終於睇左, 白頭神探同後期Scary Movie原班人馬玩得最公整最癲既一次. 笑料真係不停兼且好賤. 主線雖然重玩Spiderman第一集, 但入面玩X-Men同神奇四俠最好笑. 再者入面完全係玩真人, 用晒真名玩名人, 其中一段我估今次一定可以入到大陸, 北京仲點名支持添!
不過可能套戲太短, 所以片尾有大量deleted scene回贈, 一樣笑到hihi...
今次換左導演, 改善左David Zucker果隻佢笑你唔笑既現象, 比Scary Movie 4有進步.
自從陳奕迅入主新藝寶, 呢位陳二號就離開新藝寶加入東亞, 但繼承鄭小姐傳统加入多年都無所出. 但今個月失驚無神整隻EP出黎, 五隻新歌兩首remix夾硬凑成Maxi EP.
"神啊!求求讓我睡"一貫劉氏既慢歌, 一樣易上口式K歌, 跟住冷不防又黎另一隻K歌"火花不等人", 一樣K到不得了. "大花面"歌詞可取但旋律失色. "射程範圍"驚見John Laudon既名字(土佬Johnny呀!!), 作為電影主題曲完全合格, 沖滿80年代色彩. (至於套戲幾時可以解禁真係不得而知.) "洗澡"相信係成隻碟最舒服既一首, 由曲到詞都似一邊冲涼一邊聽既歌一樣.
成隻碟相當平均, 甚至可以話接近一條線平滑到不得了. 比佢以前幾張碟確有下滑現象, 希望佢唔好再浪費佢既才能.
(50/100)
尋晚食飯時見到以下場面:
隔離檯一家五口, 細女大約六七歲左右. 佢面前有一整碟集百家大成既菜餚, 媽咪負責餵呢位小女孩, 但似乎小女孩對自己果碟滿滿都係唔滿意, 仍然我要呢個呢個呢個, 但阿媽餵佢時又唔肯食呢個呢個呢個又嫌三嫌四. 席間兄姊建議叫冰類, 小女孩都話要叫杯紅豆冰. 阿媽發火對小女孩話都未食完自己果碟野無得嗌. 小女孩當然耍嬌, 扭住身體響阿媽身上面上亂拍. 可能見阿媽毫無反應, 轉而響老豆下手. 老豆都以為小女孩只係撒嬌, 移塊面向前. 點知冷不防小女孩一巴打落老豆塊面! 老豆起初有D茫然跟住見我望住佢地, 佢就開始不發一言怒啤小女孩. 只見小女孩低頭一樣不發一言, 阿媽出聲: 哦, 你仲唔道歉? 小女孩一直唔郁. 跟住一家四口繼續你有你講, 小女孩繼續唔郁....直至席間有人提議食雪榚, 小女孩好似啱啱充完電咁即刻附和. 阿媽就話: 你仲食唔食你D野架 ? 小女孩: 我要食雪榚. 阿媽: 咁你仲唔道歉? 小女孩: 我唔會睬佢. 老豆終於出聲(好嚴厲): 你記住你講過咩野. 不久呢家人就埋單走, 兩父女一直無對話.
換轉係以前, 呢位小女孩可能一早俾佢老豆打到失聲. 而家既父母太寵壞細路, 又怕俾人告虐兒, 但又唔知點教頑童. 就用以上例子, 小女孩打父母可能唔止第一次, 父母無喝止又無教導, 就連一句: 打老豆老母小心俾雷劈既說話都無, 令小女孩以為打父母大不了. 港女就是這樣煉成的!
久而久之, 下一代就唔會再有"尊敬"兩個字在心中, 父母會演變成人肉ATM, 又可以提款又可以用黎出氣.
話說上周末渡假完畢番到屋企驚見對面座既某吉單位多左好多張碌架床, 多到連客廳都有. 跟住夜晚個單位著晒燈見好多女人執行李.
心諗除左以前公屋因為面積細要將碌架牀放出廳之外,真係諗唔明大單位三間房都係有碌架牀就連廳都有.似籠屋賓館多過似屋企.可能d隔離鄰舍見到疑似賓館格局先去管理處投訴.
跟手有晚管理處貼出通告話屋苑單位只可作住宅用途不得用作賓館或商業用途, 奇在管理處老早知呢件事但又只係出一張通告就算.
事件俾我響屋苑討論區講出黎, 人人都好嬲. 有住戶甚至通知記者追訪, 可惜大部份業主只關心呢件事會影響樓價, 只得我會係關心呢件事可能影響到家人安全.
全民皆見錢開眼, 可悲.
完結黃金海岸週末, 再俾B另一個驚喜.
