2008年3月31日

我的三月天 (Day 31)

愛滋味 Les Témoins

好多好多年前"野蘆葦'留下好深印象, 諗唔到舊年呢套"The Witnesses"又有另一番感受. 故事推前到八十年代, 當愛滋病剛開始擴散. 同志醫生踫上年青男, 可惜年青有耗唔盡既青春, 醫生愛不到岸. 後尾年青男戀上醫生既朋友一個有婦之夫. 已婚男好仔兩頭瞞食兩家茶禮以為執到好籌直至年青男患上愛滋. 一個病就傷害左呢四位主角既關係. 久違既Emmanuelle Beart演神經質作家演得實在太好, 就連另一位久違既Michel Blanc一樣好戲. 片中果種四角關係就好似龍卷風一樣到最後都一發不可收拾. 愛情確係無分男女老少, 但有時無私與自私只係一線之隔.

2008年3月30日

2008年3月29日

我的三月天 (Day 29)


民以食為先

襟panel果位真係要打屎忽! 海上用Skype真係唔係次次得.

無球賽既足球電影-Eleven Men Out

泰國有人妖打排球, 冰島有基佬踢足球. 失婚名球星突然有日心血來潮向大家come out, 嚇得公眾嘩然隊友離棄連個仔都睇唔過眼.

就響雙失之下加入一隊基佬足球隊, 諗位重新打入聯賽. 點知對手一知對方係基佬隊伍嚇得雞飛狗走, 結果基佬隊響唔駛踢之下順利入決賽. 對手竟然係老相好!
全片圍繞足球但球賽場面就完全欠奉, 副線講主角come out後既同志生活亦都甚少落筆, 另外兩段父子關係亦都只係輕輕帶過, 完全係太虛漫遊, 亳無重點可言.
如果有興趣睇中年人芝士腸呢套可以話大飽眼福, 如果係想睇都同志喜劇或足球電影, 過主吧....啦!

2008年3月28日

2008年3月27日

我的三月天 (Day 27)


鬧爆新世界電訊!

成日聽到新聞話電訊公司有人呃老人家簽無謂野, 點知今次竟然發生響我老豆身上. 佢老味新世界D sales亂Q咁sell, 竟然呃我老豆簽寬頻電話! 我老豆明明要固網, 個sales又話係固網, 仲話包左成幢大廈既電話黎做. 老豆見平又送野咁啱PCCW約滿咪簽左, 但對方竟然連單都無留低就走左去, 到我今晚返上去食飯佢地俾張紙仔我先知係寬頻電話! 仲要$78簽18個月. 弗弗地架? 78蚊仲要係寬頻電話??

打去嘈新世界又推三推四, 班操外省口音既CS一味推, 乜野裝左電話要上網"激活", 嘩! 呢度係中國電訊嗎? "激活"都識講, 真係好珠江三角. 打去俾個sales佢又發爛咋, 我不停死纏爛打佢先發老皮話幫我取消. 我唔理照打上PCCW, 話要續約, 人地真正固網續約價都只係$88! 響極之有禮貌感覺良好既情況結果簽番俾PCCW. 我同我父母講, 如果新世界個sales真係無幫佢地取消張單, 到有人上門安裝就話己經取消左, 叫果個人搵番個sales. 亦問過B, 佢話因為無底單所以張紙係完全無法律效力.
連幾十歲都呃! 因住收尾果幾年呀! 仆街.
各位記住便宜莫貪! 唔好再幫襯呢間新世界電訊!

2008年3月26日

2008年3月25日

無殼蝸牛搵殼日誌(後傳第三回)

終於新屋入伙!

