請你俾一個理由我要聽新城電台

我已經無聽新城電台超過五六年, 因為由節目到主持人都唔吸引. 高層由陳欣建到甘國亮都係比旗下任何一個DJ更高調. 而且高層既明爭暗鬥更加成為大家茶餘飯後既話題, 根本就對一個電子傳媒有好負面影響.
但每年佢地所舉行既頒獎禮就永遠都係最令人談論. 尤其近年獎項多到又多又好笑, 真係只要人到就有獎, 都唔知係讚揚樂壇定摧毀樂壇. 終於舊年激嬲左某唱片公司, 今年又激嬲另一間公司. 咁長此落去, 唱片公司唔會再對電台賣脹, 出面仲有兩個更多人聽既電台. 要買時間播歌? 可以搵更多人聽既商台. 要檯底交易可以搵港台, 點解仲會搵少人聽既電台呢? 聽眾亦因為主持人或節目甚至播歌次數而離棄新城.
今日又傳出新城已解僱幾位資深同有名氣既DJ, 甚至改革成"新資台", 即係一半時間播放財經節目, 一半時間係娛樂節目. 以前新城"勁歌台"確係唔錯, 至少真係播歌為主. 到"娛樂台"變成好似將商業一二台溝埋變成個主要目標蕪湖. 至今更變成一個三不像既台, 要係聽財經佢地早已經有財經台, 根本就唔駛連娛樂台都要變種. 講到尾, 都係為左錢. 財經台太賣錢, airtime都賣盡. 客戶又唔想光顧無人聽既"娛樂台", 唯有出此下冊索性娛樂台變陣成另一個財經台, 掠到盡! 貫切李嘉誠賺到盡既理念.
一個電台成立短短十幾年已轉名數次, 根本就唔會留得住任何一位聽眾, 無聽眾? 電台用黎做乜野呢? 只會係浪費大氣電波同各員工既口水.

伸延閱讀:
新城當我甚麼？ - 蝦仁炒蛋
永遠懷念李麗蕊暨2007新城勁爆頒獎典禮 - holf yuen

迫上斷背山, 真係被迫??

戲院上時又無時間去睇, 結果被迫睇碟. 係! 被迫. 鬼叫好恨知究竟呢個翻拍版會係點.

套戲開始左10分鐘, 我係有種想熄機既衝動. 不過無被迫.

係因為實在太爛! 兩位男角無火花無交流兼嚴重交行貨, 果隻行貨重會係保用十年果種. 咁都算勒, 最難頂係果隻唔識笑既爛gag. 生硬堆砌, 對白又老土到暈. 不過最難頂係喪玩基gag, 總要係二三十年前果D基佬可以隨時撻著就地正法又或者基佬一定一路沖涼一路唱camp歌. 甚至你係基佬咪同我打波等等. 一邊套野表面想講基佬被歧視既情況, 但又一邊拎基黎開玩笑. 甚至臨尾請埋基界前輩李察張伯倫粉墨客串一角以為可以用真基平衡番直過頭既劇情. 可惜真係番唔到轉頭, 因為個玩笑實在開得太大.

直人永遠以為基佬題材係最賣錢, 次次都想借基立福. 但係觀眾眼睛係雪亮, 尤其今回"被迫"變成賣點. 如果條橋真係ok, 人地澳洲原版老早就大賣啦. 仲等呢個荷里活老翻咩?

(25/100)

我的十大2007 (唱片部)

今年樂壇新人多到數唔晒, 直頭有D唔知來自邊度或者出現左一陣又唔見左. 歌同碟係出多左, 但係就對樂壇無乜實質貢獻. 以下十大排名不分先後.

1) Listen to Eason Chan - Eason Chan (Universal)

呢隻算係今年本地樂壇兩張奇碟之一. 製作認真而且歌曲亦都唔錯.

2) So far So Close - 孫耀威 (Universal)

呢一刻實有人大嗌: 唔X係嘛... 每個樂壇都係需要情歌, 老孫既情歌王子形象呢十年都未見有人可以取代.

3) Moments - 古巨基 (Gold Label)

概念好, 但講人生既巳經係第二回, 再咁回帶就會好悶.

4) Process - 盧巧音 (WOW Music)

一張EP都可以過半既歌係超水準之作.

5) 3/8 - 謝安琪 (Universal)

唉~ 梗梗合格...

6) 酷愛 - 張敬軒 (Universal)

由扮西化但仍見太"娘", 到宜家真正有自己風格, 見到係有進步.

7) What Really Matters - 何韻詩 (East Asia)

見阿菇咁勤力, 未停過出碟, 一年出三(次)碟....

8) The Boy With No Name - Travis (SONY BMG)

好鬼耐聽既一隻碟.

9) Life in Cartoon motion - Mika (Universal)

一張06年既碟出現響07十大, 似乎我既接受能力實在太慢.

