生活炒雜碎 (第二回)

唔知係身體唔好, 定抑或真係老左(就快又大一歲~ 唉!), 呢個星期放工後一番到屋企食完飯洗完碗, 同B排排坐睇電視, 唔駛15分鐘就自動訓著. 仲要係扯晒鼻鼾果隻, 次次都要B半拉半扯推我上床訓. 好訓係好事, 但好訓成咁又會唔會係有病呢? 而家真正酣睡八小時, 無多無少.

#####################################

前兩日, 同事A提議落筲箕灣食晏, 一呼百應下包左半架小巴落去. 今次唔係幫襯"安利", 係幫襯另一間都算出名既麵檔"王林記". 佢地出名又係切腩同手打魚蛋. 我就叫左"魚片頭切腩撈粗".

一上枱, 一碟深啡色粗麵加幾塊切腩再加一碗魚湯片頭. 賣相一般, 味道都係一般. 隔離"安利"反而仲好少少. 另同事再叫左碟"豬手", 呢個真係全日highlight! 好味道到飛起~ 相都影唔切就挾晒!
間野超多人等位, 坐得超迫. 飯市可能要久候. 心諗附近有兩大報社:成報+星島, 一定有夜市做, 點知原來夜晚收八點, 無得宵夜!
點去? 地鐵筲箕灣站東大街出口出左轉行兩分鐘. 安利斜對面.