2008年5月31日

緊急通知: mall.jsdvd.com 暫停接受海外信用卡付款

上星期仲用到, 尋日想上去再買碟, 個付款系统突然話付款失敗, 因為只接受台灣本土信用卡. 即刻打左封email去問jsdvd.
今日先收到回覆:

您好,非常抱歉~
因金流公司TWV無預警暫停海外刷卡
我們雖已提出嚴重抗議,但還是無法利用台灣里平台付款
目前正尋求其他安全平台配合,敬請稍後.
造成您的不便深感歉意~


睇怕又要幫襯番博客來.
P.S. 之前未試過一次過上網買咁多野兼咁貴, 花成三千幾蚊(新台幣), 一大盒DHL送上我office, 都幾壯觀.
今次入有港版已經絕左版, 有仍有港版發售, 亦有無出過港版. 仲差一隻未寄黎, 好似果隻係港版就斷.

2008年5月29日

落大雨咪著波鞋

唉~ 不聽老人言, 終需吃虧在眼前!!
今朝臨出門B已經同我講記住著我對防水鞋, 點知左耳入右耳出, 照著對波鞋番工. 一路上行去港鐵站仲可以, 但一出鰂魚涌站, 哈! 以為搭左九個鐘港鐵, 天都黑埋兼大雨到無倫.
結果... 波鞋入水, 全腳濕晒.

醉瓊樓你在何方??

記得細個果時, 屋企樓下有間醉瓊樓酒家. 當時家境尚好, 所以周不時都會全家落去食個晚飯. 呢間醉瓊樓規模都真當大, 佔左三層. 但通常我地慣性係坐地下果層, 記得有次有親戚響呢間醉瓊樓請飲(呢個真係超方便, 最快到亦最快番到屋企), 先至有機會到樓上去. 仲記得佢地馳名"鹽焗雞"同"炸大腸"既味道, 真係好難忘記. 後黎呢間醉瓊樓結業, 變成另一間廣東酒樓, 我地再食唔到呢種正宗客家菜. 就算往後日子, 就算見到美其名醉瓊樓, 但不見得係同一件事.
直至前排母親節, 阿妹提議到北角某客家菜館食飯. 記得之前響北角住既日子, 呢間菜館真係日日人頭湧湧, 口碑都唔錯. 住響附近兩年但就從未幫襯過, 既然今次難得就即管一試!
當晚一到門口已深知不妙, 無人等位? 直上二樓更見半層係空既. 唔通今晚提早收爐? 因為遲到, 家人已經點左菜. 唔駛一陣四餸一湯一次過上檯! (!!!) 賣相一般, 味道就... 冬瓜湯: 完全似酒樓平價促銷三十蚊個既質素, 可以話根本係冬瓜水. 炸大腸: 賣相及味道尚可. 另一碟連名都記得: 完全唔得! 無味! 鹽焗雞: 如果果隻真係雞, 可能係史上最瘦既雞! 厚皮薄肉大骨, 鹽焗? 好似唔覺囉. 梅菜扣肉: 應該唯一好味既餸. 咁既配搭竟然收我四百幾蚊?? 見到張單我都"吓"左一聲.
原來低處未算低, 尋晚B話想試屋企附近一間大集團經營既客家菜館. 同樣叫鹽焗雞炸大腸再加碟炸蝦球. 點知美麗誤會睇錯字, "鹽缸雞"錯讀成鹽焗雞, 實質....係沙薑雞. 又油又水又唔濃烈沙薑既沙薑雞! 炸大腸, 嘩! 大腸變成一條條幼幼既紅色物體, 咬口唔似之餘連賣相都惡搞. 炸蝦球, 成晚唯一覺得唔衰既餸, 心諗如果炸蝦球都可以搞到一鑊粥, "稻X"真係可以執.
連續兩餐客家餐都搞到不似人型, 就更加懷念醉瓊樓!!!