10) Chapel of Dawn - Juno (Silly Thing)

全年最正既一張, 亦係全年奇碟既另一張. 呢個概念可塑性好高, 總好過佢近期既新歌. 否則下次出精選, 麻煩落番絕版歌: 愛上殺手.

聖誕大餐

B上次食完Thanksgiving果餐之後巳經急不及待訂聖誕餐, 縱然兩餐都係食一樣既野...

上面係Thanksgiving, 下面係聖誕. 請找出不同之處.
因為上次叫兩個都食淨好多, 搞到要拎番屋企, B自己都食左兩餐. 所以今次只叫一個, 之但係餐廳都唔蠢! 是日每人最低消費係百五蚊, 一個聖誕餐兩百三, 即係仲差七十大圓. 結果叫多一個細Pizza同一碟細意粉豪多廿蚊.

不過今次依然食淨野, 大餐食盡只係仲差Pizza食唔晒.

聖誕快樂.

我的十大2007(單曲部)

又到年尾, 又一齊數數十大, 今年已經係第八年. 排名不分先後:
1) 節外生枝 - 謝安琪
生仔前一次任性既獨白, 但就贏得全世界(除左經理人外)既認同.

2) 月球上的人 - 陳奕迅
年年都有隻硬死慘情歌, 年年都只有陳奕迅.

3) 酷愛 - 張敬軒
轉得好!

4) 送我一個家 - 泳兒
一直對佢無乜好感, 唯獨呢隻歌改變左.

5) 1973 - James Blunt
青看留恨!

6) 第三身 - Juno X Hocc
意想不到既絕配.

7) Young Folks - Peter, Bjorn & John Featuring Victoria Bergsman
唔覺意既接觸到一隻蒼海遺珠.

8) 鍾無艷 - 謝安琪
張太臨年尾標尾會!!

9) 愛到不能 - 盧巧音
嘩嘩嘩!! 成隻碟都得!

10) 一刻永恆 - 古巨基
成隻碟唯獨是呢首歌最自然.

將大肚腩送俾大肚腩

某日響戲院遇見朋友鴨, 佢一見我就伸手摸我個凸肚. 我話: 係, 我有左三個月. 佢上次見我都應該暑假左右, 果時我都無咁突. 唔知點解轉眼數月, 脂肪突然盈聚, 谷埋一個地方. 連著厚身衫都突晒出黎, 簡直一個污where中年麻甩.

尋日聖誕派對收到老細送俾我既聖誕禮物: 膠紙座一個. 但我一拆開已經笑到收唔到聲, 仲同老細講: 好襯我喎.

巨人飯盒

呢個星期為左應付聖誕節既"超級任務", 大家都做到天昏地暗. 真係無時無日, 分分鐘十一二點都仲響公司搏命. 不過人始終要食飯, 夜晚OT附近既餐廳大都閂晒門. 唯獨是同事們一定諗起一間開到好夜既茶餐廳仍然會送外賣. 但係同事都好怕叫呢間野既外賣, 因為個飯盒同份量永遠係大到無倫! 就算兩位女同事share一盒粉麵飯都未必食得晒. 有幾大盒? 見下圖.

拍埋杯凍檸茶就知有幾大! 娜姐你地一家四口分分鐘夠分.雖則三十蚊有找, 但係食唔晒真係好鬼浪費, 善哉.

古怪電車男

上一份工就多基佬, 由老細到同事, 有如恆河沙數. 而家呢份工成個本地office就女多過男, 少左基佬反而多左電車男. 當然電車男果種"奄姑"性格無乜殺傷力, 但有時都幾得人驚.
好似前幾個星期人某日同幾位同事食完晏行到番公司, 響電梯大堂遇上隔離部門電車男A. 我地四個人一字排開一路等一路傾計, 我眼尾察覺電車男A不停擰轉頭向後朝我地方向望過黎. 只見身邊女同事開始笑, 但我地又唔知佢笑乜. 同一時候電車男A仍然不停對我地上下打量. 直至番到埋位, 女同事先至講: 因為佢見到電車男A不停擰轉頭由上至下用眼光不停掃射我地四個人, 就好似"未來戰士"不停咁scan身邊既人一樣. 所以女同事覺得好好笑. 但我話: 我諗佢(電車男A)真係"未來戰士", 因為每朝搭港鐵番工都會咁啱同佢一班車. 但永遠一開車門, 佢就會一枝箭咁衝出車廂, 轉眼間已經唔見人. 就算早過佢一班車, 我一路行上地面, 佢都會一枝箭咁爬過其他人既步伐車轆腳咁係咁行, 唔駛兩秒已經唔見人.
另一位電車男B仲得(我)驚. 因為同佢唔同部門又無乜工作關連, 所以真係唔識佢. 有次晏晝等, 佢又咁啱一樣等. 唔知點解電梯大堂咁大佢都會企到咁埋, 呢下都算. 點知我無意識咁一望過去, 佢竟然係對住我陰笑! 嘩! 微笑都無乜野, 好奸既陰陰咁笑算係乜野意思? 真係怕左佢, 所以自己行過去窗口望窗. 點知響波璃反映佢依然望住我呢邊陰陰咀咁笑. 真係買你怕, 寧願等下部都唔想同佢同一部.
以為一次係咁點知第二次仲激. 人有三急走去廁所解決, 解決既半路中途佢又入黎解手, 仲企響我隔離. 一路進行中我一路感覺佢係望住我, 搞到我周身唔舒服, 拿拿臨搞掂. 正當拉番拉鍊轉身一刻, 我既視線同佢既面容有一刻既接觸. 天啊! 佢又望住我陰笑勒! 自始每次有佢出現我都避而不見, 就算要去方便而又撞見佢我都即刻打回頭. 不過有次準備打開男廁門既時候, 佢突然響側邊既傷殘人士洗手間走出黎, 真係俾佢嚇一跳. 有男廁唔去反向去個男女都入得廁所, 又唔係方便過人, 貪個廁所大定係乜, 就真係"不得而知"勒.