經過四個月後終於進駐第一個真正屬於我地既新居. 搵屋難, 原來搵人搬屋更難. 原本賴老定搵間貴價搬運公司, 早成個月要求報價, 對方話會電郵表格俾我. 點知一日復一日隔左成個星期都無回音, 所以我再打去問, 對方好緊張咁話會傳真表格俾我, 我確係收到, 之但係同一時間, 同事E知我搵緊人搬屋所以介紹左間佢幫襯過既公司俾我. 呢間公司反應好快同日即刻有人上門報價, 響價錢合理下終於決定幫襯呢一家. 至於果間貴價公司竟然響我地搬之前幾日打俾我問我係咪想搬屋要報價, 可以電郵張報價紙俾我. 天啊! 搞乜呀? 又無跟進反應又慢. 我一句: 我搬左啦, 仲等你?
單係執野入箱已經係艱辛至極, 尤其又怕會壓爛, 又怕遺漏. 單係名下既膠碟已達20多箱, 反而我地既其他雜物衣物就只得7箱. 皆因B又自己出力搬! 上回北角搬入將軍澳, 為左慳錢兼且我咁啱無野做放個悠長暑假所以日日我地都搬少少過新屋, 到最後搵左朋友M幫手一部客貨車搬到底. 但今次唔同, 又傢俬又電視, 比較多野. 但B仍然每日逐少逐少搬去新屋, 理由一來近, 步程都係10分鐘. 二來搬過去都係好易碎既野怕搵人搬會整爛. 就算我話我俾咁多錢去搵人搬屋, 做乜仲要自己辛苦呢? 結果佢仍然每日搬少少.
到左搬屋之日, 呢間搬運公司一早就打俾我, 係一早! 八點九就打黎問我準備好未? 不幸我地啱啱食緊早餐, 聽唔到電話, 不過佢地都準時到達. 一行五位北方大漢, 佢地一手就執起重到我自己郁唔到既箱放上板車. 尤其有四五箱係CD同VCD特別重, 佢地都面不改容抬起. B最開心, 因為佢咁大個人都未試過坐上貨車做"跟車".
成個搬屋過程只係用左45分鐘, 快到有D誇張. 呢45分鐘巳包括將傢俬電器連27箱野由舊屋搬落平台再落地庫停車場再車到新居再由地面停車場將傢俬電器連27箱野搬上新屋兼裝櫃兼同我臨場研究傢俬點擺. 快到有D眼突! 搬完屋老麥早餐仲未賣完. 原本約左"屎片屎兜"既人夜晚八點上黎搬條寬頻線同兩個現在電視, 咁我仲有時間響佢未上黎前set好部電視同電腦. 點知大清早打黎話因為係假期, 所以想早到晏晝兩點就上黎. 咁好啦, 一搬晒野就開始set番電腦同部電視先. 點知兩點半唔見人, 打俾佢佢又話兩點九一定到! 兩點九又唔見人, 直到四點我頂唔順打上熱線問個師傅係咪發生意外唔會黎. 點知原來真係一嘈即到.未搬之前一直有忍憂, 因為新居後面有條極繁公路, 無時無刻車來車往. 問過屋苑住戶夜晚都會幾嘈, 點知第一晚入住又瞓得好好, 車聲係有, 但太攰睡意蓋過一切.

我的三月天 (Day 25)

2008年3月24日

我的三月天 (Day 24)

除左浴室, 大致上執好屋.

2008年3月23日

我的三月天 (Day 23)

倒轉左既第七天

2008年3月22日

2008年3月21日

Trainspotting.... 錯體迷幻列車

上兩個星期當收到Trainspotting(迷幻列車)將會發行新版港3區DVD既消息, 確實好興奮! 雖然遲左五年, 但總好過唔出.

因為過兩日要搬屋, 所有DVD/CD已經入箱. 就連呢一隻我一買番屋企就直接入箱, 諗住去到新屋先開黎睇. 點知今日有網友投訴買左隻錯體碟, 我唯有一番屋企即到開箱拎隻碟出黎睇.
封面底都無事, 但一打開個盒...
咦? Disc 1?? 西班牙文?? PAL 2區?? 最正係連正片長度同版權credit都係錯! 果堆字係屬於另一部戲"Hard Rain". 今次環球乜咁唔小心印錯野, 變成呢隻假2區真3區既DVD.真係唔該多謝晒.

