Mad Men 廣告狂人

嘩!! 我愛台灣!!! 只因等極香港電視台都未見有買呢套劇, 台灣已經有公司買左直出碟. 一盒四碟十三集再外加特別收錄算交足功課, 只可惜碟首有段超級煩加超級膠既台灣發行公司既短片交代屋企睇碟係唔駛熄電話.
暫時只睇左第一集, 已經好想追落去. 近年美劇少見會拍六十年代既題材, 唔係現在就係古代, 中間既時光好似消失左. 所以呢套份外吸引, 我諗一有時間會繼續追落去.

Life on Mars

有陣子真係無留意BBC Entertainment呢個台, 有日咁啱轉台見到佢地播緊Judge John Deed既第五輯, 咁又乖乖睇晒. 跟住某晚又留意到佢地有套電視劇叫"Life on Mars", 結果又乖乖睇晒. 睇完後心諗點解本地電視劇只識哭哭啼啼三角關係, 少少創意都唔去諗, 到發現外國有好野就只識抄抄抄.
講2006年一位Manchester警探一次交通意外後, 醒來竟發現自己回到1973年. 後來就繼續活響1973年繼續警探生涯.
整體套劇既意念確係唔錯, 尤其對時代唔同文化既衝突, 其中有趣如男主角有場戲話點解自己唔係番去八十年代而係七十年代呢? 從而睇得出七十年代確係與別不同. 可惜縱然意念好, 實行起上黎就真係有D困難, 尤其要拖足16集(共兩輯)先睇到一個open ending, 都幾無癮. 再者, 發現每集嘗試拎7,80年代既警匪劇既格式套入, 但又令原本"回到未來"式意念削減, 吃力不討好, 兼且偶有悶場. 只希望打後既集數會有改善.
網上一查, 原來亞視早響七月已經有播呢套劇, 走寶! 再者BBC已經拍了續集, 同一條橋不過今次玩回到80年代.

伸延閱讀: 官方網站

Alarm For Cobra 11

平時睇電視劇尤其本地既, 每逢出現飛車撞車所用既車輛大多數二手舊車. 主要成因係成本平撞到散晒都係幾萬蚊, 唔同近年美國電影有車廠贊助幾新既車都可以任撞. 當然電視同電影成本真係相差一大截. 不過近排先發現遠到德國竟然有部電視劇有如此安排: 每集佔大半時間於飛車特技場面, 所用到既車真係乜都有! 由貨車貨櫃車吊雞車消防車甚至普通如寶馬平治保時捷都齊齊撞到飛起無一完整甚至有時撞完仲要炸到喳都無, 亦有時有如幾架名車撞上半空撞到好似跳舞一樣. 對於激好官能刺激既一定大嗌好正.
(上youtube search "Alarm For Cobra 11"就會搵到呢套劇近幾季既集數.)
上圖為消防車慘被飛落山既場面.
你叫本地電視劇都有咁既場面? 就算搵齊咁多名車一齊撞, 但係單係搵地方同埋做成既道路損壞都有排賠.

Little Britain Abroad

LB呢個聖誕特輯其實都好好玩, 將劇中人物套落異地但又保持番本質真係幾難. 好似Lou 同Andy玩cast away一段又或者Dafydd去基佬村既趣事. 但最估唔到係首相, 真係笑到反艇.

可惜正片太短反而SF就長達兩個鐘, 其中最好睇係佢地段去澳洲演出全紀錄, 原來真係比英國既Live更好笑.

不過正如之前所知佢地會幫HBO拍新一輯既LB, 兼且亦會拍電影版. 之前BBC劇去美國HBO延續, 之前既Extra結果大家都有眼睇. 電影版既話之前同樣係改編自BBC電視劇既LG"The League of Gentlemen"(港譯: 紳士同盟)既電影版仆到直一直. 同樣玩分身玩男扮女, 兼且再多一份黑色幽默都可以仆直, LB變成電影版真係有D擔心.