Last Summer的吻

呢個廣告雖然橋舊, 但勝在長青. 呵呵!

謝安琪: 鍾無艷的3/8

為左年尾交數, 再加年尾各大電台埋單. 身都未修, 唱片公司又整一張新曲加精選, 有趣係兩公婆一人一張. 張先生亦都會推出佢既新曲加精選大碟.

第一plug既"3/8", 一貫謝氏加周博賢既音樂, 易入耳更易口出. 反而第二plug 既"鍾無艷", 監製赫然係久違既Alvin Leung. 再加上林夕腰心既詞同無抖氣位弦樂副歌實在可聽度爆燈. 不過, 曾經擔心佢轉唱片公司後會要唱愛情K歌, 呢隻會唔會係一個妥協呢?

第三plug既"神奇女俠的退休生活"實在好玩. 黃偉文既詞非常到肉, 真係搵唔到唔會流行既原因.

單睇三首新歌已經咁高質素, 無乜理由唔索性真係整一張10首歌既LP, 好過呢三首新歌而家淪落成搭檯既茶客.

鍾無艷MV:

大野叔叔拆你屋

一直好唔鍾意負面野既大野叔叔有個新既聖誕特輯叫"大野叔叔拆你屋", 原本我都以為係Watdahell咁嘈之巴閉. 但聽過幾集又有唔同既體會. 原來個廣播劇係反映現實, 對本地政府既文物保育極具諷刺! 正如主題曲最後一句: 一顆淚水扇落黎, goodbye the old good days.

真係有笑有淚.

官方網頁/節目重溫 (免費/只限本地)

啋你都傻

近日見網上又有幾單"網上報復"事件. 真係啼笑皆非, 就連主人翁都笑到收唔到聲. 正所謂贏了世界又如何? 結局都發現報復者智障難擋.

聖誕綠茶

諗唔到劉華綠茶都為左佳節整個聖誕"姣"版, 無厘頭樽口整個蝴蝶結. 拎出街已經好姣, 飲上口個蝴蝶結仲頂住個咀同鼻, 好彩可以除得甩.

無殼蝸牛搵殼日誌(後傳第一回)

自從成為業主後, 都未入伙甚至收樓原來仲有好多野要搞.
第一步當然去搵銀行做按揭, 單係選擇搵邊間銀行已經諗到頭都大埋. 間間既利率又差唔多, 有幾間係好似利率比較低. 之但係都係一D掩眼法, 最終都係同其他銀行無乜分別.
第二步就係開始正式計算大家既財務狀況. 咦? 乜呢D唔係買樓前要做既咩? 係! 無錯. 不過之前我地確有粗略計算可以負擔首期, 但俾左首期後, 仲淨幾多錢呢?真係唔知. 所以大家都要坐低計計數. 點知一計, 大事不妙! 原來俾左首期後大家只淨底單位數字既存款. 果D豪裝十幾廿萬就可以忘記, 就連傢俬電器要添置都要諗過度過先得. 好彩我地仲有一大堆股票做後著, 如果股市唔跌既話.
第三步就係行傢俬舖. 以往行就得個睇字, 不過而家行就開始計算梳化點排好? 電視櫃靠窗定靠牆好? 張床買大少少得唔得? 在銀根有限之下, IKEA都嫌貴! 發現之前有幫襯過既"翡翠"價錢都唔錯, 所以集中睇佢地既產品.

試片室: Get Smart

記得兩年前仲響某台做既時候, 留意到佢也有套好舊既電視劇叫"Get Smart". 作為一套喜劇, 理應係好好笑. 不過始終係黑色幽默, 有時我真係未必get到個gag.
荷里活事隔四十年終於推出呢套劇既電影版. 由Steve Carell飾演Maxwell Smart, 橫睇掂睇佢確係有幾分似電視版主角Don Adams. 不過搵Anne Hathaway扮99就有少少失色, 因為太中女了.