當日搭酒店巴士直出尖沙咀, 表面話出老尖食Burger King, 實則行到上商場, 佢一見個招牌, 立即笑左出黎. 鼎泰豐係B最愛既餐館, 當間餐館仲響黃埔就算其他人都話難食, 佢依然話好食. 今次真正正牌鼎泰豐重生, 當然帶佢一試.
地方靚左, 星期日兩點都唔駛等位掂行掂過. 價錢貴左, 服務依然麻麻, 份量亦好似細左. 不過味道比之前受權店好味好多.
相信我地一定再去.
B既生日月, 又收禮物又食飯當然唔少得渡周末啦. 上年去黃金酒岸酒店, 今年原訂去佢另一個"飛佛": 銀鑛灣酒店. 但係之前天災令我怕上唔到大佛又落唔到大澳. 唯有重回黃金海岸酒店!
吸取上次教訓, 今次訂房時我已再三叮囑酒店唔想再入住酒吧上面既房間. 訂房部小姐都承諾我地房間會響酒店另一邊.
B當然極期待呢個假期, 話晒呢間係至愛既渡假聖地. 直到我地入到房, 我係有D失望. 訂房時酒店已經通知因為我地要求較高樓層所以係唔會有露台, 呢個我都接受, 只係宜家唔多接收無露台既房間係比有露台既房間更細. 但當我地攤上張King Size Bed既時候, 我發現近牀頭有度門, 我以為係通去隔離房, 但係門又無鎖, 一打開我真係嘩左一聲. 因為我地有個大到無輪既私家平台, 而且我地係住頂樓, 特別開揚. 比住響二三樓露台房更正.
跟住B話要去沙灘游水, 跟住去到沙灘佢又話D水好污糟, 結果變成兩傻行沙灘.
呢度酒店既自助餐一向抵食, 當然唔好錯過, 今次更坐近泳池邊, 夜晚陣陣清風, 舒服到不得了. 而且價錢仲好平, "痕身"信用咭七折只係每位兩百七(已加一). 食物以量取勝, 極多款式味道都唔錯.
最重要原來酒店間酒吧今日結業, 相信以後就算住二三樓都可以有覺好瞓. 不過我會寧願住頂樓, 至少有個咁正既平台!
開畫前自製新聞多多, 結果負負都係得負. 開畫日得四萬一, 連周末都被院商cut院減少放映場數. 再加上連媒介都劣評如潮, 今次仲唔玩完? 拍得唔好唔係死因, 只係用錯人兼處處死口唔認先係主要死因. 就連響高登有"疑似"雲先生"喪hard sell套戲話睇到想喊, 跟住有人quote我篇blog文串番佢.
算啦, 只不過係個衣櫃基想拍套基片但又唔肯認係為睇肉而體育既基片. 睇吓佢下一套港版斷背山又會唔會死口唔認係基片.
當世上「梁宇聰」處處
http://life.mingpao.com/cfm/dailynews3.cfm?File=20080622/nclvx001/vx001b.txt
文章日期：2008年6月22日
【明報專訊】從未試過看完一部電影後如此氣憤地離開。
電影《無野之城》男主角梁宇聰（戲中稱「阿聰 」）早前在一個電台節目作出一些恐同言論，嚴重開罪了同志們，因而引致網上許多人發起罷看這電影。基於以同性戀作題材的港產片比較少有，加上《無野之城》 在同志圈內外都惹來不少劣評，於是好奇地想看看那是什麼一回事，亦希望趁機親自了解一下有關梁宇聰言談的討論是否如電影宣傳公關所說是「一場誤會」，所以 我應邀出席首映禮。
導演在放映前開門見山直認電影「拍得唔好」，亦坦言大部分主角都並非專業演員。電影我不會評論，新進演員在戲中表現欠佳也可理解，但演員在現實生活中的多番粗暴言論卻不可原諒。
少數歧視少數
如電影的英文官方網站所說，在一個棒球文化小得幾乎不存在的城市，香港棒球員正正是選擇了成為社會中的少數 （minority）；反觀同性戀者、外表不具吸引力的女性，卻是並非自決的少數。棒球員梁宇聰身為某種少數族群分子之一，卻竟在電台揚言若有同性或「豬 排」愛上了他，必會遭他揍上一頓！
電影取材於香港棒球隊的真實事舻，梁戲中角色阿聰的恐同程度湊巧 地不比他真人遜色。隊友阿俊只在言語間向他表達愛意，竟被他罵作「變態」！我輕聲的跟身旁的友人說：「人家將心中感受告訴你，用得著罵人變態嗎？」只不過 是給電影中的角色作出評論而已，怎料梁宇聰竟突然轉身對坐在後一排的我們大聲呼喊：「吹呀？！」驚訝、憤怒的我完全作不出任何反應，他卻恍似害怕我們沒聽 清楚，再度轉個身來喝問一次：「吹呀？！」於是心神稍定的我反問稱呼別人為「豬排」的他，是否認為自己長得很帥？於此，他立時無言以對。
