點解潛水會怕了屈機?

有無潮童識答呢?

北京更潮!

香港呢期興"潮文", 原來北京仲潮...

八部半

好多年前第一次睇八部半, 真係睇唔明. 或者當年年紀細, 未有應付呢種高深既藝術. 多年後再響電視台再睇一次, 終於明白到導演既苦心經營.
再多年後既今日終於推出港版DVD, 又再認真睇多次細細回味箇中既意義仲有攝人既影像.
但係雖然話就話經數碼修復, 但似乎好似只係做左好簡單既洗片, 唔覺有真正既數碼修復. 我唔介意發行商用"疑似"數碼修復呃我地, 我唯一介意係隨碟附送既postcard同海報, 我寧願飛走呢批無謂野換來平幾十蚊或者俾個"真正"既修復版出黎.
(原來已推出平裝版, 只有碟無海報postcard, 平五十蚊!)

阿木-有一叫種愛做放手

如果有睇開有線新知台, 都會留意到每個廣告break第一隻廣告都係大陸既mp3鈴聲下載. 以往都係幾隻極富民族色彩既情歌, 但近排換左新廣告, 其中一隻歌相當好聽. 受注意程度甚至結集成精選響香港發行.
呢隻叫"有一叫種愛做放手"既歌係來自四川歌手"阿木"主唱, 催淚程度十足十, 比陳小春唱既失戀更悲情更叫天搶地.
近來我真係迷上呢隻歌.

試片室: Wanted 殺神特工

睇完呢個trailer, 完全係當年睇完Matrix第一集既感覺, 好新但又好莫名其妙.

難相處的同事

之前做過幾份工, 總會遇到好難相處既同事. 唔係有同事永遠搵我笨就係爭住邀功, 再唔係就係有已婚男同事抽我水一路傾公事一路摸我屁股. 有乜未遇過? 但通常會係遇上無禮貌同事居多.
不過諗住而家呢間公司都算國際上數一數二, 入親去都有番一定學歷或資歷, 點知都係俾我撞正呢類人.
同事E, 女, 廿零歲, 另一個部門工作. 佢個職位其實一D都唔難, 之前兩任都好勝任笑住走. 但到同事E都百八十度改變. 或者係性格問題, 似乎佢唔想撈兼且唔想(識)同其他人和平相處. 句句有骨兼開口埋口完全無禮貌可言, 簡直一句就直插入你心. 起初我都唔信, 有日因為急需睇條片, 成層樓就只得我地部門有部Beta錄放機, 咁啱同事E又用緊部機, 我就好有禮貌問佢可唔可以借用部電腦搵段片一陣. 佢都點頭話: 哦. 咁我就拿拿臨搵段片, 但搵左半分鐘都搵唔到. 同事E突然好唔耐煩問: 你用完未呀? 正所謂: 好佬怕潑婦. 我唯有即刻縮手唔該前唔該後轉身走. 完全感受到同事間所言非虛.
一直以黎, 同事們都有同佢高手過招, 直到尋日大家終於頂唔順爆發左互相鬧爆. 我地上司話佢成日對我地好無禮貌, 同事E竟然話係我地無禮貌在先, 完全將成件事扭曲. 結果終於鬧上佢既上司果度, 今日大家就會當面對質.
有時我覺得真係人夾人緣之外, 本身修養亦都係好大關鍵. 遇著呢類人, 除左忍之外, 適當既表達不滿都係必需既. 雖然未必會令佢有所改善, 但至少俾佢一個訊息係唔係人人都要受佢氣.

Moby的恐佈雞

之前講過moby新碟last night, 單曲MV亦面世. 首次睇edited version電視台版本已震撼萬分. 點知呢個uncut version比乜野人肉叉燒飽呀, 恐佈雞十倍得人驚. 愛動物唔係得個講字, 到頭來雞仔變成恐佈雞搵上門為同類復仇就唔好睇啦.

何超踫上陳冠希的鬼

鄧小姐既歌從來好難番唱得好. 何超今次大膽番唱"償還"加入新元素, 富創作元素. 之但係個MV就相當趕客, 尤其自拍陳既死人化粧就真係連隔夜飯都嘔埋出黎.

試片室: Tropic Thunder

Ben Stiller又有新作! 之前Zoolander我覺得巳經係爛片之霸, 但最强係本地可以成套照抄成"我要做model". 今次執導呢套Tropic Thunder", 又係繼"The Cable Guy"同"Zoolander"之後玩轉行業既電影. 一班明星為左拍戰爭片迫真, 真係走去"體驗生活"! 好玩在Robert Downey JR.扮黑人, 仲有超多明星客串, 就連Tom Cruise都話玩埋一份扮光頭肥佬.

