2009年4月30日

荒謬影話: Vanishing Point

有左藍光機之後, 確係入多左舊片BD, 尤其一D以前未睇過既, 今次呢套就係.
一位汽車速遞員同朋友打賭可以響15小時內由Denver市揸車到三藩市 , 成部片就係有關呢段旅程, 途中車手遇上未卜先知既電台DJ, 一對打劫既基佬, 神神化化既女人, 天體既電單車手.
整部片表面上都好簡單, 除左之前提及既人物, 仲要同警方作出生死鬥. 一部好基本B級片既格局, 但係意識上就真係唔係咁簡單, 尢其呢部片製作於1971年, 果個係火紅年代, 越戰之後對社會既衝擊, 再加上當年流行毒/自由/性就更加係貫穿全片, 對當時既社會作出好大既反醒. 其中結局簡直係當時當權者一個控訴: 一個手無寸鐵既人, 但制度下被迫成為敵人, 響走無後路之下唯有一死以謝天下, 以求人民可以反思對與錯.

2009年4月28日

香港對盲人真係超級.......

膠到想哭...
(相片來源: tvg)

2009年4月27日

荒謬影話: Mulligans

呢套可以話近呢一兩年可以入睇得落既同志片.
個仔帶埋同個同學仔去渡暑假, 老豆起初以同學仔身世可憐, 當多一個仔黎照顧. 點知同學仔突然come out, 挑起家中各人神經, 尤其老豆帶起佢既秘密.
片中不只只願同志議題, 家中各人都有其問題. 女兒對性既好奇, 母親對老公既憂慮, 兒子對同學既性取向不妥, 令到呢部電影更立體化, 而且編導演都頗有水準, 唔再係坊間只賣弄男體既基片.

2009年4月26日

荒謬影話: Knowing 地球毀滅密碼

講真, Nicolas Cage連仆幾部, 對佢已經有戒心. 但見係"i-Robot"既導演新作, 理應會有睇頭, 點知係一廂情願.
套戲又長又冗又多洞, 由一開始已經知"乃野". 點解小女孩唔同人講? 佢個女又唔信? 去到現代, 點解作為一個教授又唔同政府合作而自己去阻止災難呢? 呢頭話手機無訊號, 果頭又打得通喎.
但最最最可怕係夠膽敢索性將聖經拍出黎, 結尾一場睇完真係笑左出黎. 竟發現成部戲既潛台詞係: 要信聖經! 真係諗唔到呢部戲可以咁宗教, 心諗比任何一部宗教電影更正宗.
作為一部B級片, 特技都算B-C級. 慶幸個別調度場面不錯如撞機一段, 電腦cg差極但場面調度得唔錯. 似乎而家搵片睇真係好難捉, 呢類衣櫃宗教片真係避無可避.


(40/100)

2009年4月23日

2009年4月22日

小心惠康一種貨品兩個價錢

之前已經試過五包散裝出前一丁同一pack過五包裝出前一丁, 放響同一位置最頂同最低既貨架上, 價錢係相差左一蚊. 今次胃匡再接再勵!
話說要買八罐裝七喜汽水, 通常係平過廿蚊. 但今晚見到加到二十蚊零九毫, 心諗經濟差仲加價之際, 見到同一位置最低一排貨架有另一個價錢牌係十九個九. 嘩! 想
點呀? 人看低處有著數呀?收錢時見到汽水過機時係二十蚊零九毫, 即時向收銀阿姐反映有兩個價錢, 阿姐搵左個哥仔去調查, 亦證實係有兩個價錢, 之但係哥仔除左個十九個九個價錢, 咁點呀?結果, 我一睇張單, 二十蚊零九毫價錢被取消, 改成十九個九. 雖則我好似無損失, 但係之後既顧客就要捱貴汽水. 所以大家去超市買野真係要一眼關七, 免得買貴野.

2009年4月21日

城大六四潮文

新一代未經歷過六四, 通常都係道聽塗說或從文獻中得知一二, 但都唔會去到城大呢位同學咁離譜卦?


2009年4月20日

成龍話: 講出真心話 方為大奴才


哦~
(圖片來源: 三屋粥谷)

2009年4月13日

我的HKIFF 2009 (Day 10)

對我黎講睇電影節有一D戲膽, Nanni Moretti就係其中一位. 由Dear Diary之後從未間斷, 永遠都係賞心悅目. 其實我一早入左呢套戲既DVD, 只係無時間開黎睇.
今次佢又只當主角(及編劇)演出呢部戲, 片中佢係喪偶, 佢真係不幸, The Son's Room死仔, 今次又死老婆. 因為錯過左救亡妻, 只好守候女兒身旁寸步不離. 甚至將辦公室政治放到公園內.
Nanni Moretti演出既父親有別上次於"The Son's Room"入面失子果種含蓄, 今次比較
內疚, 始終係自已既過失. 而且片中鋪排佢同其他人物響公園作出互動亦都好有心思. 只不過果場床戲實在有D多餘, 否則整部片會比較完整兼免除帶上三級既冠冕.
結尾某人既客串真係令我嘩一聲, 難得佢老哥竟會出現響意大利既製作, 真係始料不及.