2008年3月20日

我的三月天 (Day 20)

歡聚歌

前晚睇TVBS時睇到呢個總統競選廣告. 用上九十年代新寶島康樂隊既歡聚歌做主題. 廣告中, 馬英九有如拯救台灣既救世者一樣. 但現實又唔係無道理, 尤其於台灣果種多民族, 或希望馬英九真係可以各族變得大同, 相親相愛.
以前聽呢隻歌唔係有太大感受, 但睇完呢個廣告就深深感動.

伸延閱讀: 歡聚歌歌詞

陳昇 新寶島康樂隊: 歡聚歌 (1995 MV)

2008年3月19日

我的三月天 (Day 19)

吹啊吹~ 讓這風吹~

2008年3月18日

2008年3月17日

禍不及父母妻兒

原本呢兩日, 本地同西藏新聞已經夠照. 今晚睇TVBS原來尋日台灣都有見更加激既新聞出現. 教育部秘書主任莊某國榮響一個民進黨既拉票大會, 爆粗辱罵馬英九既父親, 更恐佈既在場既政府官員大笑兼拍掌. 整個過程被電視台播出後, 全台嘩然. 民眾嘩然身為教育部官員竟可以大庭廣眾爆粗鬧對手既家人, 咁下一代會否有樣學樣. 縱然民進黨立刻否認莊某係黨員, 莊國榮亦都辭職兼失蹤. 就連佢既上司都作出台灣媒體所講破天荒既道歉, 但件事一直就越燒越旺.

睇番呢位人兄以往言論, 似乎都係無腦大咀巴居多. 但係就算有幾多委屈, 禍不及家庭. 無需要爆晒粗辱罵, 有失身份亦有失人格. 政治亦唔醜怪, 醜惡只係人心.

我的三月天 (Day 17)

2008年3月16日

我的三月天 (Day 16)

入箱了.

Little Britain Abroad

LB呢個聖誕特輯其實都好好玩, 將劇中人物套落異地但又保持番本質真係幾難. 好似Lou 同Andy玩cast away一段又或者Dafydd去基佬村既趣事. 但最估唔到係首相, 真係笑到反艇.

可惜正片太短反而SF就長達兩個鐘, 其中最好睇係佢地段去澳洲演出全紀錄, 原來真係比英國既Live更好笑.
不過正如之前所知佢地會幫HBO拍新一輯既LB, 兼且亦會拍電影版. 之前BBC劇去美國HBO延續, 之前既Extra結果大家都有眼睇. 電影版既話之前同樣係改編自BBC電視劇既LG"The League of Gentlemen"(港譯: 紳士同盟)既電影版仆到直一直. 同樣玩分身玩男扮女, 兼且再多一份黑色幽默都可以仆直, LB變成電影版真係有D擔心.

2008年3月15日

我的三月天 (Day 15)


訂造既梳化終於送到, 大膽既墨魚B率先試坐!

看圖作文 (1)

左: 快D啦, 好X尿急呀.

中: 我林狗著住LV係咪好有型呢?
右: 唉, 其實我係"阿猛lei"既fans....

2008年3月14日

2008年3月13日

我的三月天 (Day 13)

大陸製造香港Sim City

玩開Sim City都知一直好恨有香港城市玩, 自己做當奴曾好過, 要派糖有糖派, 要強政有強政.

點知原來大陸有公司已經將Sim City發揚光大再加上Google Earth既功能創製左呢個"E都市"3D城市街道地圖. 中國各大城市包括香港都榜上有名. 街道交通樓宇搜尋基本都有, 但強如大廈外貌連真相都附載. 更強勁既係只要點擊大廈, 就連大廈內有乜公司辦公室甚至商店名稱都一目了然. 連最麻煩既黃頁功能都有, 絕對係史上最強網上免費3D香港街道圖.
(可惜香港部份只供應界限街以南既九龍, 港島只有中上環打落到銅鑼灣. 其餘地方仲未開放)

2008年3月12日

我的三月天 (Day 12)

太古城都要落蚊帳.

