2008年12月31日

有線第一台 Vs NOW 香港台

NOW香港台未開台時, 我曾經話呢個台只會整死NOW TV. NOW 一直只係做channels carrier, 就算後黎開設財經台同體育台係因為市面少呢類型競爭者. 但開廣東話既娛樂台反而有大量類同既頻道共存, 就算唔計NOW TV所播放既其他頻道, 有線已經有兩個(唔計新知台), 無線亞視免費都有五個(包括數碼頻道), 無線收費既仲有一連串既生活/劇集/經典/娛樂新聞/兒童/音樂頻道. 基本上真係好飽和, 再加入戰場真係有咁多節目及觀眾咩?
再者, 一開台牌面同幕前幕後陣容完全係走番幾年前有線娛樂台變陣既面貌, 搵一D同無線無約既明星歌星拍節目. 可惜節目陣容真係得啖笑, 睇左近一個月, 成個台得出黎既結論就係空洞無物. 成個台既重心完全放響周末, 變成一至五根本無節目播, 只可不停轉播新聞台既新聞報導財經台既財經節目體育台既賽事, 再加上播下日韓劇同一D外購配音節目(佢地既廣東話配音堪稱全港最爛!), 兼不停重播周末既自製節目.
自製節目方面, "星期日大班"明抄外國清談節目, 可惜大班並唔係真正既名咀, 只不過係個好重懶音鍾意打斷別人說話既大叔. 比之前佢響亞視既節目相差甚遠. "一個地球"因為珠玉在前, 幾個台都拍過近似節目, 新鮮感盡失. "Home Sweet Home"同"Have a Nice Day"呢兩個姊妹節目, 都係出自阿旦既製作, 算做有少少新鮮感, 但似乎前者既感覺太流於個人既演出, 被訪者變成伴菜. 反而林珊珊既"Have a nice day"就比較平易近人, 訪者及被訪者都擦出火花, 至少有交流. 而且節目又不流於只係訪問, 亦加上一D生活小貼士做到生動有趣, 呢個節目算做幾個自製節目中較有心及有可觀性.
可惜單一個節目確係救唔到一個台, 似乎呢個台既未來動向都會係咁, 真心擔心當明年一月份正式收費時, 有幾多人真係會俾錢去睇一個無乜節目吸引既頻道.
近日我地住既屋苑都可以經公共天線接收有線既第一台. 之前佢地節目陣容都算幾吸引, 但近日一睇, 搞乜呀? 仲重播"一粒鐘真人蘇"? 又或者早晚喪播娛樂新聞報導. 我都知有線娛樂台都無乜好睇, 但估唔到呢個曾經雄心壯志既第一台都淪為比新知台更悶旦既頻道.


伸延閱讀: NOW香港台(免費網上任睇)

一個自家書籤走天涯: Foxmarks

轉換電腦最煩係將contact list/email/bookmark搬去新機, 前兩者都話有得import/export, 但bookmark呢家野真係最煩. 尤其身處響firefox, 可以import bookmark但只限從IE偷走, 外來者免問. 正煩緊點從desktop搬bookmark落laptop既時候, 發現原來firefox有個名為"Foxmarks"既add-on可以同步你既bookmarks去任何一部電腦上...只要果部電腦都有裝firefox同foxmarks.
過程簡單到不得了, download個add-on跟住註冊跟住export個bookmark上佢地server跟住響另一部電腦一樣download個add-on跟住login再跟住選擇同步bookmark.只需幾分鐘就可以將bookmark搬到另一部電腦上, 實在太感動!
遲D佢地仲會推出IE版本!


伸延閱讀: 官網

2008年12月30日

我的十大 2008 (電影部)

今次入戲院少左, 就連hkiff因為忙於搬屋而放棄. 結果大多既戲都係睇碟睇番黎. 以下係今年所選十套我覺得好值得一睇再睇既電影.

1) Cloverfield 末世凶煞 (Paramount)
以為又係雷聲大雨點少反個高潮點知小本得黎又幾過癮.

2) There will be blood 黑金風雲 (Miramax)
強烈既影像, 再加Daniel Day-Lewis一貫"超入戲"既演技, 先可以得出咁既水準.

3) Juno 少女孕記 (Fox)
明顯導演想拍套輕喜劇多於俗套地拍套問題少女片.

4) Once 一奏傾情 (Summit)
入面歌同音樂巳經代表一切.

5) The Band's Visit 警察樂隊來訪時 (TWC/SPC)

三個字講晒: 好好睇!

6) The Bank Job 玩命追緝 (Lionsgate)
今年完全被忽視既一套, 同前年既"Inside Man"一樣成蒼海遺珠".

7) Indiana Jones and The Kingdom of The Crystal Skull 奪寶奇兵之水晶骷髏國 (Paramount/Lucasfilms)
簡直懷舊大晒!

8) The Dark Knight 蝙蝠俠–黑夜之神 (Warner Bros.)

可謂今年最有戲味亦最值得討論既娛樂大片, 無論幕前幕後都係超高班.

9) WALL-E 太空奇兵-威E (Disney/PIXAR)
今次呢套比五星級大鼠更大人!

10) Tropic Thunder 雷霆喪星 (Dreamworks)
10) Saturn in Opposition (Strand releasing)

兩片同分, 前者 Ben Stiller終於再拍到部見得下人既作品, 戲迷必定大樂. 後者原來將韓式喊苦喊忽絕症橋套落意大利同志片都work喎!

我的十大 2008 (唱片部)

今年本地樂壇似乎新人有一定既水準, 多位新進又或者年青既歌手都有唔錯既表現. 以下係我今年既十大. (排名不分先後)

1) 林海峰 -我地大家 (Gold Label)
大家一齊嘻哈笑世界.

2) Jack Johnson - Sleep though the static (Universal)
好舒服既一張.

3) Coldplay - Viva La Vida (EMI)
傳聞中既最後一張大碟, 有D可惜.

4) 王菀芝 - Infinity Journey (East Asia)
未算先滿既一張但仍可以百聽不厭.

5) Mr - Mister (Universal)
新band第一張都可以做到咁既成績, 來年一定有更大發展空間.

