Mr.Bean's Holiday

而家先講呢套戲會唔會真係太過out呢?

講真第一套Bean電影真係唔多得, 笑料唔夠又舊, 完全同套戲名"The Ultimate Disaster Movie"相輝映! 認真災難. 但有趣既係當年既編劇Richard Curties後黎拍成列為近年經典既英片"Love Actually".導演Mel Smith亦都拍左我都幾鍾意既"High Heels and Low Lifes".

隔左十年, 戇豆又黎勒! 今次拍伙Steve Bendelack, 佢之前已拍過Little Britian及"The League of Gentlemen's "電視及電影版. 心諗一定今次有得玩! 結果有驚喜. 唔知係餓左豆式gag太耐定定自己好耐無笑. 就算舊笑料都照收貨, 不且笑料, 有幾場甚至有替佢擔心既感覺. 片中除左佢係主角佢既video cam亦都係一伴好重要既道具貫穿成部戲, 甚至帶起高潮, 絕對意想不到.

另一方面, 套戲都好大力鞭撻康城影展同所謂悶藝電影. 果套Payback Time我地或者見到好濃烈既王家衛影子, 香港戲迷相信都大叫過癮!

今次呢部豆戲挾住公路電影形式去打入合家歡, 絕對係一次mix and match既示範.

P.S. 各位如果你身高高過五呎, 勿買AMC又一城3院H4, H5, H6呢三個位. 我好肯定, 呢三個位肯定係世界上最窄既位. 因為當你放低張椅, 就發現根本你係無位放腳, 張椅已經極之貼前面果排既椅背. 今日我地真係坐唔落, 結果走去調位, 但不停俾人趕, 我同職員解釋, 但職員只識叫我地坐番原位. 唉! 坐到都唔駛調位啦! 根本坐唔落, 佢地又無解決方法. 好彩套戲唔滿, 又走左第二個位去睇埋半套戲. 以前AMC仲係美資時都唔會咁差, 一俾百記管理後, 一切都以錢為先, 觀眾? 理得你死啦!

去邊度好呢?

B趁住返新工前想去個大旅行, 之前我既情人節禮物係佢贊助我下次旅行. 我亦都想趁住旅行同佢慶祝生日. 就響好事連環來既時候有個大疑問: 就係去邊度好呢?
B老早就話唔想再番大陸同去台灣, 因為去過太多次. 我都話暫時唔想去泰國, 一來好悶, 二來我覺得因為政局變得危險.
可以去既地方變得好少... 我曾提議不如陪佢番夏威夷, 一來佢可以見下佢D friends, 二來可以喪游水. 但佢話我唔游水會好悶. (咁又係喎! 而且佢D friends唔係醫生就係電影編劇同明星, 好難同佢地傾得埋.) 跟住我又提議去拉斯維加斯探佢雙親, 橫掂佢阿媽成日話叫我地過去, 正所謂外母見女婿, 口水....... 但B又唔多想...
佢就提議去印度, 佢一生都好想去印度. 印度都ok, 但我一定淪為公司既人肉速遞, 送野過去印度office兼見下成日鬥咀印度同事. 講真: 咪啦. B亦因為旅行團單張有D猶豫, 因為所謂五天團, 實際只玩三日, 好鬼搵笨.
其實, 我係想去歐洲. 之前只踏足過英國同荷蘭, 我係好想去法國同意大利, 睇戲就睇得多, 我好想親身去感受佢地既文化. 其次都想再去日本, 上次去日本巳經十幾年前既事. 我最鍾意係京都同埋想去上次唔夠時間去既廣島.
廣告話: 未出發先興奮! 我就話: 未知去邊先至煩.
如果有得你揀, 你會去邊呢?

陳奕迅 - 認了吧

Eason講過原本呢隻國語碟係同上隻廣東碟同一批歌同步製作同步出版, 但因為宣傳及製作問題結果變成廣東碟先出, 國語碟押後. 亦結果有"先入為主"效應.