1965年電視版opening:

垃圾大學生

前晚既"忽然乜乜"已經令人火滾! 但心諗一個共產釋囚, 可能只不過同時代有少少脫節亦都忘記自己身份, 將自己既心底話講左出黎.
點知今日睇新聞, 一班中大學生會既人響畢業禮抗議. 不停打斷畢業禮既進行, 令到在場既畢業生同家長好反感.
畢業禮好比婚禮, 一生人可能都係得一次. 畢業禮亦都係個好莊嚴既典禮, 但估唔到一班不知所謂既中大生竟然將呢個其他人可能一生一次既畢業禮變成一個惡夢. 一直所見佢地矛頭都係向住董建華, 但係後黎又話其實目標係校長. 原來就連自己既目標係邊個都唔知, 真係替呢班垃圾大學生擔心第二時出黎做事會係點, 會係攤大手板既失敗大食賴, 定係激進既無政府主義者.
B同我講, 有日有學生喊住話過去既學期完全無溫書, 一個字都無讀過. 但大考將到, 所以哭求B點算好. B都好認真話: 無辦法. 但學生竟然話: 太多野要讀. 天啊! 讀書讀書, 當然會有好多野要讀. 唔駛讀玩足幾年又可以畢業, 邊度有咁著數呢?
真係對現今大學生嘆息.

擺到生蟲

商場棵"茄子樹"放左兩星期後, 今晚發現又多左D野. 可能擺得太耐, 竟然生起蟲不突止更變成蝴蝶. 究竟駛唔駛同食環署通報呢? 呵呵!

荒謬影話: The Man of My Life

記得之前睇過部戲有句對白好抵死, 大意係"Bi通常係基佬呃老婆既籍口". 我確係唔信真係有人"中途轉基", 只係太多衣櫃基未被發掘自己既"潛能".

老婆叫老公約隔離屋既中男鄰居去晚宴. 點知呢位基中男同男主人既一夕對話就永遠改變左呢兩公婆既一生.

基男又唔係真係想去破壞人地個家庭, 亦都見好就收. 只係人地老公對自己念念不忘, 有D被氣壞.

Zabou Breitman呢位女導演就用左120分鐘同大家上左一堂電影課. 佢用晒所有既電影語言同技巧去講個故仔, 絕對係高手. 無論剪接攝影同音樂都可以拍得住大師級水準.

吒咤正在普選

商台既吒咤樂壇又開始左投票, 以下係自己既選擇:
1) 我最喜愛男歌手: 陳奕迅 (無得傾, 一定係佢. 第二會係古巨基, 第三先係張敬軒)
2) 我最喜愛女歌手: 何韻詩 (無得揀! 楊小姐今年搞成咁, 同情分多於一切. 容小姐? 人民不會忘記佢果句: 乜你地唔係咁噓我嘛. 有如Y太果句: "信下我啦, 葉局長唔會呃人."一樣, 入晒腦, 點揀得落?
3) 我最喜愛組合: EO2 (都選左咁多年ILUB, 好悶. 反而EO2長睇長新鮮, 值得支持)

無殼蝸牛搵殼日誌(第一回大結局)

原本"無殼蝸牛搵殼日誌"係想講自從前晚收到業主話可能會收樓, 自己完全失控. 因為自己太唔想搬, 太舒適亦為個單位做過好多野, 太唔捨得. 以為可以要搞好多日, 點知一集就大結局.
我地前晚徹夜商量之後, 決定尋日大清早出去各地產代理睇下個市. 因為如果我地再唔行動而等業主真係出聲要收樓之時, 樓價一定翻兩番. 到時分分鐘想買都買唔起! 亦都好彩我地咁做, 否則都唔知樓市已經陷入瘋狂狀態. 一個單位分分鐘四五個客爭緊, 大家各都出高價搶, 間接推高個市價.
大清早我就開始響各大代理門外望下望下, 雖知佢地門外掛既價錢十個有九個流, 但都可以知大約有乜野盤可以揀. 但係一問經紀, 原來除左個價係流, 就連個盤都係流. 因為每有吉盤都即刻有人出黎承接....無論價錢係幾多.
經紀A話下晝四點先有樓睇, 咁我地咪行去另一間代理. 經紀B明顯係新人, 一句到尾: 乜都無. 只帶左我地去睇一個又黑又暗又細仲以為住響地底既樓盤. 仲要出企硬價一百九十萬!? 唔係嘛? 一味話我呢個價好難搵. 連留客既技巧都慳番, 算數! 搵番經紀A, 原來佢手頭上已經搵到五個樓盤. 可惜無一個係響自己屋苑, 只嘆樓價實在升得太貴太誇.
由老牌屋苑到新進夾屋, 有超實用既單位, 亦有非常失修既單位, 當然亦有十幾廿萬豪裝單位. 結果, 睇中左某個位於一直俾人唔睇好既屋苑內既單位. 六百五十呎有無敵超巨大廳, 房間四正. 而且上手業主一手買入後只住左三年(但個樓盤就丟空左五年先賣!), 裝修仍然好新淨. 不過單位望後面山景同公路, 行去地鐵站都要10分鐘唔似而家屋企樓下就係地鐵站.
結果用左三個鐘有講價無反價之下成交, 價錢仲係自己可以負擔之內, 有D不可思議! 無厘頭做左業主, 心情又興奮又傍徨. 因為我呢位置業初哥乜都唔識, 不停問經紀同業主好多硬膠問題, 自己諗番都笑.
好! 期待收樓之日.

