2009年1月15日

老馮既咩? 請用閣下金錢支持唱片工業

朋友響MSN問我點解響MSN用呢個標題: 老馮既咩? 請用閣下金錢支持唱片工業! 做乜事咁嬲, 其實我真係對公司同事有D勞氣.
話說我有個習慣, 如果我覺得張唱片好聽, 我樂意跟同事分享. 通常我會將CD轉成較低質素既mp3跟住放上自己部門既public server, 只供自己部門同事分享. 原意係如果佢地覺得隻唱片好聽, 佢地會買番隻CD自奉. 起初真係有呢個效果, 但後來又換左批"純正港女"同事, 呢個好意變得邪惡.
變得佢地有request, 無論好唔好聽都一律希望我可以奉獻. 起初以為如果佢地真心"試聽"完去買碟, 我都問題不大. 點知原來呢班港女只係倚賴, 128kbp低質mp3都照收, 但求隻歌有音樂有歌詞有人唱兼聽到唱乜, 歌詞有關乜, 編曲編成點一律不理. 更甚有日有港女同事又問我有無邊個邊個隻碟, 我話無, 點知佢一句: 網上無得download咩? 我真心爆左句: 你都痴撚線, 我所有歌都係真金白銀買碟錄番黎! 港女同事做出好驚訝既表情話: 下? 乜仲有人買碟架? 仲以為你所有歌都係download...
跟住有一日, iPod播緊陳奕迅一D舊歌, 另一港女同事問我乜野歌, 我好詳細答佢係陳奕迅一隻從來無出版過既唱片入面既歌. 點知第二日呢位同事突然叫我大叫: XX, 今日我有帶隻"手指", 可唔可以dub果隻碟俾我?
嘩! 老馮咩? 我唯有答: iPod入面D歌係拎唔番出黎, 而且個種(CD)響屋企. 答完轉身繼續工作. 好彩佢無再追問可唔可以借CD.
我知我係好心做壞事, 但只覺而家D人既惰性越黎越嚴重, 全部都係飯來張口. 大佬呀! 都要有人出錢買米再有人去煲飯, 你先有飯食. 你又唔肯出錢又要食飯, 分分鐘遲下就連屎都無得食!
所以我已決定暫停響公司做歌曲分享, 等大家一齊捱餓.

P.S. 舊年年尾蘇永康隻碟好正呀!!

5 則留言:

匿名 說...

唔應該暫停,應該以後都唔好做

Unknown 說...

而家D人覺得買碟係件怪事............

mysimplelife 說...

根本呢一代D觀念錯晒, 買幾千蚊個LV銀包會覺得好值, 用低過一百蚊買隻CD會覺得好貴. 所以之前報章果個"名牌流浪漢"我會覺得係抵死, 唔抵可憐.

匿名 說...

我想知邊首陳奕迅咁犀利 :P

我都覺得呢一代習慣晒,真係飯來將口。如果我遇到呢類人,一定唔會show。

八九十年代,買碟係正途,而家呢個年代,買碟反而變左怪獸,會俾人睥睨,真係唔識講....

mysimplelife 說...

其實係陳生隻"I had a great time".

所以發行話而家香港個市場越黎越細, 越黎越少人買碟搞到發行唔敢點出新碟.