2009年1月31日

藍光用後初感

部藍光碟機進駐左屋企一個月, 睇唔夠十次. 原因: 我無乜碟可睇.
正如前文所講, 想買既碟又唔多, 將部藍光碟機當DVD機用又好似大材小用. 不過藍光呢個科技又確係令我大開眼界, 以往響VCD/DVD所睇過既影像放在藍光碟上都有好大既改進.
但係始終有幾點仲係唔慣:
1) 開機同load碟時間需時, 有時要等十零廿秒先可以load完隻碟進入menu.
2) 所謂pop up menu: 唔需要離開正片都可以用menu控制功能. 運用上既機會不多, 揀字幕聲道搖控器上已可以做到.
3) 區碼問題. 香港雖然同美國同一區碼, 但係我地響DVD年代慣左全區碼player, 懶你響美國定歐洲買碟, 香港買既DVD機一定係全區碼乜區碼都睇到. 可惜BD player既區碼比較保守, 要睇另一區碼既碟就要自己諗辦法. 好彩因為BD造價好貴, 近呢一年開始多全區碼既BD上市, 以便一批貨就可以全球通行以降低成本.

始終屋企部電視只係HD Ready, 並非全高清. 或者若干年後要換電視時可以換一部全高清電視去發揮藍光既威力.

2009年1月29日

買二送一的誘惑

買左部S350後發現真心想買既藍光碟實在不多, 大多數自己已經有DVD版本, 又無謂太過重覆. 但買二送一呢條橋又幾吸引, 終於攻陷左自己.
占士邦果隻原本已經有雙碟DVD版, 購入原因係....只湊夠兩張, 揀唔落第三張, 結果都係揀番呢隻.
其實"哥記"有好多舊戲仲未推出BD甚至連港版DVD都斷左版, 我會好期待! 例如就快推出既"克藍瑪對克藍瑪".

2009年1月28日

新春馬交行 (下)

第二朝當然例俾食個酒店早餐, 講真呢個自助早餐種類同質素竟然俾之前一晚個新春魚翅自助餐更好更多選擇. 亦因為之前一晚半肚上床, 呢個早餐簡直係救命恩人, 我可以話"喪食"45分鐘, 連白粥炒麵都唔放過. 當然喪食係有後遺症: 即刻番房大覺瞓...直至11:50! 突然彈醒, 即刻換衫執野退房.
原訂想去行mgm, 點知B話不如行新葡京啦. 入到去學劉小姐話齋: 原來都係不外如是. 但B都係建議等我去鉅記掃完貨後番轉頭響新葡京食個晏.
年初二澳門周街都係人, 誇過香港. 迫下迫下先去到鉅記, 再迫下近下先可買到野執番身彩出到黎. 望望錶, 咦? 我地搭四點半船而家係三點喎... 再行番新葡京食晏真係無乜時間, 呢一刻突然諗起我既澳門至愛: 福龍!! 我地即刻車轆腳走去睇下有無檯, 是關附近間間舖門外都有條長龍. 好在響佢地臨中場休息之前拎到檯, 當然又係嗌番例牌: 焗鴨飯同炒椰菜, 今次再加首次嗌既"芝士飽". 呢個芝士飽真係好味到無話可說, 至於兩個"舊愛"依舊美味非常. 又食又趕, 食到四點, 弊傢伙! 拿拿臨埋單散水, 好在剛好響附近截到的士即刻飛車直奔碼頭. 心諗咁遲再加上過關需時一定送船尾, 之但係今次過海關又其快, 終於又趕得切上船, 結束今次趕頭趕命凍冰冰既馬交行.
今次馬交行, 感受最深應該係B, 次次都係佢遇上超無禮貌又打尖既香港人又或者勁粗魯"不文明"既大陸人, 次次唔係推佢就係撞佢, 甚至有香港師奶打佢尖, B有禮貌同佢講都俾師奶話B打佢. 我諗中港融合終於見成效!
又響酒店見到以下文字, 真係笑左出黎, 擺到明針對中國籍顧客, 連座檯鐘都貼有呢句野, 認真醜怪
.

