身心康泰就唔好腳底按摩?
B有日響屋苑平台花園散步時發現呢塊牌, 佢笑到收唔到聲. 留意英文譯本.
2009年5月31日
2009年5月30日
究竟市道係咪真係咁差?
剛剛晏晝去飲茶, 響等位之際隔離有位坐輪椅既伯伯講左以下說話: "又話個市差, 又咪係咁多人去飲茶咁多人響商場買野, 都呃人既." 跟住有個女仔走埋去好惡咁講左兩句: 你又亂噏乜野呀?
亂噏? 小姐, 其實我都有同感. 過去果半年, 好多人都無左份工係真既, 公司要cut人或唔再請人係真既, 但係如果話市面生活質緊差左? 我又唔覺喎. 周圍既人都仍然大洗特洗經常消費, 或者身邊有太多呢D富貴人, 每逢有所謂開倉, 賴理賣衫定賣鞋, 有女同事都一定血洗一番. 亦有同事每隔三個月出國遊一轉, 呢頭先話邊度邊度好正, 果頭又話下星期又飛. 就算出街食飯都似乎無被經濟拖累, 就好似屋企附近一間以往人跡罕至既太興, 近月都經常爆滿. 附近間翠華更加唔駛講, 依舊要排隊等檯.
總觀網上, 手電相機電視依舊多人買賣, 分享帖更加源源不絕. 買藍光碟既更加係要一次過幾十張咁買, 計你二百一張, 那四十張連運費好歹都要八九千. 買新樓盤一樣豪, time to say goodbye都吸引到咁多人去入市(諗起隻歌都想笑!).
當然世界上有樣野叫信用卡, 再加埋安信兄弟果種唔負責任洗腦式宣傳, 我諗好多人都成身卡數. 所以我諗呢一刻仲好似繁華盛世, 但當卡碌爆既一刻, 新卡又唔批, 市道先至係最差. 到時周街空中飛人或者上樓自助BBQ都會經常出現, 到時又會有苦主出動鬧政府.
經過負債一役, 對自己財務都好小心, 呢一刻零卡數再加小量積蓄, 我都希望可以安然渡過未來更差既市況.
(不過我承認因為部手機失靈無晒聯絡, 我都諗緊買唔買新手電... 又要錢, sosad)
2009年5月29日
當唱片公司都抽樂迷水既時候...
當唱片公司或音樂人不停叫人唔好download當老奉, 真金白銀去買音樂既時候, 原來連唱片公司都抽左樂迷水.
陳奕迅推出單曲"七百年後"時, 有位有心樂迷自製左個MV, 將歌曲加上卡通Wall-E片段完美結合, 引來一時佳話, 甚至對隻歌都好有正面評價.
點知唱片公司打蛇隨棍上, 將呢個網上MV變成Karaoke版推出, 就連原創人都唔知... 雖然原創人盜用卡通片段係唔o岩, 但唱片公司一個唔該盜用兼用黎謀利係咪罪加一等呢?
原創人MV:
唱片公司自製MV:
2009年5月28日
2009年5月24日
錯解六四?
【本報訊】皇仁書院兩名學生昨日在一個六四
座談會上，指當年北京學生受外國利用，要推翻中共，又深信當年屠城是因學生先襲擊軍車、軍人，要引起內戰。兩人言論引來全場嘩然，經歷六四洗禮的學生領袖和傳媒人即場「教導」二人，彌補學校不教的失誤。
該座談會由中學生聯盟舉辦， 30多名學生出席。他們先觀看六四屠城片段，再由講者講述當年見聞。至討論時段，皇仁書院應屆會考生李文棋說，六四頗恐怖，屠殺造成生靈塗炭，但反問「如果冇六四會點？中國會更加好？」他又認為當時學生被資本主義國家利用，「美國想透過民主運動，推翻共產黨。」
另一皇仁生溫駿瑋持類似觀點，「當時有人話，要趕走共產黨，迎接國民黨返嚟。」他不相信軍隊先開槍殺人，「上網睇到學生攞刀去劈裝甲車，啲人仲可以燒死埋（軍人），做埋燃燒彈去襲擊。」他堅信民主不適合中國，「仲有好多文盲。」
出席座談會的支聯會副主席蔡耀昌叫二人拿出證據支持論點，「有啲市民擲吓石，你知唔知係乜時間呀？係解放軍開槍殺緊人呀！」應屆會考生黃綺婷說：「坦克車一碌過就死，我揸把刀啫，可以做得乜？」社民連立法會議員黃毓民不屑溫駿瑋所說，「你講嘅都係流，今時今日冇人再咁講，好佩服你！」當年目擊六四屠城的記協新聞自由小組成員麥燕庭教導二人，切勿道聽途說，「你唔明嘅問題，趙紫陽已有答案畀你。」
兩名皇仁生會後表示，他們有修讀中史，李文棋說：「因為考試冇考，老師冇乜點教（六四）。」溫駿瑋稱，他是從網上得到有關資訊，強調真相沒人知，「話柴玲係第一個走佬，好多都咁講；話解放軍殺好多人，睇嗰啲片段無殺人，佢哋對住人民紀念碑頂開槍。」
考試無考, 老師無(乜)教, 就連網上資訊都可以引發佢地既無限幻想. 呢一代無思想只得幻想, 難怪現在世界只會倒後行而唔識反思同進步.
