HMV, 我鬧爆你!

真係不吐不快!
話說兩星期前, 我去HMV準備買隻新CD. 但係去到竟然賣晒!(仲要出左第二日就全線賣晒!) 店員問: 不如幫你訂? 我答: 我上你地個網買啦.
係因為之前曾經搵佢地訂隻1區舊戲DVD, 足足兩個月都無消息, 連話要訂既B都無左呢件事. 有一日我心血來潮打去尖沙咀分店問, 點知佢話隻碟巳經到左. 我問佢點解無人通知我既? 但佢又唔出聲. 幾日後, 去到門市拎碟, 櫃檯竟然搵唔到隻碟! 我堅持係佢地同事答我已到貨, 率之佢地竟然響出面貨架上面搵到隻碟. 心諗: 嘩! 要係有人買左呢隻碟, 我地又咪要等多兩個月? 順利收貨後, 故事做未完. 一個星期後, 尖沙咀分店有個女仔又打黎話: 你訂果套XXX已經到左勒, 你可以上黎拎. 下? 我話: 我上星期已經攞左喎. 女仔一樣好錯諤話: 下? 係咩? 咁唔好意思呀. 即係點呀?? 訂少少野都可以搞到咁亂咁耐! 自此要訂舊貨, 我都係幫襯番"阿嫲喪". 至少人地訂隻DVD唔駛八個星期.
結果今次上網買CD, 心諗新貨應該會好快番貨卦. 第二晚就收到email回覆, 但係就話"order in-process", 不過亦都話已過數. 呢下真係奇怪, 因為通常佢地未有貨係唔會過數. 但因為上星期太忙, 又無打去問. 前晚又係心血來潮上佢地個網查番張訂單, 竟發現訂單真係出現"Shipped"字樣. 心諗張confirmation email又唔知係咪當spam咁食左. 尋晚就走上去中環分店諗住拎貨. 點知呢位男店員望左張email一陣搵都唔搵就話無呢件貨. 我問可唔可以搵搵呢張訂單? 佢話internet同佢地係唔同部門, check唔到. 但佢反而走去check電腦睇下有無存貨, 結果係無. 我初頭都諗會唔會網上部門搞錯左呢? 之但係諗番再之前一次響銅鑼灣分店拎網上訂貨, 同樣位女店員望一望張email搵都唔搵就話無貨, 仲話我張email係假! 我話: 我訂左好多次都係收到咁既confirmation喎. 跟住佢又話我封email 無order number係搵唔到. 阿姐! 大大隻order number就響第一行都睇唔到. 佢先施施然去搵, 最後都搵到. 今回又會唔會一樣呢?
所以尋晚一番屋企就寫左封email俾HMV問我張訂單情況. 今朝就收到網上商店部門打俾我好肯定張CD早響上星期已經送到中環分店. 我將經過同過往經歷話俾呢位先生知. 因為我覺得每次響網上購物跟手到門市取貨都遭受呢種無禮貌待遇. 呢位先生話將我呢個投訴轉達到管理層.
以往我覺得佢地既店員好有禮貌仲好專業, 對音樂同電影都好熟. 但係近年店員水準真係差左, 有時甚至可以話唔願做. 去搵一搵隻碟都唔想做, 叫人點幫襯你呢?

九百幾銀買隻變形金剛DVD

近日網上吹得最勁就係呢段"趣聞".

十一月一日, 本地發行公司就會推出"變形金剛"港版DVD. 早響幾星期前, 我經某位行內朋友知道呢隻碟會有三個版本: 普通版/變形金剛版/鐵盒版. 批發價為$140/$170/$200. 發行商規定店舖每入十五隻普通版就可以入一隻特別版. 咁樣做都預知實有炒風, 但諗唔未發售就已經被炒起, 走勢就似股市一樣.

某出名本地網上奸商, 初時仲將"鐵盒版"定價為三百幾, 但每一日就提升. 由三百幾到五百幾, 以為到頂位. 點知尋日升到七百幾, 今日仲誇, 係九百七十五蚊. 有網友講笑話去打鐵舖訂造個盒都唔駛咁貴.

