人生可唔可以reboot呢?
以前睇戲, 戲中一個普通人可以由呢個國家既東面放棄所有走去西面重頭開始.
終歸都係戲. 但現實又有無呢個可能?
近來我會用上搭港鐵果20分鐘車程去思考人生, 今晚既題目係:reboot.
一切都重頭開始, 重頭找新工作, 重頭認識新朋友, 重頭開始新既生活.
我覺得現在, 世界很糟, 但我更糟. 如果可以重頭開始, 或者可以令呢位糟老頭既我有更好生活.
當然, 響中國大陸, 生活可能比我更糟. 要reboot, 可能只可以原地開始.
如何開始? 離開現有既生活/圈子/朋友/家庭/工作或者係無所避免.
所以,
荒謬日記算做告一段落. 餘下, 梅玲/msl應該係下位. 餘下只能按步就班地去.
再見.
B的母親上月離世, 離世之前幾日B仲仍然同母親商量傾過電話, 但諗唔到兩日後就一睡不醒. B悲痛之餘仲要應付隨後既爭產風波, 佢突然有日拉我入房, 將銀行,電郵密碼交俾我, 話如果佢有日突然有乜野事, 到時都可以動用戶口內既錢, 亦可以用佢既email通知佢既朋友同親人.
呢兩日到我病左, 突然諗起要是唔係B走先, 而係我走先, 我又無對佢向交代一切, 到時會點呢?
假設... 我真係一睡不醒. 我希望B會代通知大家我既離世. 或者我父母未必俾B出席我既葬禮, 但都希望我父母可以對B再好D, 或者B可以代照顧我父母.
我亦希望B可以令梅玲及msl繼續落去.
我希望我既葬禮上, 可以播"再見二丁目"和"給自己的信"兩首歌.
朋友不要哭, 只要記住我既笑聲同傻勁.
或者我既父母覺得以往都係錯.
都四十歲人, 已經無乜需要交代.
或者一睡不醒可以看得更清.
自從幾年前搬入將軍澳後, 見得最多除左係狗同埋一班唔著衫跑步既男人外, 就係蝸牛. 直頭係周街都見, 甚至屋苑平台都會見佢地既蹤影.
呢晚見到呢隻巨型蝸牛響屋苑大門口前爬緊, 好驚有人唔小心踩到, 我就好心將佢移到花糟旁, 點知有港女見我手執巨型蝸牛竟驚叫逃跑. 唉...
記得上次S小姐一見我呢個表舅父就當左我係歡樂天地擒上擒落直頭莫斯科馬戲團上身. 今次明顯大個女, 有番少少自己主見. 好似我地一家全程廣東話對白, 唯獨佢要求媽咪用番荷語翻譯, 但媽咪又唔肯, 雖則佢識聽又識講廣東話, 但堅持全程荷語交代, 好有性格. 但最後抵唔住頸, 佢都係爆左幾句廣東話, 笑了.
(S小姐堅持自己將對眼"打格")
兩個月前得知台灣老麥有呢隻可樂杯換, 原本想問台灣果邊既同事幫手換, 但實在太忙最後不了了之. 諗唔到呢個promotion終於黎到香港!!
公司一班女同事口口聲聲一向唔食老麥, 星期四破天荒大家叫左四百幾蚊外賣, 講到尾都係為隻杯. 食完仲話只此一次, 轉過頭星期五又encore多一次.
星期四我食完都覺一星期食多過三次老麥係會死, 係真死! 結果尋日... 我同B又食左次, 又換左兩隻. 個杯確係好靚, 而且產自名牌, 碓係引死人!
自從實施膠袋稅之後, 確係大家都環保起黎用環保袋購物. 過去一年就算我去買碟都已經要求唔要膠袋, 唱片影碟早已封上一層膠袋(有D甚至有兩層!), 如果再要膠袋就實在太誇張. 但係去超級市場又因為通常會大手入貨, 一兩個膠袋就少不免. 不過實施膠袋稅後, 我就真正要實踐唔用膠袋改用環保袋.