呢兩位同學真係讀屎片!
http://hk.apple.nextmedia.com/template/apple/art_main.php?iss_id=20090524&sec_id=4104&subsec_id=11867&art_id=12794444
2009年5月23日
日日足三両
尋日諗食晏時突然靈光一閃, 老麥最近將足三両全日供應, 其實之前晚上供應時都試過一次. 不過因為太夜, 同B一齊分享一個包都飽到想嘔. 今次心諗日光日白當正餐, 就算double足三両都應付到卦...
食完後, 原來份量都ok, 不過如果薯角减半或改番薯條或者效果更佳. 最正係兩塊厚牛肉都多汁, 並唔太乾, 只係頂層太多汁同芝士, 反而包底過乾, 唔太平均.
去到今日, B又話要整個老麥午餐, 結果又encore足三両. 今次只叫普通足三両, 份量減少左, 但似乎比double更易入口, 唔會因為底層太乾影響口感.
2009年5月22日
2009年5月21日
2009年5月20日
終於有覺好瞓
之前講過前排頻頻失眠, 就算周末前後都可以失眠. 用盡所有辦法, 結果都係成晚眼光光.
有日去Body Shop買洗面膏, 佢地向我sell呢隻"Deep Sleep"既噴霧, 成份有有機甘菊, 棗子精華, 天竺葵、杜松同埋廣藿香香薰精華油 只要噴少少響身或枕頭就可以令人鬆弛容易入睡. 第一晚我嘗試噴少少響頸同手就走去瞓, 但似乎仍然有半晚眼光光. 第二晚就試噴落枕頭, 果然當晚一睡到底. 起初我都怕會倚賴, 所以試一兩晚唔噴, 結果係50/50, 有時仍然眼光光, 有時仍有聒睡. 我諗我仍然會用呢種噴霧, 至少平日都要有覺好瞓.
2009年5月19日
2009年5月18日
Mad Men 廣告狂人
嘩!! 我愛台灣!!! 只因等極香港電視台都未見有買呢套劇, 台灣已經有公司買左直出碟. 一盒四碟十三集再外加特別收錄算交足功課, 只可惜碟首有段超級煩加超級膠既台灣發行公司既短片交代屋企睇碟係唔駛熄電話.
暫時只睇左第一集, 已經好想追落去. 近年美劇少見會拍六十年代既題材, 唔係現在就係古代, 中間既時光好似消失左. 所以呢套份外吸引, 我諗一有時間會繼續追落去.
2009年5月17日
SONY Music - Pure Gold Series
香港樂壇早兩年興起既復刻潮, 去到呢一刻以為真係已經過氣. 諗唔到較早前再鯨吞BMG後"又"改名既SONY music又再回帶推出呢個"Pure Gold Series". 又係將以往CBS/SONY, Sony Music, 現代唱片, BMG時代既出品以金碟型式出版. 記得好多年前CBS/SONY時代已經出過一次金碟"回帶", 就算之前以SONY BMG名義出既經典系列都已經將呢幾間唱片公司六七成既作品出過. 今次再出諗住有D補遺, 點知有D又係出完又出既回帶西. 響揀唔落手之下只執左呢兩張, 番到屋企一拆開, 咦? 歌詞都慳番!! 上次經典系列五十蚊都有歌詞啦, 今次索價六十幾竟然歌詞都慳埋, 實在有D過份. 雖則金碟對音色確係有少少幫助, 尤其CBS/SONY呢批後期數碼錄音真係好靚聲. 不過用六十幾蚊去回帶就真係見仁見智.
無味神棍
諗住去個博物館日, 點知去到先知記錯日子, 唯有速速走去醫個肚.
記得之前去"霸王山莊"曾經都唔錯, 所以番兜. 但唔知點解一入到去, 好似入錯左舖頭. 下午茶時間大多數都係十零廿蚊, 當然亦有三十零蚊既炒粉麵或者四十零蚊小菜. 價錢都ok架, 點左個酸辣湯, 排骨趟, 小籠包, 醉雞同埋高力豆沙, 上菜先知出事.