6) 黃耀明 - King of the Road (EEG)

之前講過...

7) 謝安琪 - Binary (Universal)
應該算係今年既碟霸!

8) Dido - Safe Trip Home (Sony BMG)
到呢一刻聽呢隻碟依然會想喊.

9) 衛蘭 - Serving You (East Asia)

如果無"Reality"呢隻歌, 呢隻碟會同張太果隻平分碟霸大名.

10) 麥俊龍 - WHY (Silly Thing)
歪埋太多, 歌曲比上一張大碟仲好.

以下係幾張今年我覺得入唔到十太但又幾好既專輯.

1) 吳雨霏 - Lady K (Gold Label)
終見成熟之作

2) EO2 - Ladies Nite (SNAZZ)

五首都係上佳作品, 熱唔起實在可惜.

3) 陳偉霆 - Will Power (EEG)
雖然跳得, 但歌藝上可能要多加磨練

4) 何韻詩 - Ten Days in the Madhouse (East Asia)
好深好深好深好深呀....

5) 狄易達 - Just Go (SNAZZ)

呢位被譽為千禧年版後生張立基, 跳得又唱得.

6) 鍾舒曼 - Castle (EEG)

呢位鍾小姐既呢張碟真係令我大吃一驚. 連英皇都做到一張高水平既製作!

2008年12月29日

SONY BD S350 入手





仲記得之前我講過未必會加入藍光行列, 結果月初無厘頭買左部新電腦加入左之後, 就真係中晒毒, 不能自拔. 見到近日因為有大陸製平價藍光碟機, 幾款日韓牌子都降價迎戰. 因為香港同美國同區, 所以出現來自美國既水貨機, 甚至可以平到二千五蚊有交易. 不過我都係為左有15個月保養, 還是揀番行貨.

將軍澳翠華餐廳

就快開勒!! B一定開心到跳舞!!

2008年12月28日

扑醒地

其實我地提早左"扑醒地", 早響上星期一B已經拆左我呢份禮物: 極適合B呢種"熱帶人"保溫用既暖蛋. 即拆即用.
至於我果份就要等跟住呢個星期三先收到. 不過跟據傳統, 每年我會買一份聖誕禮物俾自己, 而今年呢份禮物我就會係星期一收到, 呵呵~

2008年12月27日

The worst meal in my life: 亂到甩轆的東尼羅馬




果然係貪字得個貧! 為左果一百蚊coupon走去攞苦黎辛.
B一聽到話去Tony Roma's, 簡單歡喜若狂, 原來佢響夏威夷住既時候係經常幫襯. 所以話聖誕呢餐會去東尼羅馬, 佢真係未出發先興奮. 但惡夢竟然由點餐之後開始.
我地去係佢地灣仔新分店, 地方比較細, 所以就算訂左檯兼準時到都要等15分鐘先有檯. 我明白地方細, 檯自然會都係比較細張. 之但係佢地碟碟咁大碟, 擺得沙律小食已經擺唔落主菜, 仲有餐飲同自己隻碟呢?
叫左燒骨一份, 伙記仲問要跟焗薯定薯條, 我地一致揀薯條. 另外叫左一客沙律兩杯drink. 兩杯drink一陣間就到, 跟住突然送上洋葱湯一客. "我地無叫湯喎!" 位待應轉身check機, 隔離檯位大叔出聲: 我地叫架. 待應先至搵到物主.
一陣間位待應又送上牛扒一客. "我地都無叫牛扒喎!"待應又去check機, 但竟然認定係我地叫, 我叫check真D好唔好, 發現附近幾檯都無叫, 認真神奇.
終於我地客凱撒沙律出場, 味道認真麻麻, 同上星期去"加州薄餅"食既一樣麻麻, 比"肥佬"更加差幾皮. 跟住燒骨出場, 咦? 變左焗薯既? 正想搵人解答呢個問題, 隔離檯位阿叔又出聲: 我地係叫焗薯. 我心諗: 又送錯檯??? 一晚錯三次以為算經典, 點知低處未算低! 又有待應遞上半份燒骨跟焗薯, 我直接話: 不如搵你經埋黎傾下. 經埋當然無出現, 亦發現原來原先果全份燒骨係我地, 而家呢半份先至係隔離檯. 隔離檯大叔已經食緊份燒骨, 結果佢又重頭整過原份燒骨俾我, 至於隔離檯大叔就可以半份價錢食全份燒骨, 有著數哩!
25分鐘後, 我地份燒骨上檯, 依舊跟焗薯, 我即刻反白眼. 一份燒骨錯三次? 肥仔待應見狀好懶醒目話: 咦? 係喎, 應該係薯條喎, 我補番一條俾你地. 到頭來佢真係送上一小碟薯條, 好有施捨既感覺, 對唔住都無聲.
跟住叫甜品, 叫左個唔知乜野既焗蘋果跟雪糕. 但佢地完全無提醒我呢個甜品製作需時, 結果我地兩個人呆等多20分鐘. 我無催單, 但佢就不停話個甜品做緊, 因為而家太多檯同時間叫甜品, 所以要多花時間. 但我見附近勁多空檯, 就算前後左右有人既檯唔係食緊主菜就係連甜品都食完, 肥仔待應將一切負任推晒落顧客身上, 非常不知所謂. 最後甜品食完埋單, 都可以錯多次, 將隔離檯既單俾左我. 我真係頂唔順大嗌: 又錯?
成晚我地就活在錯到甩轆既奇景下食完餐飯, 埋單扣除coupon後實收二百五. 食物質素真係差到七彩, 燒骨汁淡兼骨肉分離, 應驗左"阿蘇"所講"難食骨". 不過個甜品又加番少少分, 唔會太甜, 味道又唔錯.
如果你要我俾分, 十分滿分既話佢地會係負九十分. 如果問我會唔會再去幫襯? 我同B都齊聲: 一定唔會.
問題: 根據以上全文請問今晚呢間餐廳一共錯左幾多次呢?