十六不搭喜趣來:你想點呀?

我曾經話過如果亞視真係拎左"囍趣台"條橋去拍, 應該會好好玩. 點知亞視真係宣報拍一套諷刺娛樂圈既處境劇. 由盧海鵬扮陳志雲巳經係一個賣點, 尋晚更宣稱係首個亞視高清製作既劇集, 更加係有睇頭. 亞視向來拍"影射劇"都有一手, 真係好想睇下今次會係拍成點.

可惜睇左頭15分鐘就註定個劇死硬. 三個主角扮曾志偉陳百祥譚詠麟, 由頭到尾都一D都唔似. 跟住"九嬸"更加完全脫離現實. 打後既"莊文華"諗到我頭都大埋究竟係指邊個, 直至佢地講莊生間" 家和.....萬事興電影公司"先至知原來玩鄒文懷.

打後45分鐘枝離破碎令人唔識笑既笑料再加上無劇情之下, 柴娃娃就一集. 一出credit時我真係"噢"咀. 證明亞視人識賣橋由唔識presentation. 一個超級好橋都可以落得咁既地步.

最慘盧海鵬, 短短30分鐘內要扮董建華曾蔭權陳太葉太陳志雲五大個角色. 更加頭五個角色要同一時間及場面出現. 確實係挑戰亦都係全劇唯一可取之處. 可惜劇本對白就非常求其, 根本俾唔到佢發揮個人物.

其實, 呢類劇確係難拍. 以前"娛樂插班生"都唔係主線玩劇情. 今次又要玩人物又要玩劇情, 響sitcom度真係較難發揮. 反而如果係一個gag show, 就可以較易做到. 因為暫時所睇既第一集, 全部笑料都係好短同一截截, 確係似gag show多過似係一套sitcom.

我估成晚最令我一笑係果段"智能飯局"陳志雲訪問白雪仙既時候, 白雪仙迴避問題, 頭頂打出一句野話陳先生一定係男性荷而蒙失調. 跟住陳生雙手拍面懶cute咁重覆問題.

雖則亞視將條橋拍到咁爛, 但聊勝於無. 因為無線呢一刻一定"唔會"拍.

不良主婦聯盟

無意中響BBC Entertainment發現呢套名叫"Suburban Shootout"既電視劇, 港譯:不良主婦聯盟. 負責BBC既本地翻譯次次用字都令人意想不到, 由Little Britain既港式食字到嚴肅到爆既Judge John Deed都次次大開眼界.

呢套電視劇簡直係Desperate Housewives加埋Sopranos一齊. 如果之前有睇過電影Hot Fuzz就更加有共鳴. 講兩班小鎮既家庭主婦, 一班為左小鎮用暴力除暴安良, 另一班就為私幫生意打家劫舍. 結果兩班主婦經常有衝突, 但佢地唔係用飯餸互相攻擊, 而係真係用真槍同暴力對付對方. 最過癮之處係其中一位主婦係小鎮既警長, 成日以個鎮零罪案自豪. 但佢唔知自己老婆一直同人打生打死. 例如有場老婆響公園用槍教訓兩個破壞公物既後生仔, 點知咁岩警長老公帶住班來自世界各地警察代表行過. 老婆見狀唯有即刻收埋枝槍話教緊後生仔急救. 荒謬度十足. 而家逢星期五晚播出第二季, (英國都係九月先開始播第二季! 非常新鮮!) 可惜亞洲區尺度有限, 明顯係已經cut左粗口同部份暴力場面.

近日見到BBC Entertainment開始播放一D唔係BBC既製作. 例如有黎自Channel 4既節目, 亦好似呢套劇咁係來自Channel Five. 好期待有更多Channel 4既製作出現.