記住投票呀!

請各位用自己良心, 去投選一位你自己認為有用既人. 唔好受各類歪理影響!

世界愛滋病日

今日係世界愛滋病日. 請各位關注!

遊戲時間

遊戲時間: 請估下以下圖片內既DVD我既購入價總值係幾多? 留意! 張愛玲傳一共有11隻DVD, 亂世佳人係終極四碟版! 全部DVD都係全新!A: $1-$100
B: $100- $150
C: $150-$250
D: $250-$400
E: 唔駛錢! 天跌落黎!

將會於留言欄開估.

唔通真係要搬?

一直以為呢件事會響下年先發生, 點知今晚收到業主email, 話因為近來樓價昇左好多, 想將單位放售.
一時之間俾佢打亂陣腳! 原以為佢會響明年加租, 點知原來直頭係放售. 今晚用左大半晚時間計按揭, 睇下自己負唔負擔到供層樓. 因為自己都好鍾意住響呢度, 實在唔想搬走. 希望可以繼續住響呢個屋苑.
下一步, 我會同業主傾下不如直接賣層樓俾我, 一來可以慳經紀佣金, 二來佢地都知道我係邊個, 議價都容易D. 而家只係諗緊搵邊間銀行同點申請按揭. 但係如果業主唔肯賣俾我, 咁我就要拿拿臨投入呢個市場搵樓. 否則遲早要瞓街.

荒謬影話: Zero Patience

1993年, 我第一次睇呢套戲. 正面既訊息再加上camp到震既歌舞場面, 不瑰係一套經典既同志片. 就算套片有幾好睇, 14年以黎我都唔知點解無收藏DVD或影帶. 14年後既今日, 今年同志影展無厘頭又重映. 今次帶埋B重溫呢套戲. 菲林滿佈花痕, 咁多年以黎都唔知去過幾多影展.

影片依然經典, 正面訊息同歌舞都令現今基片比下去.

點知放放下個畫面移晒位得番半個銀幕. 過左成兩分鐘都無人理. 直至我出去搵個職員佢地先去整, 佢地仲話: 呢D電影節得一個拷貝係咁架勒. 都 隔左成五分鐘先有人修正番個畫面. 完場後職員話因為佢地技術問題可以用今晚呢場票尾可以一個月內再去免費睇任何戲. 不過據我經驗, 呢間AMC公司講過既野通常唔算數, 今次真係聽住先.

乜鬼"聖誕"地獄

What the hell.....

舊年聖誕, 樓下個商場攞幾百萬搞乜野煙火聖誕樹, 個個周末都放幾場煙火表演. 但係商場又無諗到煙火, 除左有火仲有煙. 結果每次表演後, 成個商場煙霧迷漫, 成個鐘都唔散. 焗到有時經過商場番屋企都會咳到半死.

今年唔玩煙火玩大型道具, 係! 聖誕樹都無! 四叔又一另類經典. 今年玩"Fairy tales".

起初一條條羽毛物體放響地下.

一夜之間, 竟然變成棵樹! 仲要係紫色添! 遠望係有D似一棵茄子樹. 第二日, 又多左D軟雪榚物體, 仲有幾位仙子添!尋日再經過, 除左見到陳小春做Roadshow之外, 再望D擺設, 乜咁有Tim Burton既影子既? 係呀! 真係似"朱古力獎門人"D佈景. 花成千萬抄D咁既野賀聖誕. 真係只有香港人先諗到.

Kiss the Bride 去你的婚禮

去你的? how rude! 但變成去你的婚禮又變得平平淡淡. M先突然收到初戀情人R先生既結婚請帖, 另一半並唔係男人而係女兒家, 仲要係識既添! M先生唔理三七廿一即刻番去搶新郎. 有D似"My best friend's wedding", 但睇番導演係C. Jay Cox. 前作除左迷倒萬千基佬既Latter Days之外, 再前作係寫左"Sweet Home Alabama"(港譯:我要嫁得好)呢套戲. 咦? 乜同呢套又咁似既?
套戲意念唔差, 雖然係有少少老土. 但係太煩太白太多口水又太多flashback. 原本可以活潑有趣, 變得拖泥帶水. 甚至有真心搞爛gag既場面, 雖搏得少少笑聲, 但又同成套戲完全唔同tone.
Tori Spelling今次無甚表現, 點搶兩男角既戲都搶唔到, 有D可惜.
要響戲院睇播Beta既戲都算第一次, 對咁既安排有D失望.