當然自由市場價格任訂, 但都唔會咁離譜卦?

唐伯虎點秋香(數碼修復版)

呢隻野完全可以用個"抵"字形容晒!
五十幾蚊買隻周星馳經典製作, 又D9又dts又SF最重要係全片已數碼修復. 畫面修復到好似新拍一樣.
突然對比其他有出版數碼修復既港片影碟發行公司, 就算嘉禾一年只出一兩部數碼修復影碟, 但都可以用咁低價發售, 反而其他公司既出品就貴得多. 究竟呢次係做蝕本生意定抑或其他公司謀暴利呢?

以下係新(嘉禾)舊版(美亞)對比, 上係新版, 下為舊版.

現在新聞台

"現在電視"既新聞台已經開左台四日, 總觀質素唔錯. 尤其開台第一日, 其他台全部都係火箭升空做頭條. 佢地冷不防用華懋爭產案做頭條, 確係有心思.
只不過節目編排同姊妹財經台都係出現同樣既問題. 就係節目過短! 財經台既地產節目計埋廣告時間都係得20分鐘, 理財節目更誇, 就只得8分鐘. 太短俾人感覺係"無料"! 是是旦旦求求其其又一日. 新聞台亦有同樣問題, 就好似今朝, 頭15分鐘係新聞, 跟住再有五分鐘寵物節目. 跟住再有10分鐘史文鴻介紹電影. 好落雨收柴, 亦都似睇緊婦女新姿或以前既香港早晨一樣. 點解唔可以好似BBC World咁真係認真做個電影節目. 又或者如有線新聞台咁做個生活資訊節目. 唔係好似而家咁打遊激出節目, 因為好難留住觀眾.
為左慳少少錢唔同亞視續約而另組自己既新聞係好大胆. 正如官方咁講: 想學當年Fox News短短幾年打低CNN咁可以幾年內打低本地新聞台一哥有線新聞台. 係就弊! Fox News出名係共和黨口舌, 現在新聞台唔通又想做親中口舌? 香港巳經有好多喎...

移動辣人

以前我都算係半個"移動辣人", 即係好鬼鍾意食辣. 不過辣量不足, 中辣已經係頂點. 唔似老媽以前咁係正式全職"移動辣人".

可惜幾年前身體出問題, 所以聽從醫生忠告: 戒酒....只不過有時高興會係一啖起兩啖止. 戒辣: 我真係做唔到, 不過確係食少左. 老媽亦因為健康出問題, 正式退出"移動辣人"行列.

不過近呢一年, 身體對辣確係開始有反應. 以往食辣紋風不動, 只係到頂點先會滴兩滴汗. 不過最近, 少少辣巳經滿頭大汗, 甚至會係好唔舒服. 所以每次見到某"移動辣人"同事嫌辣野唔夠辣, 我都好想可以再嘗辣! 畢竟少辣確係對身體好, 可惜我就無福消受!

星洲炒米酸辣米線麻辣火煱, 再見!

生活炒雜碎(第四回)