落單無耐小籠包同高力豆沙(!!!)已經火速送上, 跟住話午市無醉雞喎. 下?? 咁又會出現響下午茶張菜單上面既? 唯有改叫客水晶牛肉包.
小籠包皮太薄一拎就穿, 排骨麵完全無味, 湯清如水, 排骨疑似白灼. 所謂水晶牛肉包, 又咪係普通牛肉包! 最弊係皮厚肉又無味.
總之成餐飯除左個酸辣湯喪辣之外, 其餘都係口啖啖. 就連服務都差到無朋友, 明明坐近門口當眼位, 叫極人都無反應, 只因大家寧願打牙較. 哼! 一毫子貼士都唔俾呀!!!
P.S. 原來太興冰鎮奶茶細杯左, so sad.
2009年5月15日
2009年5月14日
BD 愛漫遊: Twister 龍捲風暴
"Speed" (港譯: 生死時速)既成功除左因為男主角, 仲因為有個唔錯既劇本. 至於導演Jan De Bont始終係首回執導, 甩漏梗會有. 但佢去到第二部作品, 竟然係無進步之餘, 仲再退一步. 由劇本演員導技都不濟. 單靠特技實在救唔到幾多. 成部片係故事有故事去, 演員無戲可演, 特技係勁但流於推砌, 連最簡單做少少效果去遮去唔應該出現既陽光都做唔哂, 簡直係個災難.
但想唔到往後既"Speed 2", "The Haunting"更加慘不忍睹. 我諗Jan De Bont都係做番攝影師比較適合.
呢張BD畫質確係唔錯, 再加上有少量特別收錄, 作為一個反面教材, 值得收藏.
2009年5月13日
辦公室無聊問答
1. 有pantry的話, 你會在那裡洗手而不去洗手間嗎?
唔會, 因為公司個pantry仲污糟過洗手間
2. 一天會沖多少杯/次水?
除非病左, 否則好少飲公司水.
3. 每星期有多少餐午飯是飲茶/茶餐廳/大家樂?
飲茶:除非同事生日/ 茶餐廳:三餐/ 大家樂:一餐
4. 一天去多少次洗手間?
早午晚三次
5. 你的cubicle看到風景嗎?
以前有無敵維港景(見上圖), 搬左位後面壁.
6. 天天也和同事午餐?
無左好耐, 日日食自已
7. 午飯時段都去購物?
有時會, 但多數去書店同拮豬島
8. 有什麼怪習慣/奇怪私人物品放在公司?
全日喪播歌或收音機/多年同事送俾我既聖誕禮物
9. 有帶飯習慣嗎?
無, 懶!
10. 最討厭的人/事物
E小姐or懶蟲/去小便俾某同事裝...
11. 試過第一個上班要開門/鎖或最後一個下班要鎖門嗎?
公司用職員証開門, 無鎖亦唔會鎖
伸延閱讀: 辦公室無聊問答 - Blah Blah Blah
2009年5月12日
2009年5月10日
BD 愛漫遊: It Could Happen to you 傾城佳話
近日除左響公司入左好多DVD, 亦都響街入左幾張BD藍光碟. 近來出既BD藍光碟除左有新片, 仲有D屬於經典電影系列又或者比較熱門既舊片.
單係尋日已經響一日內連睇兩部戲, 其中比較鍾意係呢套"傾城佳話". 正如版友話齋, 真係好懷念Nicolas Cage以往小本製作或喜劇既演出. 呢套戲佢演出一個好人, 真係演得恰到好處, 對比飾演佢老婆既Rosie Perez既誇張萬倍既演譯, 確係令人更信服. 另外久違既Bridget Fonda亦都演得好好, 可惜佢近年歸忍, 少左演出, 懷念佢既Single同埋SWF.
導演Andrew Bergman向來都係保証, 只係自從拍過爛片Striptease後就完全無晒佳作. 呢部片佢將一個真實故事改編得比較戲劇化, 比現實故事更引人入性. 正如佢既"Honeymoon in Vegas"既故事比用同一條橋既"Indecent Proposal"更討好.
但呢隻BD既畫質並無我想像之中咁好, 只係算比DVD較佳, 碟中除左導演講評亦都無任何收錄. 不過因為之前我無買過呢部戲既VCD/DVD, 呢隻BD都算係比較上佳既收藏.
2009年5月7日
2009年5月6日
財到光棍手
過去兩個月, 我父母都遇上奸商, 兩次都要我出馬擺平, 驚覺原來所謂大機構都有枯枝.