官方網站 (有preview)

佳視電視劇重出生天

我對佳視印象唔深, 因為屋企人一直睇開麗的, 除左睇歡樂今宵之外好少轉去無線, 更唔好講轉台去佳視. 之但係佢地播既卡通片我就睇過"大鐵人"同"七星俠".
1978年, 佳視執笠. 我細個就真係無乜感覺, 大人都係好冷淡. 除左果時新知明週甚至成報日日大編幅咁講. 真係對我地無乜影響. 唯一記得佳視唔似無線同麗的時時"斷片". 即係播播下無畫面, 跟住出個slate出黎話機件故障搶收中. 其中無線更加有一段卡通片係一堆人修理緊機器, 跟住有V/O話機件故障搶收中敬請原諒云云. 我就好驚果段卡通, 因為卡通入面D人面容好特別睜靈, 真係嚇死細路.
話歸正題. 無線收費電視經典台由十月一日開始播映幾部佳視既電視劇, 例如有伍衛國同米雪既"紅樓夢"同埋有羅樂林及李通明既"神鵰俠侶". 相信四十歲以下既分分鐘睇都未睇過.
作為片主之一既無線又咁既安排雖然照顧唔到大眾, 但至少好過塵封三十年後都唔再重播.
相信部錄影機又會好忙...

基Lego: Rick & Steve

仲記得Showtime頻道多年前打造全世界第一套基卡通Queer Duck, 結果播左一季後就徹底失敗玩完. 之後貫徹Viacom傳统, 所有卡通一定整個電影版, 呢套都唔例外. 雖然有過所謂既電影版, 之但係都係無聲無色響姊妹台Logo播出.

Viacom始終對基卡通唔死心, 今年又整一部: "Rick & Steve"放響基台"Logo"播映. 今回唔係玩flash動畫, 而係玩Lego 公仔.

完全係QAF(Queer As Folk)既老翻, 就連配音既都有QAF既卡士. 其他如Alan Cumming, Margaret Cho 都係基界既紅人.

我諗究竟有幾多基佬或基友善既直人對卡通或Lego公仔有幾大興趣? 上次死因全因主角係隻好肉酸既鴨, 今回既Lego公仔, 完全無晒過往Lego公仔既可愛之處, 唔係聲大粗豪既女同志, 就係滿口牢騷既HIV+傷殘基伯. 今次仲要D Lego公仔玩親熱? No Way!

真係錯晒.

官方網頁

強劍定黐線?

番阿媽度食飯永遠完全有驚喜. 我唔係指餐飯, 反而係送飯既電視節目.

搬左出黎住後已經無左追無線劇, 只係有時響公司或阿媽度睇一集半集. 呢期無線除左狂谷"歲月風雲"外, 另一套就係"強劍". 齋睇宣傳片玩超低能玩漫畫化, 以為套劇係正經玩漫畫化. 點知...

尋晚番阿媽度食飯, 睇左半集"強劍", 真係O哂咀滴晒汗! 對白不停"時代化", 乜野"出奇過出奇老鼠"呀, 又玩自動mute粗口. 嚇到我即刻想番屋企. 諗唔到又係一套想玩cult既而古而今既古裝劇.

我唔係唔玩得, 只係太突然又出人意表, 自己一時接受唔到, 俾D時間我啦~

伸延閱讀: 強劍預告片

Judge John Deed去左又番黎!

尋晚一心留響屋企睇Judge John Deed series 5最後一集, 點知個timeslot播左第二個節目. 心諗無理由架, BBC官方網頁都話仲有一集就完series 5, 但BBC entertainment網頁就話改左播第二套劇集. 乜無厘頭俾人腰斬呀? 所以決定打封email去質問BBC. BBC效率真係快, 今晚就收佢地既回覆:

Hello and thanks for your email.