爛gag一個:
有位懶音mk女去打診所打流感針, 入到診所佢同護士講: 鵝泥打流緊真. 護士定一定神就問: 係咪打流感針呀? mk女點頭. 護士再問: 你叫乜野名? 睇過未? mk女: 流緊真呀. 護土又定一定神就話: 知勒, 你係黎打流感針, 咁你叫乜野名呢? mk女再講: 流緊真. 護士唯有問佢拎個身份證睇.
mk女個名係叫"劉錦珍".
#############################################
BBC三個新台終於登陸到"現在電視". 其實其中有兩個台既節目係同"現在電視"上面既"發現頻道組合"係有相當程度既重覆. 分別只係"發現頻道"既節目有中文字幕同雙聲道廣播, BBC既就一律英文對白無字幕. "現在電視"用"BBC 5"組合去宣傳呢5個BBC台. 之不過呢三個新台興趣不大, 連BBC Entertainment因為無乜新野都少睇左. 不過, 近日佢地出teaser話"The Graham Norton Show"會就快有得睇. 對佢真係無乜好感, 再睇舊年佢客串"Another gay movie"入面飾演大周SM男極之嘔心. 真係避得就避.
#############################################
呢排部手電真係問題多多, 食電已經係家常菜, 無用wi-fi無開BT無用黎聽歌都可以要兩日叉一叉. 再加每次聽完電話後一收線就會發生"達達"聲, 好似行人過路線既盲人輔助器一樣, 真係好煩. 心郁郁又想換電話. 用慣左PDA手電, 又可以手寫中文, 當然想繼續用番. 但係幾個牌子都幾貴, 五六千蚊先有交易. 唯一叫平係"索愛"既P1i, 但都要四千幾.
#############################################
唉~ 抽水季節! 選立法會議員變得似選班長行長. 阿豬阿狗有無案底既齊齊抽水搏上鏡出位. 邊個係真心真係有眼睇.
#############################################
今日同B入戲院睇"Amazing Grace"(港譯:奇異恩典), 以為呢間"教會"電影公司既製作會好說教. 但係整部戲都好好, 故事甚至演員演出都中上水準. Michael Apted導演果然寶刀未老!

Apple Vs SONY

OMG!

夢話

呢兩個月發既夢都好怪.
上月發到我去夏威夷出席B既葬禮, B既朋友都有出席. 後黎佢既朋友J帶我見個女仔, 係B既女兒. 我同B女傾左好耐, 佢問我點識B? 香港生活又點過... 夢醒, 諗起真係打冷震.
上星期又發到另一個更震撼既夢! 夢入面我係生癌, 得番三個月果隻. 我同B講: 我想臨走前去英國一趟. 結果我地真係去左倫敦. 去到倫敦, 我同B講我想自己去利物浦做D野. B怕我出事, 但最後都說服左B, 送我上火車上去利物浦. 去到利物浦即刻打電話俾J兼直接去佢屋企. 當面講俾佢聽我有病既消息, J喊得好厲害, 結果我陪左佢一晚之後就搭火車番倫敦. 我同B講: 我地可以番屋企.
呢個夢好灰, 但亦都好解脫. 我覺得有時電話或者email都唔夠當面講咁有力.

B都話佢發左個怪夢: 係同隻熊貓同居! 吾... 睇得太多熊貓台!

呢一期Playlist同最差MV

呢一期playlist當然唔少得陳Eason既新碟. 之但係聽得多, 其他無被plug既side-track一樣極之好聽. 例如講朱先生既"閃", 大開眼戒既續集"熱島小夜曲", 同埋唔係帶你遊倫敦咁簡單既"滑鐵盧車站".
呢一期Playlist仲有泳兒既"送你一個家", 都係近期好耐聽既新歌. 當然唔少得大力推介既"Peter Bjorn and John既"Young Folks". 不過仲有隻近日熱播到不得了既係今個星期BBC single chart既冠軍Sugerbabes既"About you now".
但係一睇個MV, 真係火都黎埋! 一個咁粗製濫造既MV竟然係唱片公司製作, 我唔希望佢地會狂歌熱舞, 但都唔係咁求其同無厘頭卦.

囍趣台

你知唔知無線曾經有個"新節目"叫"囍趣台"呢?
呢個曾經大肆宣傳既搞笑節目未播就突然被抽起, 18個月後既今日, 仍然播映無期. 有傳因為主持人響節目拎電視台某高層開玩笑, 結果高層知道決定禁播呢個節目.
乜得佢咁小氣!! 響其他電視台, 節目拎高層開玩笑就經常發生. 你睇David Letterman成日響節目打電話同CBS既主席講笑, 連主席都串番主持. 觀眾睇得幾咁過癮. 但反觀一個日日見報晚晚電視都亮相兼且成日開口埋口都愛自己個台既高層竟然只聽愛聽既說話, 只鍾意男藝員, 一有相反意見就封殺. 難怪有藝員寧願離開去換取自己既尊嚴.
況且一個電視台只播高層鍾意睇既節目, 作為觀眾算做有選擇咩? 如果唔係亞視長期積弱, 壞腦唔識轉彎, 醒目既觀眾或藝員老早就轉台.

