兩傻遊台灣 2009 (1)

原本計劃舊年聖誕去台灣, 但結果佢又話貴又要慳錢反而本地東涌遊再加二月份去澳門, 其實加埋都夠去一次台灣. 自從去完澳門, B一直話想再去台灣, 但問過旅行社既套票價錢都唔平, 結果我要佢作出取捨... 去台北定高雄二揀一! 最後高雄當選. 但機票加酒店三日兩夜未計稅同附加費都要二千三, 就響呢個時候發現國泰假期做緊特價, 三日兩夜機票連五星級酒店住宿都係一千七, 比旅行社平六百蚊! 住多一晚都係每人三百九十! 我地當然當晚即刻上網訂一個四日三夜既行程, 埋單連稅附加費每人二千四.
以為一分錢一分貨, 咁平梗係無咁著數. 但今次又唔係, 套票包五星級酒店住宿連早餐(經旅行社訂係無早餐!!), 酒店及機場來回專車接送, 保証房間升級至海景房間. 另外套票係採用e-ticket, 即係話可以用網上辦理登機手續, 預早幫自己劃位及列印登機證, 呢個就真係最滿意, 因為可以揀位坐有咁前坐咁前!
但問題黎, 高雄有乜野玩? 我係訂完所有野之後先發覺高雄又可能無咁多野玩, 所以可能要向外發展. 我有諗過台南墾丁, 但又好似唔吸引. B話佢以前住過台中, 不如去台中啦. 但台中....好遠喎. 好彩有高鐵! 四十五分鐘就由高雄去到台中. 原訂係上網買埋高鐵車飛, 但經過無數次嘗試都話系統繁忙, 唯有到時先買.
星期一朝早就出發搭巴士去機場, 搭巴士原因係慳錢兼方便, 響屋企對面有機場巴士站, 原以為要九十分鐘再加塞車時間先到機場, 但果個朝早交通好暢順, 八十零分鐘就去到機場. 雖然之前已經響網上辦左登機手續, 但原來行李托運仍然要經人手再做一次. B都覺得同以前無乜分別.
一早響網上辦好入台證, 點知去到機場櫃檯, 對方話我填錯身分證號碼, 無得簽發. 一睇個表格我都暈埋, 因為佢要求只需填身分證頭六個字號碼, 我誤解左意思係只填號碼而唔駛填字母. 又唔係第一次申請, 咁都填錯! 唯有響機場用PC既電腦再申請多一次, 先可以順利簽發.
兩個人me me more more(過海關越黎越煩!), 又買野食又錢, 幾乎last call先到個閘口, 我同B講我地幾乎又要典地先上到機.今次班機有好多空位淨, B估計少過一百人, 用咁大架飛機真係有D浪費. 一個鐘行程有時都幾趕, 趕既係行程短又要派餐, 雖則盒飯得兩啖, 又呢頭未食完又話因要降落要收tray, 趕頭趕命.
高雄機場似乎好貼近民居, 而且亦有D殘舊, 後來發現呢種殘舊感其實周圍都係. 不過過海關等行李就超快, 因為成個機場得我地呢班機果幾十人. 一出大堂就見有人拎住我地個名既紙牌, 原來就酒店職員黎接機, 另外同機仲有另一對女女couple一樣住呢間酒店, 咁我地跳上酒店既七人車向酒店出發!(代續)