五星級大鼠 2


伸延閱讀: 老鼠迴轉壽司網上熱播

喇沙

之前講美心煲仔飯, 尋日又忍唔住去左美心. 因為自己一枝公出去食晏真係無啖好食, 行下行下經過美心諗住食個意粉, 點知俾我發現佢地都有喇沙賣. 既然一場黎到咪叫左一客黎試.

我所食過既喇沙多數都係超難食, 只記得上環近九記試過一間真係好味. 不過呢個美心喇沙又唔差喎. 湯到粉都好好, 不過成碗得兩小條雞肉絲加十大塊扎肉, 賣三十蚊找五毫有少少貴. 基本一碗粉都幾飽不過隨粉附送兩隻雞翼, 算做少少bonus. 見圖有三件榚係自己另外買, 明顯係酒樓既出品: 紅豆榚硬到似檯面, 馬荳榚淡而無味, 只有件芋頭榚唔錯.
至於碗喇沙, 我會再試.

2008年3月11日

我的三月天 (Day 11)

好野! 下星期一有戲睇!

美心煲仔飯

前幾晚, B又話想去打邊爐. 我即刻突眼! 因為過去果個2月打邊爐既次數係我地06加07年既總和. 燥到不得了, 再打我諗我會當場噴鼻血. 結果仍然同佢美心快餐, 因為我表明真係唔想打邊爐, 大家唯有叫散餐. B叫左個燒雞脾飯, 我就要左個窩蛋牛肉煲仔飯. 從來煲仔飯都係好難整得好食, 炭爐煲仔飯當然有風味但唔係度度有. 以前幫襯開筲箕灣某茶餐廳, 佢地雖然唔係用炭爐整煲仔飯, 但用料同味道都係一流. 可惜原址重建, 再嚐唔到大隻老板既手勢.

今回響美心叫煲仔飯都相當大膽, 等左10分鐘左右, 煲仔飯出爐. 煲仔唔係超滾果隻, 入面隻蛋一早熟左就無癮. 牛肉唔算厚亦唔係以往食開既免治肉餅, 似山竹牛肉. 可惜一咬, 嘩~ 食牛扒乎? 得七成熟既? 雖然味道比以往食過既係好少少, 但生成咁真係少見, 唯有將個煲仔飯天翻地覆夠熱力將牛肉整熟少少.
煲仔飯豉油都好重要, 我自己基本上係條"咸蟲", 食煲仔飯係會喪落豉油. 平時一碗豉油都未必夠. 美心呢碗仔豉油明顯經處理過, 咸度適中, 份量又夠. 食完個煲仔飯仲有豉油淨.
整體呢個煲仔飯頂多得70分, 扣左響牛肉太生同果隻熟蛋.

2008年3月10日

我的三月天 (Day 10) 之無乳問蒼天

原來當人類無論男女果兩點都成罪惡要被剷除既時候, 就好似恐佈片入面面容無器官一樣咁可怕... 在生理或道德上.

2008年3月9日

我的三月天(Day9)

S小姐再次大駕光臨香港. 上次仲可以定定地影張相, 今回絕不可能. 亦再次將我呢位表舅父既雙腳變成遊樂場表演雙槓同拱橋再加送扮怪獸一野.

我哋大家

上次既30something講30不惑之年, 今回"我哋大家"講"家". 三十幾歲成家立室有自己家庭, 面對事業和家庭都有唔同既感受. 近年多左一D反醒歌曲, 由愛得太遲到預言書再到最近吳浩康既"給愛惜的人"都唱住遺忘左既家. 今回"我哋大家""Go Go飛龍"都係講大家既家:香港. "你老闆""大悶棍"就講事業, 我最鍾意既"傻婆""粒粒"就講自己既另一半. "世界有古怪"既少女成長記同"冷面笑匠"都係有關自己兒女. 最後"三角朱古力"既中年危機同"我係邊個"既中年迷失, 自己都有好深刻印象. 最後"齊齊整整"始終一家都係會坐埋一齊食飯.

