2007年9月7日

佢老母...

今朝睇到呢段新聞真係火都黎埋. 點解有D咁既老母會做埋D咁既野用報復心理對待自己子女.
我都曾經講過現今太多潮童成為父母, 尤其十零廿歲連自己都顧唔掂仲要養幾個細路. 前幾晚就親身目睹一件火都黎埋既事.
事發地點係屋企樓下間茶餐廳, 隔離檯係一家五口. 包括一個大約得廿歲既潮女, 仲有兩個得三四歲既小朋友, 另外仲有頂多十四五歲既男仔, 再加一個中年女人. 根據佢地對話, 潮女係果兩個小朋友既阿媽, 中年女人係潮女既阿媽, 男仔係潮女既細佬.
總觀成晚三個大人只顧食食食, 係不停咁食. 兩個小朋友就不停咁卡位爬上爬落, 把弄刀叉. 係! 佢地拎D叉黎玩. 嚇到我死. 但三個大人繼續食食食, 直到小朋友玩到無野好玩, 將D叉掟過黎. 佢老母先至鬧爆其中一個細路女, 細路女當場喊爆. 雖則D叉只係響我地側邊落地, 但場面震撼, 正期待佢地會對我地講對唔住. 但佢老母好少理, 叫waiter過黎問可唔可以俾多幾隻叉, 因為檯面D叉全飛晒落地. waiter真係俾左幾隻叉俾佢地, 跟住兩個細路繼續有新叉玩. 三個大人依然無理繼續大餐, 其間阿媽曾經餵過鐵板牛排定豬扒俾個細路女食, 但可能太熱, 嘔番出黎. 跟住又俾阿媽粗口鬧爆, 細路循例又喊爆, 直至佢又搵到有餐具玩為止. 結果成晚, 大人就不停食, 細路就不停喊.
究竟呢個係乜野家庭呀? 愛登士家庭就話好笑啫, 呢個黐膠線家庭? 真係好得人驚. 有時童黨問題, 細路唔駛出街都會學壞.

2 則留言:

艾麗絲謝 Agnes Tse 說...

依家新一代真係好唔掂, 學壞不在話下, 就係high藥high到short short地都有大把.

果個阿媽認真要打落十八層地獄!

小瑟 說...

下一代有時都好無辜......生長係呢D PK家庭......希望個天比佢地有好既造化啦!!!