伍晃榮與CNN

睇晚間新聞臨尾突然插播特別報導話伍晃榮病逝, 只見主播口呆左三秒加眼有淚光, 作為觀眾既我更加晴天霹靂. 還以為今年奥運佢會做主持繼續娛樂與資訊並存, 點知.....
好既新聞主播難求, 尤其本地兩個免費大台. 近年既新聞主播既質素真係每況愈下, 無個人風格, 只係包裝成美女俊男, 但在鏡頭就洋相盡出. 一位資深又有自己風格既主播逝去, 就更加令人婉息.
正如近日熱爆既CNN事件, 我因為身份問題就唔方便對呢件事有乜評價. 但我仍然想講係有時大咀巴係可以但都要睇時地人. 響有失自己身份既場合做大咀巴, 除非當左自己去左Fox News做.

暴力辦公室

(以下video或令人情緒不安, 敬請注意!)

伸延閱讀: 暴力辦公室

無殼蝸牛搵殼日誌(後傳第四回)

講真入左伙後仲係有野煩: 律師與冷氣.
買樓時, 代理提供左兩家律師樓俾買賣雙方揀. 賣家搶先揀左間平既, 我地唯有要間貴幾百蚊既. 而且我見呢家又係本地知名既律師樓, 當然有信心, 點知惡夢先至開始.
負責我地既果位法律助理十問九唔應, 直到簽正式約果日仲係有D野無同我地交代. B唯有隔幾日就一封email俾問, 但就一封都無覆. B既忍耐力有限, 終於打電話去鬧爆對方. 對方終於有反應話因為另一方律師又失踪對管理費數就快會搞. 有日呢位女士就俾左張對管理費單, 要我地入數後通知番佢. 第二日已經拿拿臨入數兼發email通知佢已入數. 但日子一日一日過, 但總收唔到佢既消息. 發多兩封email無反應, 打電話俾佢又係留言信箱. B又駛出電話鬧爆法率之搵到佢, 問佢入左數咁耐點解無消息, 呢位女士竟然答: 你send email俾我我可能miss左. 呢句野係我親耳聽到! 一封就話miss, 四封連一封俾佢老細既投訴信無理由都會miss晒卦? 原來平野無好, 貴野都唔係好得去邊. 灰!
收樓時已經知睡房部冷氣嘈過柴油火車頭, 但諗住起初係咁, 開左兩三個鐘就會好轉. 點知上星期夜晚熱, 咪開著部冷氣, 點知嘈到有D誇, 仲嘈過出面條公路!(原來凌晨後條公路會較為靜.) B頂唔順決定換機! 上去屋苑既網上討論區原來家家户户都有咁既情況, 有幾多家已經換左機. 我就根據佢地既意見之下買左部"落星牌". 有人話真係好靜兼且又夠凍, 結果買左送貨兼安裝後立即一試, 真係又果然又靜又凍! 靜到反而聽到窗外既車聲, 有D匪夷所思.

last night - moby

自從上隻Hotel真係唔係好得, 我真係懷疑呢個傻佬可能真係玩完. 點知失驚無神重回基本步, 整隻全跳舞既大碟. 或者果隻"Play"真係實在太經典, 唔多唔少有D期望.
根據碟中佢所講佢想將佢蒲左25年既經驗濃縮成65分鐘既音樂, 聽晒成隻碟之後, 雖然無"Play"果種震撼或易入口, 但仍然可以令你脚印印足成個鐘.
由第一首"ooh yeah"開始既club music, 又或者"everyday it' s 1989"果種80年代味道. "live for tomorrow"令我諗起經典作"porcelain". "alice"既熟口熟面, "i'm in love"Wendy Starland響你耳仔邊不停低沉咁i'm in love又騷又癢."響電影"Cloverfield"唔覺意暴光既"Disco Lies".
十四首作品各有千秋, 點題作"last night"作為總結, 派對完天光了. 究竟尋晚去左邊呢?

P.S. : 揸隻碟上手真係感動, 仲有人肯用傳统CD盒發行. 唔知本地公司有無諗過放棄果D大到無倫又設計得差又恐佈既包裝, 重回用番傳统CD盒發行新碟呢? 至少大家既CD櫃又可以用番黎擺CD.