2008年12月24日

3 Day Weekend

呢套電影同好多年前既"Love! Valour! Compassion!"(港譯:反串仍是愛")非常雷同. 甚至乎片中主角們亦有提"反"片, 有少少炒冷飯之嫌.
又係幾pair基佬一齊去渡假從而引發對愛情友情關係既衝激. 片中既一見鍾情老少配又或者open relationship真係包羅萬有一碟過. 不過當年"反"片集中響aids呢個議題, 而呢套戲就毫無主旨, 只在乎借機發揮再加上睇肉家既eyes candy就成就呢一部戲. 內容空洞都預左, 但連演技導技都差到加零一, 就真係令人目瞪口呆. 睇埋DVD入面另一個結局就更加懷疑究竟製作人係想拍套令人回味既同志片定係令人鬧爆既爛片.

2008年12月22日

我的第一張藍光碟


一套極之富爭論性既笑片亦都被譽為上世紀最好笑既喜劇. 踎低噴飯大膽地用聖經人物及事件開玩笑, 並且從另一角度去探討宗教, 比之前"Monty Python and the Holy Grail"玩得更放.
呢張BD屬於A/B/C全區亦擁有中文字幕, 不過只限電影部份, 特別收錄則只為SD畫質及不設中文字幕. 第一次近距離睇藍光碟, 就算呢套戲係70年代製作, 畫面經修復下份外突出, 而且暗位亦都好detail. 確實比睇DVD吸引, 不過藍光碟仍然比較昂貴, 所以未必每一張都買, 只會揀比較獨家及比較喜愛既電影.

2008年12月21日

荒謬影話: the day the earth stood still 地球停轉日

幾乎全球一致認為係爛片, 基於B非常鍾意1951年舊版結果亦願意花費去IMAX版本.
我未睇過舊版(但應該會買Blu-Ray碟黎睇), 我只知舊版有好濃厚既反戰意識. 相對新版既環保議題, 舊版就真係此較吸引.
講真呢個新版明顯係捉到鹿唔識脫角, 有個比較似樣既改編但竟然可以有個咁差既劇本, 將一套可以好有意思既戲淪為一部為特技而特技既popcorn movie. 去到中段乜野環保變得自圓其說, 外星人點解要"救地球"但最後又唔"救", 連之前舊版最深層既解答都慳番, 地球停轉, 人類真係可以警覺嗎? 好可惜新版似乎無打算去繼續/講到咁白, 只留低一連串問號.
以往Fox不停拍所謂環保救地球既災難大片, 但呢套可以算做最求其亦最反智既一部.

2008年12月20日

Where the hell is Matt?

前陣子見到VISA咭既新電視廣告, 非常有趣. 原來靈感係黎自一位美國人Matt Harding, 自2005年以黎, 每年佢都花好幾個月行遍全球拍攝唔同既跳舞片段. 終於今次佢現身響呢個VISA廣告入面令更多人認識佢.

VISA電視廣告

2008年跳舞片段

2008年12月19日

新電腦舊電腦

舊電腦閉關, 結果新電腦做左兩個星期替工. 期間跟HP既維修角力又同新電腦新windows磨合, 忙到連blog都唔得閒寫.
同HP維修永遠係好令人氣餒, 原本約好師傅上黎整(原來無論係自提定師傅上門都係收六舊!), 點知位肥師傅乜都無帶就走上黎整機, 最後只掟低一句底板有事就收六百蚊走人. 要我再打上去熱線再約時間等師傅上黎換底板, 結果整一部電腦足足用左三個星期, 不過好彩硬碟上文件得以保留. 而家部HP已經正式成為B既專機, 只係因為部舊電腦有千幾隻歌我又唔想搬去新電腦, 所以我有時仍然需要用黎過歌到iPod.
HP既維修雖然慢但總算順利完成工作, 相比約左網上行裝無線網絡而引起既風波甚至搞到我父母周街走就足以我打上去網上行鬧左半個鐘, 跟住再打去12022鬧多次. 至於乜野事實在唔想再咁詳盡咁講, 只係師傅既操守有好大問題.

不過最終無線網絡都裝妥, 前晚仲終於兩部電腦同打印機都可以互連. 將舊電腦既檔案轉移到新電腦都可以更方便.至於部新電腦當然好正, 不過用落發覺部電腦設計上有D反智. USB port貼近BR-rom, 裝左塊手寫板後有條線阻住左光碟機既出入. 另外仍然需要學習新 Windows Vista既功能, 用4GB ram行vista真係好爽, 功能亦比較多亦比我想像中user friendly. 不過仍覺vista以美觀為主, 實用性比xp為低.
新買既藍芽mouse, 比我想像中麻煩...

2008年12月18日

最愛的未必結婚

兩段新聞擺埋一齊, 一句"最愛的未必結婚"真係一針見血.

2008年12月17日

生記粥麵

響之前病既日子, 搵野食真係好難. 唔係火腿通粉就係粥, 其他生冷煎炸可免則免.
但係公司附近全部都唔啱食, 好在仲有一間, 據聞係好出名既舖頭: 生記粥麵.
每日都見佢地門口大排長龍, 結果今次趁我病就試下.
叫左個大碗既牛肉粥. 粥好綿而且仲可以搵到一絲絲瑤柱, 真係好夠味. 生滾牛肉外賣拎到番公司都無變成"柴皮". 係我近呢五六年以黎最好味既一碗粥!

2008年12月13日

衛蘭 Serving You

今次呢張碟似係一張新曲加精選, 入面有幾首歌成年前從電台已聽過, 只係佢被雪藏, 張碟押後到今個月先出世.
衛蘭之前既K歌式大碟大賣不難理解, 以佢既歌喉再加上唔差既選曲, 絕對係正常. 今回呢張碟繼續大路, 易入耳程度絕對係對任何一隻耳仔著想. 幾首K歌如"就算世界無童話"或"雜技"流暢兼順耳.
當然你實話14隻K歌真係有D頂唔順, 碟入面亦有D歌會有另一番感覺. "追"佢再放低把聲去唱, 首歌不俗可惜衛蘭去到高音有點吃力. "無所謂"亦算做幾搶耳既輕快作品, 全碟唯一敗筆可算重唱"Reality", 就算係由土佬Johnny做監製(原來佢都加入到雷氏旗下...唉!), 先入為主地難聽.

