志雲飯局 懶同你熟

裝左TVB Pay Vision之後, 都係主打新聞台, TVBS同經典台. 音樂台同生活台都會有時望望, 但因為呢兩個台太山寨廠製作, 一般節目真係幾難吸引到我. 不過佢地個"志雲飯局"貴為皇牌節目, 我都想睇睇. 上星期播出林夕一集, 講真林夕所講既之前週刊訪問都講過, 無乜新意. 反而係主持陳公公明言唔識林夕, 但一再響過程中扮懶熟, 尤其當佢地講起張國榮come out既勇氣, 陳公公突然問林夕如果換轉係你, 你會唔會有咁既勇氣去come out呢? 當時林夕定一定先答, 明顯被殺過措手不及. 我自己心諗: 大佬, 你呢位公公擺明俾個位詵林夕自動波入位come out. 難怪網上有口痕友代林夕答: 如果你係我咪係囉.
節目完結播出下集預告係李司祺. 陳公公一句: 究竟你既婚姻出現左乜野問題? 天啊!!! 陳公公似乎忘記左自己真正身份係堂堂總經理, 二人之下千人之上. 心諗一個老板斷斷唔會響大庭廣眾之下問下屬: 究竟你既婚姻出現左乜野問題? 一來呢D係人家私事, 公司無權干涉尤其當事人正幫公司賺大錢. 二來呢句問題極之侮辱, 就似假設左你/妳就係犯左一D問題先有婚姻問題. 陳公公根本就唔應該主持一個咁既節目, 如果佢只係一個小小藝員/記者, 用呢類八婆心態去做就無問題, 完全配合港人八卦心態. 但作為一位總經理去半強迫咁披露下屬私生活, 係咪恰當? 當大家鬧緊狗仔隊侵犯藝人私隱, 其實仲有隻狗公強姦緊旗下藝人既生活. 呢個係咪都要遣責呢.