我遇上扑頭黨

今曰下晝正想同B出去睇戲, 就響好多人等車既英皇道巴士站, 有個男人突然好大力一野打落阿B既後腦. B受襲後同我講有人打佢, 我同佢一齊向後望, 見果個男人向住我地笑. B正想上前理論時, 疑犯即刻逃走. 我地即刻從後跟隨. 點知半路B扭親腳追唔到, 我唯有上前問佢傷勢, 亦有其他途人上前慰問. 其中有位中年男人繼續追捕果個疑犯. 過左幾分鐘, 我同B繼續追查疑犯下落. 就係呢個時間有好多警察向東跑去. B都懷疑:唔通有人捉到佢? 咁我地一直行到華豐國貨門外見有部警車停響到, 亦見個協助追人既中年男人同D警察傾緊. 而且中年男人亦見到我地, 我地上前就有好幾位便衣警察問B係咪俾人打劫? B話唔係, 只係俾人打. 原來中年男人真係追到個疑犯! 疑犯一直跑, 跑入華豐國貨入面買野, 中年男人一直尾隨著疑犯一面報警. 直到警察趕到, 中年男人就指示警察捉住果個疑犯.
結果, 疑犯, 中年男人, 我同B一齊上左警車, 直去北角警署落口供.
點知, 中年男人, 我同B一齊響接見室等左兩個鐘, 先至有C.I.D.同我地落口供.
更神奇係警方以為疑犯係劫匪搶左B個袋. 我地先同佢地講清楚係疑犯好大力打左B個頭一下, 我地無金錢上損失. 點知佢地警方同我地講左幾樣幾震撼既野:
1)疑犯個袋有個鐵鎚!
2)疑犯身上有精神病覆診咭.
3)疑犯走入華豐國貨後買左四條底褲.
咁我地咪好好彩?? 一個精神病患者拎住個鐵鎚週街走, 但又無個鐵鎚扑阿B個頭, 只係用手打?
經過四小時又等又認人又落口供後, 警方問B追唔追究被打一事, B話唔追究, 但警方仍然會落案起訴疑犯藏有攻擊性武器.
行出警署, 天都開始黑. 我諗雖然無左一日, 但諗唔到原來香港人並唔係無情, 中年男人竟冒險去捉賊. 見義勇為足見人情並未太薄.

偷窺●男

自從去年搬到現居大廈, 我發現對面大廈某戶戶主甚愛窺看對面大廈的動靜. 我向來都將睡房窗簾關上, 但係有時都想打開窗簾透下氣. 咁我就發現呢位戶主不停偷望呢面既動靜. 坐響度睇唔清楚? 索性企起身睇. 講真有乜好睇呢?

五元五毫

只需花五元五毫, 就可以買得到上等...

牙簽一大盒. 夠用一年.

Fool Massage

每次經過銅鑼灣既謝斐道, 除左第一火煱那位員工仲記得我貴姓雖然而無幫襯成年. 就仲有一位小姐會響你耳邊叫"Fool Massage". What?? 世上乜有種叫"Fool Massage"? 係專幫Fool去massage定massage完就會覺得自已係個fool呢?
接過傳單, 紙上印住"Foot Massage".

生日快樂

祝自已今天生日快樂.


步入中年上

頭殼頂

某日響公司,女同事突然向我個頭驚叫:你個頭流緊血. 完全唔知自己幾時整親個頭殼頂. 特此請女同事影下此圖, 第一次近距離望到自己個頭殼頂, 有D陌生.

書展行

以前行書展, 都會揀夜D去貪佢少人. 點知近年越開越夜, 越夜越多人. 變得越黎越唔好行. 今年更甚, 開到十二點.
另一個唔好行既原因為上樓書店開始入侵書展. 以往行書展, 出版社為主, 書店為配菜. 近年上樓書店變主, 今年某大陸書書店竟佔左半個大陸館. 有D喧賓奪主. 出版社如博益都要縮入中間. 因為太多書店攤位, 賣既都係同一批書, 睇過一兩間就唔想再行落去.
仲有, 唔知點解, 發現今年入場好多後生仔女都好似好趕. 好似想20分鐘走足四個場館. 佢地響館內走黎走去好鬼容易撞到人, 極之危險.
舊年大陸館開始引入人潮, 書籍段斤賣引發浪潮. 今年無左呢隻歌仔唱, 反而影音產品成主流. 由經典默片"大都會","神女"到韓劇"醫道"都有.
今年整體"一蟹不如一蟹", 每况如下. 尤其經過某台灣出版商攤位外那堆過期雜誌, 我仲以為去左第三世界既垃圾堆.

