2007年11月5日

生活炒雜碎 (第五回)

因為B想買意粉醬, 百佳既貨色已經頂唔順, 但又唔想老遠去City Super買. 結果帶佢去九龍灣既Market Place by Jansons. 開左咁耐都未去過, 諗住會好大好多野買, 點知...
仲細過屋企附近間惠康. 就算另類高貴貨品都唔係太多, 反而普通貨品既價錢就比其他舖頭而貴. 作為惠康成員之一, 完全繼承惠康既傳统又迫又窄又多人. 行兩行已經想走.
不過好彩B都搵到佢想要既意粉醬. 並且搵到D佢以為香港無得賣既"辣根鹽", 正當佢再搵到"火雞子醬"時, 蓋頂個日子吸引到我! 尋日係十一月四日. 而果樽野既"有效食用日期"係十月十八日! 而且樽野仲鋪晒塵, 明顯都好耐無人掂過. 嘩! 果然有惠康既風範, 過左成兩個星期仲響架上. 咁岩有位職員哥仔行過, 我暗串(大聲)問: 請問呢樽有無新架? 因為果度樽樽都過晒期. 哥仔喪道歉, 急急將十幾樽醬飛落手推車. 好彩佢地仲有另一個牌子選擇, 不過大家佢果度買野, 真係要睇清楚個有效食用日期. 如果今晚我唔出聲, 分分鐘連Thanks Giving都過埋, 呢堆過期"火雞子醬"仍然會響架上.
#############################################
同B去銀行幫佢既簿仔戶口昇格到綜合理財戶口. 原本佢都唔想轉, 但一聽到有特惠利息, 兼免年費. 所以一試.
就響銀行入面等緊既時候, 大家講起業主會唔會明年加租. 我堅定話一定會! 因為我地係交緊市值以下既租金. 呢個屋苑過去既半年樓價同租金都狂升. 同一面積單位, 租金一年前同而家竟然相差二千蚊, 而且仲係供不應求. 我地非常擔心業主真係會瘋狂加租, 雖則嫌貴可以租第二度. 但係我地兩個都好鍾意呢個屋苑. B話如果真係加咁多租, 不如買左佢啦! 我話: 但係... 你又話唔想問銀行借想一炮過? 佢話: 如果有需要都無辦法架. 後黎大家一計, 七成按揭, 都已經用左九成積蓄. 諗落好似唔係太好.
當經濟好時, 並唔係人人受惠.

6 則留言:

aulina 說...

知道早d話你知,jason's 真係超級流。哥哥仔冇賞你小米一包咩?你發現過期貨應該有d謝意表示個喎(惠康的話一定有)。

樓,咁鍾意個屋苑其實都係時候買喇,d人亂講話仲有排升,到時捱租會更貴。

我早落搭,就快甩難!yay!!!!

mysimplelife 說...

其實我又唔至在果包米, 最怕包米都係過期生晒穀牛. 早知咁流就去番City Super都無咁嬲.
我地又想等到業主加幾多租時先决定買唔買.

Unknown 說...

我想問火雞子醬 同雞子係咪同一類野?

jason's我都去過真係細到死……

不過講開我都係星期日行馬莎喎……

買屋方面當年因為借左首置先無咁傷(同時間屋係銀主盤),我而家平過租架

mysimplelife 說...

"火雞子醬"係惠康個中文譯名. 英文其實係Cranberry Sauce. 用黎沾火雞黎食.

尋日先見到地產廣場介紹屯門居屋銀主盤, 68萬八百幾呎. 同B講唔駛借錢都得喎, 佢話屯門好遠.

蛋治 Canchi 說...

辣根鹽係乜? horseradish salt?
火雞子醬...乜真係咁譯既咩?
話時話, 加拿大既Thanks giving過左啦, 所以佢果樽, 可能係加拿大既貨? :P

mysimplelife 說...

吾, 係咪咁譯真係要問惠康D人先知.