我地就係噢..........運!

睇左五日奧運轉播, 我得出以下心得.
1) 未開幕三色台已經蝦碌百出, 又唔係第一次轉播奧運, 更唔係第一次做直播節目. 好難相信會出現有畫無聲出錯換衫兼鬧人既失禮畫面, 更唔應該開幕式途中on-mic testing仲問個咪唔係出緊街架呵. 再加送肥佬工作人員多番無厘頭入鏡, 外景如是, 廠景也如是.

2) 廣告係好重要, 之但係如某晚高清台播球賽, 每次廣告break都係容袓兒, 兩分半鐘過後先發現又錯過開波又錯幾個精彩入球, 你係觀眾一定爆炸. 請唔好當人地time off 30秒既第25秒先去廣告, 因為實錯過開波.

3) 好彩部電視有PIP畫中畫功能, 一邊硬膠廣告高清台, 一邊細格無廣告既亞視.

4) 幾時三個電視台會有條聲軌係無旁述呢? 硬膠如: 你知我都係負責講下笑啫. 又或者: 呢場好多人呀! 再例如: X sir, 呢場波實在好緊張呀(20秒前已經講過啦). 更嚴重係下下訪問運動員必問: 你知唔知全香港觀眾都支持係呀?

5) 迫住愛國! 兩個台主要既頻道都係播有中國隊出現既賽事. 就算播緊其他賽事無論比賽去到幾緊張, 隔離館一有中國隊決勝關頭, 原本播出既賽事必定慘被腰斬有頭無尾.

6) 好彩亞視既數碼台確係多左選擇, 尤其本港台經常出現既九宮格畫面, 唔駛check個EPG都知其他台播緊乜野賽事. 付出既係變成高清製作標清畫面.

7) 比賽左三日先知"唉基佬"有網上直播, 一樣有四個台不停播比較其餘兩台唔會播既賽事, 單車舉重兵乓球都係多謝有網上直播先至睇到.

8) 兩台下晝竟然走去播奧運卡通都唔播其他節目, 等唔(識/想)睇奧運有個選擇, 難怪師奶們嗌悶.

9) 開幕式真係嘆為觀止, 但跟住往後既花邊就更加嘆為觀止, 藍畫面假煙花再加咪咀, 要挑骨頭仲有理由去做.

10) 千祈唔好響公司一邊做野一邊全程投入睇奧運電視直播, 因為分分鐘夜晚十點都做唔晒D野.