Quiet Choas 在安靜漩渦沉淪到底

今年我的HKIFF就正式話上句號, 睇過既電影普遍都唔錯. 不過觀眾既質素就同電影質素相反. 食野飲野講電話解畫乜都齊, 遲到仲要揀位坐先至最經典. (爛gag: 真係唔好著紅色絨毛衫褲入文化中心睇戲, 果日見個女仔全身紅絨入場, 佢一坐底, 真係得番個頭響半空懸掛!!)
今年心水:
1. Crime is our business
2. I've loved you so long
3. Religulous

2009年4月12日

我的HKIFF 2009 (Day 9)

響舊年仲可以響亞視國際台睇到既Late show with David Letterman已經見過佢有介紹呢套紀錄片, 但諗唔到竟然係到咁有趣.
一個喜劇演員走訪各地追訪各界宗教人士, 將一切宗教荒謬事统統抓出黎. 雖則主持有反宗教之嫌, 但仍可以輕鬆地將宗教荒旦事表演出黎.

從來我都覺得宗教都係一件好怪既事, 但我實在諗唔到原來宗教除左一面正氣亦有另一面荒謬怪事.

Religulous 荒天下之大教

NOKLA

大陸A貨萬歲!!! 同場加映 NOKLA N95/5800示範片, 正到哭!
(圖片來源: 三屋粥谷)

2009年4月11日

Shakey's Pizza

睇完電影節諗去邊食晚飯真係有D頭痛, 行下行下, B發現左呢間佢既童年回憶: Shakey's Pizza響尖沙咀出現, 佢真係感動到哭了!
佢真係車轆腳咁帶左我上樓, 餐廳內裝修真係幾美式. 因為B熟晒menu, 所以由佢發板:凱撒沙律
味道一般, 可以話比較淡口.
Shakey's Special
真係好好好好好味呀!! 底薄得似紙兼卜卜趣! 少量咸牛肉令到味道更濃.
B已經揚言隔兩日又要幫襯過.
另外餐廳設外賣速遞, 不過範圍有限, 港島區無份, 去得大埔但又唔肯入將軍澳...

我的HKIFF 2009 (Day 8)

B至唔鍾意雲頓先生, 佢覺得大部份近代動作明星如史提芬史泰龍龍格爾都好dumb. 所以今次我同佢講明套戲係講雲頓先生自己. 我覺得雲頓先生偶有佳作, "Time cop"同"Sudden Death"都係唔錯既作品.
大明星落難俾人誤會打劫郵局, 引伸對自已既過去作出一次反思.
我可以話呢套戲除左係拍俾雲頓先生既fans睇之外, 其中香港既戲迷一樣睇得拍爛手掌. 不斷重提佢同華籍導演既恩怨(頭果個係影射Ringo林嗎?), 好笑到片中奸角亦替雲頓先生不值怒罵吳宇森. 佢自已亦真心不滿不停響歐洲拍好多DTV既電影, 一切都係為左錢.
今次亦係首次見雲頓先生有少少入戲, 尤其一段"抽離"既獨白亦都係佢少見既內心戲, 當然有幾多真心無人知. 但整部戲都係別出心裁, 時空穿插有別一般商業作品. 睇完部戲你唔會立即喜愛雲頓先生, 但至少一見到佢, 都唔會失聲大笑.


JCVD 玩謝尚格雲頓

高蒙公司甚至特製個新ID俾呢套戲, 玩味十足.

2009年4月10日

我的HKIFF 2009 (Day 7)

都唔知邊條廢柴諗出叫人響地面大堂排隊, 結果大堂人頭湧湧, 排隊既散場既路過既共治一爐, 亂過過時過節既羅湖邊境. 好好地大家響一樓走廊排在十幾年相安無事, 今年突破性屎忽痕, 相信下年會叫我地出文化中心外排隊.
老板一夜間走佬, 一班工人決定買起老板以洩心中怨恨. 點知無得揀之下搵到個無膽既業餘殺手, 無膽殺手無膽下手唯有下下假手之人, 雖然大功告成但竟然發現殺手同女工背後有不可告人既秘密.
玩黑色幽默同反智呢套都玩得好放, 甚至乎過哂火玩大左. 尤其叫病危阿姨去幫手殺人, 完全笑唔出甚至好不安. 往後所謂笑料都唔再好笑, 甚至有D討厭.


(0/100)
Louise-Michel 買起我老板

幾年前港產片抽左印度一次水, "起馬拉那星"成為一次惡夢, 睇過既人無一唔"吊那星". 今次輪印度抽港片水, 完全成功成為一次超合格既示範作.
有齊港片印片所有元素同特色, 再加超型美術同好聽好睇既歌舞場面, 而且佢地更加學會左港片果種靈活, 154分鐘絕對唔難過.
從此引申港片近年變成雞肋水尾, 創意有限題材保守. 雖然可以避過荷里活過於利用, 但今次Bollywood竟成功吸收精華發揚光大, 本地製作人係咪要深思港片既出路, 是否真係要放棄內地市場, 重投創意市場令港片再為港人廣泛地接受.