官方網站

1973

Simona You're getting older The journey's been Etched on your skin Simona I guess I know this We seemed so strong We've been there and gone I will call you up everyday Saturday night And we both stayed out 'til the morning light And we sang, "Here we go again" And though time goes by I will always be In a club with you It was 1973 Singing "Here we go again" Simona Wish I was sober So I could see clearly now The rain has gone Simona I guess it's over My memory plays our tune The same old song I will call you up everyday Saturday night And we both stayed out 'til the morning light And we sang, "Here we go again"And though time goes by I will always be In a club with you It was 1973 Singing "Here we go again"I will call you up everyday Saturday night And we both stayed out 'til the morning light And we sang, "Here we go again"And though time goes by I will always be In a club with you It was 1973 Singing "Here we go again" I will call you up everyday Saturday night And we both stayed out 'til the morning light And we sang, "Here we go again"And though time goes by I will always be In a club with you It was 1973 Singing "Here we go again"And though time goes by I will always be In a club with you It was 1973

Thanksgiving

又到一年一度既感恩節. 當然唔關我呢個唐人事, 之但係B就非常興奮, 始終對佢黎講都係一個大節日. 往年佢會同佢D朋友去慶祝, 近年就想同我二人世界.

起初我以為會好難先搵到有餐廳有感恩節餐. 後尾發現尖沙咀某酒店既餐廳有供應感恩節食物, 而且都只不過二百幾蚊, 味道又唔錯. 對於我呢位從未試過感恩節餐既人黎講都算幾新鮮. 跟住前年發現F餐室都有感恩節餐供應, 仲平到二百蚊有找. B當然唔會錯過! 記得第一年只叫左一個餐兩個人share. 及後第二年就豪起黎各自叫一個餐, 結果份量太大食唔晒要打包番屋企就食多一餐. 我礼同B講: 下年都係叫一個算. 點知隔左一年又無左件事, 尋晚又試叫左兩個餐. 一上菜...

嘩! 雖則係肚餓, 但係咁大碟真係有D誇.

今年佢地既火雞做得好好, 唔似舊年既咁硬. 其他配菜都係一貫水準. 尤其是個汁, 真係好味道不得了.

估下以下係乜....

係南瓜批個批底... 自己對南瓜有偏見, 結果B自隊兩件南瓜批. 但飽到無朋友之下, 唯有齋食淨個批底.

Happy Thanksgiving!

如何適當地賣廣告

賣廣告, 通常廣告客户都希望自己個廣告能夠幾時都有人見到, 以收景大效果.

不過請睇下一個反面教材. 電視台響一艘郵輪上賣廣告. 可惜郵輪佔左一半時間響汒汒大海, 搵個人都難, 只得入城時可以接觸人群, 仲要好有限.

令我諗起本地某郵輪首航, 船外掛住一條細細既黃banner, 細到令人以為係"france wheel kung"入侵郵輪.

Sleepless in...

Hello, 我叫Tom漢斯... 我已經有四晚無瞓過. 宜家最希望係今晚有覺好瞓.

話說尋晚放左工就飛的入醫院做呢個睡眠測試. 未開始仲係牙斬斬, 點知一進入準備工作即時笑唔出. 原來係要滿面通身都黐滿感應器, 就連雙腳都要, 仲要用膠布黐住驚甩. 但一諗起朝早要除低毛腿上感應器, 一撕膠布果種撕裂感覺, 諗起都打冷震.

結果黐完感應器, 成個人好似無敵鐵金剛咁, 硬晒軚, 無得郁. 唔好話行企坐, 連瞓上床都有困難.

時間一到, 測試開始, 開頭仲可以入睡. 但一陣責醒, 跟住就無再瞓過. 接近眼光光到今朝六點幾, 護士叫醒, 測試完畢, 七點都未夠已經出院. 跟手落銅鑼灣食個早餐就番公司. 都未試過咁早番公司, 成層樓都無人, 咁就好勒! 即刻竄入休息室坐響架OSIM瞓下醒下咁又一日既開始.

真係希望今晚有得瞓.

Sorry, 其實我唔想做TOM漢斯...

瞓到斷氣

每年到呢個時候, 我都會"作病". 前年有胃液倒流, 至今都未有改善. 舊年就發生癌症驚魂. 自己嚇自乙. 今年? 超勁! 係睡眠窒息症! 我一直以為係肥人先會出現呢個症狀, 其實乜人都有可能發生.

話說自己一直唔知自己有大鼻鼾, 直到十幾年前, 我阿婆話我知其實我係好大鼻鼾. 但係我都係半信半疑. 直到遇上情人, 無論係一夜或都好多夜既, 先發現其實自己呢個問題係嚴重. 例如響英國時候, 有晚半夜扎醒, 發現瞓響旁邊既J唔見左. 以為佢落左樓下睇電視, 落到去但又唔見. 走到佢既studio先發現佢瞓響梳化, 亦都發現原來係我自己既鼻鼾太大令佢瞓唔到. 結果第二日即刻碌出城買盒透氣鼻貼, 以為可以有幫助. 奈何鼻貼太貴又無乜效, 鼻鼾未減但情已逝.

