麻甩飯

之前有網友嚴選大家最喜愛既"麻甩飯", "麻甩飯"一般泛指男人尤其麻甩/地盤佬所喜愛既飯盒.  結果我揀左枝竹火腩飯.
原因: 枝竹比豆腐更有咬口! 哈哈!

一個星期兩餐感恩節大餐: 一餐係, 一餐唔係

感恩節對於B黎講簡直一個大節日, 只係謹次於聖誕. 所以早響一個月前佢已經好緊張咁叫我搵定地方食感恩節大餐. 可惜響香港可以食到感恩節大餐既地方少之又少. 終於俾我搵番尖沙咀既Main St. Deli仍然有供應, 可惜我又眼大睇錯野, 以為可以提早食. 足足早一個星期去左果度食, 但當我地一坐低先發現原來堂食只會響正日供應, 但外賣就會提早供應. 既然去到, 都係照舊幫襯.佢地有個combi都幾抵食, 兩百零蚊有湯有主菜. 始終係酒店野, 味道都非常唔錯.為左補償番B, 都係幫襯番"肥佬". 今年加到每位二百五, 可惜我地一坐低, 我又唔記得左之前既教訓, 又係一叫就叫左兩個餐. 結果一上檯, 真係暈, 大碟到失控. 飽到爆開仲要食唔晒要打包~

金鷹朱古力

行行下永旺超市俾B捉住, 原來又係試食, 仲要試朱古力! 個英文名咁熟既? 問阿姐: 金鷹朱古力?
阿姐話係呀, 好耐歷史勒! 我同B都話呢個係我地少年回憶!
如果70年代屬於金杯, 90年代屬於金莎, 咁80年代係屬於金鷹朱古力.

超難食: 新一派

為左趕住去旅行社搞聖誕大旅行既準備工作, 所以事旦搵個地方食晏. 坑口呢間"新一派"開左咁耐都未試過, 點知一試就乃野.
叫左個炒公仔麵, 20分鐘都未見影, 連B個燒味飯都就快食完, 好困難地叫位姐姐埋黎問可唔可以幫我跟單. 10分鐘過後見對面檯遲黎過我地成10分鐘但都已經有炒公仔麵食, 點解我既都未見影? 又叫位姐姐幫手跟單. 足足直到第35分鐘, 碟麵上檯.
食左一啖, 簡直要噴麵. 話就話黑椒炒公仔麵, 但咸到好以用左成枝生抽咁, 兼且完全無黑椒蹤影. 咸到咁簡直係謀殺, 咁飲杯凍檸茶沖下咸味, sorry, 杯凍檸茶又甜到爛牙.
究竟發生乜嘢事? 如果你想快D死, 請幫襯"新一派".

富豪東方酒店

B前兩日要求: 今個週末出街試D新野得唔得? 咁又係, 個個星期唔係太興翠華就係美心稻香確實有D悶. 打開"開飯"搵呀搵, 終於得出幾個點子: 入西貢/去南洋................酒店試石頭燒/富豪東方試平野. 率之富豪東方同西貢勝出, 逐日出發, 首先第一站富豪東方自助餐.
啟德機場未搬前, 對呢間酒店確實好好奇, 好希望入去幫襯下. 結果機場搬左都無入過呢間酒店. 今次見網上食家對呢家野既自助餐不過不失, 而且B鍾情富豪系酒店既自助餐, 都不妨一試. 再加上網上有七折coupon任下載, 更加吸引.
當然網上話打電話去呢間酒店訂座仲難過訂演唱會飛, 果然所言非虛. 打左成個鐘都係打唔通, 唔通真係咁受歡迎? 突然諗到打去總機轉駁, 結果2分鐘內駁通.
個場座落地庫, 面積幾大, 但都只不過七成滿. 安排入座後當然係"巡視一周"有乜好野. 攤位主要貼牆圍住一圈, 比富豪香港無咁迫, 甜品就放左響另一邊近後門.至於食品種類跟其他富豪系既自助餐近似, 只不過唔會好似富豪香港果面有班細路主攻雪榚當正餐, 呢面班細路主要係黎玩周圍走.沙律選擇比較少兼大路.呵呵!! 馳名蟹腳!! 但呢面D腳好.............瘦, 無乜肉.羊扒都係瘦但味唔錯, 牛肉卷亦都不過不失, 但最正係個炒雜菌同埋薯蓉, 好味到要encore.羊扒都encore不過越拎越細條. 燒牛肉好味, 但都不及個咖哩雞咁正! 不過呢面個印度薄餅凍得滯, 好難食.碗仔翅!! 我寧願飲個淨湯算...Home Made梳乎厘, 即叫即造, 可惜趕住咁整, 所以唔知係乜. 相對甜品檔, 蛋榚款式好少, 都係得幾款. 不過有部和夫機, 可以自助整和夫, 不過自己呆等兼出力兩分鐘先整到件, 真係幾蝦細路.埋單五百幾蚊仲有即場抽獎添! 結果抽到一百蚊餐券下次用(!!??). 五百零蚊黎講都算ok, 至少距離屋企只係20分鐘車程, 比過海比較方便. 但係比同系酒店, 香港店甜品比較多選擇, 機場店因為人跡罕至, 唔會同人迫, 可以慢慢揀, 選擇都比較多. 不過機場同東方呢兩店既招呼確係九流, 你可以食到層層叠都唔會有人收野.