梁宇聰@首映：「吹呀？！」
一個演技奇差、外表毫不吸引的新進演員態度竟然如此囂張，不理會社會邊緣少數人士的感受，更一點都不懂得尊重別人，請問梁每天對覑鏡子時，會否都揍它一頓？
因這樣的一個人而杯葛這電影，也許對其他演員及製作者不公平。但梁一日繼續厚覑臉皮地再三直認自己的確恐同而不肯向被他肆意侮辱的人們道歉，他的同事若不 公開否定他的言行，還跟他在戲院同坐一排，就是容忍覑一些不可容忍的粗暴言行，默許及助長一個恐同、暴力及充滿歧視的社會。今年初，美國一名十五歲男孩就 因對同性友人示愛而被對方槍殺——我們談的是人命！我們也不願意活在一個充斥覑暴力社會吧？
阿俊對阿聰示愛的部分佔不到五分鐘，阿俊被對方罵得傷心落淚，沒有搞笑情節卻引來絕大部分觀眾笑足五分鐘，笑聲就比觀看笑片也來得響亮，「嘩！」、「唔係 呀？」等評語此起彼落；假若安祖蓮娜祖莉向畢彼特表白愛意，大家的反應定會不一樣吧？示愛，難道是異性戀的俊男美女之特權？突然發現世上其實有不少的「梁 宇聰」，真替非異性戀者及樣貌不出眾的女士們擔心。且只要比燈柱稍胖一點，便有可能在這個街上貼滿纖體廣告的城市被稱為「豬排」。
野球即棒球。老實說，跟戲中提及的多數港人一般，我對棒球沒多少認識，香港是否一個無野之城對我影響可能不大，但我深信，一個沒有這些「梁宇聰」的香港，會是一個更和諧美好的城市。
[文＼陳巧文]
便利店有兩樣野好可怕: 膠袋同紙巾. 膠袋都話可以Say No, 紙巾你拒絕又怕轉個頭有需要, 但一拎上手就發現原來都幾多餘. 結果番到公司就發現十幾包紙巾放響檯面, 雖然已叫同事"有需要"就過黎拎包去用, 但係總起拎唔晒. 好彩我唔係揸貨車, 否則擋風玻璃前唔係幾十包萬寶路, 而係幾十包OK便利店紙巾.
(呵呵~當大家睇到呢篇野既時候, 我地已經去左某地"梳芙". 番黎先報告)
唐英年先生響立法會入面講緊漢普頓酒店事件時, 竟用上"果班友"去形容呢批不幸既旅客.
過門都係客, 人地黎到住酒店仲要被迫遷流落社區中心. 而家表面真心補鑊但內裡極之粗鄙地用"果班友"去代表苦主.
我諗香港個形像真係完全玩完. 呢鑊仲唔"香港始終有你"!
1.隆胸兩邊隆哂要一萬，但隆一邊只需三千，估一四字成語
Ans：一波三折
2.話說有架飛機比人騎劫，d乘客會對劫機者講d咩呢？估一手機品牌
Ans：Nokia（落機呀∼）
3.補時贏波，估一汽車品牌
Ans：保時捷
4.話說有間名牌鋪頭一折大減價，有個女人走左入去掃貨，但佢買完出黎之後就死左
佢究竟點死？
Ans：抵死
5.點解BB唔識笑？
Ans：因為可以笑的話，不會哭
6.拉乜野可以學到野？
Ans：Library
7.鍵盤入面邊個掣最靚仔？
Ans：F4
8.Ｌ訓低左會變成咩？
Ans：Aeroplane（L平）
9.咩毛最普通？
Ans：Normal
10.點解晌船上唔可以講笑話？
Ans：因為個海聽到會笑，咁就會引起海潚
11.小明自己做暑期作業，第二日，佢死左，點解？
Ans：因為自作業，不可 活
12.天空之城，估香港一地方名
Ans：堅尼（離）地城
13.麥當勞叔叔個頭，估一國家名
Ans：緬甸（免電）
14.邊兩個英文字母最難教？
Ans：C、E，因為EC難教
15.學生最怕乜野魚？
Ans：東星班（Don’t升班）
16.乜野豬得一隻腳？
Ans：珍寶珠
17.魚無腳，蟹無翼，咁蝦無咩？
Ans：太郎
18.魚蛋粉入面有魚蛋，咩粉入面有雪糕？
Ans：Seven
19.有乜野唔可以擺入雪櫃？
Ans：秘密，因為不能說的秘密
20.承上題，邊個電視藝人唔梳得頭？
Ans：朱咪咪，因為不能梳的咪咪（不能說的秘密同普通話讀）
21.菠蘿係黃色，咁咩蘿係綠色？