B會係史上最忍得我D鼻鼾既人. 而且佢亦有絕招! 佢話就係我既鼻鼾越黎越大聲, 佢一下如來神掌就將打側身推埋牆. 鼻鼾就會即刻靜止. 但佢都發覺我有時鼻鼾係會有幾下窒息既情況出現, 尤其近年比較嚴重. 講真就算我真係瞓足8個鐘, 第二朝我都好似無瞓過咁, 攰到無朋友. 仲周不時響office或巴士地鐵上自動進入熟睡狀態.

B曾經叫我睇專科, 但係我又唔知從何入手. 直到有日老細問起我做乜咁攰, 又同事傾起先發現呢個問題唔簡單. 所以病去淺中醫. 今晚我就會入院做一個睡眠檢查, 睇下我既情況有幾壞. 有同事講起其實就算做手術都未必斷尾, 反而用一種呼吸機就可以改善睡眠.

究竟結果係點, 一個星期後自有分曉.

六年

通常一上巴士唔夠三個站自己就會進入"熟睡"狀態. 我知我知, 呢個唔太正常, 我會另文解釋. 所以我好少會留意巴士上既野.

尋晚因為巳經係第三晚無訓, 所以上到巴士鬼打咁精神, 就係咁, 發現呢個錯左六年既告示. 心諗架巴士過去六年載過幾萬人次, 唔多唔少都應該有人見到卦. 無理由過去六年真係無人發現?

遊戲時間, 各位, 請響三秒內搵出錯處.

大鄉里出城之夜訪圓方

開左成個月, 唔係F小姐送出兩張戲飛, 真係好難會去到咁遠.

遠? 你實會話: 喂! 個商場響老尖隔離佐敦對出九龍站上面喎. 係, 真係"好似"好近, 但對於我呢D住新界以東既人黎講, 去呢個場真係有D隔涉. 搭地鐵要過兩次海或兜一個彎轉三次車先得. 正如尋晚套戲散場都要搭巴士出老尖再轉巴士番屋企, 而且加埋等轉車都係35分鐘, 快過地鐵.

其實個商場比我相像之中大, 而且令人行得好舒服. 不過實在太多名店, 唔多係我杯茶. 食肆亦較貴, 不過搵到間近戲院既賣亞洲菜, 價錢比較合理.

至於主要節目: 睇戲. 戲院係全新, 新到仲有好多地方仲係裝修緊. 例如通往廁所既樓梯同廁所所在既樓層仲係沙塵滚滚裝修緊.

呢間既仲標榜全球首間體感身歷聲效果既戲院. 即係除左前後左右有喇叭之外, 每張椅下面都會有個低音裝置. 如果睇動作片, 成張椅都會隨住音效去震動. 聽落去好似好正, 之但係原來少少bass都已經震到好誇, 誇到我D想笑. 而且尋晚睇既係劇情片, 只有幾場槍林彈雨. 反而戲前既30 Days of night既trailer就震到我彈起. 至於戲院環境都還可以, 大堂夠大, 影室都夠大. 而且影室內仲有燈光效果提示開場同正片開畫. 都係幾user friendly. 不過尋晚安永包場, 好多人好亂, D人直頭逐間院開大門睇. 入到院又傾計又打NDS. 搞到好似去左旺角咁. 雖則我都係唔駛錢入場, 但都睇唔過眼, 喪shhhhhhhhh班友.

講真商場我或者會去多次因為尋晚太夜所以未行晒個場, 至於間戲院就可免則免.

伸延閱讀: Elements (圓方) 直擊

Kylie Minogue - X

Kylie Minogue 又番黎勒!

病逾復出既第一隻大碟兩星期後就出版. 今次仲細分單CD版, CD+DVD版同USB版.

前排盧巧音都出過USB FM版, 平平無奇一盒. 你睇Kylie Minogue呢隻USB FM. 絕對會係collection item!

BBC Radio 1 Established 1967

1967年9月, BBC 既Radio 1正式開台.

經過40年, 經歷唔同既歌手音樂DJ節目. BBC Radio 1仍然係英國本土最重要既一個電台. 上兩個月, BBC為慶祝40週年紀念. 除左每日節目都有唔同既環節慶祝, 亦都出左一隻CD. 收錄左過去四十年唔同時代既名曲. 英國出晒名出雜錦碟出到出神入化, 但BBC明顯唔想呢隻又會係一隻普普通通既舊歌精選. 所以請左近年有名既歌星組合去翻唱老歌.

陣容都唔差架. 有Kylie, Amy Winehouse, Robbie Williams, Foo Fighters, Mika, Sugerbabes 同 Stereophonics. 佢地每個單位都用自己風格去翻唱舊歌.