有無咁貴呀?

話說星期五晚出街食飯一樣係好難搵位, 行過美心稻香等位等到我心"胶"痛. 先諗起商場新開左另一間酒樓, 去到仲要無痛任坐, 已經覺有D乃野!
餐牌上賣緊普通野但收緊天文價, 亦有鮑參翅肚賣緊街坊價, 我亦覺有D乃野. 唯有叫普通野: 一吋骨, 一碟三大枝炸排骨. 排骨肥美但肉俾粉"處理"後失色. 翡翠白合炒帶子, 實質係白合荷蘭豆炒帶子. 大佬, 呢碟野收我百二銀???
唯一可取係個老火湯, 真材實料, 價錢合理.
埋單連加一竟要三百三!!! 突然我覺入左黑店, 似乎我食左好多入面既靚裝修. 最嘔電係個"鮑參翅肚"套餐一樣都有翡翠白合炒帶子, 兩位用只收三百八.
找錢時送我幾張燒乳鴿券, 每人半隻(!!??), 我頭也不回, 無下次.

一年梗要豪一次

至愛既半島酒店月餅!!
較早前亦試左美心朱古力味冰皮月餅, 感覺唔錯.

錦"繡"雲吞

當你點菜時睇漏一個字, 真係要付出代價.
某日一班同事出外食飯, 見點心紙上有"疑似"錦鹵雲吞"就隨手一畫. 點知點心一上檯, 甜酸醬換成又有雜果又有西米既沙律醬. 是旦捉位阿姐一問: 有無甜酸醬? 阿姐答: 錦"繡"雲吞係點沙律醬! 大家即刻再望望點心紙先知上檔!
成圍檯都無人敢試, 我唯有身先士卒做白老鼠, 淨食雲吞還可以, 但配埋個沙律醬... 十個嘔! 西米沙律醬?? 食完真係叫聲:[ ]佢個街...

Outback一巡

好彩一早訂位, 周六都好多人.
是晚有位陽光大隻男trainee招呼我地幾檯, 後面檯一班mk女開心到收唔到咀.

初試Burger Mix

公司附近以往有間幾好味既熱狗店, 所賣既熱夠及長通粉都好好味, 可惜兩個月前突然結業. 今個月初, 上址又開另一外賣式漢堡飽店, 再睇埋某新聞節目, 原來係有大學生學習創業實習既機會, 再者見舖前日日人頭湧湧, 決定搵日試試.
今次試左個手打牛肉漢堡, 單睇個飽既份量已經有睇頭! 一望之下牛肉好似好乾又唔厚, 而且亦唔見太多醬汁. 但一咬落去完全明白哂. 有肉汁, 唔厚亦令唔太難食. 醬汁適中, 配料略欠. 薯條就算外賣亦都仍然脆. 套餐$31湅飲仲可以揀其他梳打特飲.
不過食完個飽既半個鐘後, 我既"味精反應裝置"又再啟動, 甚至乎係老麥咁既級數! 唯有不停灌水.

初試"慘仔"米線

尋日上完果個N97工作坊之後, 行過油麻地見網上聞名既"慘仔"... 譚仔米線, 見唔多人又見少少肚餓, 就決定試一試.
食過好多間米線, 似乎都未試遇到過一間真係好食, 唔係味精超標就係配料求其. 見"慘仔"米線配料有豬潤我簡直兩眼發光. 不過又見其他配料都吸引, 結果唔駛諗叫左個過橋米線餐.個米線一上檯, 真係目定口呆... 好........大..........碗........呀! 簡直係二人前. 我食左一半時心不斷諗: 點解食極都食唔完既?
不過配料唔錯, 再加上可以自調酸辣程度, 非常稱心. 四十零蚊又真係幾超值尤其如果真係二人分享! 下次都係叫個細再加土匪雞翼就算.

