大鄉里出城: Shake 'em Bums

話說為左去睇4A個五十週年展覽, 晨咁早就仆出去金鐘太古廣場. 諗住咁大既宣傳就一定好多野睇. 點知................

一岩一忽, 數埋都唔夠廿個廣告仲要已橫跨左四個十年了. 有D被搵老襯既感覺. 而且全部展出都係print ad. 就算有TVC都用硬照代替, 究竟呢個算做乜叉野展覽. 有咁多贊助既展覽竟然係得咁蚊滋咁細粒. 究竟D錢去左邊呢?

記得以前4A個廣告大展, 有HKVP出過錄影帶. 可惜HKVP早死, 根住就無再出過. 要睇呢D經典電視廣告, 除左youtube, 就別無他選.

睇住個把鬼展覽, B原本想去Dan Ryan食晏. 我就提議去一處新地方: Shake 'em Bums. B一聽到個名已經笑到收唔到聲, 但我怕如果唔好食佢會鬧我鬧到收唔到聲.
大熱天時行上星街真係好辛苦. 呢間小店數埋都係得十個位, 好細好close但唔嘈. 之前I Love U Boyz阿奴已介紹過話好味但唔好叫太多野, 因為份量都好大. 咁我就order左Red on the Neck, 係有chili響漢堡飽入面. B就叫左Guiltar Shop Special同薯條. 另外叫左兩杯奶昔.
兩份漢堡飽既份量確係好大. 味道亦相當好味. 薯條就較普通, 反而兩杯奶昔絕對真心超好飲. 好唔容易先食完個飽, 飽到頂上心口. 相對店內坐得唔係舒服, 就算係有幾好味, 漢堡飽價錢係略為貴. 反而杯奶昔就幾值勒! 好過去許留山.