2008年12月6日

生活炒雜碎(第十二回)

原本近日傷風纏身已經夠慘, (皆因公司半個部門都病左! 我都算係被傳染!) 點知尋日番到屋企, B話部電腦又壞左, 我都以為只不過普通case, 點知原來係大件事, 成部機係boot唔起. 結果周圍問人, 唯一容易搵到既係G先生, 佢都估計係motherboard問題. 但自從上次領教過HP既麻煩CS, 心諗不如搵街舖整仲有效率. 結果拎去街舖, 對方見係廠機即時撒手不幹: 不如搵番原廠啦! 結果又要等到星期一先可以搵到HP.
與此同時, B因為有事要無時無刻check email. 我唯有借出我部手機, 去附近一間茶餐廳用wi-fi上網. 可惜佢又嫌我部機個mon細, keypad難篤, 根本就check唔到email, 我就提出不如一人一電腦吧! 兩年前我都提出過, 只不過我見無乜地方, 所以作罷. 點知今次佢都同意呢點, 仲同我去"豐澤"睇機.
之前我話過, 如果再買新電腦, 希望一定有Blu-ray裝置. 所以我從呢一點出發, 可惜"豐澤"選擇不多, 心諗不如去電腦商場搵啦.
去到電腦商場, 確係比較多選擇, 不過水貨比較多. 路經某名店, 睇見SONY某型號減$2000大圓, 非常吸引, 結果經過多番思量同講價, 由原本贈品係手電變成路由器! 心諗今次真係執平貨, 番到屋企用新電腦一上網睇見SONY網頁都係呢個價! 電腦舖平$2000只係速銷手段, 不過既然屈左一部router, 再送2GB ram, 已經算係咁. 終於有得加入藍光行列, yeah!
暫時呢一刻B會共用我呢部新電腦, 希望佢又唔會整壞部機. 亦期待下星期一跟HP大鬥法!

2008年12月4日

樂家朱古力

樂家杏仁糖絕對係我既"賣飛佛", 分分鐘我自己一個可以一日kill一罐. 響娜姐果面得知樂家有新出品, 即刻走去搵. 去左平時已經無幫襯既百佳, 響一個好古怪賣聖誕裝飾既角落見到佢地有賣呢隻朱古力, 反而糖果部就無擺.
廿蚊有找不過得8大條咁多, 個樣就麻麻因為一條條實在太似"米田共". 但一咬落去, 真係嘩哈哈. 拖肥唔係我至愛但五分鐘內我都食左半盒. 搞到而家心思思想開埋另一盒添!


伸延閱讀: 樂家新品登場

2008年12月2日

荒謬影話: The Boys in the Band

終於有機會睇呢套絕對係影史上經典同志片: The Boys in the Band".
呢套70年代製作由Willaim Friedkin執導, 此人之後拍過密探霹靂火同埋驅魔人, 不幸拍完"TBITB"10年之後佢竟然走去拍左部恐同片"The Criusing".

8個基佬開個生日會, 突然中途殺出個已婚直男舊同學. 就響各種蛛絲馬跡下各人就認定直同學其實係"衣櫃基", 結果佢地玩左個"打個電話說愛你"既"說心底秘密"遊戲, 破壞性衝擊佢地既友誼或感情.
其實一開始都咬定呢個Alan直同學確係個衣櫃基, 只不過去到最後又出人意表. 片中各人演出每個角色都出色一流, 而且對白就更加一針見血句句到肉, 可惜有D真係唔係幾明白, 我都要睇番字幕或問番B果句點解.

最重要係當時70年代紐約既基佬生活係咁多姿多采但亦仍然有所顧忌: 例如直同學既恐同反應, 或班基佬為左避嫌而扮直, 又或者直同學Alan驚問: 你係基? 你結左婚喎! 當然去到現在21世紀千禧年仍然會出現以上場面. 但願有生之年如果有有心人走去重拍呢個劇本, 盡量都保持原貌, 因為有D野真係未變過.睇番DVD入面既製作特輯, 原來事隔38年後, 大部份主角都已經離世, (幾位都因為死於Aids!) 淨下兩位在生都變成老伯伯大談40年前佢地響百老匯演出呢個劇本同拍攝電影版既經歷.

(1970/CBS Broadcasting)

香港... 真係把鬼!

如果唔係有人出意外死左, 我諗香港政府到呢一刻都唔肯派包機接市民回港! 留意係包機而唔係專機, 因為包機係要每人收千一, 其他地方如內地澳門係專機, 免費. 趁亂打劫先至係最無恥!
難怪呢位澳門青年咁霸! 成為今年又一金句!

2008年12月1日

2008年11月30日

Safe Trip Home - Dido

呢張碟響過去一個星期不停去反覆去聽, 可以話百聽不厭. 一來餓左Dido太耐, 二來今次終於可以做番佢第一張碟既水準, 甚至可以話超越過去兩張碟.
今次佢完全唔玩大路歌, 11隻歌完全各有風路. 主打既"Don't believe in love"同"Look no further"實在太出. 跟住"Never Want to say it's love"甚至尾cut "Northern Skies"都係上佳之作.
我買左係2CD版本, 入面另外有隻bonus CD有3首新歌. "Summer"亦都係令人興奮之作. 好相信今次呢張又會大賞, Dido又會去到另一個境界.
以為本地CD有麻煩設計, 連外國CD都有個咁硬膠設計. 呢張Dido CD聽都未聽已經俾我整爛個封套! 全因擺碟個位好窄, 大力少少都會撕爛個封套. 真係寧願佢地用番膠盒, 對碟有保護, 收藏又容易D.

