2008年6月15日

父親節@泉章居

上回去果間"客家菜"難食不堪, 今回父親節一時諗唔起去醉瓊樓, 反而衝口而出話去泉章居, 直至訂左檯幾日後先諗起, 太遲了.
好耐無再幫襯過泉章居, 至少都有十年! 仲記得上次係一大班人上去食飯, 今日仲有聯絡好似得番一個. 今次再幫襯已經響新址, 裝修實而不華, 仲有近年興起既"中菜卡位', 講真咁既設計真係無腦, 皆因夾餸係極之唔方便.
因為自己早到, 所以走去攞檯先. 去到話: 王小姐五位. 知客阿姐帶左我去長檯, 長檯? 似乎圓檯坐滿唯有硬食. 坐左一陣都唔見其他人出現, 唯有SMS各人通知我已到. 一陣阿妹問我去左邊? 我話我坐近窗口, 點知佢又話佢亦都攞左檯開埋茶又係近窗口. 吓? 原來我地兩人各攞左一張檯一張南一張北, 知客阿姐無劃到個紀錄, 細妹後尾到又被帶到另一張檯, 好彩早發現, 否則成家人到時一人霸一檯!
記得以前泉章居係出名既基佬飯堂, 上次去真係有好幾圍基縱處處熊風再現, 今次新址就絕跡晒, 可能大家都去晒翠華卦?
父母到齊就點菜, 都係果幾味: 盬焗雞: 有雞味, 唔似出面夾硬既沙薑雞, 好味. 炸大腸: 似係"預製"事後翻叮(炸), 脆但味道麻麻. 蒸大鱔: 唔食魚, 唔知. 蟹肉扒豆腐: 好好味, 個獻太杰, 豆腐炸過再配蟹肉不俗. 海皇湯: 味道不俗足料. 事後糖水: 馬蹄露, 同個湯八成似, 幾得人驚!
同樣四百幾蚊(上次係四百到尾添, 今次平D), 但味道可以相差咁遠, 大酒樓始終係有個譜!

6 則留言:

aulina 說...

乜原來酒樓都有分孿直???

mysimplelife 說...

呢個我都係靠朋友解釋先至知...

grace 說...

泉章居未搬前簡直係我地一眾八婆既飯堂.貪佢就腳兼唔貴.
我睇"突然獨身"先知個度係基佬飯堂,好幾次係個度見到NELNEL同佢班FD.

但搬左之後就去過一次咁大把.排長龍搭LIFT先上到去,地方又細左,麻麻煩煩都費時去.

Agnes Tse 艾麗絲謝 說...

咁我既至愛TST功德林係咪佛門清靜地呢? xp

mysimplelife 說...

功德林絕對係佛門清靜地.
近來我都想去因為有女性朋友食素但又唔想去普通酒樓... 唯有一班人就佢一個.

Agnes Tse 艾麗絲謝 說...

安兄, 推薦功德林擔擔麵, 加一碗白飯送湯汁, 包你回味無窮.