廣東話版本實在太好, 其實比上隻EP更佳. 國語版又如何? "煙味"(原"裙下之臣")講唔上出色, 甚至可以話好難有過好印象, 放響第一cut, 雖同廣東話版本相呼應, 但亦可視為自殺表現. 同樣情況出現響"白色球鞋"(原"粵語殘片")一樣好難令人有丁點印象. 新歌"淘汰", 周杰倫唔知係咪存心靠害, 仲K歌之王? 另一首新歌"快樂男生"算係全碟唔錯既一首, 接近台灣人既口味. "月黑風高"(原"黑擇明")就算係全碟最差既一首, 林夕既詞唔知想點, 再配上呢隻歌. 同樣既控訴, 但"黑擇明"就高好多班. "愛情轉移"(原"富士山下"), 同樣係林夕填, 但出黎既意境就好好多, 同"富士山下"同樣出色.

至於我至愛既"不如不見"國語版"好久不見", 一個較正面既想法, 走出兩生花既詞, 令我更鍾意呢兩隻歌. 或者有日我番到利物浦, 我會用呢兩隻歌拍一個music video. "紅玫瑰"(原"白玫瑰")只係將顏色對掉, 講既野都係大同小異. 有趣係將"愛是一本書"(原"心深傷透")變成一隻R&B, 比原版更可愛. 另一隻"第一個雅皮士"(原"最後的嬉皮士")更由"嬉皮士"變成"優皮", 兩個已過去既光輝年代配上Jazz音樂, 輕快得我都腳印印. 唯一一隻豬頭骨"月球上的人", 雖則從未喜歡過呢套一味識得嗌既廣播劇. 但曲詞都唔錯, 思想空間感唔錯.

聽完全碟, 畢竟係一隻港製國語碟, 好難同以往全台灣製作既比較. 我只能夠講似一套港產荷里活片, 地道口味扮外製, 好難令外人認同. 要係真係失敗? 認了吧!

試片室: I Now Pronounce You Chuck and Larry

重拍2004年澳洲製作"Strange Bedfellow", 舊版講兩個中年男人, 因為為左避稅, 靈機一觸扮基結為伴侶而可以少交稅項. 因而引發笑話連篇.

呢類借基立福既戲長拍長有, 不過大半因為以直出發, 變得兩面不討好, 雙失也. 不過"Strange Bedfellow"還可以, 至少對白有趣, 鱷魚先生Paul Hogan扮基又好神似.

今回拍成美版, 硬係覺得又會係雙失果隻... 再加個Jessica Biel, 直到唔恨!

梅小玲群選-"我的十部電影"

相信大家都喜歡電影, 人人總會有幾部窩心的電影. 現梅小玲舉行"我的十部電影". 讓大家以短文介紹十部自己真正心水的電影. 好讓大家可以分享大家的電影選擇. 無分深淺遠近中外, 只要是你認為可以代表自己的, 都希望可以介紹給大家. 頭十位参加的版友將獲贈禮劵. 請大家踴躍參加.

注意:

1) 介紹文章盡可能附上中英文電影名稱及海報圖片.

2) 請使用自己創作文章, 勿轉載他人介紹.

3) 頭十位参加的版友所獲贈的禮券將經郵遞送上.

4) 我及梅小玲各版主保留一切決定權利.

参加請進入以下網址:

http://www.mslforum.com/phpbb/viewforum.php?f=9

你還會記得皇后嗎?

當皇后餐廳不再皇后餐廳,

皇后碼頭仲會係皇后碼頭嗎?

成魔成仁 Chapel of Dawn

曾經每同人講起: Juno 麥俊龍. 人地都會話: 咪啦. 咁惡頂.

無錯, 初出道時負面新聞多到層出不窮. 就算過到父蔭下既"犀利醒"公司, 一樣俾人話. 但大家都睇到佢非常努力去做好音樂.

舊年一首"成魔之路"確係耳目一新. 但一直就無話再出碟既消息. 就連"成魔之路" 都變成CD Single 隨"奶週"附送. 結果事隔半年後, 呢張據說製作左兩年既新大碟終於推出.

據Juno講, "Chapel of Dawn"除左係大碟名稱, 更將會係一個時裝品牌. 除左每首"犀利醒"既主打歌都加上"Silly thing for life"既暗語外, 而家更將唱片名變成時裝品牌. 真係好佩服TK氏既商業頭腦.

呢張"Chapel of Dawn"可能會係近年意念最強亦最灰暗既概念大碟. 由王雙駿再加黄偉文包辦全碟曲詞, 再加上日本作曲/樂手並且日本混音以及匈牙利既音樂錄音. 真係不惜工本. 再加上多位本地單位例如阿菇, 林狗, 草蜢既cross over, 睇得出今次佢地想製作一隻可以列入經典既製作.