08感恩節

每年, B都會好期待呢個節日. 對佢黎講感恩節可以話係假期既開始...聖誕新年跟住黎. 而且佢離開父母咁多年, 感恩節確係有D思鄉. 所以感恩節一餐可以帶俾佢一解思鄉.
可惜屋企附近間"肥佬"早兩個月結束左, 今年想食感恩節餐就要出城. 跟據過去經驗, 兩個人叫兩個感恩節大餐確係太多. 因為個份量實在驚人, 所以由舊年開始已經改只叫一份餐再加其他主菜, 咁樣就唔會太浪費.今年依然只叫一份感恩節餐, 另再加一份pasta. 感恩節餐依然陣容鼎盛, 再加一份蟹肉pasta, 兩個大人都食唔晒, 好可能之前我地"殺掉"左佢地個靚麵包, 填左少少肚, 否則一定食得哂. 結果都係帶番少少番屋企.
題外話: 有時餐廳開音樂都ok, 但有無諗過唔好將喇叭裝得太貼近D客又或者唔好開得太大聲呢? 尋晚響"肥佬"又出現呢個情況, 安排側房一張檯俾我地, 但張檯對上有隻喇叭"焚"緊機, 我面有難色問有無第二張檯呢? 外籍經理話今晚好滿, 未有其他空檯, 但可以安排將音樂較細聲D. 我又覺得可以接受, 但食到半路中途, 音樂又大聲左, 比之前仲大聲! 又捉住另一位部長之類既人, 原來係佢自己頭先較大聲左, 結果佢都答應較番細聲. 餐廳始終係個食野既地方, 並唔係酒吧disco要靠音樂去吸引客人. 餐廳放大聲既嘈音樂只會趕客, 尤其將喇叭裝到貼近D客既耳邊, 天花咁高都唔去裝, 係要貼檯裝為乜呢?


伸延閱讀: 舊年感恩節

2008年11月29日

Arizona Sky

睇同志片最怕遇到悶藝野, 睇肉片同山寨野, 前者中者都會悶到瞓著後者都話可以得啖笑.
呢套"Arizona Sky"就處於高不成低不就既位置. 故事又係老掉牙既話中年熟男重回故鄉尋回年少初戀, 當然無論直定攣, "浪漫"愛情故事一向好得人心. 呢套就咁睇個大綱都可以話屬於呢類, 只可惜業餘演員再加不濟既劇本完全拖跨左成部戲既成績, 對白冗長兼無聊, 其中一位男角hea住演出, 其中一場表弟"捉姦在床"東窗事發既戲, 劇情要求表弟打表哥一拳, 結果拳都未到表哥已經俾左大個反應, 連拳聲效果都慳番. 當然呢套片成本低成咁, 連呢隻DVD都係導演自家山寨式製作既DVD-R, 慳得一蚊得一蚊就預左. 但如果對白上可以再執執, 劇情推進得可以比較好, 套野或者可以會更好.

2008年11月26日

寬螢幕的你管與超爛的4:3

近日留意到youtube既版面有重大變動, 繼之前推出高清版video後, 原本video都響近日轉成widescreen版本. 不過似乎九成九既video仍然係4:3比例, 搞到似用widescreen LCD TV睇模疑訊號一樣, 異常古怪.
亦令我諗起以前電視台播電影時, 片商為左照顧4:3比例電視既觀眾, 通常都會做一個full screen pan and scan版本供電視台及出影帶時用. 即係一套用1.88:1比例去拍攝既, 佢地會用技術將畫面不固定地響原格菲林上跟隨主角遊走, 畫面比例會變成普通電視既4:3. 令到響電視播放時畫面上下唔會出現黑邊, 但咁樣就會睇唔晒原片上整個畫面, 有D地方就會錯過左.
響網上就容易搵到一段當年BBC播映既電影, 唔知係咪做漏左pan and scan呢一步, 結果有好多場口都出現好多好好笑既古怪空白場面.
(留意白色框先為電視台出街既比例)

TCM製作大導演介紹 widesceen 同4:3既分別

2008年11月22日

我被金融海嘯沖走了

近月查閱銀行既月結單(唔會話我唔環保, 銀行月結單我係指定要收hard copy, 就算連埋信用卡同股票一個月總收到十封月結單左右, 但始終係比e-banking來得實在同安全. 而且做個人理財做預算都容易好多, 網上銀行真係未必做到.), 發現股票戶口總數無左一半, 加加埋埋無左十幾萬! 呢一刻先發覺我地原來已經俾呢次金融海嘯沖出大海, 如果前年B唔係突然話想買股票而唔係齋低息儲錢, 我諗我地今次可能未必受影響.
近呢個月自己駛錢都小心左, 亦都駛少左. 已經連續兩個月有錢淨而令到每月私己儲蓄額增加. 有好多野想買例如Blu-ray機,新手機,新手錶都無限期押後. 原訂聖誕會去台灣, 上個月決定改去澳門. 今日B又話個市咁差, 真係唔多想駛錢. 佢既一句話, 結果就連澳門都無得去. 我諗今年聖誕都係當無發生過...吧啦.

2008年11月19日

咬字

無論上一輩或呢一輩既"專業"音樂製作人, 對歌手既唱歌咬字必定會嚴格, 因為如果一個歌手唱歌咬字唔清唔楚, 平常人唔睇歌詞真係唔知對方唱乜, 唔知唱乜咁又點會有共鳴呢?
好在香港少見呢類漯脷歌手, 但好不幸前陣子遇上一個反面教材...
電台第一次聽呢隻歌, 心諗: 呢條女究竟唱緊乜野? 中文歌嗎? 跟住響電視睇有字幕既mv, 見大約估到唱乜. 可以話全首歌佔左70%連咬個字都hea住去. 懶妳響廣告歌界有幾紅, 但作為一個歌手, 連咬字清楚呢D基本功夫都做唔好, 再點叫人支持妳呢?
我諗朱fun E應該再出動打救樂壇!


註: (原文本來於十月完成, 但眼見呢位咬字不清既女有班盲目fans於網上對反對者喊打喊殺, 所以原文一直擱置至今, 見班fans散去後, 所以將文章出土. 文章曾作修改)

2008年11月18日

光纖廣告

之前HKBN既"誤導性"光纖廣告真係睇到人火滾. 但尋晚連續睇左幾個新廣告(似乎係承接上回依舊泰國低成本製作), 無左誤導性真係成條光纖隊入你屋企, 反而重回CTI時代既踩界式挑戰.
18個版本, 各有千秋. 我至愛係以下呢個熊貓, 至可怕係燒魷魚一個, 玩過籠太過震撼.