今回幕後陣容相當勁, 連好久不見既區新明都客串寫左"齊齊整整". 仲有令人驚喜既Solar同半隊Beyond都有貢獻.
總結十三首都係精品, 越聽越有味. 再加上隻DVD好睇非常, 每隻MV都別有意思. "我哋大家"算係今年暫時黎講最好聽既一隻.

P.S. 希望下次搵人糾正下陳奐仁既廣東話, 免得又出現"cut煙"(吸煙)呢類旺角懶音.

2008年3月8日

我的三月天(Day 8)


新屋第一件傢俬到步!

關於梅小玲--一些最近的覺悟

(響blog用慣口語寫, 今次太認真嚴肅所以正規去寫)
近這一年, 大家也許都發現以往梅玲是大家的網上聚脚點. 但變成幾天都沒有新文就算有都只得一兩位版友回文, 梅玲變得冷冷清清. 一直以來我都想探討這個現象, 找出個原因來, 但總是亳無頭褚.記得去年我曾經出過"梅玲已死"的言論震撼大家, 也許是太灰太殘酷. 就由那時開始, 大家也開始離棄梅玲. 我也嘗試離開梅玲, 將這位小女孩交給我不太認識的別人處理. 但最後梅玲都係交回我手上, 可惜大家就一去不返.
起初我還深信大家都是我已死言論集體離棄, 再之前有版友亦說過有人於其他版說我管理得差人也不太好. 我也覺得這或者是我為主因. 還記得上個月的版聚, 很慶幸還有幾位版友出席. 席間B問我為何這麽少人出席不像以往動不動十幾廿人出席. 我實在想不通如何答B, 只說: 大家都討厭我. B還以為我說笑, 我只得對自己苦笑.
但近日拜讀某版友的網誌, 這版友大大標題說離開梅玲也說出原因. 我看過後實在很難受, 我實在想不通一個由以往眾人很有心討論的地方變成一個大家都討厭"唔好玩"的地方, 是我錯嗎?如果大家都認為完全是我為主因令大家討厭梅玲, 我願意為我過去言行而道歉. 若果是其他人或原因令大家厭棄梅玲, 我也願意代其他人向大家誠心道歉. 我不是又天真又傻, 只是我深信過去這麽多年的友情, 大家曾對梅玲的信任信心及支持, 不希望就此畫上句號.我不期望我這段牢騷會即時把大家帶回來, 但我希望大家願意接受我的歉意. 也希望大家不要輕言放棄對梅玲的友誼. 也希望大家可以繼續在這裡理性地交流熱烈的討論.
如有任何意見, 歡迎大家給我電郵至 info@mslforum.com

2008年3月7日

我的三月天(Day 7)

猩爸刻請飲.

2008年3月6日

我的三月天(Day 6)

終於可以笑下.

關智斌.代表作

買左一段時間兼聽左一段時間, 直到今晚先記起想寫一寫.

關智斌自從獨立發展都係好努力營造情歌王子型像, 但係佢之前既"代表作"一般都好嚇人: 尤其"月光光"果隻自動轉key既技倆實在佩服.
但上一張碟開始見佢有所成熟, 揀既歌唱既歌都開始有種味道. 上回"預言書"一次兩生花, 今回"代表作"一種自憐. 黃偉文寫出關果輩既歌手既無奈. "白木屋"重回情歌王子果種情懷, 歌與詞不差, 相信都係為左市場. 新歌不俗其餘舊歌精選都揀得好精, 除左"月光光"之外算係一個對關智斌好好既小總結.

2008年3月5日

2008年3月4日

2008年3月3日

我的三月天(Day 3)

以前呢三位PPG小妹妹響office係有自己既位, 地位超然. 不過最近公司擴充, 佢地既位俾"真人"坐左. 最後佢地要流落到去電梯口坐地下. 不過阿Johnny Depp或Will Smith呢D億萬巨星(既紙牌公仔)都係只可以坐電梯大堂, 呢三位小朋友當然無例外.