起初一個星期確有D唔習慣, 經常唔記得帶環保袋. 但之後每日番工就記得帶一大一細既環保袋: 細既主要用作買少量貨品例如去便利店或者超市一件起兩件止. 大既主要就用作超市入貨之用, 唔好以為個袋好細, 但原來貨量負重能力都相當不俗.
不過, 我既BYOB就應該係Buy Your Own Bag, 因為大果個係響"胃匡"九個幾購入(無帶另外一個大袋所以迫住買多個), 細果個係B響"首頁"買書時送既.
六月我有三分二日子係病緊, 傷風咳一直都好過, 西醫中醫再西醫, 乜野型狀味道既藥丸都試過, 一日三次定一日四次, 三碗水埋一碗水. 到最後好在一星期, 率之上是期又黎過.
起初又係傷風咳, 諗住食幸福傷風素可以頂住檔, 點知越食越衰, 咳多兩錢重, 第二朝實在太病, 所以都係返唔到工. 星期一晚甚至發高燒. B出動佢殺手鐧: 退熱貼. 果然好勁! 真係退燒. 第二朝仲可以返工添, 點知當晚響公司已經發高燒, 終於頂唔順, 自己入左醫院急症室. 之但係入到急症室, 我D燒又退左, 不過佢地都為左安全計, 將我帶到隔離病房, 再由著到好似董太上身既醫生診斷我, 基本上係不停問我問題, 其中一題係: 你過去幾日有無接觸過豬流感患者? 講真, 接觸左都唔知! 結果醫生都係俾左一D藥俾我仲話如果食完藥都係未好, 就真係要到H1N1診所接受檢查.
今日, 藥又食晒, 但仍然係有傷風症狀. 咁我就帶住醫生寫俾我既轉介信去H1N1診所, 不過呢位醫生都認為可能只係普通傷風咳, 但為安全計, 我都係需要做測試與及做家居隔離三日.
諗唔到傷風可以搞咁耐...
P.S. Day 1: 去完診所再返公司執野交帶一切就返屋企, 不過返到屋企依舊要做公司野, 因為實在太忙!!
環球唱片就快推出一張精選碟, 精選歌曲都有同一特質, 當然呢D"暗啞底"既碟心照不宣. 只不過有網站刊出一份疑似官方宣傳文案有以下解釋:
「慘情歌」精選— 群星《田》
在這個經濟不景氣的年代，各大唱片公司為了保住生存空間，找尋活命的氧氣，各出奇謀，最常見的方法就是推出各式各樣的雜錦精選唱片應市。而製作精選方面的 專家，則非香港的環球唱片公司莫屬，該公司十年來推出大量不同主題的精選唱片應市，主題豐富，屢創佳績，讓樂迷有機會可依據不同主題﹑歌手收藏心儀的舊 歌，饒有心思，對樂壇的正面發展未嘗無功。繼早前推出過多張新歌大雜燴的暢銷精選《Love情歌集2008》﹑《Love Best 最愛情歌集2》﹑音樂人個人全紀錄《潘源良 二五精神永不完全集》﹑《林敏驄 都是愛情惹的歌》﹑以及一些歌手的個人全集《張國榮 最熱》﹑《王菲 阿菲正傳》後，環球在這個酷熱的六月又研發了全新的「慘情歌」精選系列，讓樂迷有系統地收錄一些精彩兼具代表性的「慘情歌」，而該系列的第一輯正是封面以 四個空格子組成﹑包裝簡約兼附送貼紙讓受眾DIY碟名的粵語「慘情」精選——《田》。