伸延閱讀:
18區廣告
HKBN官方網頁

2008年11月17日

MR/黃耀明/鄭融/謝安琪/EO2

MR Mister
終於有真正制成品出現, full band響香港主流樂壇難生存, 響主流唱片label生存就更加少見. 但聽完呢隻maxi ep, 我相信佢地絕對有得留低不突止, 仲更加一定有更好前途. 主打既"Everyone""想太多"已經係上加之作. "等不了""15"更加係有潛質plug上台.

黃耀明 King of the road
黃先生終於有張較似樣既專輯出台! 卸下華禮, 坐上公路飛車說人生. "廣深公路""貪生怕死""20"係我多年來重拾聽明歌既興趣.

鄭融 23
鄭小姐今次徹底地成熟了! 風格雖然依舊跳跳紮, 但歌詞及演譯上已見佢有進步. 全碟最驚喜係"Whatever will be".

謝安琪 Binary
而家先寫? 係, 因為呢張碟太回味, 完全要逐粒音細數先可以享受. 全碟10隻歌各有千秋, 音樂及歌詞都係高水準之作, 可以話呢張碟係今年最重要既一張.

Eo2 Ladies Nite
呢四位哥仔, 似乎係要辛苦工作/plug歌兩年賺夠先會去出版一張新專輯. 全碟五首歌差不多都plug過, 但其實最搶耳既係首國語歌"男人的錯", 久違既吳國敬大作, 再加夕爺既詞, 有唔錯既化學作用.

2008年11月16日

Scatman John

前陣子為左幫舊同事婚宴搵歌, 就將CD櫃大反轉. 唔覺意搵到十年前呢兩隻CD. 前晚為左上"你管"搵Dido, 咁順度搵番Scatman John既video睇睇, 竟發現原來Scatman John(John Larkin)響九年前已經離開左我地, 難怪多年來佢都好似無再有新歌出現.
如果80年代係代表新音樂崛起, 咁90年代係代表百花齊放, 只要你有料有綽頭甚至可以運用你既缺撼就一定可以響呢個世代立足(John係口吃的!). 就回顧Scatman John既名作.


Everybody Jam


Scatman's World


Scatman

2008年11月13日

Dido!!!

等左咁多年, Dido終於有新歌面世. 似乎今次隻新歌延續上次Life for rent既感覺走. 感覺良好.

邊個係Dido?? 唉, 就由以下幾隻超經典歌重頭認識Dido.
Thank you:
http://hk.youtube.com/watch?v=thqK24LJR3o

(Eminem)Stan:
http://hk.youtube.com/watch?v=KQR6yBwFHQU

Here with Me:
http://hk.youtube.com/watch?v=y95-VipidR0

White Flag:
http://hk.youtube.com/watch?v=NMB4xtnFlvo

Life for Rent:
http://hk.youtube.com/watch?v=x96IK7xHkbs

(Faithless)One Step Too Far:
http://hk.youtube.com/watch?v=8nn01AzOwDw

Hunter:
http://hk.youtube.com/watch?v=lEexvtfUHkY

2008年11月12日

呢個都唔係占士邦

之前20集占士邦都係...

  • 好姿整既男人, 就算同壞人對打之後都要"立即"執番靚自己身光頸靚趕下場.
  • 佢有個上司叫M有男有女, 有位識整秘密武器兼永遠認為占士邦係個大細路既Q, 仲有明戀占士邦既秘書小姐Moneypenny.
  • 故事簡單到爆開. 壞人想統佔/破壞呢個世界, 占士邦出面阻止; 搞掂, 完場.
  • 一定有多過一場既床上戲,
  • 一定有首易上口又非常流行既主題曲.
  • 一定有個好爆既opening再先至輪到每集獨有既opening title.
  • 多數會智取再加秘密武器, 少用拳腳.
  • 再講一次: 占士邦係個姿整男人, 行步路擺個pose住乜野酒店就連飲杯野都麻煩(姿整)過人.
不幸, 睇完第22集之後, 原來我地睇緊呢個都唔係占士邦. 由頭到腳就連行步路都無忽似, 極其量佢只可以話係個爛仔.
新力公司近廿年來一直想拍占士邦, 因為佢地話擁有版權. 結果跟果家人打上官司, 輸左. 點知後尾原來用少少錢收購MGM, 就可以間接擁有占士邦, 之前蠢左.
占士邦改革! 換上新面孔, 導演變得唔一定係英國人或英聯邦人(今集係位德籍導演), 幕後都係果家人. 造就左新一代占士邦: 就係大家所講既有血有肉. 突然之間占士邦變左超人, 無左秘密武器仍然可以上天下海跳高炸不死等等. 最重要就係見人就打, 見人就殺, 打左先算, 打既係爛仔交, 完全無左以往英國紳士風度: 打完都執番企理自己, 唔學似宜家爛身爛勢通山走.
上一集故事還可以, 只係無諗到留下一大條尾巴, 留番俾今集繼續. 今集, 仍然無Q, moneypenny, 秘密武器... 故事已經扯到無雷公咁遠跟唔番, 動作場面變得麻目, 停不了飛車打打打飛艇打打打飛飛機打打打跟住再黎個大爆炸...依然係佢既爛仔交. 可惜攝影同剪接都令到果D動作場面零零碎碎毫不緊湊.
今集已經唔再係占士邦電影, 只淪為一部打打打既超人動作片. 以往每個男人都希望自己係占士邦, 都幻想可以有美女名車拯救世界. 如今幻想破滅, 因為新占士邦只係一位揸名車既mk浩男, 佢同曾特首一樣只希望做好份工, 唔順超就打你兩鑊. 究竟係真心有血有肉, 定抑或搵食艱難? (果場被M cut信用卡而要四出班水既戲, 有D面善! 笑!)