伸延閱讀: “獎門人”台前幕後聯合打造全新綜藝搞笑節目 今晚看什麼台？ “喜趣台”！

準時

B成日同我投訴點解而家D電視台都唔守時, 電視節目就印呢個節目2330開, 但通常2335都唔見個節目開始.
講真本地兩個免費電視台, 最準時算係亞視本港台, 反觀兩個英文台, 節目實際開始既時間通常同節目表上面係完全兩回事. 心諗如果觀眾用G-Code錄野真係俾佢玩殘.
守時一來係尊重觀眾既表現, 二來亦都係對自己公司業務係有好大影響. 廣告客戶買果個時間賣廣告但因為節目遲開連帶廣告break都遲左, 客戶係有權抽起果個廣告.
以往我負責電影台, 我都會從觀眾角度去諗, 公司規定每套電影唔可以遲過三分鐘開始. 除非廣告太多, 否則我都盡量可以安排電影準時開始. 可惜有同事既數學比我更差, 連計數機都唔識用. 明明預兩個鐘時間但佢就放套兩個半鐘既電影落去. 如果我有提早check通常都可以改到, 之但係有時係太遲, 要出街勒. 公司另一規定如果套戲遲過五分鐘開始, 開始前必需加個因遲開向觀眾道歉既五秒啟事. 心諗都已經係遲左, 道歉係好, 之但係再加五秒? 咁咪更遲?
之後被調到英國既綜藝台. 公司規定節目唔可以遲過一分鐘開始. 我就通常安排有三十秒緩衝, 因為如果節目宣傳片或廣告有調動, 都可以有30秒走盞. 不過同我拍檔既外籍同事, 就真正由觀眾角度出發. 佢通常會令到每個節目都非常準時開始, 相差可能只係兩三秒. 結果一有調動, 佢就要將全日既野重新做過. 真係有辣有唔辣.
後黎去左新聞台, 呢個台比較嚴, 因為新聞節目都係直播, 所以掌握時間都要好準確. 起初我真係不停篤計數機去計時間, 尤其我仲要負責砌個節目表. 後黎自創左個"減數法", 效率同精確度都改善左. 因為一秒之差, 都會有好大影響. 不過最麻煩係遇到錄播節目, 尤其果D唔係自家製作既錄影節目. 因為根本預唔到準確既時間, 尤其節目通常係要出街前幾個鐘先錄起, 但發現嚴重under-run. 控制室同事通常都好順手, 隨手就拎起台歌MV既播. 但試過因為有節目under-run左10分鐘, 又唔可以cut番入直播室, 結果... 第二日我走去拎餅playback帶睇番, 原來尋晚控制室不停重播果段長分半鐘既台歌八次去填補果10分鐘時間! 我一次又一次去數播左幾多次台歌. 一路數一路驚, 因為高層send email問我地點解播咁多次台歌? 後黎公司終於諗到剪輯一D新聞精華用黎做填補時間用.
噢! 越扯越遠. 作為電視行業既人, 都應該從觀眾層面去諗, 對觀眾有一種尊重.

Reno 911!: The Movie

如果鍾意"The Office"呢類偽紀錄片既電視片集, 呢套"Reno 911"就真係唔好錯過. 一班小城既警察遇上唔同既荒謬場面, 佢地亦用最反智既方法去面對. 主角都係怪怪: 有基到震既警長, 暗戀基警長既女警, 有反女同志既女警亦同時隊中有"女同警"!
呢套電影版更加玩得盡, 有好多野電視版真係未必出到街. 雖則故事主線兒嬉但笑料就層出不窮.

(留意片中含有兒童不宜場面, 切記唔好同家長或小朋友一齊睇.)

估下佢地響沙灘炸D乜?