整張歌曲共收錄十七首來自不同歌手﹑不同唱片公司的歌曲，年期為80年代末期到90年代初期的作品。光看歌手的陣容，牌面甚大，計有梅艷 芳﹑譚詠麟﹑Beyond﹑王菲﹑達明一派﹑林憶蓮﹑張學友﹑黃凱芹﹑林子祥﹑葉蒨文﹑盧冠廷和鍾鎮濤等，都是位列一線的香港歌手，乍看起來已滿有吸引 力。至於這些歌曲大抵都是旋律精彩，歌詞主題鮮明﹑內容一針見血，整體感染力強的作品，反映了多位本地音樂人﹑歌手在特定時空﹑特定地點的想法和心聲，表 達著強烈的愁緒與哀思，當中的感情﹑價值觀，都是港人今日的「集體回憶」。加上當中不少歌都曾是主打作品，應該能引起不少毋忘香港過去生活和樂壇盛世的歌 迷的共鳴。
誠然，碟中所選的作品都是佳作，曲子或悲切動人，或激昂慷慨，歌詞不失佳句和文眼，多年以後重聽，甚堪回味。若說當中值得重點推介的歌 曲，著實不少，例如Beyond的「長城」﹑「歲月無聲」在慘情之餘，內容和題材均帶出強烈的搖滾精神，他們激昂且具真情實感的演唱，也把歌曲的主題和情 懷成功放大。林憶蓮的「破曉」詞曲俱佳，歌詞淡淡幾筆已經寫出鮮明的情緒，具有強大的感染力量，歌者情切清麗的嗓音也是歌曲的一大吸引處。達明一派「十個 救火的少年」筆鋒幽默精警，而黃耀明自己的「舞吧舞吧舞吧」也寫出「情變」後懺悔者的內心話，感情滿滿，亦是佳作。其他歌曲方面，「媽我沒有做錯」﹑「你 知我知」﹑「問青空」﹑「漆黑將不再面對」都是不容錯過的佳作，而梅艷芳的「四海一心」則不禁叫人懷念這位值得支持的一代天后。
宏觀來說，音樂的作用除了是陶冶性情外，讓人自由自在地飛翔在想像的海洋外，更重要是使人找到心靈的寄託和真切的共鳴，覺得有一些歌可以 代表自己的心聲，老了以後也有回憶的憑藉。雖然這張《田》收錄的都是一些流行﹑大路的慘情歌，但都是你我過去熟悉的流行作品。在這個沒有甚麼歌可以代表你 的年代，這些昔日的老歌，應該能代表你的心聲？
文/ 李重言Stephen Lee (香港)
就連介紹甚至碟評連最基本既常識都欠缺, 難怪新一代對六四呢個主題咁忌諱同唔明白.無錯我病左成個星期. 今日都只係咳左五次.
時間回到六月三日, 下晝食完飯坐響公司, 突然發覺喉嚨有D痛, 心諗唔係又作病卦. 當晚, 喉嚨依然有D痛, 但無流鼻水咳, 直至星期四朝早, 先開始咳同流鼻水. 臨返工前到港鐵站既診所睇睇醫生先, 認為打個底做個預防都好. 間診所又換左醫生, 有時呢D醫療中心既唔好處就係成日轉醫生, 又或者醫生輪班制, 你睇開醫生A, 好唔好彩你今日病左, 但醫生A聽日先至上班, 唔通你要捱到第二日先去睇醫生嗎? 以往我就睇開一個男醫生, 今朝突然係變成女醫生駐診, 雖然佢地有我過去三年既病歷, 但每個醫生用藥都有分別. 今次呢位女醫生就俾左一大堆藥丸同藥水, 隻藥水仲要係荔枝味添! 不過幾日後我食晒成個療程既藥, 我既病情好似無乜大起息, 依舊鼻水長流又咳又喉嚨痛.