2008年5月26日

SONY疑似廣告歌


事情係咁, 某日B響電視睇到呢個SONY廣告, 心諗: 咦?咁似佢一位朋友所寫既歌? 呢隻歌好多年前響夏威夷曾經好流行. 所以佢致電俾佢朋友道賀恭喜佢既歌成為SONY廣告歌. 點知佢朋友話重未賣過歌俾SONY做廣告歌. 咁B將SONY呢段廣告片send俾佢朋友, 咁啱B亦都有呢首歌既CD, 我地一聽之下, 明顯係兩隻歌唔係一樣但亦有疑似既地方, 似唔似大家評下.
B既朋友亦都回覆廣告入面果隻唔係佢既歌, 但都有相似既地方.
B朋友既歌曲Toad Song by
Keali'i Reichel

2008年5月25日

Indiana Jones and The Kingdom of The Crystal Skull 奪寶奇兵之水晶骷髏國

呢一集奪寶奇兵絕對係一個集體回憶! 就由一開始派拉蒙既舊ID開始話俾我地知, 十九年前既記憶就由呢一開始.
相隔十幾年Indy又再出動, 自己又老左, 老豆死黨又死晒, 唔多唔少有D心酸. 近年英雄回歸大多數都帶著呢種稀虛既心酸情懷, 就咁令到跟左佢地好多年既Fans更加熱血.
論劇情今集比較更簡單, 其中外星生物既佈局比較貼近當年一度大熱既UFO熱潮. 同以前三集唔同, 呢集比較近代(50年代), 唔多唔少反應當年既心態, 其中"阿飛"既態度, 係咪都掛住梳靚自已個頭或者開首一場鬥車, 唔多唔少同肥佬(佐治盧卡司)自己套"美國風情畫"接近.
今集再加入父子情節比第三集同樣既父子情黎得生硬, 一來兩父子少交流, 連情趣都少左分享. 反而鍾意重遇第一集女友既一段, 頗有火花.
之前三集多用光學特技, 近廿年後電腦特技太普及, 所以今集唔多唔少用多左電腦特技少左以往既硬橋硬馬既動作場面.
新一代既朋友可能要重溫之前三集先可以投入呢一集, 否則好似而字咁只會見到好多小朋友大叫唔好睇, 反而大人大叫過癮!
始終情懷真係好重要!

2008年5月21日

試片室: My Sassy Girl 我的野蠻女友

記得呢套韓片熱潮中大賣既愛情片? 有齊笑與淚故事結構又一流就連少少細節都唔放過, 兩年前荷李活購入版權重拍, 仲以為至少有大明星做主角. 得出黎又有唔同感覺, 不過地鐵估步伐一段似乎重保留.

2008年5月20日

抽水之霸: 西片譯名鬥西!

西片譯名以前係偶有佳作, 但近年無一不食字, 悶到飛起. 但都唔夠呢一間公司勁, 之前已試過幾部, 但都唔夠最新呢部勁!一部C級片改個靚名就諗住混水摸魚! 真係俾福伯史伯甚至肥佬見到分分鐘無一唔汗顏, 得啖笑.
鳴謝:littlesam提供封面

活著多好

八天了, 每天都有著不同的感人故事及場面, 淚也差不多流乾了, 不知還要煎熬我們的神經到幾時.
昨天, 就連吃個午飯都帶著點罪惡感.

請捐助四川災民亦為他們祝福.

2008年5月17日

試片室: The Happening 破天慌 (有令人不安的預告)

暑假其中一套期待既戲. 之前有條trailer真係好吸引. 但係有條最新teaser出左黎, 真係十個驚, 香港唔三級上就有鬼...
(Teaser片段內容或會令人極度不安)

2008年5月15日

熱血與冷血

呢兩日既地震新聞完全係個超級無敵催淚彈, 每分每秒都令人不期然落淚同時間又希望搶救人員救得一個得一個. 熱血既請唔該立即捐款去賑濟災民, 幾十一千幾百都無問題, 南亞海嘯香港人都捐左十億, 今次咁水深火熱都無理由會少過上次卦. 就連內地企業"國壽"都成立基金照顧一班孤兒, 絕對係抵讚!
可惜大家熱血左兩日, 今日一段冷血新聞就真係令人髮指!
點解有人犯下爾天大禍仲係毫無悔意? 更加用"因為手未斬斷無理由判咁重"為理由要求上訴. 呢類人根本就需要終生監禁, 免得出黎社會為害人間.

2008年5月12日

Come On Baby!

