2008年10月27日

軟飯王

話說屋企附近個商場內既食肆差既繼續咁差, 好既就已經一走了之. 要搵食就真係所餘無幾.
商場其中一個舖位被譽位死位! 開乜野食肆都會滅亡, 由中餐館開始, 左手挾住廣東點心, 右手又叉住北京飽點. 完全係集百家大成, 舖位大大但坐到仲迫過大牌檔, 結果玩死左自己. 原班人馬原址開另一間日式餐廳, 舒服係坐得舒服左, 但味道差又貴到飛起, 最難頂係衛生, 有次驚見企響橱窗前既魚生師傅一邊撩鼻一邊整魚生! 開業不久人流散晒
就算食二百送一百甚至長期八折都無用, 店舖"長期"水靜河飛. 一年都無就執左.
不久見圍板話又係開餐館, 心諗: 唉, 咪啦, 個位開乜死乜. 前兩個星期呢間餐館開張, 客似雲來, 見個menu賣既都係好普通既野, 價錢又唔平, 唔通真係咁好味? 跟住屋苑既網
上討論區街坊話間野有明星睇仲會招呼埋你添! 明星效應當然有效, 但兩個星期後, 人流散去, 今晚B話不如去試下啦.入座後被編去窄窄既兩人檯, 咁大個舖位但又係有咁多檯得咁多檯, 迫到似雞籠. 最正既自己對到正一正個喇叭, 全場正在"焚"勁歌, 下下泵心口. 果一刻, 真係想走. 跟住....真係見到明星!!! 郭小姐走埋黎招呼執檯, 心諗如果呢間野有電視, 平時八點係咪一定播果套劇呢? 有位藝員做下生招牌, 再望下個menu, 結果留低. 不過請左佢地可唔可以較細聲個喇叭, 結果到埋單一刻, 歌聲依然咁大力泵心口. 真係以為去左disco食晚飯, 成晚都好似咁... 我: ....... B: what? 我: ....... B: ha? 連隔離檯一對中年男男couple都要接近咬耳仔去傾計.
呢間野似乎賣意大利飯做主打, 但我地真係唔係太好, 所以揀左其他野, B叫左個士多啤梨骨飯, 我要左個黑松露牛仔肉意粉. 個飯...吾... 哈哈! 根本係茶餐廳水準, 笑鳥. 個意粉比較似樣, 唯一遺撼係D牛仔肉似皮帶多過似肉. 兩個菜連兩杯野飲承惠一百八十幾, 貴得唔合理.埋單後我倆都諗起KFC最近個廣告, 笑左出黎.
用一百八十幾去睇藝員仔, 有D傻. (佢地係有套餐, 價錢比較平, 但要係指定主菜無得揀.)

2008年10月26日

Clerks 2 便利店氹氹轉2 (港譯:賤男咔啦囌)


十幾年前, 我響hkiff睇左呢套戲既第一集. 當年真係驚為天人, 碌幾萬蚊卡數去拍一部戲但又可以咁趣緻兼有紋有路. 造就左我成為Kevin Smith既粉絲, 每有新作都仆心仆命去睇. 其中片中一對活寶Jay同Silent Bob亦成為Kevin Smith之後每部片既必定主角.
亦慶幸Kevin Smith響第一集無用到另一個結局(將Dante殺死), 今回Dante可以延續上一集繼續響便利店工作. 不過一次意外被近轉去快餐店工作, 再跟中女女友結婚離開New Jeresy.
今次可能係Kevin Smith唔再屬於果個階層去睇野, 呢個續集跟第一集相差太遠. 響便利店既人生百態, 響呢一集统统都唔番, 只得番既係零丁既碎碎念. 就連Jay都似收左火一樣. 好在有Jason Lee呢位舊同學既出現先可以有少少衝激, 當烈亦有倒如KS既商標星球大戰fans今回大戰LOTR fans.
結尾一段人獸交真係笑到收唔到聲, 出位得黎又荒旦. 真令我其待KS下一部關於拍咸片既新作.

