私隱

前排有線女主播被人電話性騷擾, 懷疑有員工響公司內聯網偷取電話號碼犯案.
我一直相信內聯網俾互聯網一樣咁唔安全, 但不幸各大公司仍鍾意將大量員工資料放上內聯網. 記得之前一份工, 外籍上司要求將我地手提電話號碼放上網供緊急時其他相關人仕或部門使用. 但我同幾位同事覺得有侵犯私隱之嫌. 內聯網即係其他部門或姊妹公司甚至全世界既姊妹公司既同事都可以進入. 登手提電話號碼都係為左工作上需要, 例如我負責新聞台, 半夜三更有突發新聞有節目改動我都可以預知同幫手. 但要係其他無關係既人都可以得到我既電話號碼我覺得好無需要. 之前上司已經無厘頭要求放我地既大頭照放上內聯網網頁, 心諗我地雖然係電視台, 但我又唔係藝員明星, 只係個職員仔, 都唔係賣樣, 做乜要落相呢? (而家新公司係可以選擇登相或唔登相.)
所以我地向上司反對個建議, 有同事甚至揚言會向私隱專員公署求助. 結果件事被擱置, 依照番之我地既建議: 列印電話號碼名單只分發俾相關人仕.
仲以為件事告一段落...
有一日, 我既公司電話響起, 係外面打入. 一接對方知我姓乜, 但竟然係理財公司打黎既推銷電話. 但我從來唔會用公司電話號碼作其他用途, 所以我問對方佢點解有我呢個號碼同知我姓乜. 對方支吾以對, 辯稱響朋友手上得知. 我問咁位朋友姓甚名誰佢又講唔出, 仲話:可能你位朋友想俾驚喜你. 我問: 咁你係響你朋友手上得到定我朋友手上得到呢? 佢又答唔出. 我話: 咁既然你乜都答唔到我, 點解我要buy你既野呢? 況且你又解釋唔到點解你有我號碼, 我懷疑係你非法偷番黎, 所以我會報警.
對方收線都收唔切! 同其他同事講, 甚至唔同部門, 都不約而同都曾經收到呢間"康X" 或 "X宏"理財既推銷電話. 都一樣打到公司電話去. 好明顯公司有有心人響內聯網偷取同事電話號碼同姓名交俾呢間理財公司既人.
所以大家將野放上內聯網前, 請三思.