新春馬交行 (上)

"又去澳門?"
"又係你話要過年出去行行..."
結果, 三個月內又去多次澳門, 一來慳錢, 二來又要遷就父母留港食團年飯.
今次見康泰有個package二千零蚊兩位又酒店又船飛最重要仲包兩位酒店自助晚餐, 明知新年街邊一定無啖好食, 酒店有餐食保証啊!
不過酒店只係三星既內地酒店"維景"(即"京澳"), 大大話之前已經住過呢間酒店四五次, 十幾年前都算做ok, 但十幾年後間酒店真係殘到無朋友.
仲諗住搭早船可以避開人群, 點知一樣多人到全船爆滿去到澳門海關排足半個鐘尤如以前過年去深圳一樣萬人空巷. 幾經艱辛過關出閘撲"濕肚"直奔酒店. 好唔容易搵到一間餐館新年仲開口做生意, 叫左兩個小菜, 味道尚可但實頂唔順一班大陸人響餐館入面食煙仲狼過食飯, 煙到好似去左bar一樣, 我地拿拿臨食完就走.
番酒店攞左房入到去驚見同十幾年無乜改變, 傢俬甚至房門殘舊到不堪, 無左一邊床頭几已經夠特別. 不過既然咁平況且只住一晚都係算吧啦.
當日香港11度, 澳門竟得9度, 怕凍既B決定是日唔出街, 齊齊響床上暖暖暖到晚飯時間.
酒店既自助晚餐標榜"新春魚翅自助餐", 入到去一望, 原來只有一道所謂蟹黃翅, 其餘都係好普通既菜式, 或者覺得過時過節要食熱野結果就連沙律都欠奉. 一兩個round已經唔想再食, 連平時唔會掂既炒飯都食埋. 不過最難頂係間旋轉餐廳因為我坐"倒頭位", 令我第一次親嘗食飯時會有作悶"暈自助餐浪", 諗起都笑.
食完飯我建議不如去放煙花, B簡直不知何物, 咪"打的"帶佢出去海邊放煙花既地方. 我都係第一次澳門過年暨放煙花, 自小一怕刀二怕火, 到呢一刻我都係唔識(怕)用菜刀同火機.
雖然海邊我估得七八度, 但見一個個煙花響頭頂爆發, 心情都幾興奮. 點知B又係怕有意外唔敢玩, 結果我地兩條友仔都只係買左D好"兒童向"既煙花仔去玩, 雖然兒嬉, 但真心好玩.

2009年1月26日

麻甩奇幻逆緣

尋晚年三十晚, 響浴室對鏡一照, "你好麻甩"!
係呀, 其實十幾年我已經有麻甩既狀態呈現, 不過近呢幾年, 麻甩既情況更加成形. 某日好耐無見既P小姐拜訪, 佢見到我都嚇左一跳... 頭頂驚現地中海雛型, 身型又脹左. (佢又何嘗唔係肥左又....女人左.)
所以我深信, "麻甩是這樣煉成的..."

談吐:
十幾年前響電話既另一方, 一直認為我係個四十零歲仔女一對既爸爸. 直至某次公開宴會見面, 我都只不過係廿幾歲既死o靚仔. 老成, 變成麻甩既代名詞. 當時當然未算麻甩, 麻甩我覺得係好世故好粗口先至算. 所以我由以前一句粗口都唔講到宜家偶然一兩個宣洩, 不過好在果幾個粗口只溶響文字, 唔溶響口.

衣著:
幾年前我仲係每日著整齊恤衫番工, 未老先衰. 近年一星期五日變成有四日著T恤牛仔褲番工扮後生. 結果仲衰, 形同譚校長出show咁, 比麻甩更麻甩.

外表:
唉, 生得老成! 廿幾歲已有四十歲外表再加埋咁既服裝指導簡直係真人版"奇幻逆緣". 近年識得去打扮同保養, 結果都係keep番自己外表一樣樣, 跟生理年齡開始接近. 但係頭頂既"光環"漸現型, 麻甩既速度再加快.

興趣:
原來人越大, 自己越愛懷舊. 開始鍾意舊歌舊戲舊地方, 亦都因為愛懷舊, 越開始自己麻甩到走上網問其他麻甩懷舊一番.

結尾:
前陣子某日有位小朋友(都唔細勒我諗都有成廿幾歲!), 佢問我有無五十歲, 我左前額突現一大滴汗. 我亦諗起某位舊友V先生, 五十幾歲但有副三十歲既面貌同身材, 我而家就同佢剛剛相反, 或者有日響街佢真係會未必認得我.
果然係麻甩奇幻逆緣.

2009年1月25日

如果世上沒傻瓜...咁方力申係唔係哩?

我唔知方力申既右邊面係咪有問題?
我唔知做封面設計位仁兄係咪有心整蠱方力申?
定抑或方力申覺得呢個pose係最靚?
再一個令人目瞪口呆既唱片封面, 就快成為世界紀錄了!
慶幸獲金牌大風續約比前輩梁漢文還要幸運, 但新唱片就無乜幸運依舊無乜變, "如果世上沒傻瓜"已經行貨到不得了, 還好彩佢地全力plug"月全蝕", 歌詞認真麻麻, 但歌還也可以. "最好的時光"及"面目全非"聽完真係好蕪湖, 反而跟住既"時間太少"有少少驚喜.
希望佢下次除左做好D歌之外, 仲要做一張無大頭相既唱片封面, 否則長此下去, 傻瓜只會係方力申佢自己.