第一單又係無線收費電視, 係呀, 又黎勒. 今次向父母話檢查天線. 神奇在我父母又放佢地入屋, 今次佢向我父母話因為大廈既衛星天線(??)係佢地保養, 所以向佢地介紹可以睇多好多個台. 我父母又一知半解答應裝解碼盒, 直至細妹番到屋企, 見到有人裝緊無線收費電視既解碼盒, 我父母先知又上左檔, 最慘係佢地簽左18個月合約兼預繳三個月月費. 細妹有打電話上去要求解約, 當然無結果啦. 我唯有借助傳媒力量同有關公司跟進. 過程就唔想咁詳細, 不過想講係有關公司話明有齊白紙黑字再加電話真人確認, 我父母確係響知情下有簽約. 有傳媒亦都話呢間公司係好狡滑, 就算前線員工如何呃人, 佢地有另一條線令到奸計成功. 最後, 無線收費電視都願意跟我父母解約, 不過已經預繳既月費就無得拎番. 唉, 財到光棍手喎...
第二單更加正, 又係發生響我父母身上. 今次係PCCW. 上個月我父親收到PCCW既來電向佢推介續約新優惠, 但我父親又猶疑不決, 有關職員問我父親身份證號碼確認身份後, 我父親話要考慮一下就收左線. 當晚我父親係有致電俾我有關呢件事, 我都立即打上去確認我父親無續約. 直到尋日, 我父親收到PCCW既續約確認信. 又中計!! 睇怕又係打去12022既時候.
2009年5月5日
2009年5月4日
手電
上圖呢部手電係2006年買入, 用左差唔多三年. 但近排開始經常有問題, 唔係有來電時一個唔該hang機接唔到來電, 就係個5字永遠久不久失靈. 近日更甚係個Windows完全無聲無色地hang左, 所有來電都無法打入. 我諗都係時候換手電, 不過我諗應該唔會再買Windows Mobile既手機. 心目中我只要求有手寫功能可以俾我呢D懶學打字既虫手寫中文SMS, 最好就有收音機同埋有Wi-Fi功能等我可以旅途中聽收音機或上網解悶.
不過... 呢個環境同埋支出收緊情況下, 買新手電可能真係得個諗字.
2009年5月3日
直擊灣仔維景洒店被隔離住客現況
今次H1N1來勢兇兇, 酒店住客被隔離雖然係好難受, 但為左大家香港市民著想, 希望佢地都係會明白.
伸延閱讀: Swine Flu: Brit Tells Of Hotel Hell
Warner Archive
最近發現華納出現左呢個網站WBshop.com, 主要係發售華納旗下既產品. 其中較為特別係同時間推出一系列舊片DVD名叫Warner Archive, 講真片種亦較為"偏門", 並非主流大片, 而且價錢亦偏貴, 每張Warner Archive DVD都要美金$19.95, 而且每部片都未經過修復兼且並無任何特別收錄, 最重要係根據dvdbeaver.com所指, 呢個系列既DVD只係一張好普通DVD-R燒錄而成, 如果想平D都得, 可以幫襯佢地既網上下載服務, 每部Warner Archive電影只收$14.95.
呢個online DVD on-demand郵購服務其實每當收到訂單, 佢地先會燒錄一張DVD-R電影光碟寄俾客戶, 而且係無區碼無字幕但有包裝. 相信呢種服務完全係為左減少貨物存積, 令到更有效控制成本.
有時從朋友口中聽到本地發行商經常埋怨電影DVD唔賣得, 其實呢種DVD on-demand會唔會係一種出路呢?
伸延閱讀:
Warner Archive on WBshop.com
Warner Archive DVD on dvdbeaver.com
荒謬影話: Holding Trevor 誰來, 愛我?
原來之前已經響同志影展放映過, 我諗我真係睇漏眼, 好在台灣仍然係個好地方, 乜野片都會輸入.
主人翁決定離道友男友, 遇上好心醫生, 原本以為有好發展, 點知舊男友癮起回歸, 衝擊新戀情.
從編導演都掌握得唔錯, 雖然成本低兼業餘, 但至少看出用心並唔係一般坊間賣肉求財既基片. 其它描寫主角兩位友人都相當立體, 尤其女角遇上突變後既描寫都相當唔錯. 只可惜尾段突變成一個個獨立片段式MV, 較為失敗, 總括稍有驚喜.
2009年5月2日
牛下遺孤
有日同事向我展示一堆膠鴨玩具, 佢話響牛頭角下村某士多買番黎. 咁岩我對呢D膠鴨"情有獨鍾", 以前好恨有一大堆膠鴨放響浴缸一齊沖涼, 可惜新屋無浴缸, 但係個慾望並無退減. 就托同事買左一袋, 三十蚊有成20隻, 因為另外有同事想要, 就分左十隻俾佢, 留低十隻"自用".
訂閱：
文章 (Atom)