考古要做功課嗎?

行書店見到明報出左本香港舊相集, 雖然相片都係近廿年以來影既, 未算乜野經典作品. 但見都有少量文字解說, 幾十蚊又無傷大雅.
點知今晚一讀, 就搖頭嘆息, 點解有咁好配套可以出書, 就連資料搜查都懶去做呢? 就拎書中其中一段話西灣河太安樓連同附近太康樓太富樓等等係太古集團早年住宅項目. 就算唔係老街坊都知, 太安樓係六十年代置地公司興建既屏風樓, 至於太康樓太富樓等等確係太古興建不過只係船塢員工宿舍. 呢D料就算唔係經人肉掌故代代留傳, 都可以好容易上網搵到. 真係唔明點解咁有經驗既作者編輯都可以犯咁既錯. 之前一本講本地舊戲院既書入面內容一樣錯漏百出, 究竟而家D所謂作家點解可以咁求其, 少少功課都唔做呢? 真係誤人子弟.

野仔紀念冊WildSketChild

如果一直有聽開商台少爺占既電台節目, 都知佢有隊叫"野仔"既樂隊. 事隔多年後, 佢地又有新搞作, 除左搞音樂會更加出版新曲加精選大碟.
呢張CD結集左上次張EP歌曲再加幾隻新歌. 雖則野仔呢類"疑似"校園樂隊, 歌喉真係唔多有期望, 但音樂上就比較有少少水準. 新歌如"開始"或"地上樂隊"及"生日快樂"都係上乘作品, "我的日記""老地方""相約在八王子"雖則詞較嫩但仍算寫出二字頭既情懷. 重唱"你唔愛我啦"確係基於商業角度, 但Punk版又會係另一種camp味, 諗起以前AMK既camp版哥仔靚.
聽得多艾粒, 聽下野仔算做係中和一下.
P.S. 隻碟個設計真係激死, 諗左成個鐘都唔知點拎隻碟出黎. 因為隻CD真係俾塊超厚咭紙夾住. 原夾要輕輕力屈張咭紙, 隻CD就會彈出黎. 真係無言.

生活炒雜碎(第九回)

隔左咁多日先有新blog文, 皆因部電腦煩到震.
用左兩年幾既手寫板因為俾我日日行文千字結果面版花到認唔到字, 寫一句野都搞成個字先寫到. 所以把心一橫買塊新既. 奈何手寫版牌子都係黎黎去去果兩間, 結果又買番同一牌子另一以往用過既型號. 原本想買新出既無綫型號, 但諗深一層, 一塊板只得兩三年壽命. 如果買塊三百幾蚊既無綫板好似比較唔合化算. 都係買塊百零蚊啦.
裝好手寫板, 又到另一問題. 一直用開IE上網, 亦有用Firefox做輔助. 但自從升上IE 7.0之後就發現有極大問題: 一來唔可以做Windows Update, 二來每隔一段時間, IE內所有cookies都會自動消失, 搞到每次上網去某D要login既網頁都要重新login. 但係記性有限, 真係無乜可能記住晒所有網頁既login ID, 總之搞到好麻煩. 但係一直搵唔到原因所在, 所以前兩晚把心一橫set Firefox做指定瀏覽器, 惡夢就咁開始. 個IE突然發脾氣, 所有元件都暫停, 變成一個唔肯上網既既IE. 結果我火滾之下順手將成個IE7鏟走重裝IE6, 點知原來個IE6一直在世, 只係IE7遮住左佢. 之但係發現個IE6中左毒, 俾某網站騎劫左個首頁. 電腦入面既N牌防毒軟件竟然scan完話無事, 跟住我嘗試用其他既Anti-Spyware軟件去掃都係無功而回. 唯有索性鏟走埋IE6, 點知錯手鏟走埋其他野, 就連呢十年save落既email一律走埋. 嘩! 死晒火! 好彩Win XP既一流功能: Time Machine!!! 一個唔該就將時光重回前一晚啱啱裝好手寫板既時候. 無事發生過! 不過我都順手鏟走個IE7, 今次IE6重生後完整無缺無毒運作. 不過我諗以後主力用Firefox, IE? 少掂為妙.
###############################################
今日出去食兩餐都食到我好火! 晏晝一餐去某連鎖餐廳, 兩個人叫兩個餐, 難食就預左. 食到尾聲, 我食完但B未食光, 侍應A走埋黎問我食完未, 我話食完佢就收左我隻碟, 仲跟手收埋B既刀叉添. B仲話好彩唔駛切野. 唔夠一分鐘, 侍應B走黎問食完未? 我地都未答佢已經伸手收碟. 我立刻話仲未食完喎. 佢先縮手. 不過都唔夠兩分鐘, 我地都未講夠十句野, 侍應A又問同一條問題: 食完未?又係未等答案隻碟已經係半空. 我無晒氣但又大聲話: 未食完呀唔該. 侍應A又縮手放番隻碟上檯. 話口未完輪到經理問, 我怒啤兼擰頭, 佢又先自動離開. 心諗如果再有人黎問我一定拍檯破口大罵: 你地問撚完未呀? 都未食完, 乜你好撚趕咩? B都買佢地怕拿拿臨食完. 問題係出面又無人等位兼且又有大量吉檯, 點解要搞到D客咁趕呢? 結果叫杯餐茶, 嗌左成十分鐘先出現. 真係火都黎, 一毫子貼士都唔俾!
跟住今晚去附近既茶餐廳食個快飯, 兩人每人叫左一個炒粉麵. 落單時仲話一個飲中湯一個飲凍檸茶, 點知阿姐番單仲大聲朗讀: 兩個中湯. 咪住阿姐, 係一個中湯一杯凍檸茶喎? 何來兩個中湯呀? 佢竟然話你地兩個叫既炒麵跟中湯嘛. 吓?立刻睇番佢張手寫單確係一個中湯一杯凍檸茶. 佢竟然仲話係兩個中湯喎. 真係無言, 今次我無爆粗, 只係無奈咁話我淨係要一個中湯一個凍檸茶, 唔好俾其他野我, 唔該.
點解而家所謂既服務性行業既人咁求其兼無賴既?

