唉,又要搬

住左呢度一年零三個月,屋主一個電話要將單位放盤, 又係時候搵地方搬.
住慣左呢度又靜又方便, 只係上山落山真係身水身汗.
希望今次搵樓唔會好似舊年咁搞到一鑊粥.

唔扮野做自己

香港樓市好左可能係好事, 但引申到出現左個怪現象.
以前樓盤廣告一定用好大篇幅話自已個盤有方便, 間格用料有幾好, 一切都係最實際去出發.
但近呢一年既樓盤廣告就變得好虛華. 金髮美女俊男飛機遊艇曼哈頓東京, 要幾離題有幾題. 試問紐約既飛船同大角咀海景樓盤有乜關係? 澳洲黃金海岸靚女講左聲: Absolutely Beauty同西灣河樓盤又有乜野關係?
都係大陸樓盤最實際, 明價明賣. 唔扮野做自己.

我以港人為恥

每次聽到話香港人唔好, 總有人話係D大陸人差落左黎香港搞差香港.
但現在我好相信, 呢個只不過係香港人自圓其說, 為左掩飾自己既惡行.
今日路過旺角, 走進間越南餐廳食午飯. 午飯時間特別多人, 我被編到近門口既一張檯坐. 雖然近門口, 但見玻璃門關上, 可以阻隔街外熱氣同車來車往既污塵. 我先無異議.
跟住每每有客人進出, 都無人願意順手閂門. 頭一兩次我仲可以起身閂門, 跟住我只好同店員話請佢地閂門, 但佢地都唔係幾願意閂門. 到最後我忍唔住同一個岩岩入黎但又唔閂門既肥仔講:可唔可以順手閂門? 佢望一望我千萬個唔願意咁閂門.
原來公德心呢樣野, 響香港一早死左八九成. 只係閂門小小動作, 又可以防止冷氣流失, 又可以阻隔煙塵. 香港人都寧死唔做! 可恨沙士無滅左香港, 可恨負資產只能令到少部份炒家跳樓死. 我寧願香港可以死過翻生, 重新教育一班有教育過既市民.
我以港人為恥! 如果有人問我係乜野人? 我寧答:我係華人. 死口不認香港人.

我遇上扑頭黨

今曰下晝正想同B出去睇戲, 就響好多人等車既英皇道巴士站, 有個男人突然好大力一野打落阿B既後腦. B受襲後同我講有人打佢, 我同佢一齊向後望, 見果個男人向住我地笑. B正想上前理論時, 疑犯即刻逃走. 我地即刻從後跟隨. 點知半路B扭親腳追唔到, 我唯有上前問佢傷勢, 亦有其他途人上前慰問. 其中有位中年男人繼續追捕果個疑犯. 過左幾分鐘, 我同B繼續追查疑犯下落. 就係呢個時間有好多警察向東跑去. B都懷疑:唔通有人捉到佢? 咁我地一直行到華豐國貨門外見有部警車停響到, 亦見個協助追人既中年男人同D警察傾緊. 而且中年男人亦見到我地, 我地上前就有好幾位便衣警察問B係咪俾人打劫? B話唔係, 只係俾人打. 原來中年男人真係追到個疑犯! 疑犯一直跑, 跑入華豐國貨入面買野, 中年男人一直尾隨著疑犯一面報警. 直到警察趕到, 中年男人就指示警察捉住果個疑犯.
結果, 疑犯, 中年男人, 我同B一齊上左警車, 直去北角警署落口供.
點知, 中年男人, 我同B一齊響接見室等左兩個鐘, 先至有C.I.D.同我地落口供.
更神奇係警方以為疑犯係劫匪搶左B個袋. 我地先同佢地講清楚係疑犯好大力打左B個頭一下, 我地無金錢上損失. 點知佢地警方同我地講左幾樣幾震撼既野:
1)疑犯個袋有個鐵鎚!
2)疑犯身上有精神病覆診咭.
3)疑犯走入華豐國貨後買左四條底褲.
咁我地咪好好彩?? 一個精神病患者拎住個鐵鎚週街走, 但又無個鐵鎚扑阿B個頭, 只係用手打?
經過四小時又等又認人又落口供後, 警方問B追唔追究被打一事, B話唔追究, 但警方仍然會落案起訴疑犯藏有攻擊性武器.
行出警署, 天都開始黑. 我諗雖然無左一日, 但諗唔到原來香港人並唔係無情, 中年男人竟冒險去捉賊. 見義勇為足見人情並未太薄.

偷窺●男

自從去年搬到現居大廈, 我發現對面大廈某戶戶主甚愛窺看對面大廈的動靜. 我向來都將睡房窗簾關上, 但係有時都想打開窗簾透下氣. 咁我就發現呢位戶主不停偷望呢面既動靜. 坐響度睇唔清楚? 索性企起身睇. 講真有乜好睇呢?

五元五毫

只需花五元五毫, 就可以買得到上等...

牙簽一大盒. 夠用一年.

Fool Massage

每次經過銅鑼灣既謝斐道, 除左第一火煱那位員工仲記得我貴姓雖然而無幫襯成年. 就仲有一位小姐會響你耳邊叫"Fool Massage". What?? 世上乜有種叫"Fool Massage"? 係專幫Fool去massage定massage完就會覺得自已係個fool呢?
接過傳單, 紙上印住"Foot Massage".

生日快樂

祝自已今天生日快樂.


步入中年上

頭殼頂

某日響公司,女同事突然向我個頭驚叫:你個頭流緊血. 完全唔知自己幾時整親個頭殼頂. 特此請女同事影下此圖, 第一次近距離望到自己個頭殼頂, 有D陌生.

書展行

以前行書展, 都會揀夜D去貪佢少人. 點知近年越開越夜, 越夜越多人. 變得越黎越唔好行. 今年更甚, 開到十二點.
另一個唔好行既原因為上樓書店開始入侵書展. 以往行書展, 出版社為主, 書店為配菜. 近年上樓書店變主, 今年某大陸書書店竟佔左半個大陸館. 有D喧賓奪主. 出版社如博益都要縮入中間. 因為太多書店攤位, 賣既都係同一批書, 睇過一兩間就唔想再行落去.
仲有, 唔知點解, 發現今年入場好多後生仔女都好似好趕. 好似想20分鐘走足四個場館. 佢地響館內走黎走去好鬼容易撞到人, 極之危險.
舊年大陸館開始引入人潮, 書籍段斤賣引發浪潮. 今年無左呢隻歌仔唱, 反而影音產品成主流. 由經典默片"大都會","神女"到韓劇"醫道"都有.
今年整體"一蟹不如一蟹", 每况如下. 尤其經過某台灣出版商攤位外那堆過期雜誌, 我仲以為去左第三世界既垃圾堆.

人就係咁化

今晚收到來自滿地可朋友M既電郵. 佢公告大家佢既伴侶: R 已於三日前病逝. 數月前佢地仲去左古巴渡假. 番到加拿大先驗出有硬化症. 結果同病魔糾纏左數月都係魂歸天國.
R同M算係我所認識既couple中最長情既一對. 一齊已經30年. 今次突然辭世, 真係好膽心M能否支撐得到.
人就係咁化, 前一日仲係開開心心, 下一刻就已經人鬼相隔. 慶幸M當時陪住R走最後一程.

RIP
Richard Paul BELAIR
1957-2005