星期一返到公司有女同事叫我不如搵中醫, 咁大個仔真係未試過去睇中醫, 但呢位同事又講到中藥有幾神奇, 響咳到傻左之下真係去左公司附近一間藥材舖, 見位中醫仲後生過我, 總係有D怪怪. 其實我係信中藥療效, 只係對"把脈"呢家野存疑. 位後生仔同我"把脈"既時候, 我個心係響度諗: 究竟有乜野好聽呢? 跟住佢就寫左一張藥方叫我去櫃檯執藥. 當然現今既藥材舖都有呢種俾現代人額外既服務: 代客煎藥. 晏晝落單放工有藥拎. 當晚飯後無耐就飲左呢濟中藥, 唔係太難飲. 原本當晚已經咳少左. 但係食完濟藥大約一個鐘後, 我完全咳到無停. 由當晚十點開始一直咳到凌晨四點, 是夜B同我完全無瞓. 我甚至將自已隔離做廳長瞓梳化, 但實在太咳, B響房不停俾我咳醒. 究竟係我同D中藥唔夾定抑或D中藥有問題.
因為公司打緊扙, 咳到甩肺都係要返工. 同事問起食左中藥之後見效未? 我只有報以喪咳. 今次又有同事叫我睇西醫, 佢地話呢個西醫強項醫咳! 保証止咳云云... 況且呢個西醫又響公司附近, 唯有搏搏. 一去到我就有種"乃野"既感覺, 一直以黎, 我直覺如果個醫生真係醫術高明藥到病除, 照理診所一定"客"似雲來無時無刻都濟滿成間診所. 但呢間診所我一入去坐左成十分鐘都係無"客", (離開前都係無客) 我就有"乃野"既感覺. 一入到細細診証室, 係位中年醫生, 起初我同佢對答都係好"正常", 直至佢用聽筒聽我身體既一刻, 佢又問左我一大堆完全off topic既問題, 尤其對我身體甚有興趣. 起初一兩條我見佢係醫生都認真答, 但跟住發現佢開始有D古怪, 唯有事事旦旦答佢.(其中一條問題詳見我幾日前twitter) 當然最後佢亦有開左一大堆藥俾我包括可樂味既咳藥水同埋大個校褸鈕既藥丸. 當日食左第一次佢既藥, 果然藥到病除, 鼻水收晒咳都無埋. 不過藥力好短, 每六小時一次, 但去到第四小時, 鼻水同咳齊齊回歸. 兩小時後食完藥又一條好漢! 周而復始, 我個人感覺: 好流. 所以食左幾日後決定停藥. 另一個要停藥既原因, 係果粒臨瞓前食既特效藥, 原本設定係食完會好好瞓, 但係我食完之後成晚眼光光, 小腹仲有陣痛添! (反而另一種日間既膠囊藥丸就食到我好眼瞓!)
不過, 近呢兩日我已經咳少左, 就響呢個時間H1N1竟然響本土爆發. 其他人對我種"口罩人"更佳顧忌, 試過有日響港鐵上, 我一坐底, 坐響對面既大嬸立刻彈開走去第二卡.
我都希望我可以早日康復, 又H1N1既惡潮早日消退.
剛剛晏晝去飲茶, 響等位之際隔離有位坐輪椅既伯伯講左以下說話: "又話個市差, 又咪係咁多人去飲茶咁多人響商場買野, 都呃人既." 跟住有個女仔走埋去好惡咁講左兩句: 你又亂噏乜野呀?
亂噏? 小姐, 其實我都有同感. 過去果半年, 好多人都無左份工係真既, 公司要cut人或唔再請人係真既, 但係如果話市面生活質緊差左? 我又唔覺喎. 周圍既人都仍然大洗特洗經常消費, 或者身邊有太多呢D富貴人, 每逢有所謂開倉, 賴理賣衫定賣鞋, 有女同事都一定血洗一番. 亦有同事每隔三個月出國遊一轉, 呢頭先話邊度邊度好正, 果頭又話下星期又飛. 就算出街食飯都似乎無被經濟拖累, 就好似屋企附近一間以往人跡罕至既太興, 近月都經常爆滿. 附近間翠華更加唔駛講, 依舊要排隊等檯.
總觀網上, 手電相機電視依舊多人買賣, 分享帖更加源源不絕. 買藍光碟既更加係要一次過幾十張咁買, 計你二百一張, 那四十張連運費好歹都要八九千. 買新樓盤一樣豪, time to say goodbye都吸引到咁多人去入市(諗起隻歌都想笑!).