呢張雙CD, 頭一隻主要係由1967唱到1986年, 第二隻就由1987唱到2006年. 一共四十首歌. 不過發現碟一入面既歌較為無被改到鬼馬伍陸, 只得Mika將Police既Can't Stand losing You變成Disco music又或者Gossip將Careless Whisper改左成激昂band sound較有新意. 反而碟二唱既近代歌就好玩到不得了. 好似有好鬼電子既姣男版Crazy For you.(娜姐聽到一定笑到收唔到聲) 仲有Tracy Chapman既經典名作"Fast Car", 就算重唱成點都係咁好聽.

40年音樂迫響呢兩隻CD係有D遺漏兼迫夾, 但將現代源素套入呢40年既名曲又有另一番感受.

後記: 次次同英國HMV訂CD, 次次寄黎唔係爆盒就係爛入面. 今次都唔例外, 而且今次仲係爛呢隻Super Jewel Box, 入面Disc 2一開個盒就自動飛出黎, 仲花埋添! 激死. 都唔知有無得配添!

招魂飯局與紋身黨

U Movies繼變型金剛後又一貢獻. 比"阿奴飯局"更好笑. 招魂飯局!



同場加映真心膠紅磡區區議員候選人秘製"紋身黨"政綱:

荒謬影話: Outing Riley 出衣櫃記

一年一度既同志影展又開始, 今年選片真係好奇怪: 一, 女同片佔多. 二, 大播舊片. 無新片咩? 又唔係喎. 睇番我過去一年介紹過既基片已經可以夠開個同志影展. 咁點解今年又搞成咁, 同選片及主辦單位封閉有關. 好彩我就唔係單夠呢個影展先可以睇基片, 否則真係錯失好多好戲.

就正如今次介紹呢套"Outing Riley". 2001年, Pete Jones贏左美林密斯舉辦既第一屆Project Greenlight. 就拍左套"Stolen Summer". 跟住2004年就拍左呢部"Outing Riley".

響呢部戲可以睇得出佢寫呢個劇本同其他come out基片唔同, 別出心裁. 將自傳式混入現實同超現實甚至同拍攝既工作人員有互相交流, 都呢套戲原本好簡單既故事變得完全唔沉悶.

其中對神父兄長對同性戀既睇法, 再加其餘兩兄弟對細佬係基既處理態度都有唔錯既落筆.

正期待Pete Jones下一部大型荷里活喜劇, 據聞劇本已落入Farrelly Brothers既手上.

飲得杯落

B成日話樓下個商場連Deli都無, 想件三文治都唔得. 當然樓下有齊幾間餅店, 之但係佢地D三文治有幾好食真係係人都知.

點知話口未完, 上星期老麥小食亭隔離圍起版上黎, 跟住仲貼上logo! 登登登等~ 就係開Pacific Coffee! 終於可以坐低嘆番杯, 或拎番屋企嘆.

不過...

1) 以星巴克死跟性格, 一定死跟到底. 咁就更加正囉.

2) 唔知老麥檔野會唔會被迫遷, 人地賣咖啡你賣雪榚, 都無抵觸卦.

NO UNAUTHORISED TRESPASSING??

乜原來"擅自闖入"係可以事先申請, 失敬失敬!

伸延閱讀: 渠務署英文告示牌錯漏多

不良主婦聯盟

無意中響BBC Entertainment發現呢套名叫"Suburban Shootout"既電視劇, 港譯:不良主婦聯盟. 負責BBC既本地翻譯次次用字都令人意想不到, 由Little Britain既港式食字到嚴肅到爆既Judge John Deed都次次大開眼界.

呢套電視劇簡直係Desperate Housewives加埋Sopranos一齊. 如果之前有睇過電影Hot Fuzz就更加有共鳴. 講兩班小鎮既家庭主婦, 一班為左小鎮用暴力除暴安良, 另一班就為私幫生意打家劫舍. 結果兩班主婦經常有衝突, 但佢地唔係用飯餸互相攻擊, 而係真係用真槍同暴力對付對方. 最過癮之處係其中一位主婦係小鎮既警長, 成日以個鎮零罪案自豪. 但佢唔知自己老婆一直同人打生打死. 例如有場老婆響公園用槍教訓兩個破壞公物既後生仔, 點知咁岩警長老公帶住班來自世界各地警察代表行過. 老婆見狀唯有即刻收埋枝槍話教緊後生仔急救. 荒謬度十足. 而家逢星期五晚播出第二季, (英國都係九月先開始播第二季! 非常新鮮!) 可惜亞洲區尺度有限, 明顯係已經cut左粗口同部份暴力場面.

近日見到BBC Entertainment開始播放一D唔係BBC既製作. 例如有黎自Channel 4既節目, 亦好似呢套劇咁係來自Channel Five. 好期待有更多Channel 4既製作出現.

官方網站 (有preview)