2007年7月19日

夠與絕

作為新聞人物, 俾人追訪確係無可厚非. 但作為"正统"新聞工作者, 都要衡量輕重. 今日兩張報章"星島""東方"又再做兄弟, A1版變做G1版, 過氣人物Coco大爆名人性史. 更揚言: "所以當風聲無咁緊, 我一定會再返香港, 目標就係做全港最紅媽媽生!" 好大既口氣啊!!! 明知會觸犯法例都要做! 更勁既係記者原文照錄無再作平衡, 話俾人知雙程證來港工作係犯法.
既然俾呢兩份報紙捧左佢做一個星期新聞女皇我覺得已經足夠. 佢又唔係三頭六臂, 只係一位令到處長下台既北姑. 有乜野講, 一個星期七日乜都講晒啦. 仲有乜野可以吸引讀者呢? 其中星島尤其熱心, 簡直日日追擊. 作為一份入得學校同屋企既報紙, 日日都有段咁既新聞, D小朋友會唔會問阿媽: 點解呢個姨姨日日都著咁少布既? 佢D手手腳腳係咪有問題, 可以咁扭曲既?
而且今次佢好高調擺明我會再犯案, 尤如對法律示威. 當局會唔會或應唔應該介入呢件事去調查呢? A1係用黎報導重大新聞, 一位北姑雄霸A1幾日並發佈錯誤訊息同嘔電pose既艷照, 完全係代表本地新聞界既水準破產. 當然我對呢兩份報紙早已放棄, 佢地D虛偽作風, 聞者作嘔.

夠就夠! 但都唔夠呢個絕.
亞視有新老板後終於有所動作! 今個星期六無線有香港小姐競選. 亞視往年都會製作一個大show或其他選舉去對撼. 但今年用最平方法去對撼: 播電影! 播一套由邵氏製作周星馳主演既港產片"回魂夜". 呢套戲較早前先至重出修復版DVD. 有趣係今次亞視竟然用一套邵氏電影對撼同樣係邵氏旗下既無線. 相當諷刺! 今次應該可以吸引大班年青觀眾去睇亞視. 一來套戲已經好多年無響"免費"電視頻道上播, 一定吸引班"星迷"重溫, 二來港姐一年比一年吸引力下降, 今年甚至完全無noise, 點吸引D觀眾去睇呢? 亞視今回用對台既彈藥打番對台, 成本同回報絕對成正比! 絕頂聰明.

3 則留言:

aulina 說...

呢排冇乜心機睇電視,俾你一提,我又突然好想睇回魂夜!

講開,星爺呢批戲講講下冇二十都十幾年,我兩件細嘅只識少林足球同功夫,但係舊片爛到好似百變星君都笑得好開心。港產片魔力真係難以解釋。

mysimplelife 說...

但呢套對於你兩位公子黎講就實在太深同太暴力.
我撐港片~

aulina 說...

執屋裝修要掉玩具,細果個同我講:「媽咪,你留返d暴力玩具過我得架喇,其他d可以揼...」

家長指引下睇ok嘅,佢地頂唔住會自閃。:)