全碟並無情K歌, 歌曲上亦只帶出天使與魔鬼, 無話對或錯, 只有黑與白. 例如同草蜢及Mr. Scanner合作既"亥時出世", 有神父與魔鬼既祈禱. "Unhappy Hour"有人與魔一齊飲一杯, 又或者無間道式既"成魔之路", 更有D令我諗起近來大熱既徐步高事件. 魔警太暗? 又或者從"惡搞之物"去睇魔童. 正邪之間我睇你好你睇我好既"Poor U". 更有借聖經發揮既"左面". 我覺得最真既"第三身"講分身, 或者見得太多, 身同感受.

我好相信"Chapel of Dawn"係一張好耐聽既唱片, 更相信今年至此最有水準既一張. 風格濃烈, 未必人人受得起. 但大家不妨試試放下承見, 嘗試接受Juno既音樂, 或者可以有另一番體會.

P.S. 隨碟附送既MV DVD, 肯定係近年music video既超級佳作.

食相

呢排睇到好多blog都講食野, 由小瑟到加百列到Guy甚至連朱fun E都寫食野~

我都破例跟隊貼食~相!

不過係難食果隻.

難食一: 尖沙咀某間老牌京菜酒家

阿媽教落: 出街食飯勿嗌套餐, 因為一定難食. 以為老牌食肆唔會卦... 點知.........

酸辣湯, 味道勁怪, 又唔酸又唔辣. 完全生粉水一樣. 同另一間既螢光酸辣湯有得揮.

頭盤, 一啖已經即係想嘔... Sorry, 打後既我巳經唔想影落去, 因為掛住扣喉. 而且酒家有位阿伯侍應對B極感興趣, 不停同佢英文對答兼俟身俟勢, 嘩! 作死呀! 當我盲架!

難食二: 九龍灣某西餐廳

今次唔係叫套餐, 只係想食個下午茶. 結果...

我呢個蟹柳肉醬焗刀削麵. 意念好, 但刀削麵太諗, 真係入口即溶, 成口漿.

B呢個... 哈哈! 名都唔記得太清楚. 好似係芒果牛柳粒生菜包伴春卷. 賣相一流, 但味道係另一回事.
呢間野好奇怪, 入面有好多伙記, 但佢地都唔多願意招呼客人. 由無人帶位開始, 到叫野食, 甚至埋單. 你都要好有耐性, 分分鐘遞三分鐘手都無人會理你. 但反而見伙記們圍埋一齊傾計, 或揸住餐牌周圍行. 仲要加一? No thanks.

喊唔停: 我愛你!

講真真係無一首歌既music video可以令我喊到唔識收聲. 唯獨一隻...
S.H.E. 既我愛你!
真係喊到收唔到聲! 就算MV入面個故仔有幾政治不正確, 但係畫面絕對配合到隻歌.

我愛你 - SHE
從你眼睛看著自己　最幸福的倒影
握在手心的默契　是明天的指引
無論是遠近　什麼世紀 在天堂擁抱　或荒野流離
我愛你我敢去　未知的任何命運
我愛你我願意　准你來跋扈地決定 世界邊境
偶爾我真的不懂你　又有誰真懂自己
往往兩個人多親密　是透過傷害來證明
像焦慮不安　我就任性 怕洩漏你怕　所以你生氣
我愛你讓我聽　你的疲憊和恐懼
我愛你我想親　你倔強到極限的心
我撐起所有愛　圍成風雨的禁地
擋狂風豪雨　想讓你喘口氣
被劃破的信心　需要時間痊癒
夢想纏著懷疑　未來看不清
就緊緊的擁抱　去傳遞能量和勇氣 我愛你
我愛你我想去　未知的任何命運
我愛你讓我聽　你的疲憊和恐懼
我愛你我想親　你倔強到極限的心
哪裡都一起去　一起仰望星星
一起走出森林　一起品嘗回憶
一起誤會妒忌　一起雨過天晴
一起更懂自己　一起找到意義
我愛你 我不要沒有你　我不能沒有你 絕不能沒有你
六分鐘版:

濃縮版:

Samsung DVD-R145 入手誌

屋企部"部部膠"錄影機用左兩年, 近日一開機就只識load "hello", 襟其他都無反應. 相信係壞左. (呵呵~ 好在買左架相機之後先壞.) 因為保養期已過, 要整分分鐘可以買部所以決定索性買部新.因為我好少要錄野, 得B要錄劇, 戲同David Letterman. 而且即錄即睇. HDD又好似無乜需要. 當然既然部電視有HDMI, 我都希望部DVD機可以有呢個輸出. 我知就算普通一隻DVD碟谷上1080i都未必太有幫助, 但我估至少有少少改善卦.