從春田花花同學會到The Pancakes

舊年一套"春田花花同學會"被人鬧到狗血淋頭. 唔理性既話比垃圾更爛, 理性既話唔應該將咁悲情既向小朋友灌輸.

我只覺得呢套戲曾經令我好感動甚至激動. 將卡通人物化成真人, 唔好忘記麥嘜麥兜既背景根本就係現實既香港. 電影入面一切荒謬爆笑既場面根本同現實無分別. 好難理解點解有人真係想逃避現實定抑或第一次睇老麥既漫畫?

其中片中一隻"Fing下Fing下"既歌曲一直以為唔會出版, 點知岩岩主唱既dejay又推出佢既新碟"1.2.3.4.5.6 cheese!"終於收錄左呢隻歌. 雖然唔係人人受得呢位小女子獨特既歌喉, 但又唔可以否認佢既音樂真係令人好放鬆. 尤其今次一隻"日落.入夜", 更見功力.

Listen to Eason Chan

呢張算唔算近年香港樂壇少見純電音跳舞歌既大碟? 由頭跳到尾, 中間仲有個飲水休息位, 結尾再整個執番跌落地既眼耳口鼻假胸散銀既位. 搖頭到不得了. 唔夠喉? Disc 2響英國混音既Remix版包你跳到甩肺.

陳奕迅上次有Remix碟已經係華星時代2001年既"Mixed Up", 由人山人海大玩傷信幸福摩天倫Remix. 英皇時代亦有呢類電音歌曲, 但今次呢張大碟歌曲製作極之認真及大手筆, 引證本地樂壇係可以玩好多新野, 並唔係只得K歌同兒歌.

伸延閱讀:

電色繽紛陳奕迅:《Listen to Eason Chan》-牢騷絮語

嘩~好電呀! - Lost in Procrastination

馬後炮●劉

http://ent.sina.com.cn/x/2007-10-12/07101746252.shtml
劉先生以為李安會搵佢拍"色戒". 佢又黎!
次次有乜大導大片成功佢就會發馬後炮功話早知就接果套戲啦或俾我就唔敢拍之類厚面皮說話. 從春光乍洩到英雄到臥虎藏龍再由斷背山再到呢套色戒, 如果劉先生既演技真係得到各位大導既認同, 又點會無人揾佢拍戲呢? 究竟係佢自知自己係需要話題大片而令自己覺得自己既級數可再提昇定抑或佢既演技...唉~
之前因為"英雄"之後講一講俾佢埋到張藝謀, 拍左部"十面埋伏", 結果完全無noise. 再跟住拍左中港日既"墨攻", 一樣無noise. 再到最近, "投名狀"偷步詐諦提名奧斯卡. 都唔覺得會令佢上另一個高峰.
都係認真磨練一下自己既演技先, 你睇郭先生既演技確係有進步. 反而劉先生我地只記得佢D馬後炮.

男人之大

今日有報導上星期BBC有個電視節目, 因為主持人著左係超窄西褲, 結果觀眾見到主持人絝下突現隆然巨物, 嚇得紛紛投訴. 主持人處之泰然, 仲讀出有關投訴留言.
其實, 真係咁得人驚咩? 而且觀眾真係咁留意到果度激突? 講真男人生成有幾大有幾長真係無得揀. 要係天生異稟, 真係左閃右避著晒鬆身褲, 但一坐低真係遮都遮唔住. 正如女人胸大, 試問叫人點遮呢?
不過, 男人著得太窄又對自己唔健康. 所以我都唔敢著太窄既褲, 一來唔想太"現袋", 亦想為自己既下身健康著想.


伸延閱讀: 金牌主持人激凸被投訴

鬼佬與阿差

警告
以下內容或會引起閣下不安, 敬請留意.