2009年1月21日

Barack Obama 新的一天

希望Barack Obama能夠為美國帶黎新希望!

2009年1月19日

廿蚊張Krusty

HMV既特價攤永遠可以搵到意想不到既野, 繼多年前用廿五蚊入左葉倩文既新碟(好似出左無耐!)後, 前兩日就見呢張, 當年因經濟問題無入, 而家終於可以擁有!

2009年1月18日

鬧爆嚴重呃人既無線收費電視

繼舊年父母無知地中左"新世界電訊"騙人既陰招之後, 今年我父母再創新猶, 打開大門再放騙子入屋. 今次係無綫收費電視.
響報章雜誌已經睇過無數次呢間公司既員工點樣呃老人家裝設收費電視, 但諗唔到我父母咁都上當.
以下係我父母同我個妹話俾我知既過程.
有個自稱"翡翠台"既男人按門鐘向我老豆話要入屋拉高清線, (咁啱佢地幢大廈剛改裝左公共天綫.)我老豆就以為管理處派人入屋整線結果佢就放左果個人入屋. 入到屋咁果個男人就露出真面目向我老豆sell個高清機頂盒, 話每日供五蚊, 供足18個月就有部高清機頂盒. 最重要係個男人無提過無線收費電視呢個服務, 我老豆又胡裡胡塗咁答應. 直到個男人問我個妹拎信用卡, 大家好似一言驚醒夢中人咁, 再睇份合約竟然係無線收費電視既合約. 呢個男人就話: 有線都無野睇, 我地無綫有四十幾個台睇. 呢個時候我個妹暗中打電話俾我, 我唯有叫我佢快D趕個男人走, 否則佢會賴死唔走. 個男人果然真係賴死唔走, 我問佢邊間公司? 佢答翡翠台. 我問咁你係邊個部門? 你上司又係邊位? 佢又答唔出, 只話無線又有藝員部又有咁多部門. 咁我話: 你即係唔係無線員工啦. 佢先至話佢係屬於無綫收費電視. 我唯有請佢快D離開我父母屋企, 佢反而問我有乜問題? 我話: 你又話自已係"翡翠台" 實質係"無綫收費電視"已經滿口謊言, 以為你sell高清機頂盒實際上係sell收費電視服務志在呃老人家. 結果講左好耐我父母先至可以趕到呢個男人走.
希望我用呢件事, 捉醒大家以下幾點:
1) 睇數碼廣播係唔駛搵人入屋拉綫!
2) 睇數碼廣播係唔駛登記收費電視!
3) 十個有十個無線收費電視既sales都會呃老人家, 勿上當!
4) 佢地所sell既Topcon高清機頂盒一千蚊都唔駛, 要你用二千七百蚊買絕對係搵笨.
5) 千祈千祈千祈唔好俾陌生人入屋, 就算佢係無綫有綫定差人特工, 就算係曾蔭權都唔好放人入屋.

2009年1月15日

老馮既咩? 請用閣下金錢支持唱片工業

朋友響MSN問我點解響MSN用呢個標題: 老馮既咩? 請用閣下金錢支持唱片工業! 做乜事咁嬲, 其實我真係對公司同事有D勞氣.
話說我有個習慣, 如果我覺得張唱片好聽, 我樂意跟同事分享. 通常我會將CD轉成較低質素既mp3跟住放上自己部門既public server, 只供自己部門同事分享. 原意係如果佢地覺得隻唱片好聽, 佢地會買番隻CD自奉. 起初真係有呢個效果, 但後來又換左批"純正港女"同事, 呢個好意變得邪惡.
變得佢地有request, 無論好唔好聽都一律希望我可以奉獻. 起初以為如果佢地真心"試聽"完去買碟, 我都問題不大. 點知原來呢班港女只係倚賴, 128kbp低質mp3都照收, 但求隻歌有音樂有歌詞有人唱兼聽到唱乜, 歌詞有關乜, 編曲編成點一律不理. 更甚有日有港女同事又問我有無邊個邊個隻碟, 我話無, 點知佢一句: 網上無得download咩? 我真心爆左句: 你都痴撚線, 我所有歌都係真金白銀買碟錄番黎! 港女同事做出好驚訝既表情話: 下? 乜仲有人買碟架? 仲以為你所有歌都係download...
跟住有一日, iPod播緊陳奕迅一D舊歌, 另一港女同事問我乜野歌, 我好詳細答佢係陳奕迅一隻從來無出版過既唱片入面既歌. 點知第二日呢位同事突然叫我大叫: XX, 今日我有帶隻"手指", 可唔可以dub果隻碟俾我?
嘩! 老馮咩? 我唯有答: iPod入面D歌係拎唔番出黎, 而且個種(CD)響屋企. 答完轉身繼續工作. 好彩佢無再追問可唔可以借CD.
我知我係好心做壞事, 但只覺而家D人既惰性越黎越嚴重, 全部都係飯來張口. 大佬呀! 都要有人出錢買米再有人去煲飯, 你先有飯食. 你又唔肯出錢又要食飯, 分分鐘遲下就連屎都無得食!
所以我已決定暫停響公司做歌曲分享, 等大家一齊捱餓.