原本想買Philips DVDR3400/9, 點知臨尾發現Philips有HDMI但無得上1080i, 結果臨門改買Samsung DVD-R145. 一樣可以錄 Dual Layer DVD, 一樣有Time Slip, 一樣可以兼谷+/-碟. 最重要係有HDMI輸出加可提升至720p/1080i. 而且價錢同Philips果部一樣, 所以決定入Samsung. 但發現有一環睇漏左....

買左返到屋企即刻自裝, 有auto set up都算幾方便. set好後一開始就試up-scale到1080i... 結果畫質谷爆. 播陳奕迅Get a Life演唱會DVD, 效果比用"部部膠"+色差出仲要差. 或者我唔識校所以先至搞成咁. 所以決定試Tuner, 咦? 乜咁既? 電視接受麻麻喎, "部部膠"果然至今都被譽為機皇, 連Tuner都靚過人. 亦難怪嘗試網上search Samsung DVD錄影機既評語少之又少, 因為我估大家可能知道個Tuner麻麻, 所以避之則吉. 只有我呢個傻佬上當. 好在千零蚊唔係大數目, 未致揼心... 不過有左HDMI, 部電視既PIP功能終於啟動, 第二時唔駛不停轉台.

買豉油送雞

成日D人話買豉油送雞, 誇張得很.

但今日終於見到比豉油同雞貴幾十倍既荒謬贈品. 齋講都唔信? 睇圖.

係某連鎖直銷中心賣電腦防毒軟件, 只賣二百幾蚊. 但贈品係一部名廠多合一彩色打印機. 講真一部普通既多合一打印機都要四五百蚊. 而家買二百幾蚊軟件就送部打印機, 妹仔大過主人婆, 勁!

頭文字D (機場版)

如果拓海見到, 佢都想轉行.

我的HKIFF 07 之零七電影節七不思議事件

一/ 今年電影節網上購票係歷來最亂既一年. 明明二月訂飛, 到三月中就快開始都未收到飛, 甚至有人從來未收過飛. 有關當局由解釋因為要印藝術節既飛先(已俾人踢爆無此事)到賴電腦系统出錯到有職員踢爆開幕前幾日先收到飛先至寄出. 咁電影節當局, 唔該解釋我係二月訂飛, 手上既飛都係28/2列印(見圖), 點解要到三月尾先寄出飛呢? 係郵寄香港本土需時一個月, 定抑或有人失職呢? 二/ 一個阿Rain, 就可以令戲飛響半個鐘內買晒. 仲勁過步姐. 不如下年又搵阿Rain過橋, 買得最多飛既可以請去韓國睇阿Rain演唱會甚至單獨會面. 劉華狂迷會諗: 如果係劉華就好lu.

三/ 繼舊年有糖水怪, 今年仲勁, 有食到"拍拍聲"既蝦條怪, 我位老友仲化身啤酒怪, 場內飲酒. 真係乜人都有.

四/ 年年都有人遲到, 今年特別勁. 勁到遲到超過成個鐘都有, 都咁遲咯, 入場為乜呢?

五/ 話說某場"吳清源"為頒獎禮之夜. 在頒獎禮途中, 觀眾席突然有人大嗌: "可唔可以快D呀, 我地黎只係為左睇戲架!" 全場即刻死寂. 結果大會總監怒叱果位無賴觀眾.

六/ 除左有食野怪, 仲有手機怪! 文化中心入面係收唔到手電架. 由開幕至今, 手電甚至call機都係收唔到. 今年見有人響場內拎住手電擒高擒底驚叫: 呢度真係收唔到! 又或者向帶位投訴: "點解呢度電話既?". 可惜大會堂係舊有設計, 所以仲收到手機訊號. 結果套戲一路播就一路有人講電話同打SMS. 有晚有人拎部laptop出黎打email添! 銀幕己經光燦燦, 觀眾席一樣光爆, 何其壯觀!

