2007年7月21日

變態書展2007

記得上屆我仲話書展好變態, 咁尋晚諗住可以避開周末人羣同哈利迷, 所以揀響星期五晚入場. 點知人一樣咁多, 今年大會將人龍移入會展入面排隊但不幸外面人龍依舊, 確係好心做壞事. 但好彩我地老早響便利店買定飛, 可以避開羅湖式蛇餅人龍.
今年會場賣既野終於back to basic, 主要係書為主, 賣精品文具反而好零丁. 但似乎参展出版商既數量係少左, 但攤位就好幾倍. 往年好熱閙既尚書房, 可能簡體書熱潮冷卻兼人仔升左, 今年攤位迷你左兼再無搶書情況出現.
但係始終人太多, 根本無機會埋去睇本書. 就算有機會入到攤位, 但攤位入面太迫, 都會俾人迫黎迫去, 根本無可能認真去睇本書. 雖然係咁, 我地響短短四個鐘入面買左十零本書同碟. 由散文小說文學研究到狗仔旅行書再到字典同影集. 收鑊唔錯.
上屆就話有兩大類型奇人, 今年就唔覺有. 就算"書喼黨", 往年佢地唔碌爆你隻腳唔罷休, 今年我都係被碌一次, 未至於爆. 就連佛教攤位都無再點壇香, 似乎今年大家禮貌上都有改善, 可喜可賀.
不過始終頂唔順大會既排隊安排, 完全錯晒, 令人行左好多寃枉路亦令人龍塞佳. 再者唔該下次搵個識講"純正"廣東話既"食蕉"嗌咪, 因為我地真係聽唔明佢不斷重覆果句: 茅飛含休邊, 休飛含jor邊.

3 則留言:

Guy 說...

自從有漫畫賣的第一年迫餐懵後,年年都買定門票的說,除了前幾年去夜場被迫在會場買門票外…

去年還是前年星期六夜晚是免費的,基本上那個時段去只是去迫,完全不能買書,由鷹君中心迫到會展再迫出來,免費迫人兩小時...

Agnes 說...

我同同學係kubrick攤位俾一個自由行喼神當我地係店員, 先係揶揄冇乜特別, 之後竟然命令我地俾d notebook佢過目. 頂.....

aulina 說...

怕人怕迫,花市意頭嘢都唔行,書展真係咪攪我。