電視風雲: 第一回合

話說自從新金主入主亞視, 有線打出10蚊台迎戰Now既英超足球. 電視圈再起風雲. 幾個月後, 終於有第一回合既結果.
就算有新金主入股亞視, 似乎仍然響到招兵買馬階段, 甚至接近吹水. 不停有消息邊個邊個藝員會加盟, 真係有做野既就真係無.
反觀有線既10蚊台"第一台"開台後更加雷聲大雨點小. 我早講明呢個超低成本既新台要打其他免費台根本就無可能. 因為成件事實屬大昆水. 當第一台開台前, 有線仲係講所有基本客戶可以收睇呢個第一台, 我都覺得奇怪, 乜唔係搵新客上台而搵舊客撑場既? 結果一開台, 情況360度轉變. 官方公佈基本客戶係唔可以收睇第一台. 因為客戶可以響基本台入面可以收睇到有關節目. 以往可以收睇有線A台既就只需俾10蚊就可以睇第一台. 同日, 有線A台關台! 變相所有A台客戶由以往唔駛錢到而家都要俾10蚊先睇到第一台. 而且A台同第一台既節目編排係有90%相同. 形成有線成機可以每戶收10蚊. 試想像一個有千戶既屋苑, 每戶十蚊, 已經有過萬元收入. 搵完舊客笨, 新客呢? 話就話俾10蚊睇一世, 但仍然要裝解碼器, 全數$810. 而且以往近乎免費既A台都可以話執就執, 十蚊睇一世? 你信唔信呢? 我可以話有線巳死! 唔識變通, 無生意頭腦, 只會得失客戶, 仲邊會有人會幫襯呢? 相信今年客戶流失率更多尤其佢地近期玩關卡阻止客戶取消服務既劣招更加令人反感. 今年無廿萬客? 一定!
HKBN近期推出BBTV打正攻打有線旗號, 意念鮮明, 其實都應該好有效. 可惜覆蓋有限, 影響上台, 死症. 點解唔搞好網絡先去推出服務呢? 結果有服務但吸納唔到新客, 如此生意, 佩服欽敬!
Now作為全球最成功既IPTV, 確係幾光榮. 基本上佢地有齊所有外購電影台/體育台已經可以係話無敵. 只不過之前佢地既海鮮價確係令人幾苦惱. 當然, 出面打乜野杖, 佢地都唔會怕. 所以佢地開始有所動作! 講左近半年, 終於響年底發生. 所講係Now新聞台. 之前Now一直都對亞視新聞台唔滿意, 結果趁今年約滿後不再同亞視續約, 自己成立新聞台. 最重要Now可以用原本財經台既人力物力就可以開新聞台, 無需由零開始. 再加上現有亞視新聞台既訂户, 可以話打左場嬴硬既杖! 至於亞視新聞台就會轉到亞視既數碼頻道繼續廣播.
至於無線, 確係怕有知名藝員跳蹧過亞視有線. 但隨住亞視既無米粥同有線第一台開台後, 事情好似平靜落黎.