官方網站: Quantum of Solace

2008年11月8日

Free Preview

以前一聽到"Free Preview"一詞真係好怕, 尤其仲響某英國台工作既時候. 每年總有一頭半個月舉行Free preview, 即係有線電視供應商提供呢個台既免費試睇去吸引訂戶去訂呢個台. 有時一年可能舉行兩次分別唔同既供應商, 今次可能係Sky, 下次可能係Telewest.
吸引訂戶最好當然俾最好既節目響呢個時候播出, 亦盡量大幅咁宣傳其他節目. 我怕既原因就係因為要做雙倍既工作量, 總之要留住舊客吸納新客為目標.
到宜家自已變番做一個普通電視觀眾, free preview反而對我係一種樂趣. 正如上月BBC在港推出半個月既free preview, 至少留住我響BBC Knowledge, 睇左幾集英版既The Apprentice, 感覺又真係好睇過美國版. 不過可惜如果再訂呢個月, 月費就會超過四百蚊, 結果我都真係無幫襯. 今個月又輪到"Fx"同"Fox Crime"台做free preview. 可惜暫時兩個台既節目唔太吸引我, 除左Fx台會播英劇"Peep Show"有少少吸引我之外, 其餘舊到如"J.A.G","Frasier"已播到唔想再睇, 叫我訂呢個台撇除金錢問題以內容黎講真係有D難度.

P.S. 舊東家"STAR World"大換血後就連logo都換埋, 但最正既係佢地既節目終於首現(港式)中文字幕. 之前已講過無數次, 就算你有幾強勁幾獨家幾優先既劇集節目, 但無左中文字幕呢家野, 香港根本就好少人會去訂呢個台, 睇下人地SONY旗下幾個台就知個分別. 而家STAR World先後知後覺, 去到Heroes S3先加中文字幕, 如果有埋free preview或者都可以吸引到人去訂呢個台.

2008年11月6日

警訊話...

成日覺得警訊除左夜晚播之外, 響午間婦女節目時段都應該播一次, 畢竟師奶確係屬於易呃一群.
睇得多警訊, 就對騙案手法略知一二. 今晚放工走近港鐵站感覺有人叫我, 回頭一望有位中年西裝人向我招手, 而且佢好熟口面, 似我一位舊朋友. 點知佢一開口, 我就知佢唔係我位朋友, 因為佢係講普通話. 佢一開始就問我識唔識普通話, 我話: 還成. 他就繼續介紹自已... 自稱北京人, 剛從吉隆波到港來到鰂魚涌想搵朋友又搵唔到, 自己身上又無晒錢, 想問我借錢搭車.
吓? 又係伸手攞錢搭車黨? 見佢西裝筆挺, 左手仲點左枝煙添. 多口問佢想去邊? 佢話要去機場, 因為行李全部寄存響機場.
呢一刻, 腦海中突然自動播出警訊案件重演既片段. 疑問 1: 有錢由機場去
鰂魚涌搵朋友但又唔預錢回程? 疑問 2: 銀包連信用卡或提款卡都無? 老兄, 你點信你由外地到港呢?
結果, 我同呢位疑似"自遊人"講: 我還是找你的朋友幫你吧. 我就轉身走.
上左港鐵, 我先知自己蠢左. 應該搵位警察先生幫幫呢位西裝....如果呢位西裝人係"假如我是真的", 警方都可能會幫佢. 但如果呢位西裝人只係另一位伸手攞錢搭車黨"? 各位響鰂魚涌附近就要小心.
或者我都係睇得太多警訊....

2008年11月4日

最近我開始約會卓韻芝

唔係講笑, 呢排真係日日對住卓小姐....
基本上, 梗係唔係對住佢真人啦. 只係一口氣買左佢四本近作日日刨. 件事係咁既, 事關近月買左幾本blog書, 我睇書係屬於好快果隻, 所謂一眼睇百字. 讀完果幾本blog書, 感覺係... 好爛好垃圾.
唔係講笑, 頭一兩版的確吸引, 咁就叫我真係出錢買本書. 但打後果幾十頁紙真係悶到出煙, 完全係兩回事.
或者因為受呢D 爛blog書影響, 真係要搵番D真正有智慧既書去睇, 結果我揀左卓小姐.
我一直都有拜讀卓小姐既專欄, 甚至乎佢"之前"既電台節目都有不定期收聽. 但唔知點解, 一直無買佢既著作.
或者佢係算果種我"喜歡"但未入到我既書店wishing list, 我會買邁克林奕華藍海寧李碧華但卓小姐哩... 又未輪到佢. 但佢又屬於我會響書店揭佢書既對象, 即係得個摸字, 但又未wishing.
咁點解今次又會咁重手買呢? 除左係"渴書"之外, 仲因為... 商務85折! 唔好話我cheap, 卓小姐妳亦好怪我, 我錯過左今年書展, 今次就係今年買平書既最後機會. 卓小姐, 妳都屬於消費型人, 妳都好清楚點為之精明消費, 我諗今次我真係有過good deal. 四本你既著作再加商台某本新書埋單都係二百幾, 就可以日日同你"文字交流", 妳四本書足夠令我滿足兩個月, 抵!

2008年11月1日

生活炒雜碎(第十二回)