Ans：Keroro
22.麥兜自己沖涼，估一近代文學作家名
Ans：朱自清
23.英文有廿六個英文字母，當E同T走左之後，會剩低幾多個英文字母？
Ans：21個，因為ET搭UFO走左
24.恐怖分子下面係乜野？
Ans：恐怖分母
25.承上題，咁中間係乜野？
Ans：恐怖分線
26.足球姓祝，籃球姓藍，咁柔道姓咩？
Ans：姓誕，因為又到聖誕，又到聖誕∼
27.大口仔搽紅唇膏，估一英文生字
Ans：Direction（大red唇）
28.六減二幾時等於零？
Ans：做六gei手勢果時
29.有怪獸入侵地球，我地應該點做？
Ans：唱進行曲（超人的主題曲歌詞：這進行曲，一高奏，妖怪便逃走∼）
30.恭喜發財，估一國家名
Ans：比利時（比利是）
31.NDS同PSP對打，邊個會贏？
Ans：NDS，因為NDS係屈機（摺機）的
32.點解撩耳仔會好開心呢？
Ans：因為Happy New Year∼
33.冬甩個爸爸係邊個？
Ans：多啦A夢（片尾曲：冬甩個爸爸，冬甩個爸爸，多啦A夢）
34.晌多啦A夢入面，邊個人大個左會做醫生？
Ans：小夫
35.晌多啦A夢入面，老師病左會傳染比邊個？
Ans：大雄，因為野比大雄
36.承上題，佢最先傳染比邊個？（唔係多啦A夢人物）
Ans：小新，因為野原新之助
37.多啦A夢姓咩？
Ans：吳（片頭曲：多啦A夢唔∼）
38.點解多啦A夢成日話睇唔到野？
Ans：因為佢伸手不見五指
39.點解呢個世界上有東京、南京、北京但無西京？
Ans：因為西經比唐三藏拎左
40.Hello Kitty見到Dear Daniel塊面上有個交叉，點解Kitty會打Daniel一巴？
Ans：因為個交叉係Miffy個口
41.地球爆左, 咁要走去邊度？
Ans：地球gei右邊
42.咩動物識打桌球？
Ans：鷹，因為鷹識桌球
43.九加四幾時等於一？
Ans：睇時針吧
44.一個中文字，分起來會很爽，合起來會很痛，猜動詞（18+）
Ans：咬
45.廣東出冬瓜，廣南出南瓜，廣西出西瓜，咁廣北會出咩？
Ans：出聲，因為講不（廣北）出聲
46.咩生果唔打字？
Ans：蕉，因為不打字蕉
47.有咩老鼠得兩隻腳？
Ans：米奇老鼠
48.承上題，有咩鴨得兩隻腳？
Ans：所有鴨（包括唐老鴨）
49.如何用三盞燈同一張凳營造一個緊張氣氛？
Ans：燈燈燈凳
50.柴、米、油、鹽，有邊樣唔係八十年代gei產品？
Ans：油，因為油不是八十年代∼
51.夫差係吳國人，西施係越國人，咁勾踐係咩人？
Ans：劉松仁
52.麵包A、B、C、D，邊 個包係苦？
Ans：C，因為麵包師傅（C苦）
53.一加一幾時會等於三？
Ans：錯果時
54.晌咩時候零會大過二，二又會大過五？
Ans：猜包剪鎚果時
55.咩動物會撕爛條鰻魚？
Ans：蛇，因為佘斯曼（蛇撕鰻）
56.小明比大明養，咁大明比邊個養？
Ans：狗，因為久仰大名（狗養大明）
57.益力多係咩味架？
Ans：你今日飲左未
58.李雲迪最憎咩理髮產品？
Ans：美源髮彩，因為美源髮彩，冇得「彈」
59.阿明同阿珊去打劫銀行，但事敗逃亡
但d警察追捕果時唔追阿明，淨係死追阿珊,點解呢?
Ans：因為喜瑪拉雅山（起碼拉阿珊）
60.達文西密碼上面係咩？
Ans：達文西帳號
如果唔係公司附近間"貨倉"賣晒呢隻碟, 都唔會遲好幾日先聽到呢隻碟.
上回X&Y. Coldplay係迷失左方向, 跟住Chris結婚生仔, 我以為Coldplay就咁玩完. 等待多年, 終於有新歌出現, 初聽唔入耳, 就算多聽一兩次都係搵唔到熱捧既理由. 直到隻碟拎上手放入電腦播(書房無位放任何音響設備), 由頭到尾播一次, 無感覺!
唔甘心, 過左半個鐘後再播一次. 開始掌握到歌詞入面既氣味, 確實Coldplay今次有野心破格. 見credit出現Brian Eno已經暗話: 駛唔駛呀?