人就係咁化

今晚收到來自滿地可朋友M既電郵. 佢公告大家佢既伴侶: R 已於三日前病逝. 數月前佢地仲去左古巴渡假. 番到加拿大先驗出有硬化症. 結果同病魔糾纏左數月都係魂歸天國.
R同M算係我所認識既couple中最長情既一對. 一齊已經30年. 今次突然辭世, 真係好膽心M能否支撐得到.
人就係咁化, 前一日仲係開開心心, 下一刻就已經人鬼相隔. 慶幸M當時陪住R走最後一程.

RIP
Richard Paul BELAIR
1957-2005

排隊癮

原來10%九折係咁大吸引力.
話說尋日因為要買糖漿, 所以要到較遠既百佳超級廣場. 一去到, 真係大開眼界. 人山人海既場面, 原來呢日呢間百佳超級廣場全部貨品九折優惠. 心諗原來九折咁大威力. 個個都好似為左世界末日咁, 一車二車全滿好似買野唔駛錢.
不過無幾遠鄰近我屋企既惠康同華潤超市長年九折但係終日無乜人. 極之諷刺! 講真論平, 華潤係比惠康同百佳更平! 再加九折後確係幾平. 可惜仍然顧客唔多.
究竟為何百佳九折一天有咁大吸引力可以萬人空巷? 可能係, 大家都有鋪排隊癮卦.

八里公路

當每個人仍然講緊陳奕迅既新大碟時, 同期推出既新曲加精選大碟就好似無乜人講. 原來三首新歌又唔係太差. 尤其當發現三首都係Jim Lee李振權監製, 更令我知道, 最好既陳奕迅band sound又回來!
八里公路是band sound, 放下來也是band sound. 音樂節奏感十足, 完全係陳奕迅響華星早期所出一樣, 令人回味. 開心不了卻係三首中最好! 最耐聽. 由音樂到歌詞都唔俾夕陽無限好差.
可惜呢三首會變成被人遺忘既好作品.

新光戲院

新光戲院將於八月結業,
真係幾可惜.

上星期應文匯報邀請接受一個紀念新光戲院既訪問.

終於今日出街. 特別鳴謝摺摺.

「我是在新光看戲大的。」在這間戲院度過整個成長期，已步入中年的Anthony，聽說新光將在8月結業，臉上有無盡唏噓：「這是北角區唯一的戲院，誰知還是做不下去。」

　「最記得買了票後，沿著樓梯走到二樓的大堂，然後在寬敞的大堂裡坐下等開場，那種感覺，並不是買了票馬上搭電梯入院看電影的戲院可比的。」

　小時候並不住北角，卻總是跑到位於北角的戲院：「以前常常在那裡看內地電影，如《劉三姐》，裡面的歌好聽得不得了。那是自己第一次在新光看戲，大概10歲吧。後來在北角上班，有時下班後便會逛過去看戲。」

　從《劉三姐》等內地電影，到筆者聽也沒聽過的港產片《大腸特搶》（據聞是汪阿姐有份投資的），到西片《魔域仙蹤》等，成長的記憶與感情，還有瀰漫在腦海中的炒栗子、燒魷魚的氣味，繚繞著新光一院裡的大銀幕，前後聲音超大，左右卻很細聲的喇叭，以及唯一一次在戲院裡打開飯盒，用戲送飯，這一切，都是永不會結束的回憶。

　「人大了，對戲院的質素有更高的要求，而且新光變成只放映港產片，就不再去了。」他最後一套在新光看的戲，是《未來戰士續集》。

　「但聽到結業的消息，還是忍不住感到可惜。我一直很想陪喜歡粵劇的家人到新光看大戲，但幾次都買不到票，大概再也沒有機會了吧。」他感慨著。

　或許，即將上映的《頭文字D》，會是Anthony與新光的最後一次接觸。

http://paper.wenweipo.com/2005/06/21/OT0506210003.htm