人越老係咪越容易瞓著? 以往無凌晨一點唔碌上床, 前排日日失眠電視睇通宵. 近月又有新野, 每次晚飯後唔駛半個鐘就自動響梳化上瞓著. B由以往拉我起身入房到現在拉都唔拉任我響廳瞓通宵.
我無深究點解會咁易瞓著, 我又唔係真正到處睡既人, 實在費解. 當然當大家見呢度幾日又無更新就知我又大昏迷.
##########################################
香港既反智社會再下一城! 政府呢頭話唔會用公帑賠償俾雷曼苦主, 果頭消委會又話用基金支援苦主打官司. 消委會個責任係無錯, 但可唔可以只支援查明有欺詐成份既案件而唔係每位都去幫呢? 有時呢類投資已講明可升可跌, 輸打嬴要就係最唔要得.
就正如最近我決定離開某一個網站以後都唔再做訪一樣, 佢地歪理當真理, 唔知頭唔知路既人就盲目跟隨, 聞者傷心見者笑到流眼淚. 以為都係只有一個硬膠膠, 到頭黎原來連版主都膠埋一份. 好在我及時逃出, 否則一定"膠住"走唔甩.
##########################################
前幾年本地電台DJ唔用腦既選舉事件搞到佢地幾乎身敗名裂. 諗唔到上個月英國BBC亦發生左一件類似而絕對不可原諒既事件, 一切由玩電話開始, 詳程就唔再講, 因為BBC自己響網站都有個詳細既timeline, 連當中粗口內容都出埋. 玩電話開玩笑到底都係有限度, 如果似呢兩位仁兄玩到咁完全係有損人格. 但最神奇係何解呢一集既內容可以去到咁淫褻都可以出到街, 就算開始已有警告字眼但都唔可以做擋箭牌. 換轉係響香港發生, 我諗電台甚至會被政府停牌.
結果呢兩位主持, 一個自動辭職, 一個就被停職停薪連電視節目都cut埋. 就連Radio 2總監都引咎辭職. 因為呢件事除左收到有超過三萬宗投訴外, 就連英國首相都嚴厲批評呢件事.
下次大家開玩笑前, 都係最好諗清楚.
##########################################
收到老細通知, 我終於獲得進昇, 人工亦都有所調整. 當老細向我提出加幅時, 佢問我滿唔滿意? 我只能夠講: 呢個時勢, 有人工加已經好難得.
經過咁多年響呢一行掙扎, 終於有人肯定我既辛勞而獲得應有既嘉許, 我已經開心到不得了.
我深信, 就算呢個困境, 你努力就仍然可以得到應得既回應. 香港, 唔好氣綏!

2008年10月27日

軟飯王

話說屋企附近個商場內既食肆差既繼續咁差, 好既就已經一走了之. 要搵食就真係所餘無幾.
商場其中一個舖位被譽位死位! 開乜野食肆都會滅亡, 由中餐館開始, 左手挾住廣東點心, 右手又叉住北京飽點. 完全係集百家大成, 舖位大大但坐到仲迫過大牌檔, 結果玩死左自己. 原班人馬原址開另一間日式餐廳, 舒服係坐得舒服左, 但味道差又貴到飛起, 最難頂係衛生, 有次驚見企響橱窗前既魚生師傅一邊撩鼻一邊整魚生! 開業不久人流散晒
就算食二百送一百甚至長期八折都無用, 店舖"長期"水靜河飛. 一年都無就執左.
不久見圍板話又係開餐館, 心諗: 唉, 咪啦, 個位開乜死乜. 前兩個星期呢間餐館開張, 客似雲來, 見個menu賣既都係好普通既野, 價錢又唔平, 唔通真係咁好味? 跟住屋苑既網
上討論區街坊話間野有明星睇仲會招呼埋你添! 明星效應當然有效, 但兩個星期後, 人流散去, 今晚B話不如去試下啦.入座後被編去窄窄既兩人檯, 咁大個舖位但又係有咁多檯得咁多檯, 迫到似雞籠. 最正既自己對到正一正個喇叭, 全場正在"焚"勁歌, 下下泵心口. 果一刻, 真係想走. 跟住....真係見到明星!!! 郭小姐走埋黎招呼執檯, 心諗如果呢間野有電視, 平時八點係咪一定播果套劇呢? 有位藝員做下生招牌, 再望下個menu, 結果留低. 不過請左佢地可唔可以較細聲個喇叭, 結果到埋單一刻, 歌聲依然咁大力泵心口. 真係以為去左disco食晚飯, 成晚都好似咁... 我: ....... B: what? 我: ....... B: ha? 連隔離檯一對中年男男couple都要接近咬耳仔去傾計.
呢間野似乎賣意大利飯做主打, 但我地真係唔係太好, 所以揀左其他野, B叫左個士多啤梨骨飯, 我要左個黑松露牛仔肉意粉. 個飯...吾... 哈哈! 根本係茶餐廳水準, 笑鳥. 個意粉比較似樣, 唯一遺撼係D牛仔肉似皮帶多過似肉. 兩個菜連兩杯野飲承惠一百八十幾, 貴得唔合理.埋單後我倆都諗起KFC最近個廣告, 笑左出黎.
用一百八十幾去睇藝員仔, 有D傻. (佢地係有套餐, 價錢比較平, 但要係指定主菜無得揀.)

2008年10月26日

Clerks 2 便利店氹氹轉2 (港譯:賤男咔啦囌)


十幾年前, 我響hkiff睇左呢套戲既第一集. 當年真係驚為天人, 碌幾萬蚊卡數去拍一部戲但又可以咁趣緻兼有紋有路. 造就左我成為Kevin Smith既粉絲, 每有新作都仆心仆命去睇. 其中片中一對活寶Jay同Silent Bob亦成為Kevin Smith之後每部片既必定主角.
亦慶幸Kevin Smith響第一集無用到另一個結局(將Dante殺死), 今回Dante可以延續上一集繼續響便利店工作. 不過一次意外被近轉去快餐店工作, 再跟中女女友結婚離開New Jeresy.
今次可能係Kevin Smith唔再屬於果個階層去睇野, 呢個續集跟第一集相差太遠. 響便利店既人生百態, 響呢一集统统都唔番, 只得番既係零丁既碎碎念. 就連Jay都似收左火一樣. 好在有Jason Lee呢位舊同學既出現先可以有少少衝激, 當烈亦有倒如KS既商標星球大戰fans今回大戰LOTR fans.
結尾一段人獸交真係笑到收唔到聲, 出位得黎又荒旦. 真令我其待KS下一部關於拍咸片既新作.

2008年10月25日

加東叻藥豬咕nic

每年公司都會出一D紀念品送俾客戶, 記得有年出產罐頭拍紙簿, 要開罐先用到, 但係未用到拍紙簿已經俾個罐頭到成手損晒. 往年年尾出既月曆都係反應麻麻, 唔係太巨型就係毫無新意.
尋日收到下一年既月曆時, 真係笑左出黎, 唔係咁搞野出朱古力嘛....

呵呵! 警告!! 無人造色素, 味道同朱古力!!一打開竟然又係月曆! 個個月都用唔同既朱古力包裝.咦, 數數下無左一月同十二月既?包裝紙竟然就係一月, 睇死人.盒底係十二月!!貼身地送上2010年年曆咭. 可以提早plan放假了.

呢個爛gag, D細路明唔明呢?呵呵.