由Life in Technicolor做引子, Cemeteries of London開始抑揚歌聲, Lost!果種新浪漫, 42跟Coldplay之前既作品好唔似, 以往總有人話佢地上兩張碟不停重覆自已, 呢首42反而有種新生感覺. Lovers in Japan/Reign of Love係碟中我最喜歡既歌, 初聽真係以為係U2作品, 但Chris既歌聲再加上極吸引既編曲令到隻歌加分不少. Yes會係呢隻碟另一加分既歌曲, 歌詞都幾到肉, 雖未及前作Fix You驚天動地但都相差不遠. 主打歌Viva La Vida太典型Coldplay歌曲, 雖則歌詞政治化, 但似乎跟編曲配合唔到. Violet Hill有Susde既影子, 真係唔係講笑, skip都skip唔切. Strawberry swing好舒服, 尤其之前果首難聽到死, 份外覺得呢首好聽. Death and All His friends 終於回到Coldplay影子下, 佢地所有拿手都出齊, 作為完結份外完滿.
今次Coldplay突破舊日框框, 亦都成熟左少少(??). 作為Coldplay跟隨者, 好開心佢地終於一洗之前少少打喊露既疲態, 再次令到Fans喝采.
話說部"唉卜拮豬"一買番黎就有呢個毛病:每次入歌多過一首就出現error message話部唉卜拮豬無同部電腦連線. 所以我一直都係逐首歌同步, 不過試過入套戲入去亦都出現錯誤信息. 結果尋晚頂唔順, 諗住重置部機可以解決問題. 雖則機內所有歌同戲都會無晒, 但總好過次次出error message.
重置過程一直好順利, 但到最後一刻竟然又係另一個error message: 1604- 重置失敗. 成部機死左! 我曾經嘗試重覆幾次都係失敗, 心諗都係預左拎上CASE換機.
但心有不甘咪上網諗住問人, 谷歌一番後竟發現呢個錯誤非常常見, 可能係USB引起. 再上Apple官網, 佢地竟有幾個解決方法, 基本上都幾硬膠, 例如重裝i-Tune, 或用第二部電腦重裝, 又或重新啟動電腦去重置唉卜拮豬, 結果我揀最後者. 得左! 重置成功! 但當同步歌曲時老毛病又黎! 唉! 三百幾隻歌又要逐隻入過, 想死.
唔服輸, 將套戲save落USB手指帶番公司, 用公司部電腦過套戲落唉卜拮豬. 竟然得左! 真係無言!
今日響網上先發現佢又發作...
遇上佢既病發都已經唔係第一次, 只不過一次比一次凶夾狠. 似乎佢係知道自己既毛病, 只不過佢自已無能力控制自己. 曾經我都覺得真係好可惜, 不過直到發現佢自己沉迷信仰到走火入魔, 先知道原來一切都係自己攞黎.
記得第一次領教佢既"威力"係源自多年前佢組班搞雜誌, 我同Gabriel都加入. 一班人開左幾次會都係無乜實質結果, 只係暫時决定由真書變成網上雜誌. 當然佢係老細, 唔多唔少都要俾幾分薄面佢, 但大家都各有要求同意見, 每每我地都有ban佢D橋, 佢開始變得無乜耐性. 記得最後一次開會, 一開始我同另一位成員都覺得佢一個意見不切實際. 唔知係咪壓抑太耐, 佢既怒火一下子爆發! 在場每一位無一倖免. 跟住呢次怒火甚至延續到網上, 所有成員就連佢既朋友都人人有份. 直至有日佢打電話俾我繼續鬧, 我當然不作反抗, 因為知道一反抗佢只會受到更毒辣既咒罵. 鬧到無氣, 佢突然同我講: 不如將"XXX"成個俾晒你. 我只吓左一聲, 佢繼續: 乜你唔係恨左好耐咩? 講真, 我真係無意思接手, 同唔識搞雜誌, 我加入只係想做寫手玩吓. 況且我接手後, 之前有興趣加入既人都俾佢鬧走晒, 都無人敢幫手. 佢離開加我接手後, 好彩之前俾佢鬧既成員有部份都願意或有條件下留低幫手. 果個網上雜誌都可以響甩皮甩骨下生存左一年有多.
後來佢淡出網上, 原來去左某本地影音雜誌工作兼到台灣出書做作家. 當大家以為一切已成過去, 突然佢又回塘不停攻擊另一位網上作者, 原因就不便多講, 但佢再次響網上爆發, 連一直無出聲既Gabriel都變成攻擊目標俾人翻舊賬. 當然又係鬧完後又人間蒸發, 今次轉戰blog界, 一人開十幾個blog, 又出版第二本書. 大家以為佢終於康復, 點知最近既狂迷事件及沉溺宗教又令到佢再度發作, 好彩既係佢已經將我地一班遠古時代被佢攻擊過人遺忘, 無再將我地再掛響佢口邊. 可惜既係就算我地幾想接受有精神心理缺撼既人, 但一次發作, 永遠會段送我地俾佢地既關懷.