同事帶左包泰國粟米餅返公司, 個個都話好味, 直至食完拎個包裝袋背後一睇.
太美妙了! 你旺我旺大家旺! 旺旺!

2008年5月11日

Walk Hard -The Dewey Cox Story

John C. Reilly並唔係我上心既演員, 佢係位好好既綠葉演員, 但要做主角由頭帶到尾就真係幾懷疑. "Walk Hard -The Dewey Cox Story"可以話係套勁低成本既"阿甘正傳"式傳記片, 用個半鐘嘻嘻哈哈半認真講近五十年既美國音樂歷史. 主角Dewey Cox又係懶American Dream有理想既"少年"(!?), 因誤殺大哥被父親趕走, 從此為左完成大哥遺願走去唱歌, 誤打誤撞下成名, 後來染上毒癮一沉百踩, 最後又再誤殺父親而令佢覺悟離開毒海.
故事完全天馬行空, 偶有"良好"場面例如主角跟Beatles吸毒後既幻想自己變成卡通人物, 就同Beatles以前卡通一模一樣, 真係神來之筆. 又或者遇上貓王, 貓王既舞步動靜突然變得好似李小龍上身咁. 但當然亦有好多"難堪"場面例如玩人體殘肢或者不停有裸男露"芝士腸"場面.
中心思想係好, 用嘻笑講近代美國音樂歷史, 但大玩cheap gag就真係幾精神分裂.

(60/100)

2008年5月10日

神奇の海綿

係同事介紹用上圖既海綿, 同事話只要將化學海綿濕水再揸乾, 用黎清潔一流. 佢甚至話可以污糟既波鞋抹到新既一樣. 既然功效宏大又所費無幾, 所以托佢買左一包試試.
今日鐘點清潔上黎, 我就同佢講不如試試呢隻化學海綿清潔爐具, 因為爐頭唔知上手點解可以整到咁污糟. 同時間我亦都用B既汚糟舊波鞋試用呢隻海綿. 結果位阿姐真係將個爐頭抹到新既一樣, 千年污漬無晒. B既舊波鞋我都抹到有七成新咁濟, 認真神奇. 不過缺點係清潔進行時海綿會自動分解成碎片, 所以清潔最好鋪報紙免得一地膠碎.
最神奇係呢包野係free cutting可以分開好多次用, 每包都只係十蚊, 指定既拮豬島十蚊店有售, 抵到喊. (另拮豬島百貨家品部亦有售但索價三十九個九.)

2008年5月8日

露點阿叔 Vs 美心港女

網站youtube起初係俾人用黎自拍短片分享, 但係可惜演變成現今咁電影電視MV重播站, 真正自拍短片分享變得小眾. 美心港女將youtube變成邪惡報復工具結果天有眼, 響高登起底組之下令呢位八婆變成過街老鼠, 所有個人資料都上載分享.
當然亦有人用自知既技能, 大唱時事歌. 多少搞笑多少認真, 自己諗.

2008年5月4日

無殼蝸牛搵殼日誌(後傳第五回)

響新屋住左近兩個月, 以為上手只係住左三年慳左筆裝修費所以只係用左萬幾銀買傢俬就可以一勞永逸. 點知越住落去越花得多錢, 以下係呢兩個月所有完全突然既駛費:
維修浴屏 $500 (一個唔該俾B整爛)
更換睡房冷氣 $3000 (終於有覺好瞓)
加裝厨房射燈 $250 (B要求! 因為原本既射燈位置低B, 佢怕佢個影會遮住自己切野切親自己)
鞋櫃 $1650 (兩個人買個咁巨型既鞋櫃, 有D浪費)
更換風扇 $600 (B果把深圳買既美的風扇用左近八年, 已經唔識轉)
蒸餾水機 $830 (講左三年, 終於突然決定買!)
更換吊燈 $500 (....)
加裝客廳捲簾 $350 (...)
兩個月已經用七千幾蚊既呢D非經常性開支, 簡直同倒水一樣, 仲未計埋B上兩個星期新買既一缸魚...最貴既係佢用蒸餾水去換魚缸水!
黎緊相信係部只用左一年既三叔DVD錄影機已經壞得七七八八, 我估我真係會等有數碼接收既硬碟錄影機先至會換機.
原來呢度慳D果度慳D, 都係唔夠應付果D突然開支.