P.S. 舊年年尾蘇永康隻碟好正呀!!

2009年1月13日

梅小玲又要抖下

今日晏晝上梅玲仲上到, 點知今晚番到屋企十一點零鐘上網. email收唔到已經奇怪, 兼且再上唔到梅玲添! 就連網存公司既網頁都上唔到, 心諗唔會咁邪間公司摺左嘛? 上去網存討論區先知道該公司剛剛俾人hack server. 而家一切服務要暫停, 但其中有一兩個server撞死左, 希望梅玲唔會因為咁又死多一次...
所以, 梅小玲暫時休息. 不日回來.


結果, 唔駛一個鐘, 梅玲又上番, 只係無左當日既新文章, 好彩!

2009年1月7日

喂~ 醒D啦!

上個月我仲講過一個幾有趣既網站"Where the hell is Matt?", 今日驚見網上有文章及video講其實呢位Matt Harding所拍過既跳舞video全部都係電腦特別效果整出黎, 整個idea都係廣告公司諗出黎. 佢甚至響一個演講會上大爆真相.
跟住各位網友就爭相轉載呢篇文章, 之但係當我重睇一次佢既video, 真係有一刻我係相信呢個真係一個騙局. 直至今晚上Matt既網站, 佢亦作出澄清: 佢所有既跳舞video都係真, 果次演講會只係同大家開左一個玩笑. 完全源於早前佢睇個一套好精彩既video, 但後來發現竟然廣告公司製作既一套充滿電腦特技效果既短片. 所以佢有感而發如果假設佢既video一樣會係個騙局, 大家會有乜野反應. 結果佢就用呢次演講機會虛構佢既video係充滿電腦特技機械人大投資既騙局, 就連用成本圖都出埋. 只係大家實在太認真信以為真.
當然網絡既野有真有假, 但係既為網上人, 實在有太多方法及材料去辨真偽, 只係有無心去做.


伸延閱讀:
San Francisco, California Here's a Little Clue for You All,
the Walrus is Animatronic
Matt Harding Confesses: Where the Hell is Matt? Video an 'Elaborate Hoax'
假如我是假的 - 網絡暴民 Jacky’s Blog

2009年1月4日

除夕東涌遊



之前講過原定聖誕台灣高雄遊變成澳門遊再變成邊度都唔去. 結果思前想後, 大拿拿連放十幾日假, 無理由要迫B一齊留響屋企. 見到東涌Novotel Citygate酒店有個幾合理既package, 不如就黎個本地遊.
第一次住呢間酒店, 呢個package除左酒店房一晚之外, 仲連自助晚餐兩位. 佢地既自助餐已經多次俾傳媒話抵食, 所以一定要試下.
我地加左錢住豪華樓層, 感覺房間略細再加埋自己唔太喜歡既開放式浴室, 如果商務住宿可能都ok. 不過酒店既隔音唔錯, 除左杜紀隔離機場飛機聲同下面公路既車聲, 就連隔離房既聲都隔到!
至於個自助晚餐, 話哂除夕夜, 份外多人. 至於食物選擇, 冷盤選擇幾好, 尤其沙律已經有好多款選擇. 至於熱食選擇就一般, 不過種類少但味道就真心好食, 尤其個羊架, 我encore左四次! 而且每次一清盤, 就立即有新一盤出現, 補充食物既速度好快. 招呼亦都好勤力 , 呢個自助餐如果用街價$298黎講確實超值!
原本第二朝搭昂平衫碌玲上大佛, 但因為B呢位熱帶人見朝早得12度即係山上過10度, 打消上山決定, 改去機場打個轉. 食個堡家敬又買左D工藝品, 就結束呢次零捌除夕兩傻遊.

2009年1月3日

唔該專心D啦!

讀書上堂要專心, 就算響頒獎禮都要專心, 否則就似呢位關同學咁, 瘀足一世紀.

2009年1月2日

如何掉眼淚

送俾威廉●陳.