七/ 雖知今年電影節多公司贊助, 所以要播廣告. 但有無諗過條廣告同電影節夾唔夾呢? 經典如果條Grand Hyatt間JJ既廣告片, 就完全同套戲甚至電影節同tone完全兩個世界. 每次睇我都睇到O咀.

我的HKIFF 07 (Day 9)

捉錯晒用神!!!
好地地一個好概念, 做乜變成死亡真面目呢? 男人死左打落地獄, 點知地獄人人無感情無反應, 悶到抽筋. 諗住再去死多次, 落得死極死唔去. 原本故事發展到尾, 條橋都係唔錯. 可惜導演唔知係咪怕套戲頭十分鐘一句對白都無會悶死所以不停搞血腥爆肚流腸切手指甚至果場被地鐵拖行既爆頭情節去整醒觀眾. 講真, 我就睇到想走. 因為要趕場.
趕場去睇今年我既最後一部戲. 其實, 如果呢部係一部新進短片, 我覺得一流. 可惜硬生加入超級市場及不少爛gag, 變得成套戲精神分裂, 三不像. 極之可惜.

The Bothersome Man 超完美地獄
Cashback 愛情回水

就咁就完成左今年電影節. 除左有事miss左一部戲, 其他普遍黎講只算係中等.
三優: 超時空泡泡女, 離奇過小說, 我自求我道
三劣: 愛在基吧的日子, 一切從浮屍開始, 超完美地獄

我的HKIFF 07 (Day 8)

原以為真係講911來龍去脈, 點知變成美法互數, Juliette Binoche老左, John Turturro由角色到情節都變得無聊, 兄妹亂倫更加睇到眼突. 一部少少浪費演員既電影...

兩個英國人黎到中國大陸, 就響霍亂時期! 未睇過本小說, 但發現故事不俗, 將一段似有還無既感情響一個窮鄉內演化. 主角們演得不慍不火. 雖未致巨構但至少令人滿意.


A Few Days in September 諜戰911
The Painted Veil 愛在遙遠的附近

我的HKIFF 07 (Day 7)

Christopher Guest對香港人黎講一向好陌生, 佢導演既作品從來未響香港上過. 就算出碟都係得兩套咁大把! 近年佢以拍偽紀錄片著名, 呢套偽得黎又偽唔晒. 細片搵來發莓演員演出, 點知一個網上流言激起大家對提名奧斯卡既希望. 結果監製導演編劇經理人甚至片廠老板都想插手, 結果製成品變成一套三不像.

好大力鞭撻奥斯卡同荷里活制度啊! 對白精澼, 極之諷刺. 再加上呢套承Christopher Guest既傳统無劇本下要演員自由發揮, 結果更加有獨一無二既演出.

我問你: 你有無為過你好朋友流過淚呢?

一個目中無人, 心中只有古董既男人, 佢無朋友. 有日拍檔同佢打賭: 如果10日內佢可以搵到個真正好朋友, 咁就可嬴得值廿萬歐羅既古董. 可惜事實係呢份隱閉中年無朋友又唔識交際(咦? 咁似我既?), 點可以10日內搵到好朋友. 誤打誤撞之下識得好客到爆既的士司機教佢如何跟你做friend. 可惜friend過打band, 後來的士司機發現俾人利用. 響的士內大聲淘哭!

今年又有至愛Daniel Auteuil, 百看不厭. 記得多年前世紀大爛片"The Closet"佢又去呃人感情/友情. 今回比前作更加高難度, 唔扮基佬扮隱閉. 結尾巧妙用上"百萬富翁"呢個電視遊戲節目既特性去帶來高潮, 難度甚高但控制得好好.

所以我再問你: 你有無為過你好朋友流過淚呢? 尤其係為男人friend! 感覺係好gay, 係唔係? 咁以前"英雄本色"Mark哥豪哥咪一樣喊到豬頭. 喊只為分泌, 但付出左真友情真係好難收得番.

有時男人之間除左基仲可以有真感情真友誼.