2008年10月25日

加東叻藥豬咕nic

每年公司都會出一D紀念品送俾客戶, 記得有年出產罐頭拍紙簿, 要開罐先用到, 但係未用到拍紙簿已經俾個罐頭到成手損晒. 往年年尾出既月曆都係反應麻麻, 唔係太巨型就係毫無新意.
尋日收到下一年既月曆時, 真係笑左出黎, 唔係咁搞野出朱古力嘛....

呵呵! 警告!! 無人造色素, 味道同朱古力!!一打開竟然又係月曆! 個個月都用唔同既朱古力包裝.咦, 數數下無左一月同十二月既?包裝紙竟然就係一月, 睇死人.盒底係十二月!!貼身地送上2010年年曆咭. 可以提早plan放假了.

呢個爛gag, D細路明唔明呢?呵呵.

2008年10月21日

像字宙旅程...王菀之: Infinity Journey

無論任何歌手, 轉會既第一張唱片永遠係令人期待. "我來自火星"深得我心, 就更深信呢張碟一定有爆炸性演出. "永遠幾遠"有少少反高潮既K歌, 明白商業元素, 但亦慶幸呢隻歌都可以. "玻璃色"就係一貫王小姐風格, 意境良好.
跟住半張翻唱片品, "花灑"不及原版既"他條", "郎來了"亦不似千嬅那種恨嫁, 反而"小黑與我""呼天不應"甚至"多愁善感"都似比原版錦上添花.
全碟雖未致於爆炸性, 但都已經相當唔錯. 期待下次有更多新歌可以欣賞.

2008年10月17日

兩傻遊濠江2008 (3)

原本預左第二日去氹仔, 但B響第二朝發現酒店有專車去威尼斯人渡假村, 我地見出面天氣又有毛毛雨, 所以決定都係去威尼斯人走一轉.
我覺得威尼斯人既成功除左得個大字, 有D細微野都係做得好好. 以前我地去葡京回力都唔可以戴袋入去, 甚至手錶手電都要除低過金屬探測器. 今次去"永利"都係唔俾戴手袋或者背囊入內, 但戴住手機手錶過金屬探測器係無問題. 但威尼斯人就算你有背囊手袋入賭場係完全無障礙, 呢個就幾值得讚. 不過亦有缺點就係....煙霧迷漫, 比永利葡京更甚.
威尼斯人另一個特點就係有個超巨購物商場. 我地兩個人都唔知行左幾耐行左幾多轉先正式行完個商場, 行完之後真係有D虛脫既感覺. 原來都行左三個鐘, 仲有D肚餓. B就唔係好想去foods court醫肚, 我就無所謂, 最終佢揀左商場入面一間叫"Wings"既餐廳, 叫左客德州雞翼同一客漢堡飽. 雞翼好味不過個汁就唔多掂. 漢堡飽就真係唔錯, 但值唔值百七銀一客就見仁見智.
同B講, 不如下次黎澳門住響威尼斯人啦, 因為仲有一樣野我地好想做, 就係睇"太陽劇團", 我諗會係一個好好既體驗.
就咁, 今次濠江遊就響落雨斯濕下完成. 俾我印像係: 澳門依然有好多好野食, 就算貴左唔少但都值得. 另一樣野係葡京依然有好多"家禽"四圍走兜搭路人. 去葡京買曲奇竟有位高過我既濃低胸向我兜搭, 我即刻拉住B, 車轆腳咁離開.

2008年10月15日

兩傻遊濠江2008 (2)

行完威尼斯人有少少肚餓, 食晚餐又太早, 又食多次麵又太重複, 諗住去義順食個雙皮奶, 點知又人山人海. 率之去左禮記食雪榚, 跟住就番酒店瞓個晏覺.
晚飯時候, B問究竟去邊度食好呢? 講真去左咁多次澳門, 連(新)帆船餐廳都試過, 要搵穩陣就只有毛記, 但我倆都頂唔順佢地既"清潔環境". 再加上近日無記幾個飲食節目車輪轉介紹澳門美食, 突然心中有個答案. 因為阿蘇個節目都有介紹呢間餐廳, 其實幾年前已經去過, 價錢ok, 味道一流, 今次番兜唔係無道理.
盡見檯檯都係芝士包, 咪啦! 自己叫左D心水野!

