人可以快快樂樂過個新年. 亦祝願內地既災民, 就算佢地都有"白色恐佈"(大雪), 但亦希望佢地過個好年.