一年一度既六月, 每年都要花盡心思去搞D野, 只係為左B既生日.
記得幾個月前行玩具反斗城, B竟然鍾意呢隻SpongeBob, 再睇埋呢套卡通, (佢平日唔睇卡通, 就算佢同佢個女果時都唔鍾意睇卡通)佢更加迷上呢隻野, 仲有時扮佢講野. 結果我決定今年佢既生日禮物就係呢隻SpongBob公仔. 唉, 係鍾意埋呢隻又哨牙又古怪既公仔.
禮物係唔夠, 生日總係要出去食餐飯. 原本想去番假日酒店, 但原來裝修中, 唯有改去第二間. 突然諗起玲玲師傅近期推介既富豪酒店自助餐, 我都有成十年無幫襯過, 所以決定再試.
款式同味道比以前好好多, 單係個"蟹山", 後面張檯果兩個男人完全係主攻呢座山, 絕對回本. 298呢個價錢算做真係無投訴.
又有禮物收又食埋飯....係仲有下文! 下個週末.... 嘻嘻.
好野唔好俾佢停!!
一張丟空了無人坐的凳輕撫給腰背磨殘了的凳In Memory of Tim Russert.
無奈凳裡只有遺憾
在遠遠的以前 凳子很美
父親很少皺紋
獨望著空凳原我能
再度和他促膝而坐
獨望著空凳心難過
為何想講的從前不說清楚
曾懶說半句我愛他 懶說半句我愛他
過去我說我最是要緊
今天發覺最愛他 呼叫永遠也愛他
聽我叫喊只得一張空凳
上回去果間"客家菜"難食不堪, 今回父親節一時諗唔起去醉瓊樓, 反而衝口而出話去泉章居, 直至訂左檯幾日後先諗起, 太遲了.
好耐無再幫襯過泉章居, 至少都有十年! 仲記得上次係一大班人上去食飯, 今日仲有聯絡好似得番一個. 今次再幫襯已經響新址, 裝修實而不華, 仲有近年興起既"中菜卡位', 講真咁既設計真係無腦, 皆因夾餸係極之唔方便.
因為自己早到, 所以走去攞檯先. 去到話: 王小姐五位. 知客阿姐帶左我去長檯, 長檯? 似乎圓檯坐滿唯有硬食. 坐左一陣都唔見其他人出現, 唯有SMS各人通知我已到. 一陣阿妹問我去左邊? 我話我坐近窗口, 點知佢又話佢亦都攞左檯開埋茶又係近窗口. 吓? 原來我地兩人各攞左一張檯一張南一張北, 知客阿姐無劃到個紀錄, 細妹後尾到又被帶到另一張檯, 好彩早發現, 否則成家人到時一人霸一檯!
記得以前泉章居係出名既基佬飯堂, 上次去真係有好幾圍基縱處處熊風再現, 今次新址就絕跡晒, 可能大家都去晒翠華卦?
父母到齊就點菜, 都係果幾味: 盬焗雞: 有雞味, 唔似出面夾硬既沙薑雞, 好味. 炸大腸: 似係"預製"事後翻叮(炸), 脆但味道麻麻. 蒸大鱔: 唔食魚, 唔知. 蟹肉扒豆腐: 好好味, 個獻太杰, 豆腐炸過再配蟹肉不俗. 海皇湯: 味道不俗足料. 事後糖水: 馬蹄露, 同個湯八成似, 幾得人驚!
同樣四百幾蚊(上次係四百到尾添, 今次平D), 但味道可以相差咁遠, 大酒樓始終係有個譜!
有次響某討論區留低以下文字:
但係我呢兩年都未必上BD...除非BD player平到二千蚊有交易又或者換電腦.
有人問點解? 你估我真係唔想咩? 之但係得咩? 因為自從成為業主, 每月駛費就好似倒水一樣. 單係睇今個六月, 換新微波爐, 換新浴屏已經駛左成三千大圓. 再加上其他駛費供樓今個竟然係得赤字!
祈求下個月唔好再有野壞因為部DVD錄影機神神地都唔敢去換, 如果再有野壞真係唔知點算. 唔好講BD或買新DVD錄影機, 就連屋苑既數碼廣播接收兩個月後完工我都未必可以會投入數碼廣播.
今個月真係有D失控, 唯有下月節衣縮食...