For Your Consideration 問鼎奧斯卡

My Best Friend 個好朋友

我的HKIFF 07 (Day 6)

每個人總有回憶, 有好有唔好. 唔好既回憶通常想忘記, 但如果唔好既回憶一個唔覺意再次走進你既生活, 你會點處理呢?
泳池員工發現有孌童男搞細路, 仲將過程拍底. 原本諗住向電視台揭發, 點知誘發出比想像更大既後果. 諗唔到成班friends連員工自己都係曾經俾中年孌童男搞過. 內心爭責究竟要為呢一代做D事定抒或為報童年受辱之仇?
全片拍得好有爆炸力, 尤其電視台老作新聞一發不可收拾之後, 每個人都有自毀既傾向. 觀眾會替各位角色去擔心.

Sons 仔仔一堂

我的HKIFF 07 (Day 5)

一日趕三場, 後生時仲可以, 到我呢個年紀就真係有D難.

當年"愈笨愈開心"打真軍到令我地嘩然, 今回返到祖國再拍玩世電影. 賤格老板為左奸計搵黎演員扮幕後大老板. 要做既係就係做丑人. 點知演員就因為本身演員道德太投入角色同現實難作出取捨. 結果最後同大家開左個大玩笑. Lar Von Trier捨棄Dogma, 就連片中都要戲謔. 取而代之係停不了既short cut. 起初還可以, 到後來就真係吃不消.

大玩辦公室文化確係令人有共鳴, 但一到政治又如何?

至愛導演Nanni Moretti既The Caiman有D似前作"Aprile"(四月又四月). 製片苦無新作, 突然飛來蜢一個係人都唔想拍既劇本, 因為影射緊總理. 製片唔拍又會破產連家都散埋, 新進女導演又驚青要接手拍大製作. 大家就因為總理而走埋一齊. 之前已講過Nanni Moretti前作"Aprile"都有講意國政治. 都為左國家而痛心. 唯有老歌老片先令佢有D放鬆. 不過今回或者太沉重或太複雜, 令到成套戲有D原地踏步. 不過結局睇到Nanni對政局既怒火先至舒一口氣.

咁嚴肅? 睇部笑片啦. "超時空泡泡女"好玩到不得了. 雖然條"回到未來"橋已經番過無數次, 但今回依然玩得過癮. 大玩90年代文化, 原來除左80年代, 剛過左無耐既90年代一樣好玩. 當年人人有錢到揮金如土, 有現在無將來. 令到當代人再次反醒過去既荒謬. 幾位主角超出色既演出, 再加上真實經典人物客串, 全片毫無悶場, 笑位一個接一個. 對笑到就死既觀眾連一個休息機會都無真係太殘忍. 最後, 日本人永遠都叻係自欺欺人. 日本沉沒, 日本最後一個沉沒, 大和號....等等都睇到日本人自卑得可憐. 今回唯有自製浪漫去安慰自己. 有口痕友話: 唔知香港幾時會拍套一樣既戲講回到過去阻止老董八萬五呢?

P.S.: 今回"泡泡女"官方都玩港式字幕, 不過個"hei"好似應該串成"hea"先岩.

The Boss of it all 愈扮愈開心

The Caiman 政壇大鱷

Bubble Fiction: Boom or Bust 超時空泡泡女

長篇荒謬啓示錄: 唱衰香港(第四集) - 唱衰香港前先要唱衰大陸人

近日中央台有人放蛇揭露港商賣假野呃自由人, 我都幾同情班自由人. 遊客係易呃, 但都唔好咁離譜囉.
但係另一方面, 如果有領教過自由人既行為, 真係幾恐佈. 前兩日排隊等巴士番屋企, 幾位操不知名國內方言既自由人無排隊就企響站頭. 後尾可能見我地成條龍既人怒啤佢地. 佢地先施施然走去排隊. 但當巴士一到站, 我剛拎出銀包抬頭之際, 佢地巳經響龍尾湧上前衝上車. 排緊隊既乘客個個都黎唔切俾反應, 只有人嗌: 大陸哩排隊啦~ 但幾位自由人已經衝左上車兼坐底. 大家上車後唯有都怒啤呢幾位自稱會響將軍澳康盛花園落車, 又唔排隊又打尖既自由人.
以下片段又係自由人傑作. 片段或許會令人情緒不安,敬請留意.

兩傻遊福爾摩沙

一篇遲左四個月既遊記.

