2008年7月13日

響末世為左慳果一個幾毫

今日報載話即食麵加價到四個幾一包, 突然發現好末世feel. 之前油米都加到天價引起搶購, 今回連窮人恩物既即食麵都加到脫離現實, 我感覺有一日, 已絕跡多年既二手飯又會出現. 不過幾間連鎖快餐既食物份量都已縮左一半水, 可能好難會有食淨既情況甚至乎可能食唔飽既出現.就係響呢個末世要想盡辦法去慳一個幾毫. 早講過呢兩個月都錄得赤字, 所以真係要慳D駛. 以往響超市買盒裝奶, 收銀都會問: 有無奶咭? 但真係唔知乜野係奶咭, 有乜作用? 邊度可以申請? 一直都無追問收銀. 可能被問得太多次我地又買到熟晒, 直到有次收銀又問同一問題我就試問: 乜野黎架? 女收銀響收銀機底拎左張咭俾我話: 呢張就送俾你! 原來所謂奶咭, 其實係張優惠咭, 平時響超市買兩盒盒裝奶要十一蚊, 但憑呢張咭買"九龍奶"就可以十蚊有找. 過去果幾個月仲慳左唔少, 原來除左奶咭, 呢間公司仲有發行麵包咭同果汁咭, 一樣可以慳到一個幾毫.
少數但長計, 如果有即食麵油米咭, 咁真係可以救世!

2 則留言:

aulina 說...

窮人係唔飲奶的……

其實奶卡,學校係會派的,我兩名就經常有拎返嚟益我,不過,我屋企係唔飲奶的,窮嘛。:P

仲有美心蛋糕卡的,好似買西餅蛋糕平少少。點解有?因為細仔訂飯間供應商係尾森囉。

麵貴有原因的,全球失收,我幾個月前咪發現麵粉貴咗囉?而家d麵先嚟貴,算係咁喇。

如果你今日有路經街市,d菜價先嚇死你。

mysimplelife 說...

疑問: 1)丁麵賣四個幾, 但公仔仍然可以維持賣兩個幾, 乜野道理呢?
2) 窮人唔飲奶? 第一次聽. XD