(95/100)
Chandi Chowk to China 從印度到中國

2009年4月9日

我的HKIFF 2009 (Day 6)

一直都鍾愛Michael Winterbottom既Wonderland同24 hours party peoples, 但往後既Code 46同A Mighty Heart都令人跌眼鏡, 更遑論果套"情慾九歌".
今次又一大明星作品, 幽幽地講一個家庭跑到意大利古城重過新生活. 全片焦點我覺得係細女, 因為自已過失令到母親意外喪失, 重過新生活後仍然很悔恨不已, 甚至經常夢到母親無時無刻出現, 晚晚發惡夢亦令父親痛心.
Michael Winterbottom今次似乎又比前作遜色, 雖則部份劇情能帶領觀眾情緒, 但總括亦只能講係幾平淡, 大大浪費Colin Firth同 Hope Davis兩大星, 尤其後者.


Genova 逃情熱那亞

2009年4月8日

我的HKIFF 2009 (Day 5)

就算當日我幾唔舒服同幾眼瞓, 都好彩當晚套戲實在太精彩, 令我睇果時完全投入, 睇完先舊病復發.
苦悶中女一心有好奇精神, 從姑媽口中得知發生火車謀殺案, 結果化身無間道入古堡查案, 但又俾佢誤打誤撞謎底.
全片流暢無廢話, 對白又精警非常, 甚至爆爛gag處處. 男女主角既演出就更加令本來出色既劇本更添色彩, 兩人身體語言豐富, 響果一刻, 實在令我諗起蕭芳芳同許冠文.
劇情除左笑料之外, 推理劇情亦都令人絲絲入扣. 雖則我一直認為某角係兇手, 但到頭來竟然爆個冷.


Crime is Our Business 靚太查案記

2009年4月6日

含得耐

我知呢隻並唔係新產品, 但我真係未試過. 呢隻芒果味比較軟兼黐牙, 正如同事E話齋: 黐牙可以俾你含耐D嘛. 呵呵.

2009年4月5日

香港零度了



圖片未經PS.

伸延閱讀: "天氣報告-零度"

2009年4月4日

我的HKIFF 2009 (Day 4)

事隔十七年, 我同Terence Davies再響電影節相遇. 不過今次唔再係佢既童年回憶, 反而係佢對利物浦Liverpool呢個城市唸一篇七十幾分鐘既詩句.
雖然響利物浦我只係個過客, 亦未曾深入去了解呢個城市. 但利物浦對我黎講仍然有佢既個人魅力, 始終係我一個又愛又恨既城市. 最近Google Map既Street view又將我帶返到呢個城市, 發現離開左八年, 原來有好多地方都變左. 好奇地走去J既大門一望, 但係就依然無變.
其實部片雖然有好多陳年生活片段, 但又唔全套都係有關利物浦, 對宗教皇室戰爭都有觸及, 有時輕鬆有時哀傷, 就跟大家黎一次Merseyside tour.


Of Time and the City 城市流光

唉~ 自上次"天使"之後話過唔會再睇洪先生既作品, 完全係一個受苦既經驗. 之但係為左支持K先生而捧場, 結果又係另一個受難既經驗.
作為第一部長片, 理應可以寬大面對. 但只不過實在太糟, 太長太多沙石就連講故仔既能力都無, 實在睇到一頭煙. 就正如佢自已即場介紹部戲都可以結巴巴詞不達意, 很難想像佢明唔明自已套野究竟想表達D乜.
見今趟多左歐洲資金, 正如大劉話齋: 有個錢就身痕. 香港部份還可以, 瑞士一段就變成硬銷式寰宇風情, 真係有D頂唔順.


Soundless Wind Chime 無聲風鈴

2009年4月3日

我的HKIFF 2009 (Day 3)

都睇左十幾廿年電影節, 香港人就好似無進步過一樣, 依然有人響文化中心大劇院內打手電又或者又天真又傻地問點解收唔到手電. 有個咁劣質既電影節主辦機構就有咁劣質既觀眾.
今晚套戲確係一流, 女角係釋囚放監後同妹妹團圓, 重過新生活, 但及後發現親人早當佢唔存在, 生活上又遇上種種歧視. 正當完全迷失之際, 一封遺書就正正為大家作出解脫.
Kristin Scott Thomas 既演出完全無得傾, 捕足到果種無助同無奈. 其實片中各人都囚禁響各自既監獄: 有口難言既爺爺, 失婚既警察, 失憶既母親. 結局各人都係走不掉各自監獄, 只有女主角因為最後遺書發現而真相大白, 最後吐出一句: I'm here. 真正感受到自已存在, 並唔係過去15年被忽略被隔離同被誤解.


I've Loved you so Long 別問愛是誰