記得以前香港無論普通市民甚至傳媒都好鍾意叫外國人做鬼佬鬼妹, 印巴籍就叫阿差阿星. 但通常居港既外籍人士比較唔多介意, 只係印巴籍比較唔多鍾意呢個幾侮辱性既稱呼. 較早前香港既反歧視條例實施, 稱呼人鬼佬鬼妹阿差阿星都會係一種歧視. 可惜, 響完全無宣傳教育下, 普羅市民唔多知之外. 就連前線既公務員都可以大大聲表達佢地根深蒂固既思想.
上星期同B到急症室響六個鐘之內就遇上兩件事. 例如有護士可以響大庭廣眾之下同醫生有以下對話: 睇埋阿差先啦. 咁岩果位印籍人仕行左入黎就企響護士後面, 最重要呢位印籍人仕係識廣東話! 因為之前響汽水機, 我入左錢但又無野出, 佢係用廣東話同我講野. 遇上呢個咁尷尬場面, 呢位護士果然見慣大場面, 仲用廣東話同位印籍人仕講: 入去啦.
跟手正當我地響出面大堂等報告既時候, 身邊幾位警察亦都好大聲講電話. 響醫既範圍已有告示講明唔好用手提電話. 不過位警察哥仔大聲之餘, 仲"果條鬼佬"前"果條鬼佬"後既對答. 講真確實幾冒犯. 試下有人響佢地面前大大聲講"果條差佬"前"果條差佬"後, 睇下佢地有乜反應?
要搞公民教育, 不如就由前線公務員開始先. 免得好似曾特首既文革狂言再度發生.

千嬅新唱

上次千嬅隻老黎新碟, 好壞参半後, 就傳出千嬅要求轉label既消息. 就響呢個時候, 隻老黎碟就出第二版, 與此同時舊東家亦出版另一隻碟打對台. 作為商業因素, 通常都會出一D新曲加精選黎打對台. 但今次金牌竟然係出一隻新碟.

呢隻"千嬅新唱金牌金曲"全部重唱金牌過往既流行作品. 記得金牌之前已出過另一隻翻唱既醇音樂精選. 起初我仲以為呢隻只係demo精選, 拎出歌詞一睇, 有兩首音樂竟然響日本錄製, 更搵日本音樂人編曲製作.

不過細聽, 呢隻碟既歌曲肯定一樣出自果隻"醇音樂精選"既遺駭. 亦可能其他金牌歌手同樣亦有錄其他歌曲. 未來日子, 可能都有方力申側田梁漢文吳雨霏等等既"新唱"大碟.

聽完成隻碟15隻歌, 我有D暈, 甚至耳鳴. 究竟作為呢隻碟既三位監製: 李漢文, Jan Lee(好彩係Jan唔係Jim!)同埋側田. 有無諗過呢D歌係用黎出街? 定抑或你自己交俾雷Sir既功課呢?

翻唱人地既歌係難, 但只要有掌握都可以有感染力. 記得兩年前鄭秀文曾經有隻災難性既翻唱碟. 聽完後我只吐出兩個字: 仆街! 完全係一隻要黎自瀆既唱片! 之但係今次, 唱者無心, 監者無耳. 透氣噴咪懶音乜都齊. 監製混音竟然唔察覺. 唱又毫無情感, 冷冷淡淡, 一個字講晒: Hea! 不過, 總括佢翻唱女仔歌係好過翻唱男仔歌(501除外). 你聽"為何他會離開你", "藍鞋子", "愛是最大權利"及"派對動物"都係易掌握, 還可以一聽. 反而男仔歌"傷追人", "命硬"及"好心好報"吃力到不得了."羅曼蒂克"又被日本人編到老牛上樹, 訓得著.

今次呢隻雖未致於災難性製作, 但至少係隻無心無力既示範作.

伸延閱讀: 金牌抽水大行動：《千嬅新唱金牌金曲》- 牢騷絮語

試片室: Vantage Point

如果你鍾意'24"呢套電視劇, 呢套戲你真係唔好錯過. Dennis Quaid再回歸動作片, 再加"Lost"既男主角Matthew Fox. 齋睇trailer已經好吸引同刺激!