焗鴨飯: 面頭金黃色飯焦, 焗飯入面有鴨絲同葡腸. 鴨油同葡腸既味道已經令個普通既焗飯加分!
葡國雞: 八十幾蚊得五件雞, 但重點係汁唔濃但味濃, 食得出雞係新鮮雞, 因為雞有雞味....

葡腸炒菠菜: 簡單但又好味.埋單都係三百蚊, 抵到震! 晚飯過後始終都係去左義順走一轉! 呵呵~

(代續)

2008年10月14日

兩傻遊濠江2008 (1)

終於完成呢次濠江遊, 同B去過好多次澳門. 第一次甚至係同我父母一齊去, 對上一次就應該係陪佢出席一個會議, 一大班人住響老鍊咁遠既一間極之荒無酒店, 附近正係興建中既威尼斯人渡假村.
今次臨時將原本想訂英皇娛樂酒店改為皇都酒店. 一來B唔鍾意住響賭場, 二來近來經濟差左, 真正慳得一蚊得一蚊. 以往我地都曾經住過呢間酒店, 印象雖然係市中心附近, 但又算幾偏僻, 而且內襱真係好殘舊, 話就話五星級, 但好似好一廂情願. (但最正果次係搭新渡輪, 令我發誓今生今世都唔會再搭新渡輪去澳門!)
今次當然仍然幫襯"何生小輪", 至少係信心保証! 唔駛90分鐘我地已經去到酒店. 原來呢間酒店新近裝修好, 外面雖則仍然好舊, 但內裡就已經光猛好多! 甚至係客房都睇得出有改善, 無左以前木面牆, 而家裝左32吋LCD電視, 而且仲有免費上網服務. 我地被安排較高樓層既豪華客房, 可以遠眺內港海景橋景. 放低行李, 第一樣野當然係去醫肚. 諗住行番去廣場, 行到一半見有間貼滿蔡先生相片既小館, 原來呢間小館馳名竹昇蝦子麵, 既然一場黎到當然又要試下. 味道唔錯, 竹昇麵完全同我地食開既麵有分別, 口感好好. 可惜價錢比較貴... ($40/蝦子竹昇雲吞撈)
食飽左後, B話想去永利行下, 感受下呢間同拉斯維加斯果間既分別. 入到去無葡京咁煙, 地方夠大但空檯都好多, 星期日都係咁既環境, 真係有D擔心. 用左15分鐘行完, 我倆感覺真係麻麻, 一來我倆唔鍾意賭, 尤其B以前曾經響拉斯維加斯既賭場工作過, 對賭真係好麻木. 二來一個咁大既場竟然有咁多空檯, 真懷疑究竟澳門賭場係咪過剩呢?
跟住我地去睇果株願望樹, 以為係乜野表演, 點知又係一個異常浮誇既機關裝置, 難為內地自遊人一個一個咁向果株假樹掉硬幣但又唔係真心許願志在配合呢個浮誇場面, 難怪B話: 就算呢班人唔買野唔入賭場幫襯, 賭場都一樣可以賺到佢地既錢.