當然世界上有樣野叫信用卡, 再加埋安信兄弟果種唔負責任洗腦式宣傳, 我諗好多人都成身卡數. 所以我諗呢一刻仲好似繁華盛世, 但當卡碌爆既一刻, 新卡又唔批, 市道先至係最差. 到時周街空中飛人或者上樓自助BBQ都會經常出現, 到時又會有苦主出動鬧政府.
經過負債一役, 對自己財務都好小心, 呢一刻零卡數再加小量積蓄, 我都希望可以安然渡過未來更差既市況.
(不過我承認因為部手機失靈無晒聯絡, 我都諗緊買唔買新手電... 又要錢, sosad)
該座談會由中學生聯盟舉辦， 30多名學生出席。他們先觀看六四
另一皇仁生溫駿瑋持類似觀點，「當時有人話，要趕走共產黨，迎接國民黨返嚟。」他不相信軍隊先開槍殺人，「上網睇到學生攞刀去劈裝甲車，啲人仲可以燒死埋（軍人），做埋燃燒彈去襲擊。」他堅信民主不適合中國，「仲有好多文盲。」
出席座談會的支聯會副主席蔡耀昌叫二人拿出證據支持論點，「有啲市民擲吓石，你知唔知係乜時間呀？係解放軍開槍殺緊人呀！」應屆會考生黃綺婷說：「坦克
兩名皇仁生會後表示，他們有修讀中史，李文棋說：「因為考試冇考，老師冇乜點教（六四
考試無考, 老師無(乜)教, 就連網上資訊都可以引發佢地既無限幻想. 呢一代無思想只得幻想, 難怪現在世界只會倒後行而唔識反思同進步.
呢兩位同學真係讀屎片!
http://hk.apple.nextmedia.com/template/apple/art_main.php?iss_id=20090524&sec_id=4104&subsec_id=11867&art_id=12794444
有日去Body Shop買洗面膏, 佢地向我sell呢隻"Deep Sleep"既噴霧, 成份有有機甘菊, 棗子精華, 天竺葵、杜松同埋廣藿香香薰精華油 只要噴少少響身或枕頭就可以令人鬆弛容易入睡. 第一晚我嘗試噴少少響頸同手就走去瞓, 但似乎仍然有半晚眼光光. 第二晚就試噴落枕頭, 果然當晚一睡到底. 起初我都怕會倚賴, 所以試一兩晚唔噴, 結果係50/50, 有時仍然眼光光, 有時仍有聒睡. 我諗我仍然會用呢種噴霧, 至少平日都要有覺好瞓.
諗住去個博物館日, 點知去到先知記錯日子, 唯有速速走去醫個肚.
記得之前去"霸王山莊"曾經都唔錯, 所以番兜. 但唔知點解一入到去, 好似入錯左舖頭. 下午茶時間大多數都係十零廿蚊, 當然亦有三十零蚊既炒粉麵或者四十零蚊小菜. 價錢都ok架, 點左個酸辣湯, 排骨趟, 小籠包, 醉雞同埋高力豆沙, 上菜先知出事.
落單無耐小籠包同高力豆沙(!!!)已經火速送上, 跟住話午市無醉雞喎. 下?? 咁又會出現響下午茶張菜單上面既? 唯有改叫客水晶牛肉包.
小籠包皮太薄一拎就穿, 排骨麵完全無味, 湯清如水, 排骨疑似白灼. 所謂水晶牛肉包, 又咪係普通牛肉包! 最弊係皮厚肉又無味.
總之成餐飯除左個酸辣湯喪辣之外, 其餘都係口啖啖. 就連服務都差到無朋友, 明明坐近門口當眼位, 叫極人都無反應, 只因大家寧願打牙較. 哼! 一毫子貼士都唔俾呀!!!
P.S. 原來太興冰鎮奶茶細杯左, so sad.