官方網站

急症室的一夜

病左成兩個禮拜, 連續發燒左成個星期既B. 平時點都唔肯去睇醫生既佢, 點知今次兩個星期睇左三次醫生. 尋晚更加係好辛苦, 所以尋晚經私家醫生轉介帶左佢去急症室檢查.
結果急症室既分流令到我地由九點正等到十二點先見到醫生. 當然我唔介意分流, 但B就越坐越唔舒服. 跟住驗血驗尿照X光再等報告. 終於半夜三點半先離開醫院. 檢驗結果仍然搵唔到乜野原因令佢發燒唔退. 唯有照食藥.
不過, 已經有好多年無去過急症室. 當然無乜事都唔會去呢個地方, 細個胡塗將膠珠塞鼻, 就被送佢急症室急救. 跟住盲腸炎又用救傷車送我入急症室, 不過去到竟然"食咋胡", 被打回頭.
尋晚六個鐘頭中, 響急症室內見盡人生喜怒哀樂. 有想殺老婆既醉丈夫, 有車禍既傷者, 有痛失親朋既人, 亦有跌斷腳既小朋友. 我地既小小傷風相對下變得好渺小.

飯堂

讀書時候無要求, 飯堂又幾好或難食都唔識分. 到大個仔出黎做野, 乜原來飯堂有時都幾難頂.
讀完書出黎只做過三份工, 不過只有其中兩份有提供飯堂呢樣野.
第一份係本地某報, 當時響舊報社, 飯堂設於天台. 面積唔大, 由一對年老夫婦主理, 據聞佢地已經做左好多年. 每日既餸菜係無得揀, 每日每枱例牌三餸一湯白飯任装. 通常我地一個部門會佔據一張檯, 到時到候肥伯就會送上餸菜. 好唔好食就真係一時時, 但佢地既番茄煎蛋又真係味道好好送飯一流. 跟住報社搬到新址, 肥伯繼續經營飯堂. 但係飯堂就細左一半有多, 而且公司擴張左好多, 又雜誌又網站又電視台, 咁細個飯堂根本應付唔到咁多同事. 兼且肥伯年老又打苦頭, 飯餸開始縮水又求其又唔乾淨. 結果公司搵左另一個承辦商響二樓停車場間左一間好巨型既飯堂, 兼且對外開放. 當然員工有折扣. 要俾錢黎食飯當然有要求, 雖然餸菜普通, 但花款就好多. 又鐵板餐又打邊爐. 仲間多間VIP房可以俾多少少食十二人套餐. 但心諗我地幾何有時間可以坐低慢慢打邊爐. 通常都係買外賣番去一路食一路做.
直至我離開呢間報社之後, 原來又換左另一承辦商: 大家學....
第二份工亦有飯堂, 係因為公司位遠郊區, 到最近既酒樓都要揸八分鐘車出去. 快餐呢更加要揸十幾分鐘車出城先有. 所以呢間飯堂真係救左呢幾十人既生命. 之但係又係衰唔乾淨, 入職九個月後因為食左個唔乾淨既午飯, 搞到要入醫院做手術. 自始我寧願搭順風車都要出城食晏直至公司搬番出市區為止. 搬到出市區後, 公司再無開設飯堂.
但最經典係記得後生時某年暑假到某大中資書店做暑期工, 有幸可以擁有長工既同等待遇:到飯堂食飯. 記得要買一份飯券, 通常有廿幾張. 每日會預告第二日會有乜野食, 咁你就響飯票上寫上你想食乜, 將飯券撕一半放入箱, 自己就keep個存根. 第二日就用個存根拎你既餸菜. 記得餸菜都係好北方兼住家, 最好味應該係炸菜蒸牛肉餅, 味道岩岩好. 除左白飯之外, 仲會有大量饅頭供應, 非常有內地色彩. 算做一個幾有趣既體驗.

伸延閱讀:
瓊天奇菜逐道數-牢騷絮語
瓊天奇菜 - 飯格
擎天美食- 一個好人?
瓊天奇菜—難吃的日子 - 加百列傳

又見夕陽

撞正周末兼天氣唔好, 一定會見到呢種夕陽.