對上一次去台灣好似係2004年. 果次B公幹, 我呢位"跟得官人"就跟左去台北四日三夜. 當然佢公幹, 我都係幫佢執頭執尾, 影相拍video都要做埋. 甚少出去玩.

兩年後, 聖誕前B問我想去邊? 我話: 越遠越好. 可惜團費嚇親人. 泰國五天團都要六千幾蚊? 日本都去到啦! Sorry喎, 日本無八千唔好諗. 正當限制越黎越多, 結果都係去台灣.

今次參加所謂"Yo Tour", 其實只不過係機票加酒店套餐加半日市內遊. 原本我地選定搭長榮客機加住三星級酒店. 但點知臨出發前幾日旅行社打黎話酒店滿左, 如果要如期出發我地要加錢升級住五星級酒店及改坐中華航空. 首先, 酒店我覺得ok. 但華航....... 上次我已經死忍長榮果D吵耳機上音樂. 今次諗住長榮始終好過華航卦. 點知都係坐番華航! 雖知華航機長質素己改善好多, 但未登機, 都係有D心掛掛. 結果上到機, 無期望果然無期望. 個早餐難食到哩... 好彩一陣間就到台北.

到達台北先知道我地呢個所謂"團"只有兩家人合共八人咁大把. 響旅遊車上, 台灣既導遊不停講政治. 再加上B漏口風話自己響台灣住過幾年兼識中文. 導遊就轉用B呢位老外做話題. 悶到訓著. 當日第一個行程: 九份. 九份之前我已經去過. 確係一個好有風味既山村. B就第一次去, 去到就已經鍾意左果個地方. 九份附近風景確係好靚. B仲瘋狂購物兼掃街邊野食. 食到唔停得口!

跟住第二個行程係去買茶葉, 唉! 呢D擺明搵你笨. 結果成團人hea左10分鐘乜都無買就走. 跟住就一齊去晚飯. 一餐好求其既飯, 響平安夜.

台灣無乜慶祝聖誕節, 就算商場都無乜装飾. 只有酒店有少少聖誕氣氛. 我地住果間所謂五星級酒店就真係差少少... 上次住"三德"得四星級都好過呢一間. 或者因為係日資關係卦.

第二日, 就正式做過自由人, 兼且當好漢上101! 因為唔係假期, 101大樓一D都唔多人. 好快就上到觀光層. 可以睇晒台北市全景, 都幾值得去架. 至於101大樓個商場, 同本地IFC無乜分別. 反而地庫個foodcourt大得可怕亦經濟得可怕, 三百幾蚊台幣(大約八十蚊港紙)兩個人就可以食得飽飽! 當晚我地又完全忘記係平日工作日, 西門町未必有太多野睇同食. 結果九點鐘去到, 舖頭閂門食店打洋. 結果走左去TGI Friday.

第三日, 下晝就到誠品書店. 因為誠品響101大樓附近信義區開左間旗艦店. 我可以話史上行得最舒服既書店. 入面有五層, 由書到CD到服飾到電器乜都有得賣之外, 仲大到有D O 咀! 行一日都未必行完. 跟住我地就入左淡水. 淡水我係有個故仔講: 話說至六年前, 同B約好一齊去台灣. 結果臨出發, 佢就番左夏威夷養病. 我就一個人上路. 有日去到淡水, 坐響Starbucks, 突然諗起佢. 所以就打長途俾佢. From Taipei with Love.... 所以今次我就帶住佢去番果間Starbucks, 回味番果件事. 淡水呢個小漁村都係同九份一樣有種好令人relax既感覺. 當晚出街食飯, 去到某商場只見成個商場都無乜人既, 我都覺得奇怪. 直至B媽打電話俾B問我地感唔感受地震先知個零鐘前地震. 可惜, 我地一D感覺都無. 但響電視新聞就見災情幾嚴重.

第四日臨返香港時因為B食錯野唔舒服, 所以無乜去邊. 唯有準時到機場. 到達機場, 華航話因地震震斷電鑬所以電腦當機要人手辦理check-in. 但我問會準時嗎? 登機證同大電視話俾我聽: 準時. 咁就準時入閘啦! 去到閘口, 咦? 點解起飛時間遲成個半鐘既? 一問地勤先知因為電腦當機所以班機要延遲. 最重要係班機仲響半空未飛到台灣. 唉! 又俾人呃左. 結果幾百人等了又等. 華航雖送上汽水同花生. 今回真係食住花生睇好戲. 因為架機一降落就落客落貨就跟住再上客上貨再起飛. 有無時間做檢查架? 唯有硬住頭皮上機. 今回搭係我至愛A330機, 雖然飛機餐難食, 但至少呢款俾到我安全感. 一陣間就番到香港.

