2008年3月11日

美心煲仔飯

前幾晚, B又話想去打邊爐. 我即刻突眼! 因為過去果個2月打邊爐既次數係我地06加07年既總和. 燥到不得了, 再打我諗我會當場噴鼻血. 結果仍然同佢美心快餐, 因為我表明真係唔想打邊爐, 大家唯有叫散餐. B叫左個燒雞脾飯, 我就要左個窩蛋牛肉煲仔飯. 從來煲仔飯都係好難整得好食, 炭爐煲仔飯當然有風味但唔係度度有. 以前幫襯開筲箕灣某茶餐廳, 佢地雖然唔係用炭爐整煲仔飯, 但用料同味道都係一流. 可惜原址重建, 再嚐唔到大隻老板既手勢.

今回響美心叫煲仔飯都相當大膽, 等左10分鐘左右, 煲仔飯出爐. 煲仔唔係超滾果隻, 入面隻蛋一早熟左就無癮. 牛肉唔算厚亦唔係以往食開既免治肉餅, 似山竹牛肉. 可惜一咬, 嘩~ 食牛扒乎? 得七成熟既? 雖然味道比以往食過既係好少少, 但生成咁真係少見, 唯有將個煲仔飯天翻地覆夠熱力將牛肉整熟少少.
煲仔飯豉油都好重要, 我自己基本上係條"咸蟲", 食煲仔飯係會喪落豉油. 平時一碗豉油都未必夠. 美心呢碗仔豉油明顯經處理過, 咸度適中, 份量又夠. 食完個煲仔飯仲有豉油淨.
整體呢個煲仔飯頂多得70分, 扣左響牛肉太生同果隻熟蛋.

4 則留言:

aulina 說...

點解我印像中窩蛋牛係7成熟嘅?

mysimplelife 說...

下....我所試過既牛肉煲仔飯都係九成到全熟. 生到咁微紅真係未試過. 可能我真係見識少.

aulina 說...

係咪淨係紅色咋?因為我記得細個仲食肉果陣,山竹牛肉咪紅卜卜嘅?媽咪話熟架,係未轉色咋!

同埋冇記錯的話,窩蛋牛肉飯同山竹牛肉一樣,係加咗鯪魚落去打架,所以唔係黑mee monk係啱數架。

(為食呀,睇好多cook book... )

mysimplelife 說...

微微粉紅果隻,肉質似山竹牛肉但無山竹咁紅.
原來係熟既, 咁都放心D.
又學到野~ 呵呵~