消滅香港

近日網上傳出馬己仙峽道一塊過百年城界石碑被移走, 呢塊石碑係一百年前港英政府為維多利亞城設立既既邊界, 極具紀念價值. 就算維多利亞城早已唔存在兼且回歸十年, 石碑都相安無事, 我每次行山都見到, 點知近日就傳出呢個消息. 究竟發生乜野事呢? 附近唔見有工程, 石碑被移走後原址用石屎補上. 當然我地政府連天星碼頭皇后碼頭都要拆, 一塊小小既石碑有乜理由唔拆呢? 再引申如果香港政府好學唔學, 學台灣現政府去蔣化而在港去英化, 香港既歷史以後可能只會存在響舊刊物同老香港既心中, 下一代可能就連香港點黎都唔知.
香港政府文物保育, 其實由港英政府時已經錯哂. 如果大家搭巴士經過東區海底隧道響九龍收費站向西望可以見到一個垃圾車停車場, 可以見到入面有兩個大帆布, 其實係列火車卡! 記得十幾年前, 九廣鐵路捐出一卡火車俾當時市政局. 纜車公司亦捐出退役綠色山頂纜車俾市政局放響歷史博物館. 結果兩卡火車曾經響興建中既博物館外展出一段短時間. 跟住隨住博物館開幕, 火車卡被移走. 大家以為移左入館內, 點知館內設計時竟然無預計放置火車卡同纜車卡. 結果建成後只容納左部電車, 火車同纜車就放置到茜草灣車場至今. 原準備幾年前開設交通博物館可以重置, 結果交通博物館一事不了了之. 而家火車卡還好有上蓋保護同用帆布遮住, 兩件文物就咁俾棄置響垃圾車場.
當政府話想將皇后碼頭響啟德重置, 心諗啟德計劃已經講左好多年, 同西九一樣十劃都未有一撇. 唔知皇后碼頭被拆散後, 會唔會又被棄置到車場多年, 直至無人記得. 又或者好似舊卜公碼頭一樣, 無厘頭被重置到摩士公園內幾十年無人知, 直至今年, 興集體回憶又再被重置到赤柱一樣既命運.
政府要消滅香港? 請先消滅D老香港先. (註: 回歸後我會講自己係居港華人, 香港人中國人呢個名稱太沉重我受唔起.)

伸廷閱讀: 棄置逾十年 港府懶理 百年火車卡 淪為道友天堂