台北四日三夜, 都可以好開心.

直搗黃龍 The Man from Hong Kong

畢竟係1975年作品, 有得出巳經偷笑, 仲有想修復得靚? 哈!一開始無乜問題, 反而opening credit就見底! 可能原本拷貝已經爛無可爛, opening credit一段真係粗到哩~ 不過到正片時又好番D喎.

好睇唔好睇就見仁見智勒, 嘉禾早期既西片, 英語為主, 無廣東話.(王羽, 洪金寶有少量國語對白), 再加有賣埠保證既前度007佐冶拉辛庇主演. 好70年代B movie. 好此道者應該收貨.

佐冶拉辛庇同嘉禾應該仲有"鐵金剛大破紫陽觀", "鱷譚群英會", 呢兩套真係未睇過, 好似甚至之前本地未出過影音產品.

won ei

一條已響電台玩過既gag, 原來搬上電視一樣work!

Panasonic TZ3 入手誌

之前講過想買部新相機去取代舊果部Canon A40. 響二揀一之下終於決定入Panasonic TZ3. "蜂摘"有驚喜價! 仲平過"老伯", 兼且有一大堆贈品跟機. 平時相機除左出國影下風景之外, 有時出街我都影下snap shot. 當然睇演唱會時買二百蚊飛又想影到歌星相, 一部有遠攝既相機一定係理想既選擇.呢部TZ3有10倍變焦, 就肯定fit晒我要求, 七百萬像數又唔會太低. 當然防手震功能最岩我呢D"柏金遜"人...

再重申, 我真係唔識影相. 我好渼慕人地識影相兼影D相好靚. 我亦相要影靚相, 有架似樣D既相機會係好重要.

以下係我測試相機影底既, 影得唔好唔好笑啊~

以下係測試變焦:

(1) 28mm 響我個位望出去

(2) 10倍變焦望到對岸油塘(3) 40倍變焦(像數下降到得200萬, 開左防手震) 可以見到油塘地鐵站標誌

基本上部機揸上手手感幾好, 無我呢D大手人用咭片機時既姐手姐腳. 變焦時亦無Ricoh R6響得咁誇張. 操作方面亦好簡單, 無須要太多setting. 場景亦有好多選擇, 只係我仲未慣用場景, 好多時一較錯就又要影過. 除左變焦強勁, 防手震都係對我黎好有幫助.

整體呢部Panasonic TZ3確係一部好全面功能好強勁既相機. 有人話: 點解無面孔對焦. "老百"店員話: 面孔係俾果D連自動對焦都唔識, 一野就影既人用架.

好彩我仲識自動對焦.

試片室: 28 Weeks later

四年前, 我地有28 Days later. 有真有假. 今日再玩呢條橋, 有無覺得有D無謂呢?
今次由DV變菲林, 獨立片變成大Studio B級片鉅獻. 面目全非, 會係另一個救世者嗎?

白兔姐姐陪你打機機

唔怪之得人頭湧湧老豆帶仔排長龍, 醉翁之意....

我的HKIFF 07 (Day 4)

一套係我一套係B既選擇. 點知兩套都乃野.
一條屍引發小鎮風雲, 係人性墮落還是無風起浪呢? 縱有大明星及靚風景, 都掩蓋唔到套戲內容空洞對白乏味既殘局.
另一套係B既選擇. 我唔揀既原因係: 我唔好韓片. 而且早聞呢套野麻麻. 結果B仍然上當. 靚仔被炒後為錢甘心去做鴨仔. 點知搭上前老細. 條橋老土都無緊要, 但不停拖拖拉拉成兩個鐘. 又膚淺又悶藝. 比同類型既"美少年之戀"更虛. 完場後, 在場眾基佬拍爛手掌. 講真我無拍, 仲俾左個反眼. 究竟拍掌係俾面在場既導演演員, 還是真係感動到佢地呢? 後者的話, 中韓劇毒太深勒...

JINDABYNE 一切從浮屍開姑
No Regret 愛在基吧的日子