自已部台製門Windows既PDA蜂一直壞壞地, 有時不停達達聲亦又有時索性無故offline甚至玩罷工唔聽電話. 一直都想換機之但係又無心水機令我有衝動去換, 因為真係唔想再用Windows mobile, 只希望用番大廠手電, 當然最重要有手寫功能等我呢個死懶鬼可以手寫中文SMS.
近期確係睇中索愛新出一部有手寫既手電, 不過仍在觀望其他人既反應先. 尋日殺出3G iPhone未出前都有考慮過, 但尋日一睇完個規格就真係可以放棄!
1) 無視像鏡頭 : 我唯一升上3G既動力都無埋, 算把啦!
2) 無藍芽A2DP: 雖然我較少用, 但呢個已經係音樂手電必備, 無就真係講唔通.
3) 無iTune shop: 係賣部機俾人但人地想買歌買軟件又難過登天, 玩咩?
自己都有部iPod Touch, 之但係反應慢兼曾經死機都令我懷疑呢次iPhone只會又係得個樣.
原本好好地一部基佬拍俾基佬睇既戲可以搞到咁反智, 未上映已經負面新聞多多, 由"自我審查"海報到"反同言論", 由被可憐到被杯葛, 戲劇化到不得了, 就連比自編劇本更傳奇.
好, 眼見俾基佬們圍攻就駛出一條老屈基佬自導自演既苦肉計, 以為可以嚇一嚇班基佬. 雖烈確係令部戲又見報, 之但係老屈呢條橋令到基界更加反感, 連套戲既主要觀眾層都趕走, 咁邊個會入場睇套戲呢?
基佬們成日話俾直人迫害受盡歧視, 到頭來今次反而係"自己人"自己迫害自己, 真係有寃無路訴.
呢位基哥仲話下一部戲係港版斷背山, 去好多地方如死海, 耶路撒冷橄欖山, 哭牆, 京都Miho博物館, 澳洲黃金海岸, 曼谷Patpont,南灣浮台, 長沙上灘拍外景. 今次就將捧球搬入衣櫃, 下回大大基字放上額頭, 你估仲有無人會上當呢? 仲可以用乜野屎橋去hard sell部戲呢? 我地而家係生活在千禧年, 並唔係上世紀八十年代, 需要上清新,城市週刊煲新聞谷部戲.
當然, 無錢無藝術, 有錢有偽術.
平時睇電視劇尤其本地既, 每逢出現飛車撞車所用既車輛大多數二手舊車. 主要成因係成本平撞到散晒都係幾萬蚊, 唔同近年美國電影有車廠贊助幾新既車都可以任撞. 當然電視同電影成本真係相差一大截. 不過近排先發現遠到德國竟然有部電視劇有如此安排: 每集佔大半時間於飛車特技場面, 所用到既車真係乜都有! 由貨車貨櫃車吊雞車消防車甚至普通如寶馬平治保時捷都齊齊撞到飛起無一完整甚至有時撞完仲要炸到喳都無, 亦有時有如幾架名車撞上半空撞到好似跳舞一樣. 對於激好官能刺激既一定大嗌好正.
(上youtube search "Alarm For Cobra 11"就會搵到呢套劇近幾季既集數.)
上圖為消防車慘被飛落山既場面.
你叫本地電視劇都有咁既場面? 就算搵齊咁多名車一齊撞, 但係單係搵地方同埋做成既道路損壞都有排賠.
由數碼廣播第一日開始, 成件事就已經錯晒. 當初推出數碼廣播係主要改善電視接收既情況, 高清只係個伴菜. 點知港人既反智心態再加無腦既無線高調催谷, 高清變成必備品, 無鬼影無雪花既好處已經無(正常)人去提及.
試播左一段時間, 人人都心急去追捧所謂既高清台. 所謂高清節目只係有小部份確係高清製作, 其他只係用標清谷上高清廣播, 跟真正高清好有距離. 但可憐既反智港人仍然津津樂道所謂高清節目, 就連平時唔會追劇既都逼住每晚追劇以為可以趕上潮流. 可惜無線劇越黎越當人白痴, 得人驚到用Windows Media Player去化驗DNA咁既情節都可以出現, 可憐反智高清港人就咁照單全收. 更加不停有人問反智問題: 點解呢套劇唔高清? 點解新聞又唔係高清? 點解亞視每日只高清兩個鐘?...
五千幾蚊一部過渡性貨既解碼器出現更加令呢種反智麻木追從高清既心態推出高峰. 跟住又會點呢? 港人三分鐘心態後, 高清解碼器就如當年既麗音解碼器一樣極速消失. 無人再會日日將高清掛響口唇邊. 用左五千蚊摩貨既都會暗自嗌傻.