生活炒雜碎(第八回)

時光重回收樓之後入伙之前.
B話想搵驗樓師驗樓, 我就寧願搵人做徹底清潔. 結果最後我嬴左, 我就搵番一向幫襯開既家居服務公司幫手, 代價係一千大元一次徹底清潔. 佢地響電話向我簡介個服務: 包徹底清潔一次, 包所有清潔用品器材我地無需提供, 包清潔到底, 唔乾淨一定抹到滿意為止.
當日, 兩位大嬸已經遲大到, 講呢度距離港鐵站遠喎. 但佢地遲左35分鐘遠比距離港鐵站既10分鐘路程更遠. 到埗後問我攞清潔濟... 喂? 乜你地唔係包埋咩? 吉屋邊度有齊清潔用品呢? 好彩上手業主都有一兩枝淨低. 佢地開始時仍見好落力, 直至30分鐘後, 兩位大嬸開始馬拉松式煲手電粥, 一路單手煲粥, 另一隻手就抹窗. 另一位更加勁, 連地拖都無帶, 一路單手煲粥, 另一隻手就用布抹地, 用既係潔而亮! 一個鐘頭後, 佢地話完工要我驗收. 我見木地板俾佢地用潔而亮抹到白晒, 眼都突埋. 抽油煙機完全無抹過, 厨房牆又係變成潔而亮白色漬牆. 唯有請佢地再抹過, 佢地只係用濕布將地板上既潔而亮抹走, 抽油煙機抹完依舊油淋淋, 厨房既潔而亮牆無郁過. 兩位大嬸完全係hea左我60分鐘就話收錢, 求其到不得了.上星期我地位鐘點阿姐上黎, 我同佢講: 好彩你今日上黎, 上次你公司果兩位阿姐真係亂黎. 用潔而亮抹地!
一千蚊開一次眼界, 好大代價.
###############################################
連續兩次叫PCCW師傅上門, 兩次都拍案叫絕. 上次遲左兩個鐘, 要發火鬧先到. 今次仲好笑, 因為簽約上18M寬頻, 約左夜晚八至十上黎換modem. 點知下畫五六點位師傅打黎話: "今日下晝咁啱上你地屋苑做野, 已經順便幫你做埋, test埋速度都ok. " 吓? 乜唔係要換modem咩? 師傅話: "班CS係唔1係都叫話換modem架啦. 批modem可以行100M架!" 我再次: 吓...... ADSL 100M??
夜晚番到屋企即試速度, 18M價錢得13M用得, 仲話速度ok?
###############################################
今晚新聞真係實在太正, 志蓮監獄! 果下不準揮手, 真正前無古人後無來者, 膠到不能!