Sadly this episode had an OFCOM complaint upheld against it and therefore is not suitable for transmission by the BBC. We are very sorry if you feel your enjoyment of this programme and series was compromised removal of the final episode we had to make for compliance reasons. It is always a dilemma for us. BBC Entertainment plays out across several nations throughout Asia, some of which have strict regulations on issues such as language, sexuality and nudity. It is simply not possible for us to transmit separate programme feeds to all these different countries and so there are occasions where we have to make edits that would not be necessary for Thailand alone. If we did not do this we would be subject to heavy fines and the risk of being taken off air entirely. This also explains why you can sometimes see unedited versions of the same BBC programmes later on other networks.

You should be pleased to hear that we will be repeating series one, which starts from Saturday 14th July so please check the listings closer to the time.

We are sorry for the frustration and hope this goes some way to explaining why the removal of this episode had to be made. Despite this we also hope that you will continue to enjoy BBC Entertainment and look forward to your continued
support.

Regards,

Douglas Spitz
BBC Entertainment

唉, 又俾人去OFCOM投訴. 原來如此. 不過既然佢地又會repeat番series 1既話, 條氣都順番. 各位, 唔想去HMV買三百幾蚊呢套劇既2區DVD, 就要留意14/7佢地既電視重播. 最重要係有中文字幕, 唔駛下下去問人D好深既法律名詞.

Judge John Deed

呢兩個月迷上BBC Entertainment入面一個電視劇"Judge John Deed".

一個非一般既法官, 有自己堅持既信念, 周旋於女友政府貪官上司同事前妻女兒犯人. 好睇就好睇在套劇並唔似無線劇咁不斷情情塔塔三角四角男女男男女女. 呢套就多數時間放響案情, 而且用上極大量真實法律名詞, 甚至極之仔細既科學常識. 我好相信如果無中文字幕, 劇中有大量艱辛深字, 我會睇得好辛苦. B呢類法律人當然睇得津津有味.

每集除左條對貪官同政府對抗既主線外, 都會有唔同既case. 好似上星期講"Big Brother"呢類真人騷同傳媒對社會既影響. 之前更有Bi-Sexual商人同男友既金錢交易內幕引發政府危機. 極之update!

講起資料搜集仔細, CSI LV都算係俵俵者, 可惜最近呢個season, 男主角走左, 黎左個神化replacement, 搞到套劇都變得神化兼求其.

如果你屋企有Now TV又有裝BBC Entertainment,不妨逢星期日晚七點花個半鐘去睇下呢套劇: Judge John Deed. 呢個星期開始播series 5.

P.S. 當然唔少得百看不厭笑到肚攣既"KEEPING UP APPEARANCES"啦! 必睇!

Heroes

已經好耐無追劇集. 本地就已經不消提. 外國既上套已經係House series 1, 連season 2都skip住去睇. 之前West Wing, CSI, Little Britain, The League of gentlmen... 或者DVD上既 The Office或者Queer As Folk. 自從"Taken"事件之後令我以後都唔敢追科幻劇. 不過呢套迎期美國大熱既劇集又令我重拾番追劇既興趣. 呢套就係"Heroes".

　　《Heroes》“是關於世界各地的普通人在發現自己有特殊能力之後如何生活的故事”。這聽上去很像《X-men》系列的電視版，只不過劇中人物並非“變種人”。這些超級英雄（或者說普通人）的特殊能力包括：一個30歲的男護士發現自己能飛；一個28歲的癮君子能看到未來；一個33歲的賭城脫衣舞娘能用鏡子做出很多匪夷所思之事；一個24歲的日本漫畫迷能讓時間停止；一個31歲的監獄囚犯能穿墻入室；一個17歲的拉拉隊長能違抗每一次命運降下的死亡……最後他們的超能力讓他們團結起來，躲避想利用他們超能力DNA的人。他們的命運就是拯救世界。
其實個故事就係咁簡單, 每個普通人當發現自己異於常人, 又矛盾又驚喜. 但係每每生活上就只能夠當個平凡人又想為社會作貢獻但不維社會所容.

人生就係咁荒謬.