(代續/預告:一邊睇住蔡先生介紹一邊嘆住濠江美食)

2008年10月10日

反智到無朋友的網上旅行社

話說B講左離開香港去渡個長週末講左好耐, 成個暑假都過左, 只去左黃金海岸酒店. 當然佢梗係唔算數, 仲老早提過佢十月有個五日假期, 結果我又懶懶閒直至呢幾晚睇阿蘇個電視節目介紹澳門, B問: 不如我地去澳門囉. 又係埋門趕頭趕命去訂飛. 見康泰永安都選擇唔多, 反而中旅選擇較多, 而且佢地有個"芒果網"疑似有網上訂票服務, 仲話可以有專人送飛服務, 所以一試. 搞完一大輪之後竟然無要求我入信用咭號碼就話完成交易, 我仲諗或者佢地會係確定房間後我會收到電郵通知去上網繼續交易. 但唔夠10分鐘我竟收到佢地既來電, 對方話你所訂既套票價錢會係比訂果個貴百幾蚊, 我仲未來得"吓", 佢又繼續: 王生, 我地而家係有兩個付款辦法, 你可以上我地響旺角既寫字樓或者去旺角中旅社碌卡又得, 又或者可以用銀行入數. 我個"吓"終於可以送俾佢.
諗唔到網上買野都可以搞到咁複雜, 網上買野都係為左方便唔駛出街限時完成, 無諗到中旅社可以咁反智網上訂完仲係要落門市俾錢. 我同位鄉音女士講: 唔該請你幫我取消呢個booking, 旺角太遠勒.
結果放工咪又碌左落門市訂, 不過突然醒起原本想訂既果間酒店係有賭場, 而B對呢種酒店實在唔鍾意, 唯有改訂番間無賭場既酒店, 仲平左幾百蚊添.

2008年10月9日

爛到爆開的英文 (2) B/L SM PK

究竟首選牌係First Choich/First Choick呢?
另外乜野係B/L SM PK呢?
玩SM既PK? 吾....
(攝於新都城惠康)

2008年10月8日

爛到爆開的英文 (1) Time is Closing

(攝於新都城)

2008年10月7日

雷安娜SACD


從老歌谷睇到有網友話呢隻出於2003年出既SACD非常靚聲, 最重要係呢一刻係有舖頭半價發售呢隻碟.
仲記得呢隻碟當年係老媽教我聽流行曲其中一隻, 全碟十一首歌都係上佳之作. 但唔知點解幾年前復刻版重現但無買番, 所以一見有咁正既意見即刻碌出街搵, 搵左好多間先搵到. (唔駛去H記了, 佢地原來無入.)
雖然我無入呢隻碟既復刻版, 但我仍有另一隻雷安娜精選既復刻版CD, 所以可以對其中一兩隻歌作比較. 雖則自己亦無SACD player, 但齋用CD果層去比果然發現呢隻SACD確係比普通CD靚聲好多, 高音同音場都比較清翠同廣闊.
似乎今次真係執到寶.

2008年10月1日

Life on Mars

有陣子真係無留意BBC Entertainment呢個台, 有日咁啱轉台見到佢地播緊Judge John Deed既第五輯, 咁又乖乖睇晒. 跟住某晚又留意到佢地有套電視劇叫"Life on Mars", 結果又乖乖睇晒. 睇完後心諗點解本地電視劇只識哭哭啼啼三角關係, 少少創意都唔去諗, 到發現外國有好野就只識抄抄抄.
講2006年一位Manchester警探一次交通意外後, 醒來竟發現自己回到1973年. 後來就繼續活響1973年繼續警探生涯.
整體套劇既意念確係唔錯, 尤其對時代唔同文化既衝突, 其中有趣如男主角有場戲話點解自己唔係番去八十年代而係七十年代呢? 從而睇得出七十年代確係與別不同. 可惜縱然意念好, 實行起上黎就真係有D困難, 尤其要拖足16集(共兩輯)先睇到一個open ending, 都幾無癮. 再者, 發現每集嘗試拎7,80年代既警匪劇既格式套入, 但又令原本"回到未來"式意念削減, 吃力不討好, 兼且偶有悶場. 只希望打後既集數會有改善.
網上一查, 原來亞視早響七月已經有播呢套劇, 走寶! 再者BBC已經拍了續集, 同一條橋不過今次玩回到80年代.


伸延閱讀: 官方網站