2008年12月27日

The worst meal in my life: 亂到甩轆的東尼羅馬




果然係貪字得個貧! 為左果一百蚊coupon走去攞苦黎辛.
B一聽到話去Tony Roma's, 簡單歡喜若狂, 原來佢響夏威夷住既時候係經常幫襯. 所以話聖誕呢餐會去東尼羅馬, 佢真係未出發先興奮. 但惡夢竟然由點餐之後開始.
我地去係佢地灣仔新分店, 地方比較細, 所以就算訂左檯兼準時到都要等15分鐘先有檯. 我明白地方細, 檯自然會都係比較細張. 之但係佢地碟碟咁大碟, 擺得沙律小食已經擺唔落主菜, 仲有餐飲同自己隻碟呢?
叫左燒骨一份, 伙記仲問要跟焗薯定薯條, 我地一致揀薯條. 另外叫左一客沙律兩杯drink. 兩杯drink一陣間就到, 跟住突然送上洋葱湯一客. "我地無叫湯喎!" 位待應轉身check機, 隔離檯位大叔出聲: 我地叫架. 待應先至搵到物主.
一陣間位待應又送上牛扒一客. "我地都無叫牛扒喎!"待應又去check機, 但竟然認定係我地叫, 我叫check真D好唔好, 發現附近幾檯都無叫, 認真神奇.
終於我地客凱撒沙律出場, 味道認真麻麻, 同上星期去"加州薄餅"食既一樣麻麻, 比"肥佬"更加差幾皮. 跟住燒骨出場, 咦? 變左焗薯既? 正想搵人解答呢個問題, 隔離檯位阿叔又出聲: 我地係叫焗薯. 我心諗: 又送錯檯??? 一晚錯三次以為算經典, 點知低處未算低! 又有待應遞上半份燒骨跟焗薯, 我直接話: 不如搵你經埋黎傾下. 經埋當然無出現, 亦發現原來原先果全份燒骨係我地, 而家呢半份先至係隔離檯. 隔離檯大叔已經食緊份燒骨, 結果佢又重頭整過原份燒骨俾我, 至於隔離檯大叔就可以半份價錢食全份燒骨, 有著數哩!
25分鐘後, 我地份燒骨上檯, 依舊跟焗薯, 我即刻反白眼. 一份燒骨錯三次? 肥仔待應見狀好懶醒目話: 咦? 係喎, 應該係薯條喎, 我補番一條俾你地. 到頭來佢真係送上一小碟薯條, 好有施捨既感覺, 對唔住都無聲.
跟住叫甜品, 叫左個唔知乜野既焗蘋果跟雪糕. 但佢地完全無提醒我呢個甜品製作需時, 結果我地兩個人呆等多20分鐘. 我無催單, 但佢就不停話個甜品做緊, 因為而家太多檯同時間叫甜品, 所以要多花時間. 但我見附近勁多空檯, 就算前後左右有人既檯唔係食緊主菜就係連甜品都食完, 肥仔待應將一切負任推晒落顧客身上, 非常不知所謂. 最後甜品食完埋單, 都可以錯多次, 將隔離檯既單俾左我. 我真係頂唔順大嗌: 又錯?
成晚我地就活在錯到甩轆既奇景下食完餐飯, 埋單扣除coupon後實收二百五. 食物質素真係差到七彩, 燒骨汁淡兼骨肉分離, 應驗左"阿蘇"所講"難食骨". 不過個甜品又加番少少分, 唔會太甜, 味道又唔錯.
如果你要我俾分, 十分滿分既話佢地會係負九十分. 如果問我會唔會再去幫襯? 我同B都齊聲: 一定唔會.
問題: 根據以上全文請問今晚呢間餐廳一共錯左幾多次呢?

4 則留言:

Marcosora 說...

還好我上次去的是舊店~ 經理有經驗之餘 (我地自己叫錯野食都fix到-.-) 地方闊落到好似開圓桌會議咁~lol (不過未見識過新店比較唔到)

mysimplelife 說...

我無去過舊舖, 不過應該都唔會去.

Ogake 說...

自從我係美麗華分店食過冷霄ribs之後,都無再去過,講緊既係幾年既事啦~
大堆頭既野食,我都係喜歡去"肥天使"同"出左去返黎"多D~

mysimplelife 說...

無錯, 肥佬同outback真係鐵膽, 走唔甩.