2007年9月14日

呢頭家

近來響網上見到有好多後生仔女想自己搬出黎住或者新婚甚至試試同居生活.
但問題係大家對呢件事太理想化, 甚至可以講係太天真! 以為月入幾千租個二三千蚊單位就可以自由自在. 完全忽視往後生活既需要. 作為同居左三年幾唔算太耐, 但我都樂意做個過來人, 傾下置家之道.
就由搵樓開始, 當初因為我地收入唔多, 搵樓只可以搵D細單位, 質素同環境都係麻麻. 好在當時SARS過後, 樓市剛有轉機, 租金尚未起飛. 所以搵到個連傢電既細單位, 一來可以慳一筆置家電費, 二來搬走時都唔需要太大工程. 其時租金已經佔二人總收入既差唔多四分一, 淨低既唔多. 所以平時起居生活水電煤都盡量慳. 例如買餸, B唔識廣東話, 試過去街市俾人搵笨, 所以自始只識去惠康買餸, 貪佢唔駛識廣東話. 餸菜會係貴D, 唯有響日用品上慳. 惠康牌永遠係佢既"飛佛". 直至阿媽教我: 去藥房買會平過超級市場好多. 就改變左我地買野既習慣. 梘液番梘洗頭水牙膏漱口水洗潔清全部藥房最平. 分分鐘一次過可以慳十零廿蚊.
水電煤亦係另一大開支! 港島既電費零舍貴, 夏天試過單月都七八百蚊. 當然係計每晚開冷氣開足12個鐘. 但因為B既習慣改唔到, 想慳都唔得. 所以通常每月總支出都要成萬二三蚊, 已經佔收入既一半, 仲未計俾阿媽既家用.
後黎, 大家既收入有改善, 可以住好D同住大D. 所以搬到呢度, 地方大左, 但租金只係大家既總收入十分一. 雖則淨低既錢多左, 但我地都係想過番之前既生活, 繼續慳家.
因為我真係怕左百佳既唔乾淨餸菜, 每個周末都會陪B落去行街市, 買D新鮮餸菜. 或者有我同行, 佢從未試過俾人搵笨. (只有一次佢自己買左條八十蚊既魚, 我一睇, 頂多值廿蚊.) 所以餸菜可以慳得更多. 梘液番梘洗頭水牙膏漱口水洗潔清依舊藥房最平, 但呢區既物價似乎仲貴過北角市區, 一支濃縮洗潔清北角賣八個半, 呢度要十蚊枝, 超級市場要十二蚊!
水電煤真係覺得電費九龍係平D. 例如上兩個月, 因為B放暑假一日廿四小時開住冷氣開足成個月都係六百蚊. 不過我遞上果張過千蚊既電費單俾佢睇(中電係雙月計), 佢都話要再慳. 水煤每張單都係百一二蚊. 所以呢度每月開支都要萬五蚊以內. 平時各自生活費, 佢支出多數係買書, 我就係買碟. 花費都係每月二千蚊以內. 以兩個人既生活其實都唔錯.
希望以我呢個例子, 俾到大家一個印象, 究竟搬出黎住係咪真係咁理想?

4 則留言:

aulina 說...

呢排都有聽到後生女同我講,佢話留完學返嚟要響屋企對住呀媽好煩,好想搬出嚟。我話:你搵唔到兩皮一個月嘅工又冇人同你分租的話,諗都唔好諗。

可能我細細個開始要跟住呀媽去超市/街市買嘢,你講果d我好細個就知喇(所以我而家都會帶兩個去架),可惜呢d所謂師奶嘢唔係咁多人未使用就學,細路睇嘢諗唔到水電媒都要計。:)

我夜晚唔開冷氣,日頭細路多數返咗學又係唔使開好耐,住港島夏天都只係四百幾電費。

mysimplelife 說...

我呢D男人老狗就好耐未曾同阿媽去買餸, 唯有每次番阿媽度食飯同佢攞料.
當然你果度近海真你份外通涼, 但我呢度係個山谷, 前面仲有堆屏風公屋遮住個海. 唔開冷氣都唔得.

Mixer 說...

你的部落格已成功登錄在www.mix-blog.com,由於聯播系統更新需時,請耐心等候,非常感謝你的支持!

小瑟 說...

成個月24小時開足泠氣都係 4百幾電費都真係幾平喎!!! 我依家開左2/3個月, 唔知今個月幾錢呢~~~^_^

出黎住都真係唔野小架!!!