生活炒雜碎 (第三回)

輪流轉, B傷風完就輪到我. 我病完B又感冒, 今次仲要大感冒, 睇左兩次醫生. 今日先好番少少. 呢個幾星期, 要日日照顧佢起居飲食. 叫佢食藥又要求又要請三請四催, 佢先可以乖乖食藥. 結果, 佢未散, 我就已經散晒.

############################################

除左"光污染", "聲音污染"都係另一種俾人忽視既問題. 尤其我地每日去餐廳茶樓都受到呢類污染. 汚染通常主要唔係來自食客, 反而係來自侍應.

話說樓下個商場開左間我好鍾意既越南河粉店, 有晚同B走去幫襯. 一開始就已經搞到好嬲, 因為太多人, 所以要攞飛. 但我問門口果位知客攞飛, 但佢無理我, 我以為佢忙點人數無留意我. 所以我再出聲示意, 但佢一樣望一望我就算. 呢個時候亦有其他人加入攞飛, 佢竟然好順手派飛俾其他幾位完全無理我. 正當我想拍檯之際, 經理一個閃身出現, 遞左飛俾我. 心諗: 點解八婆都可以做知客既?

跟住等左一排就有檯, 反而另一家人, 一家六口竟然被分配去四人檯, 結果人迫人.

全晚高潮係成間舖頭D女侍應都好好中氣, 全晚乜都大聲嗌. 點菜? 嗌! 帶位? 嗌! 最慘係全程響你耳仔邊不停嗌. 有兩次真係俾佢地嚇到彈起! 又嘈又迫, 就算D生牛肉河有幾好食都食唔落. B直頭食左半碗都話想走, 試過其他分店又無呢個問題, 只係呢間分店真係嘈到想死.

臨尾埋單同位經理講: 你地班女好嘈! 可唔可以叫佢地唔好嗌呢? 嘈到都唔想食落去. 經理猛say sorry.

根據屋苑討論區既街坊講, 呢幾日佢地去幫襯時, 已經靜左好多, 無再嗌生晒. 原來真係唔鬧唔得!

#############################################

再次證實以下道理:

外籍靚男人一定配個好醜樣既中國女仔.

一位好靚既外籍美女一定搭上一個好醜樣既港男.

呵呵!

#############################################

消防船噴水表演加送彩虹

龍咁威

請唔好誤會我唔係講緊鄭中基主演既"龍咁威2003", 就算鄭先生呢套曾經被我譽為2003年最好睇既港片, 其顛覆同荒謬之處絕對雅俗共賞.

呢套1981年既製作, 講吳耀漢同羅志強都係響大陸偷渡來港, 誤打誤撞之下做左同佢一模一樣既國際動作明星既替身. 可惜經理人為錢, 想呢位替身替已過世既明星死多次.

故事似曾相識, 想影射既亦呼之欲出. (又或者佢地只係投射左某一位既未來.) 不過除左睇得出梁普智並唔係一個好既(喜劇)導演, 同樣現今既國際級導演, 吳宇森既早期喜劇反而睇到佢就算掌握早期港(台)產癲狂喜劇, 亦可以拍得好流暢. 響呢套龍咁威只睇到一個個場面而唔係一套完整既戲. 不過, 響呢套電影入面吳耀漢分飾既"香耿"就描寫得好好. 一個非常天真無邪既偷渡客, 對前路充滿希望, 完全無受香港染汚. 其中幾埸佢幻想既樣辦戲, 係當時港片少見對岩岩開放既中共有咁正面既描寫. 並唔似八九十年代港片對大陸人既恐欋. 尤其結尾尖沙咀太空館出殯一場, 香耿並無乘機抽水, 反而强調唔適合同明星既家人生活. 完全係講出對大陸人唔想被資本主義染汚, 都係大陸好.

我搵呢套戲都搵左好多年, 到頭來因為本地發行公司失敗, 至今仍然只可以有VCD版本. 至於DVD版本, 分分鐘我地等到有普選都未必出到.