1. 有pantry的話, 你會在那裡洗手而不去洗手間嗎?
唔會, 因為公司個pantry仲污糟過洗手間
2. 一天會沖多少杯/次水?
除非病左, 否則好少飲公司水.
3. 每星期有多少餐午飯是飲茶/茶餐廳/大家樂?
飲茶:除非同事生日/ 茶餐廳:三餐/ 大家樂:一餐
4. 一天去多少次洗手間?
早午晚三次
5. 你的cubicle看到風景嗎?
以前有無敵維港景(見上圖), 搬左位後面壁.
6. 天天也和同事午餐?
無左好耐, 日日食自已
7. 午飯時段都去購物?
有時會, 但多數去書店同拮豬島
8. 有什麼怪習慣/奇怪私人物品放在公司?
全日喪播歌或收音機/多年同事送俾我既聖誕禮物
9. 有帶飯習慣嗎?
無, 懶!
10. 最討厭的人/事物
E小姐or懶蟲/去小便俾某同事裝...
11. 試過第一個上班要開門/鎖或最後一個下班要鎖門嗎?
公司用職員証開門, 無鎖亦唔會鎖
伸延閱讀: 辦公室無聊問答 - Blah Blah Blah
過去兩個月, 我父母都遇上奸商, 兩次都要我出馬擺平, 驚覺原來所謂大機構都有枯枝.
第一單又係無線收費電視, 係呀, 又黎勒. 今次向父母話檢查天線. 神奇在我父母又放佢地入屋, 今次佢向我父母話因為大廈既衛星天線(??)係佢地保養, 所以向佢地介紹可以睇多好多個台. 我父母又一知半解答應裝解碼盒, 直至細妹番到屋企, 見到有人裝緊無線收費電視既解碼盒, 我父母先知又上左檔, 最慘係佢地簽左18個月合約兼預繳三個月月費. 細妹有打電話上去要求解約, 當然無結果啦. 我唯有借助傳媒力量同有關公司跟進. 過程就唔想咁詳細, 不過想講係有關公司話明有齊白紙黑字再加電話真人確認, 我父母確係響知情下有簽約. 有傳媒亦都話呢間公司係好狡滑, 就算前線員工如何呃人, 佢地有另一條線令到奸計成功. 最後, 無線收費電視都願意跟我父母解約, 不過已經預繳既月費就無得拎番. 唉, 財到光棍手喎...
第二單更加正, 又係發生響我父母身上. 今次係PCCW. 上個月我父親收到PCCW既來電向佢推介續約新優惠, 但我父親又猶疑不決, 有關職員問我父親身份證號碼確認身份後, 我父親話要考慮一下就收左線. 當晚我父親係有致電俾我有關呢件事, 我都立即打上去確認我父親無續約. 直到尋日, 我父親收到PCCW既續約確認信. 又中計!! 睇怕又係打去12022既時候.
上圖呢部手電係2006年買入, 用左差唔多三年. 但近排開始經常有問題, 唔係有來電時一個唔該hang機接唔到來電, 就係個5字永遠久不久失靈. 近日更甚係個Windows完全無聲無色地hang左, 所有來電都無法打入. 我諗都係時候換手電, 不過我諗應該唔會再買Windows Mobile既手機. 心目中我只要求有手寫功能可以俾我呢D懶學打字既虫手寫中文SMS, 最好就有收音機同埋有Wi-Fi功能等我可以旅途中聽收音機或上網解悶.
不過... 呢個環境同埋支出收緊情況下, 買新手電可能真係得個諗字.
有日同事向我展示一堆膠鴨玩具, 佢話響牛頭角下村某士多買番黎. 咁岩我對呢D膠鴨"情有獨鍾", 以前好恨有一大堆膠鴨放響浴缸一齊沖涼, 可惜新屋無浴缸, 但係個慾望並無退減. 就托同事買左一袋, 三十蚊有成20隻, 因為另外有同事想要, 就分左十隻俾佢, 留低十隻"自用".
