BD 愛漫遊: The Towering Inferno 沖天大火災

70年代荷里活曾經好流行災難片, 由大地震到國際機場再到海神號, 無一死傷無數只救得一兩個. 呢一部破天荒兩大片廠合作既災難片, 搵到當時地上最強既卡士, 單係Steve McQueen同Paul Newman已經係近代兩大男星難得一次碰頭. 原以為兩大男星一定難搞兼勾心鬥角, 結果到頭來最難搞反而係女主角Faye Dunaway.
當然1974年既特技好難同現在既CG比較, 尤其當年通常一比一真實佈景兼大火再加巨型模型特技配合, 果種實感已經令CG比下去.
不過, 兩大男星甚少同場演出, 鬥好戲既機會係少左. 好在仲有其他大明星緣葉配襯, 令到全片165分鐘絕無冷場.呢張A區美版BD亦交足貨, 音效強勁而畫質亦都係中上程度. 最重要特別收錄異常豐富, 特輯訪問甚至outtake一樣有齊. 可惜擁有國際發行既華納從未推出過呢套戲既3區DVD(只出過港版VCD), 否則本地更多人可以欣賞到呢部經典. (TCM亦有播過呢部片, 但似乎係無中文字幕)