呃人電話又出動

今晚搭車番屋企時收到個電話話係香港大學做民意調查, 咁我咪繼續聽:
女: 請問你追到通脹嗎?
我: 吓? 你想問乜呀?
女: 我係問你追到通脹嗎?
我: 我實在唔明你問乜? 你條問題好有問題囉, 乜野叫做"追到通脹"?
女: 我意思係通脹你追得上嗎?
我: 當然追唔到啦.
女: 多謝你, 好而家要少少個人資料做參考, 請問先生既職業係?
我: 傳媒
女: 哦(dead air左兩秒), 請問先生你公司係幾多呢? 一萬五千以上定以下?
我: 吓? 公司? 我無公司喎.
女: 哦(又dead air左兩秒), 我係問"工資".
我: 以上.
女: 請問你係20-30歲?
我: 係20-30歲以上
我: 請問你係邊間機構既調查?
女: 我地係香港大學既?
我: 你係香港大學?
女: 我地係香港大學委託做調查.
我: 咁你地係邊個團體呢?
女: 哦(又dead air左兩秒), 係香港大學委託我地中山一間公司做調查.
我: 吓? 中山公司? 印象中香港大學無搵過中山既公司做調查喎.
女: 咁好啦. (極速收左我線)

結論: 今次搵老襯硬銷電話搵港大過橋, 真係報得警! 港大都有自已一team做民意調查, 駛乜搵公司做, 仲要係中山既公司?? 再者, 民意調查響十年前已經係用電腦做, 不經人手, 亦都唔會問埋D咁個人既資料, 要呃人都用下腦啦, 唔該. 再者唔該set問題時做好D, 或者搵個識表達自己同識中文既黎做, 連問人幾多歲都可以問成咁, 無言.
最後我會公佈佢既電話號碼, 等大家以後見到呢個號碼絕對可以唔聽!

31899962