2007年8月27日

旅行團

都成十年無參加過旅行團, 仲記得上次参加旅行團係同某位ex一齊到華東旅行. 當然講得出ex, 就已經代表ex, 因為一番到香港就分手.

以往参加旅行團, 第一二日素未謀面既團友已經可以談天說地, 一齊同檯食飯, 兼且全部互相幫助. 呢個我係覺得旅行團另一個好處: 認識新朋友. 我曾經響旅行團認識一對年青夫婦, 後黎完團後佢地寄番一D相比我(記得以往我地係用菲林影相!), 我地一直有互寄聖誕咭長達五年之久.
不過後黎自遊行流行, 對於我呢種"單男"黎講, 自遊行自自在在總好過参加旅行團同人share房間.
今次再次参加旅行團, 發現好多野唔同晒. 團友再唔同其他團友傾計, 團友再唔會同檯一齊食飯. 番到酒店就各自入房互不相干. 参加五天團大家姓甚名誰已經唔重要, 全程完全無溝通, 莫過講互相幫助, 就算互相見到都立刻彈開. 我地都曾經試過幫人影相, 幫其他團友一D好濕碎既事. 除左一班女仔有計同我地傾之外, 其他都一個唔該都無就走開.
究竟係而家D人變左, 還是旅行團變左質呢? 不過我好肯定一樣野, 就係而家既父母太遷就佢地既細路, 而家既細路亦可能物質生活好左, 變得嬌生慣養.
其實呢個團就未必岩D小朋友, 有幾多十歲以下既小朋友鍾意響高溫之下賞花? 又或者沿途欣賞風景? 又或者去名店購物呢? 不過成團三十人已經有四五件呢種十歲以下小朋友. 結果行程中, 呢班小朋友唔係嗌悶就係喊熱, 嘈到你想大巴大巴升埋去.

之前我都講過麵店既失禮事件, 話說呢間麵店好細, 冷氣又唔足, 所以就真係好熱. 不過作為遊客一心想品嘗美食都唔計較, 不過有一家人就幾失禮不停嗌好熱, 奇就奇在父母毫無意思去安撫D小朋友, 任由小朋友嘈住扭計嗌熱, 難為對住幾個火爐既老板顆計大汗細汗都無出聲, 仲要笑面迎人送呢樣送果樣. 在場另一檯日本本地客見到咁嘈都面有難色. 完全極之對呢位老板既心血不敬.
當香港人嘈大陸自遊人搞到香港污糟邋遢無晒儀態, 請唔該各位有口話人無口話自己, 外遊時請保持應有儀態, 免得外地人都怕左港客.

7 則留言:

小張 說...

係呀, 我學校d中學生有少少事唔識自己解決。打爛野企左響度唔知要做咩,
我叫佢拿掃把掃左d玻璃碎,佢掃把都唔識用,重要話我 :我屋企只係用吸塵機,我響屋企有工人幫我做。
滴晒汗。

Gabriel 說...

我根本就覺得十歲以下既小朋友係唔應該出國旅行,因為佢地去左都唔記得。

如果話而家d小朋友唔得,反而想講而家d家長重唔得。

mysimplelife 說...

太多後生父母, 廿幾歲人有個八九歲細路. 連自己都顧唔掂, 點教仔女.
某日飲茶見隔離枱三代同枱, 但係阿媽只顧打PSP, 連個仔有無野食都唔理.
真係無言.

小瑟 說...

哈哈, 好一個大巴大巴星埋去呀!!!!XDDDD

aulina 說...

嗯…後生父母…咁我點搭嘴好呢?

"但係阿媽只顧打PSP, 連個仔有無野食都唔理."

我有食飯時打機,但係我都有理兩個仔架!!!XXXXDDDDDD

話時話出到街真係鬧仔又俾人話、唔鬧仔又俾人話。我,一早已經話之人地點睇,盡量搵d啱佢地去同kid friendly嘅地方。如果明知佢地怕熱呢d地方就唔會去,明知入戲院睇大人戲佢地會發顛咁咪唔去囉。

做人呀爸呀媽真係要預咗要犧牲好多。

說...

細細個跟團旅行都只係覺得坐飛機o個下會好正之外,其他野都淡而無味。唔記得o個度o的歷史文化風土人情,但就好記得跟旅行團係幾咁辛苦同討厭......好彩試過唔跟團,否則唔會建立旅行o既興趣。

至於團友嘛,我呢個八十年代出世o既人,頂多試過同團友熟但去完就各自忘記對方......咁令自己覺得團友係過客,好似識唔識都係咁tim,但你o個陣係去完旅行都有keep in touch定點﹖

mysimplelife 說...

娜姐, 我覺得鬧仔其實無乜唔妥, 只要唔係好似我地果代咁當街俾老母打到飛埋牆就得. 我反而睇唔過眼係父母太縱子女, 搞到呢一代個個都係"周麗淇". 到佢地大個點算?

謙, 之前我地只係書信聯絡, 因為佢地多數時間住響泰國. 當年internet唔係咁流行, 仲係33.6K時代. 不過只維持左五年, 直到有年無再收到佢地既聖誕咭為止.