鳳城好貴

時光倒流番去六月中, 啱啱病好, 為左慳錢一家決定父/母親節一次過搞食好D. 原訂去鴻星, 但細妹話不如去鳳城啦. 我對鳳城無意見, 只怕係對父母黎講有少少寒酸.因為病完精神未及恢復, 連點菜都無心機. 結果重任落響細妹, 佢發板! 叫左個套餐加隻八寶鴨. 一黎碟拼盤...好味呀!!! 大腸海蜇都異常好味, 其他反而普普通通. 最後落到八寶鴨, 鴨瘦但料足. 可惜我對果D填料真在無興趣, 食左兩啖已經夠皮.
埋單竟要千三銀!!! 嘩!!! 同去鴻星差唔多喎!!!

風味棧

今年終於記得幫自己個郵政信箱續期, 俾完錢就要去醫肚. 郵局附近大把野食, 可惜午飯時間太多人等位. 突然諗起好幾條街以外, 父母屋企對面開左間雲南米線, 咁就決定去試.
店子細又多人, 結果坐得好唔舒服. 餐牌都係賣一般米線, 但我俾其中一個拖鞋雞扒米線吸引, 咁就叫左一個黎試. 心目中既然叫得"拖鞋雞扒", 至少塊雞扒都有番一定份量, 點知一上菜, 雞扒碎上, 就連擺番個型都慳番, 完全睇唔到"拖鞋"何在. 至於個米線底, 我order左小辣, 結果係味如清湯, 完全無辣味, 最弊係連芽菜都係得幾條, 相當唔得. 三十五蚊連凍飲, (杯可樂仲要係啤出黎!!) 有D唔值.

日日足三両

尋日諗食晏時突然靈光一閃, 老麥最近將足三両全日供應, 其實之前晚上供應時都試過一次. 不過因為太夜, 同B一齊分享一個包都飽到想嘔. 今次心諗日光日白當正餐, 就算double足三両都應付到卦...食完後, 原來份量都ok, 不過如果薯角减半或改番薯條或者效果更佳. 最正係兩塊厚牛肉都多汁, 並唔太乾, 只係頂層太多汁同芝士, 反而包底過乾, 唔太平均.去到今日, B又話要整個老麥午餐, 結果又encore足三両. 今次只叫普通足三両, 份量減少左, 但似乎比double更易入口, 唔會因為底層太乾影響口感.

Shakey's Pizza

睇完電影節諗去邊食晚飯真係有D頭痛, 行下行下, B發現左呢間佢既童年回憶: Shakey's Pizza響尖沙咀出現, 佢真係感動到哭了!
佢真係車轆腳咁帶左我上樓, 餐廳內裝修真係幾美式. 因為B熟晒menu, 所以由佢發板:凱撒沙律
味道一般, 可以話比較淡口.
Shakey's Special
真係好好好好好味呀!! 底薄得似紙兼卜卜趣! 少量咸牛肉令到味道更濃.
B已經揚言隔兩日又要幫襯過.
另外餐廳設外賣速遞, 不過範圍有限, 港島區無份, 去得大埔但又唔肯入將軍澳...

一餐六千蚊既晚飯: 仁寶小館

升職加薪, 同事們當然嗌晒要(我)請(佢地)食飯. 好彩同期仲有兩位同事都升職, 所以三個人請我都覺得ok, 頂盡咪每人一千蚊.
同事M揀左呢間位於北角和富道既小菜館, 根據"開飯"上面網友介紹都係唔錯既. 心諗呢種小菜館貴極有限, 同事亦報價只係二千六蚊一圍, 三人夾份都係每人一千有找. 但我實在太天真太傻, 成個部門成廿幾人, 係要分兩檯... 呢個我係去到先至知.
至於菜式一開波就黎幾碟炸物: (是晚對眼有古怪, 好多相都out focus, 請見諒)
賴尿蝦 (小弟唔食蝦, 唔知味道)聖子 (另一樣我唔食, 一樣唔知味道)椒鹽排骨 (貌似好乾, 實質味道唔錯)椒鹽魷魚 (又係炸...味道一流)油炸鬼釀魚肉 (aka 鬼鬼馬馬) (呢個真係精彩, 樣騎厘但原來油炸鬼溝沙律醬係可以!)龍蝦仔 (小弟唔食蝦, 唔知味道)兩碟菜 (前者味過啖, 後者味過濃)豉油日本雞皇 (果然係招牌菜, 有雞味又易入口, 好耐未食過咁正既雞)蝦蒸飯 (雖然唔食蝦, 但個蒸飯好正呀!!)
再加埋一班"酒鬼"同事喪隊, 結果是晚埋單五千九, 每位承惠二千大元, 連老細都話太貴. 講真二千六百蚊咁既環境食呢D菜式確係好鬼貴, 一D都唔值.
(後記: 同事們第二朝都醉醒提議不如出一半, 免得食左我地隻"車".)