當然我都樂意迎接數碼廣播, 至少無左鬼影雪花, 接收好D. 不過少睇本地兩個免費台, 主要睇IPTV, 所以影響有限.
難怪政府遲遲唔推出數碼電台廣播, 一來負責測試既港台亂七八糟人人貪污, 二來電台廣播高清無畫面, 港人唔會接受因為無器材可以追.
姑勿論"無野之城"製作人係咪為求一己私"慾"去賣弄周fing fing, 但投資或製作呢類偏鋒電影原本都勇氣可嘉. 再者已經好耐無港產片以基佬為主要市場.
之不過就響海報被投訴變成受害者之前, 竟爆出有演員走上港台某同志電台節目疑似宣傳呢部戲. 但不幸片中演員不停搬出恐同心態及言論就連女性都侮辱埋, 就似響教堂大嗌天主係魔鬼一樣. 完全係幫呢套戲倒米, 終於令到本地基佬群及女影迷都發起杯葛呢套電影既行動.
有時起用直人拍疑似基片唔係唔妥, 亦都無要求戲裡戲外都言行一致, 只不過就算自己有幾屈就響一部基片中, 都無需不經大腦咁響大氣電波發送自己恐同既信息. 只會令人覺得而家所謂藝人變得更"偽人"!
伸延閱讀:
自己人：無野之城 (有節目錄音)
罷睇《無野之城》Boycott HK pseudo-gay movie “City Without Baseball” - We need a City without “City without Baseball” (Facebook group)
歡迎對號入座!
當年勇
曲：盧冠廷 詞：張景謙
歷遍風霜的雕塑
人亦看透了世俗
管他世間是冷酷
讓當年勇
暗暗的拋在路途上
已經沙啞的聲線
藏著以往那憤怒
怎可在等在這夜
讓當年勇
再發出唬呺踏長路
這夜晚 風聲使我更驚恐
不相信這眼睛 但眼睛已落淚
火光中激發當年豪情
陣陣熱血湧心間
千億聲呼叫在耳邊
惡夢現已蔓延
自從舊年百佳推出醜陋既吹水膠袋費後已經拒絕去百佳買野, 但有時有D貨真係百佳先搵到, 唯有間唔中幫襯. 其餘時間已轉幫襯惠康.
除左好肉酸既膠袋費外, 仲因為佢地既取巧價錢. 除左睇落似平左但只係抬高價錢去減之外, 買兩件特價亦都係個陷阱. 明明買一件都夠, 但見買兩件會平D, 結果又買多件兼發現買貴野? 唔信?
請睇以下張相, 某街坊響將軍澳新都城既百佳發現兼拍低. 請大家用心算或計數機計下自己買貴幾多?
(圖片來源: 三屋將軍澳谷)
有人話"Day for Night"算係杜魯福入門真係一D都唔錯. 尤其對電影迷戀既影迷就更加投入, 甚至只係八八卦卦既娛樂新聞眼都會對呢套戲有興趣.
一部相當踩線既電影, 一班各有問題既演員及工作人員, 一位煩呢樣驚果樣既導演, 做就左一次相當出色既演出. 對白有趣, 處境又層出不窮, 從一部電影誕生見盡人生百態. 在情情愛愛兜兜轉轉, 最後都係化成一大卷菲林上既電光幻影.
最重要全片無過於高深, 淺白既對電影作崇高致敬.
四年前已經買左呢套戲既1區DVD, 但老毛病之下一直無開過黎睇. 直至上星期又買左呢隻3區版本, 再加上心情還可以終於欣賞到呢套大師經典作.
我未讀過原著, 反而B有睇過本書. 尋日一齊睇呢套戲, 不到20分鐘佢已經嗌好悶. 套戲係悶藝, 係因為大家都追尋完/美, 響完/美細心經營下, 唔一定人人都上心. B問如果我係Thomas Mann, 會點寫個結局, 我諗呢個真係好難答. Gustav係好想去高攀所謂美既Tadzio(我同B都認同佢叫"美"? 換人啦唔該), 只不過佢既道德上令佢只能遠觀. 如果我寫我諗會令佢地有真正交流, 並唔係如片中既眼神亦都唔係大家所諗既...肉體上. 我諗會係言語上一句你好嗎都好, 免得臨終時都係只得個指天篤地既形像.
全片擺明係戀(男)童但唔知點解呢張3區DVD既中文字幕會令成件事變直. 其中一段Gustav夜半於酒店外第N次遇上Tadzio, Tadzio向Gustav報上發電微笑, Gustav坐低並自謂(大約): 我不想你再向任何人微笑, 我愛妳. 喂? 妳? 突然前十秒仲係男, 後尾自動抝直? 成件事錯晒. 打字幕既係一時錯手打錯字, 定抑或譯字幕不認不認仲係唔想面對現實呢?
(80/100)
